ཞེ་ཧོ་སྨན་ཁང་གི་ཁག་བཅུ་པའི་བོད་སྐྱོར་སྨན་པ་ཝང་ཆང(གཡས་ཀྱི་གསུམ་པ)དང་ཁག་བཅུ་གཅིག་པའི་བོད་སྐྱོར་སྨན་པ་ཅང་ཆིང་ཝེ(གཡོན་གྱི་གསུམ་པ)ཡིས་བོད་རང་སྐྱོང་ལྗོངས་མི་དམངས་སྨན་ཁང་གི་སྨན་པ་བཀྲ་ཤིས(དཀྱིལ)དང་། བསྟན་འཛིན་བསོད་ནམས(གཡས་ཀྱི་གཉིས་པ) དེ་བཞིན་གཤགས་བཅོས་ཚོགས་པ་བཅས་དང་མཉམ་དུ་ལྷ་སར་ནད་པར་གཤེར་མ་དང་མཁྲིས་པའི་སྦུ་གུ་བླུགས་པའི་གཤགས་བཅོས་ལེགས་གྲུབ་བྱུང་རྗེས་ཀྱི་མཉམ་པར་ཡིན་པ།

ཧྥུའུ་ཅན་ཞིང་ཆེན་ཆོན་ཀྲོའུ་གྲོང་ཁྱེར་ཧུའེ་ཨན་རྫོང་སྨན་ཁང་གི་བོད་སྐྱོར་ཕྱི་ནད་ཚན་ཁག་གི་སྨན་པ་ཀྲང་ཚུང་ལིན(གཡོན་གྱི་གཉིས་པ)དང་ཨན་ཤིས་རྫོང་སྨན་ཁང་གི་བོད་སྐྱོར་ཕྱི་ནད་ཚན་ཁག་གི་སྨན་པ་ཀྲེང་ཡུས་ནེང(གཡོན་གྱི་དང་པོ)གིས་བོད་ལྗོངས་ཆབ་མདོ་གྲོང་ཁྱེར་ལྷོ་རོང་རྫོང་སྨན་ཁང་གི་སྨན་པ་པ་སངས་བཀྲ་ཤིས(གཡས་ཀྱི་གཉིས་པ)དང་སྐལ་བཟང་སྟོབས་རྒྱལ(གཡས་ཀྱི་དང་པོ)དང་ནད་པའི་ནད་གཞིའི་སྐོར་གྲོས་བསྡུར་བྱེད་བཞིན་པ། (ཤིན་ཧྭ་གསར་འགྱུར་ཁང་གི་གསར་འགོད་པ་འཇིགས་མེད་རྡོ་རྗེས་པར་བརྒྱབ)

ནག་ཆུ་གྲོང་ཁྱེར་མི་དམངས་སྨན་ཁང་ཕྲུ་གུ་དམར་འབྱར་གྱི་ནད་གཞི་ཚབས་ལྕིའི་ལྟ་སྐྱོང་ཁང་དུ་ཏ་ལེན་གསོ་རིག་སློབ་ཆེན་ཞོར་གཏོགས་སྨན་ཁང་དང་པོ་ནས་ཡོང་བའི་བོད་སྐྱོར་སྨན་པ་ཐེན་ཚུང་ལེང(གཡོན)གིས་འཇིགས་མེད་སྟོབས་རྒྱལ(དཀྱིལ)དང་སྨན་གཡོག་བསྟན་སྒྲོན་དང་མཉམ་དུ་སྔ་བཙས་ཕྲུ་གུ་དམར་འབྱར་ཞིག་ལ་འཕྲུལ་ཆས་དབུགས་གཏོང་སྨན་བཅོས་བྱེད་བཞིན་པ། (ཤིན་ཧྭ་གསར་འགྱུར་ཁང་གི་གསར་འགོད་པ་འཇིགས་མེད་རྡོ་རྗེས་པར་བརྒྱབ)

ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ལོ་གཉིས་ཀྱི་བོད་སྐྱོར་ཡུན་ཚད་ཐིམ་པར་གཟའ་འཁོར་གཅིག་ལས་ལྷག་མེད་ཅིང་། པེ་ཅིང་ཞེ་ཧོ་སྨན་ཁང་མཆིན་པའི་ཕྱི་ནད་ཚན་ཁག་གི་དགེ་རྒན་ཆེ་མོ་བ་ཞུས་ཧའེ་ཧྥུང་སྔར་བཞིན་གཤགས་བཅོས་བྱེད་པར་བྲེལ་བཞིན་ཡོད། བོད་སྐྱོར་བྱེད་རིང་། ཁོང་གིས་ཚོགས་པའི་སྣེ་ཁྲིད་ནས་དཀའ་ཚད་ཆེ་བའི་གཤགས་བཅོས་སྣ་ཚོགས་ཐེངས་མང་བྱས་པའི་གྲས་སུ། ས་མཐོར་གསུས་ཤེལ་སྤྱད་དེ་མཆིན་པ་གཡས་ངོས་ཀྱི་ཕྱེད་ཀ་གཅོད་པའི་གཤགས་བཅོས་དང་པོ་དང་གསུས་ཤེལ་སྤྱད་དེ་གཤེར་མའི་རྒྱུ་སོར་བཅུ་གཉིས་གཅོད་པའི་གཤགས་བཅོས་དང་པོ་སོགས་ཚུད་ཡོད།

ཞུས་ཧའེ་ཧྥུང་གིས“ཁག་གསར་པའི་བོད་སྐྱོར་སྨན་པ་རྣམས་ད་དུང་ཁོར་ཡུག་དང་ལས་ཀར་རྒྱུས་ལོན་བྱེད་བཞིན་ཡོད་པས། ང་ཚོ་ཁག་འདིའི་བོད་སྐྱོར་སྨན་པས་མཐའ་མའི་ལས་གནས་ཡག་པོ་སྲུང་དགོས”ཞེས་བརྗོད།

སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལས་དོན་2015ལོའི་ཟླ་བ་བརྒྱད་པར་སྤེལ་འགོ་ཚུགས་ཚུན། དེ་སྔའི་ཁ་ཐོར་དང་ཕན་ཡུན་ཐུང་བའི་འཕྲོད་བསྟེན་བོད་སྐྱོར་བྱེད་སྟངས་ལས་ཚད་བརྒལ་བྱུང་སྟེ། “ཞིང་ཆེན་གྱིས་གྲོང་ཁྱེར་འགན་གཙང་ལེན་པ”དང“སྨན་ཁང་གིས་ཚན་ཁག་འགན་གཙང་ལེན་པའི”མ་ལག་ཅན་དང་ཡུན་རིང་ཅན་གྱི་ལས་ཀའི་ལམ་སྲོལ་ཞིག་ཆགས་ཡོད། 2021ལོ་ནས་བཟུང་། རོགས་སྐྱོར་ཐོབ་པའི་ཁྱབ་ཁོངས་རང་སྐྱོང་ལྗོངས་མི་དམངས་སྨན་ཁང་དང་ས་ཁུལ་དང་གྲོང་ཁྱེར་གྱི་མི་དམངས་སྨན་ཁང་7(གཤམ་ལ“1+7”སྨན་ཁང་ཞེས་བསྡུ་རྒྱུ)ནས་གཙོ་གནད་རྫོང་མི་དམངས་སྨན་ཁང་13བར་རྒྱ་སྐྱེད་བཏང་ནས། སྤུས་ལེགས་སྨན་བཅོས་ཐོན་ཁུངས་གཞི་རིམ་དུ་ཁྱབ་རྒྱ་ཆེ་རུ་འགྲོ་རྒྱུར་མུ་མཐུད་སྐུལ་འདེད་བཏང་ཡོད།

གསར་འགོད་པས་ཤེས་རྟོགས་བྱས་པར་གཞིགས་ན། མིག་སྔར་རྫོང་སྨན་ཁང་13གྱིས་སྒོ་བསྟེན་དང་འཕྲལ་བཅོས་བྱེད་ཚད་མི་ཐེངས་ཁྲི་68.24ཟིན་པ་དང་ཉེན་ཁ་དང་ཚབས་ཆེ་བའི་ནད་པ་མྱུར་སྐྱོབ་ཐུབ་ཚད་94%ཟིན་ཡོད། རྫོང་སྨན་ཁང་ཁག་གཅིག་གིས་ཀླད་རུས་འབྱེད་པ་དང་དཔྱི་ཚིགས་བརྗེ་བ་སོགས་དཀའ་ཚད་ཆེ་བའི་གཤགས་བཅོས་བྱེད་ཐུབ་ནས་སྨན་བཅོས་ཞབས་ཞུའི་ནུས་པ་མངོན་གསལ་དོད་པོས་ཆེ་རུ་ཕྱིན་ཡོད།

ཉིང་ཁྲི་གྲོང་ཁྱེར་སྤོ་བོ་རྫོང་གསུམ་འཛོམས་གྲོང་རྡལ་རྣ་གཡུ་གྲོང་ཚོའི་གྲོང་མི་ངག་དབང་ཆོས་སྒྲོན་དུས་ཡུན་རིང་པོའི་ནང་པུས་ཚིགས་ནད་ཀྱིས་མནར་ནས་འགྲོ་སྐྱོད་སྟབས་བདེ་པོ་མེད། ད་ལོའི་ཟླ་བ་གསུམ་པར་ཀོང་ཀྲོའུ་གྲོང་ཁྱེར་མི་དམངས་སྨན་ཁང་དང་པོའི་རུས་ནད་ཚན་ཁག་གི་རིགས་གཅིག་མཁས་ཅན་ཚོགས་པའི་རོགས་རམ་འོག སྤོ་བོ་རྫོང་མི་དམངས་སྨན་ཁང་གིས་ངག་དབང་ཆོས་སྒྲོན་ཚུད་པའི་ནད་པ་20ལ“པུས་ཚིགས་བརྗེ་བའི”གཤགས་བཅོས་བྱས་པ་རེད།

ཁོང་གིས“ཐག་རིང་ལ་འགྲོ་མི་དགོས་པར་རྫོང་སྨན་ཁང་ནས་པུས་ཚིགས་བརྗེ་བའི་གཤགས་བཅོས་བྱེད་ཐུབ་ནས་དུས་ཚོད་དང་འགྲོ་གྲོན་མི་ཉུང་བ་ཞིག་གྲོན་ཆུང་བྱུང”ཞེས་བརྗོད།

ལྷ་ས་གྲོང་ཁྱེར་མི་དམངས་སྨན་ཁང་གི་ཡོན་ཀྲང་དང་པེ་ཅིང་གྲོང་ཁྱེར་གྱི་ཁག་བཅུ་པའི“ཚོགས་སྒྲིག་རྣམ་པའི”བོད་སྐྱོར་སྨན་བཅོས་རུ་ཁག་གི་རུ་སྣེ་ཁྲིད་མཁན་ཀྲང་ཉིང་གིས། བྲང་ཁོག་ལ་ན་ཟུག་གཏོང་བ་དང་། གཟའ་གྲིབ་ཕོག་པ། རྨས་སྐྱོན་ཕོག་པ། ཉེན་ཆེའི་སྦྲུམ་མ་སྐྱོབ་བཅོས། ཉེན་ཆེའི་བྱིས་པ་དང་ཕྲུ་གུ་དམར་འབྱར་སྐྱོབ་བཅོས་སོགས“ལྟེ་གནས་ཆེན་པོ་ལྔ”འཛུགས་རྒྱུ་ནི་སྨན་བཅོས་བོད་སྐྱོར་གྱི་སྤུས་འབྲས་ལེགས་གཉེར་གྱི་དམ་འཛིན་བྱ་གཞི་གལ་ཆེན་ཞིག་རེད་ཅེས་བརྗོད།

གསར་འགོད་པས་ཤེས་རྟོགས་བྱས་པར་གཞིགས་ན། མིག་སྔར“1+7”སྨན་ཁང་གིས“ལྟེ་གནས་ལྔ”36བསྐྲུན་པའི་ནང་རྒྱལ་ཁབ་རིམ་པའི་ལྟེ་གནས་19དང་། རང་སྐྱོང་ལྗོངས་རིམ་པའི་ལྟེ་གནས་8 ས་ཁུལ་དང་གྲོང་ཁྱེར་རིམ་པའི་ལྟེ་གནས་9བཅས་ཡོད་པ་རེད།

ད་ཆ་བོད་སྐྱོར་སྨན་བཅོས་ཤེས་ལྡན་པ་ཁག་གསར་པས་སྔོན་ཐོན་གྱི་སྨན་བཅོས་ལག་རྩལ་སྤྱད་དེ་ས་མཐོའི་སྨན་བཅོས་རིག་ཚན་འཛུགས་སྐྱོང་དང་། ཤེས་ལྡན་པ་གསོ་སྐྱོང་། ཚན་ཞིབ་སློབ་གསོ། སྨན་ཁང་དོ་དམ་སོགས་ཁྱབ་ཁོངས་སུ་ཞུགས་ཏེ། སྤུས་ལེགས་སྨན་བཅོས་ཐོན་ཁུངས་ས་མཐོར་རྩ་བ་ཚུགས་ནས་མང་ཚོགས་དེ་བས་མང་པོར་མུ་མཐུད་ཕན་པ་ཐོབ་པར་གཞོལ་བཞིན་མཆིས།