ཉེ་དུས། “དུས་རབས་དང་མཉམ་སྐྱོད། མི་དམངས་དང་སེམས་མཐུན” ཞེས་པའི་ཀྲུང་གོ་གསར་པ་དབུ་བརྙེས་ནས་ལོ་75འཁོར་བའི་བརྙན་འཕྲིན་ཟློས་གར་འགྲེམས་གཏོང་བྱེད་སྒོའི་གཙོ་གནད་ཟློས་གར《ཉི་འོད་གྲོང་ཁྱེར》ＣＣＴＶ-1འཕྲིན་ལམ་ནས་སྟོན་འགོ་ཚུགས་ཤིང་། ཨ་མྲ་ＴＶདང་ཐེང་ཤུན་བརྙན་ལམ་ནས་ཀྱང་དུས་གཅིག་ཏུ་བསྟན་པས། རྒྱལ་ཡོངས་ཀྱི་ལྟད་མོ་བ་ཚོའི་དོ་ཁུར་དང་ཚུར་སྣང་ལན་ཆ་ཆེན་པོ་བྱུང་ཡོད།

《ཉི་འོད་གྲོང་ཁྱེར》ནི་རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས་ཀྱི་གཙོ་གནད་རོགས་སྐྱོར་རྣམ་གྲངས་ཤིག་ཡིན་ཞིང་། ཀྲུང་གུང་ཧུའུ་ནན་ཞིང་ཨུད་དྲིལ་བསྒྲགས་པུའུ་དང་ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་དྲིལ་བསྒྲགས་པུས་མཉམ་དུ་ཕབ་བཟོ་བྱས་པ་དང་། ཀྲུང་དབྱང་བརྙན་འཕྲིན་ལས་ཁུངས་དང་། ཧུའུ་ནན་རླུང་འཕྲིན་གློག་བརྙན་བརྙན་འཕྲིན་ཚོགས་པ། ཨ་མྲ་ＴＶསོགས་ཀྱིས་གསར་རྩོམ་བྱས་པ་ཞིག་རེད། འཁྲབ་ཚན་དེའི་ནང་གཙོ་བོ་བསོད་ནམས་ཀྱིས་མཚོན་པའི་གཞོན་ནུ་དྲུག་གིས་བོད་དུ་ཕུགས་འདུན་དོན་གཉེར་དང་རང་ངོས་ཀྱི་རིན་ཐང་མངོན་འགྱུར་བྱེད་པའི་སྐོར་དང་། སྲོལ་རྒྱུན་དང་དེང་རབས་ཀྱི་གདོང་ཐུག་ཁྲོད་བོད་མི་དམངས་ཀྱི་ཧུར་བརྩོན་ཡར་ཐོན་གྱི་འཚོ་བའི་རྣམ་འགྱུར་དང་རིན་ཐང་གི་རེ་སྙེག་མངོན་པ། བོད་ལྗོངས་འཕེལ་རྒྱས་དང་ཡར་ཐོན་ཁྲོད་ནས་རྒྱུན་ཆད་མེད་པར་གོང་བུར་འགྲིལ་བའི་མི་རིགས་དབར་གྱི་མཐུན་སྒྲིལ་དང་། མཛའ་བརྩེ། བརྩེ་དུང་བཅས་བརྗོད་ཡོད།

བརྙན་འཕྲིན་ཟློས་གར་དེ་ལྟ་མཁན་ལ་ཉི་འོད་ཀྱི་དྲོ་སྐྱིད་སྦྱིན་ལ་བོད་ཀྱི་ཐུན་མིན་ཉམས་བཟང་གིས་ཡིད་དབང་འཕྲོགས་ནས་རིག་གནས་དང་ཡུལ་སྐོར་གྱི་ཚ་རླབས་ཟམ་མི་ཆད་པར་འཕྱུར་བཞིན་ཡོད་ཅིང་། དེ་བས་གླེང་རིན་ཡོད་པ་ཞིག་ནི། འགོ་བརྗོད་གླུ་གཞས《ཉི་འོད་ལ་སྙེག་པ》ཞེས་པ་ལས་སྒྲིག་བཟོ་བྱས་པའི“ཉི་འོད་ཞབས་བྲོ”ཞེས་པ་དྲ་ཐོག་ཏུ་སྐད་གྲགས་ཆོད་ཡོད།

བོད་ཀྱི་རིག་གནས་ཡུལ་སྐོར་གྱི་རྒྱབ་ལྗོངས་ལས་མངོན་པ་ནི་བོད་ཀྱི་མཛེས་ལྗོངས་དང་ཞིམ་ཟས་ཀྱི་ཡིད་དབང་འགུཌ་ཤུགས་ཙམ་མིན་པར། ད་དུང་མི་དེ་བས་མང་བ་ཞིག་གིས་བོད་དུ་སེམས་ཀྱི་བདེ་བ་ཉག་གཅིག་འཐོབ་པའི་འདུན་པ་འཆང་ཞིང་། 《ཉི་འོད་གྲོང་ཁྱེར》ལས་བོད་ཀྱི་མི་དམངས་ལ་རང་ཉིད་ཀྱི་ཕ་ཡུལ་གྱི་འགྱུར་ལྡོག་གསར་པ་མཐོང་དུ་བཅུག་པ་དང་། ཚང་མར་ཡུལ་དེ་གར་འཚོ་བ་སྐྱེལ་མཁན་མི་དམངས་ཀྱི་བསམ་པའི་སྟོབས་ཤུགས་དང་ཕུགས་བསམ་དོན་གཉེར་བྱེད་པ་དངོས་འབྲེལ་ཚོར་བར་བྱས་ཡོད།

བར་སྐོར་ཁྲོམ་གཞུང་གི་འཁྲུག་ཆ་དོད་པའི་རྣམ་པ་ཟབ་མོ་ནས་ས་བབ་སྨི་5200ཟིན་པའི་གམ་པ་ཡུལ་གྲུའི་མཐའ་ཡས་པའི་རྔམ་བརྗིད་བར་དང་། སྣང་རྫོང་གི་སུར་པན་གྱི་ཁ་ཚ། རྫ་ཡུལ་གྱི་སྦྲང་རྩིའི་ཞིམ་མངར། གམ་པའི་ལུག་ཤའི་རོ་བཅུད། ཞོ་སྟོན་གྱི་ལྷ་མོའི་ཉམས་འགྱུར། སྤུས་ལེགས་ཐང་ག་བཅས་ཕྱོགས་གང་ས་ཅི་ཐད་ཀྱི་མཛེས་ཉམས《ཉི་འོད་གྲོང་ཁྱེར》ནང་མངོན་པར་བྱས་པ་མ་ཟད། ལྷག་པར་དུ་བོད་ཀྱི་མངོན་མིན་རིག་གནས་ཤུལ་བཞག་སོགས་དམིགས་བསལ་གྱི་ཡུལ་ལུང་རིག་གནས་འདུས་པའི་ཉམས་བཟང་ཕབ་ལེན་བྱས་ཏེ་ལྟད་མོ་བ་རྣམས་ལ་ཇི་མ་ཇི་བཞིན་གྱི་བོད་ལྗོངས་ཤིག་འདྲེན་བྱེད་དུ་བཤམས་ཡོད།

《ཉི་འོད་གྲོང་ཁྱེར》ད་དུང་ཨ་མྲ་ＴＶརྒྱལ་སྤྱིའི་ＡＰＰབརྒྱུད་གོ་ལ་ཧྲིལ་པོའི་རྒྱལ་ཁབ་དང་ས་ཁུལ་195རུ་བསྟན་ཞིང་། བརྙན་འཕྲིན་ཟློས་གར་དེའི་མཐོང་སྣེ་དམིགས་བསལ་དང་ནང་དོན་ཟབ་མོ་ལས་འཛམ་གླིང་ལ་བོད་ཀྱི་རང་བྱུང་མཛེས་ལྗོངས་དང་མི་ཆོས་ཉམས་འགྱུར་མངོན་པ་དང་། མཛེས་སྡུག་ལྡན་པའི་འཚོ་བར་བཅངས་པའི་བོད་ལྗོངས་གསར་པའི་མི་དམངས་ཀྱི་དགའ་ཞེན་དང་དོན་གཉེར་བྱེད་ཚུལ་མཚོན་པར་བྱས་ཤིང་། འཛམ་གླིང་དུ་དངོས་ཡོད་དང་སྣ་མང་ཡིན་ལ་ཡིད་དབང་འཕྲོག་པའི་བོད་ལྗོངས་ཤིག་མངོན་པར་བྱས་ཡོད།

(པར་ངོས་འདིའི་པར་རིས་ཡོངས་ནི་བརྙན་འཕྲིན་ཟློས་གར《ཉི་འོད་གྲོང་ཁྱེར》གྱི་པར་རིས་ཡིན་པ་དང་པར་རིས་ཚང་མ་ཨ་མྲ་ＴＶཡིས་མཁོ་སྤྲོད་བྱས)