འདི་ནི་ཙ་རི་ཤང་གི་རྣམ་པ་ཡིན་པ།

ད་ཆ“མི་ཁྱིམ་བདུན”ཞེས་པའི་ས་མིང་དེ་ཤེས་མཁན་ཉུང་ཉུང་རེད། རྒྱུ་མཚན་ནི་ད་ལྟ་ས་ཆ་དེར་ཙ་རི་ཤང་ཟེར་གྱི་ཡོད་པ་དང་དེ་ནི་ལྷོ་ཁ་གྲོང་ཁྱེར་ལྷུན་རྩེ་རྫོང་གི་མཐའ་མཚམས་ཤང་ཞིག་ཡིན།

རྒྱལ་ལམ་219བརྒྱུད་ནས་ཆག་ལ་བརྒྱབ་རྗེས་ཙ་རི་ཤང་གི་མངའ་ཁོངས་སུ་སླེབས་ཀྱི་ཡོད།

ཙ་རི་ཤང་ཆོས་ཟམ་གྲོང་ཚོའི“གཤོང་ར་ཐང”ནི་ས་གནས་དེ་གའི་གྲོང་མིའི་དགུན་མཚེར་ཡིན་ལ། ཤྭ་བ་མཆུ་དཀར་འཚོ་གནས་བྱ་ཡུལ་ཞིག་ཀྱང་རེད།

ཙ་རིའི་ཡུལ་ལྗོངས་མཛེས་སྡུག་ཧ་ཅང་ལྡན་པ་ཞིག་ཡོད།

ཙ་རི་འདི་ཉིད་བོད་དུ་སྐད་གྲགས་ཆོད་ཅིང་། དེར་ཁྱད་དུ་འཕགས་པའི་རང་བྱུང་མཛེས་ལྗོངས་ཡོད་པ་མ་ཟད། ད་དུང་དེ་གར་སྨྱུག་མ་འབེལ་པོ་ཡོད། བོད་དུ་མཛེས་མར་བསྟོད་པའི་དར་ཁྱབ་ཆེ་བའི་གཏམ་དཔེ་ཞིག་ཡོད་པ་སྟེ། “ཞལ་རས་དཀར་གསལ་ཟླ་བ། སྐུ་གཟུགས་ཙ་རིའི་སྨྱུག་མ”ཞེས་པ་དེའི་ནང་བརྗོད་པའི“ཙ་རི”ཞེས་པ་ནི་ཙ་རི་ཤང་ལ་ཟེར། དེར་བརྟེན་ད་ལྟ་མི་མང་ཆེ་བས་ཙ་རི་ཞེས་པའི་མིང་ཤེས་པ་ལས། “མི་ཁྱིམ་བདུན”ཞེས་པ་ཤེས་མཁན་ཉུང་ཉུང་ཡིན།

“མི་ཁྱིམ་བདུན”ཞེས་པ་ནི་ལོ་རྒྱུས་དེབ་དང་། གནའ་དཔེ། དེ་སྔའི་ས་བཀྲ་བཅས་ཐོག་གི་ས་མིང་ཞིག་ཡིན་ལ། དུས་རབས་གོང་མར་ཤང་གི་མིང་དུ་བཏགས་མྱོང་ཡོད།

ང་ཚོས་ཤང་སྲིད་གཞུང་གནས་ཡུལ་གྱི་ཁྲོམ་གཞུང་གཡས་གཡོན་དུ“མི་ཁྱིམ་བདུན”དང་། “མི་སྤྱི་བདུན” “མི་འགྱུར་གཏིང”ཞེས་པ་སོགས་འབྲི་སྟངས་མི་འདྲ་བའི་མིང་བཀོད་པའི་ཚོང་ཁང་གི་སྒོ་བྱང་མི་ཉུང་བ་ཞིག་མཐོང་བྱུང་། དེ་དག་ནི་ས་གནས་དེ་གའི་མིས་ས་མིང་དེར་དྲན་གསོ་ཞུ་བ་ཞིག་ཡིན་སྲིད།

《བོད་ལྗོངས་བོད་ཡིག་གནའ་དཔེ་དཔེ་སྐྲུན་ཁང》གིས་དཔེ་སྐྲུན་བྱས་པའི《ལྷུན་རྩེའི་ཡུལ་སྐོར་ཕྱོགས་སྟོན》ནང“མི་ཁྱིམ་བདུན”ནི་ལྷུན་རྩེ་རྫོང་མངའ་ཁོངས་ཀྱི་གསང་སྔགས་ཆོས་གླིང་དགོན་གྱི་བོད་རིགས་ཁྲལ་པ་བདུན་དེ་གར་གཞིས་ཆགས་པས། རིམ་བཞིན“བྲག་རི་མི་ཁྱིམ་བདུན”ཞེས་པའི་འབོད་སྲོལ་བྱུང་ཡོད་ཅེས་འཁོད་ཡོད།

ཙ་རི་ཤང་ཆོས་ཟམ་གྲོང་ཚོའི་གྲོང་མི་ཨུ་ལྷན་གྱི་ཀྲུའུ་རེན་ཚེ་རིང་ཕུན་ཚོགས་ཀྱིས། སྔོན་ཆད་ཀྱི་ཙ་རི་ནི་གཙོ་བོ་ཆོས་ཟམ་གྲོང་ཚོའི་རྒྱུད་དམ་ཡང་ན་ཡུལ་སྨད་ཤང་གནས་སར་ཟེར། ད་ལྟ་ཙ་རི་ཤང་སྲིད་གཞུང་གནས་ཡུལ་ནི་ལྷོ་པ་བ་སྡོད་སའི་ས་ཆ་ཡིན། ངག་རྒྱུན་དུ་ལྷོ་པ་བའི་དུད་ཚང་བདུན་དེར་སྡོད་ཀྱི་ཡོད་པ་ལས་དེ་གར“ལྷོ་པའི་མི་ཁྱིམ་བདུན”ཞེས་ཀྱང་ཟེར་སྲོལ་ཡོད།

བོད་རིགས་ཁྲལ་པ་བདུན་ཡིན་ནའང་འདྲ། ཡང་ན་ལྷོ་པ་བ་དུད་ཚང་བདུན་ཡིན་ཡང་རུང་གནས་འདིར“མི་ཁྱིམ་བདུན”ཞེས་པའི་མིང་ས་རྒྱ་རྡོ་ཁྱབ་ཏུ་དར་ཡོད།

“མི་ཁྱིམ་བདུན”གནས་ས་ད་ཆ་ཟམ་པ་མདོང་དང་གྲོང་ནང་སྲིད་འཛིན་གྲོང་ཚོ་གཉིས་ལ་འཕེལ་རྒྱས་ཕྱིན་པ་མ་ཟད། དེ་གར་ཙ་རི་ཤང་སྲིད་གཞུང་གནས་སའང་རེད། ལོ་ལྟར་སྨུག་སྤྲིན་འཁྲིགས་པའི་རི་བོ་གསུམ་པོའི་རི་གཤམ་གྱི་ཐང་གཤོང་སྟེང་གཙང་ལ་གྲལ་འགྲིག་པའི་གྲོང་ཚོ་ཆགས་པ་དང་ལྷོ་ཆུ་གཙང་པོ་གྲོང་ཚོའི་འགྲམ་ནས་ལང་ལོང་དུ་རྒྱུག་གི་ཡོད། དེ་བོད་ཀྱི་ལྷོ་རྒྱུད་དང་ཧི་མ་ལ་ཡའི་ཤར་རྒྱུད་ཀྱི་བྱང་འདབས་སུ་གནས་ཡོད། ལྷོ་ནུབ་ཏུ་ལྷུན་རྩེ་རྫོང་ཡུལ་སྨད་ཤང་དང་གསང་སྔགས་ཆོས་གླིང་ཤང་དང་སྦྲེལ་བ་དང་། བྱང་ཤར་དུ་ཉིང་ཁྲི་གྲོང་ཁྱེར་མེ་ཏོག་རྫོང་དང་། སྨན་གླིང་གྲོང་ཁྱེར། སྣང་རྫོང་བཅས་དང་ས་མཚམས་སྦྲེལ་ཡོད། དེ་གར་སྔོ་ཁེབས་སྟུག་ལ་ཡུལ་ལྗོངས་ལྟ་ན་སྡུག སྔ་མ་འགྲོ་ལམ་ཧ་ཅང་དཀའ་ཚེགས་ཆེ་བའི་དབང་གིས་སྐད་གྲགས་ཆོད་ཡོད། ད་ཆ་རྒྱལ་ལམ་219མངའ་ཁོངས་ཡོངས་སུ་ཁྱབ་པས། སྣུམ་ནག་ལམ་དེ་ཐག་རིང་ཤོས་ཀྱི་ལྷོ་པ་གྲོང་གསར་བར་ཤར་གཏོང་ཐུབ་པས་དེ་གར་ཕྱོགས་བཞི་མཚམས་བརྒྱད་དུ་འགྲོ་སའི་ལམ་བུ་ཤར་གཏོང་ཐུབ་ཡོད་ཅེས་བརྗོད་ཆོག

“མི་ཁྱིམ་བདུན”ནི་བོད་ཞི་བས་བཅིངས་འགྲོལ་མ་བཏང་གོང་ལྷུན་རྩེ་རྫོང་གི་མངའ་ཁོངས་སུ་གཏོགས་པ་དང་། བོད་ཞི་བས་བཅིངས་འགྲོལ་བཏང་རྗེས་སྣང་རྫོང་གི་ཆུས་ཤིག་ཏུ་གྱུར་ཡོད། 1979ལོའི་ཟླ་3པར་ལྷུན་རྩེ་རྫོང་གི་ཁོངས་སུ་བཅུག་ཡོད། 1999ལོའི་ཟླ་7པར་ཙ་རི་ཆུས་མེད་པར་བཟོས་ནས་དེ་སྔའི་མི་ཁྱིམ་བདུན་ཤང་དང་ཆུ་ཟམ་ཤང་གཉིས་ཟླ་སྒྲིལ་བཏང་ནས་ཙ་རི་ཤང་བཙུགས།

“མི་ཁྱིམ་བདུན”གྱིས་མཐའ་མཚམས་འབྱོར་འབྲིང་གྲོང་ཚོ་འཛུགས་སྐྲུན་ལ་ནུས་ཤུགས་ཡོད་རྒུས་སྐུལ་འདེད་གཏོང་བཞིན་ཡོད་པ་དང་། དེ་གའི་མང་ཚོགས་རྣམས“འབྱོར་འབྲིང་ཁང་པར”སྤོས་ཏེ།“ཡུལ་སྐོར་ལ་བརྟེན་ནས”ཡོང་འབབ་གསོག་བཞིན། “ཕྱུག་འགྱུར་ལམ་བུར”སྐྱོད་བཞིན་ཡོད། ད་ཆ་དེ་སྔའི་འགྲོ་དཀའ་བའི་མཐའ་མཚམས་ཀྱི་རི་གྲོང་དེ་དཔྱིད་དཔལ་བཞད་ཅིང་མཛེས་སྡུག་ལྡན་པའི“མཐའ་མཚམས་ཀྱི་མུ་ཏིག”ལྟ་བུ་ཞིག་ཏུ་གྱུར་ཡོད།