ཀེ་རོམ་གྱི་རྡེའུ་སྒྲིག་བཞིན་པ།

ཀེ་རོམ་འགྲན་བསྡུར་གྱི་སྐར་མ་རྩིས་ཆས་ཡིན་པ།

འགྲན་ཞུགས་པ་ལྷ་ས་གྲོང་ཁྱེར་གྱི་ལས་བཟོའི་ལུས་རྩལ་འགྲན་ཚོགས་སྐབས་གཉིས་པའི་ཀེ་རོམ་འགྲན་བསྡུར་ལ་ཞུགས་བཞིན་པ།

ཀེ་རོམ་ཡིན་པ།

ཀེ་རོམ་འགྲན་བསྡུར་བྱེད་བཞིན་པ།

ལྷ་ས་གྲོང་ཁྱེར་གྱི་ལས་བཟོའི་ལུས་རྩལ་འགྲན་ཚོགས་སྐབས་གཉིས་པའི་ཀེ་རོམ་འགྲན་བསྡུར་བྱ་ཡུལ་ཡིན་པ།

གཟའ་མཇུག་ཏུ་བོད་རང་སྐྱོང་ལྗོངས་བོད་ལུགས་ཀེ་རོམ་མཐུན་ཚོགས་ཀྱིས་ཀེ་རོམ་འགྲན་བསྡུར་ཞིག་གཉེར་བ་རེད།

མིག་དམར་དོན་གྲུབ་ནི་བོད་ལུགས་ཀེ་རོམ་མཁས་ཅན་ཞིག་ཡིན་པ་དང་བོད་རང་སྐྱོང་ལྗོངས་ཀྱི་བོད་ལུགས་ཀེ་རོམ་མཐུན་ཚོགས་ཀྱི་ཚོགས་གཙོ་རེད། ཁོང་གིས“ཀེ་རོམ”ཞེས་པ་དེ་རྒྱ་གར་གྱི་སྐད་ཡིན་པ་དང་ཡུལ་གཞན་ནས་དར་བ་ཞིག་ཡིན་ཞིང་། ལོ་150ཡི་གོང་ཁེ་ཧྲི་སྨིར་བས་བོད་དུ་འཁྱེར་ནས་རིམ་བཞིན་དཔོན་རིགས་དང་ཚོང་པའི་ཁྱིམ་ཚང་དུ་དར་ཁྱབ་བྱུང་བའི་ཤོད་ཚུལ་ཡོད། “ཀེ་རོམ”བོད་དུ་དར་རྗེས་བོད་ཀྱི་མང་ཚོགས་ཚོས་ས་ཁོངས་རང་བཞིན་ལ་གཞིགས་ཏེ་ཀེ་རོམ་རྒྱག་སའི་སྒྲོམ་སྟེགས་དང་རྡེའུ་ཡི་རྒྱུ་ཆ་དང་། ཚད་གཞི། འགྲན་བསྡུར་སྒྲིག་སྲོལ་བཅས་ཀྱི་ཐད་ལེགས་བཅོས་ཆེན་པོ་བྱས་ཡོད། དུས་རབས་20པའི་ལོ་རབས་90པའི་དུས་འགོར། “ཀེ་རོམ”དེ་ཤེས་སླ་བ་དང་རྒན་གཞོན་ཚང་མས་རྩེ་ཆོག་པས་ཇ་ཁང་དུ་དར་ཁྱབ་ཆེ་བ་དང་རིམ་བཞིན་དམངས་ཁྲོད་ཀྱི་རོལ་རྩེད་ཅིག་ཏུ་གྱུར་ཡོད། ཕྱིས་སུ་ལོ་མང་རིང་གི་འཕོ་འགྱུར་བརྒྱུད་དེ་མི་རིགས་ཀྱི་སྲོལ་རྒྱུན་ལུས་རྩལ་ཞིག་ཏུ་གྱུར་ཡོད་ཅེས་ངོ་སྤྲོད་བྱས།

དུས་ཡུན་རིང་པོའི་འཕོ་འགྱུར་ཁྲོད“ཀེ་རོམ”ལ་འགྲན་བསྡུར་གྱི་སྒྲིག་སྲོལ་ཆ་ཚང་ཞིག་རིམ་བཞིན་ཆགས་ཡོད། ལྷག་པར་དུ་དུས་རབས་20པའི་ལོ་རབས་80པའི་རྗེས་སུ་འབྲེལ་ཡོད་སྡེ་ཚན་གྱིས“ཀེ་རོམ”གྱི་ཆུ་ཚད་ཁྱབ་གདལ་དང་མཐོ་རུ་གཏོང་ཆེད། བརྟག་དཔྱད་ཞིབ་འཇུག་གཏིང་ཟབ་བྱས་པའི་རྨང་གཞིའི་ཐོག《ཀེ་རོམ་འགྲན་བསྡུར་གྱི་སྒྲིག་སྲོལ》བཟོས་པ་མ་ཟད། འགྲན་བསྡུར་དེ་བོད་རང་སྐྱོང་ལྗོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་ནང་བཅུག་པ་མ་ཟད། ད་ཆ“ཀེ་རོམ”དེ་རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་ཀྱི་རྣམ་གྲངས་ནང་དུའང་བཅུག་ཡོད་པ་རེད།

2021ལོར་མིག་དམར་དོན་གྲུབ་དང་ཀེ་རོམ་མཁས་ཅན་43མཉམ་དུ་བོད་རང་སྐྱོང་ལྗོངས་ལུས་རྩལ་ཅུས་ཀྱིས་ཁྱབ་བསྒྲགས་བྱས་པའི་བོད་རྒྱ་སྐད་གཉིས་ཀྱི་བར་བཅུག་རི་མོའི《བོད་ལུགས་ཀེ་རོམ་གྱི་སྒྲིག་སྲོལ》བཟོས་པ་དང་འཐུས་སྒོ་ཚང་དུ་གཏོང་བའི་ལས་དོན་ནང་ཞུགས་པ་རེད། དེའང་མིག་སྔའི་བར་བོད་ལུགས་ཀེ་རོམ་འགྲན་བསྡུར་གྱི་སྒྲིག་སྲོལ་ཆ་ཚང་ཤོས་ཤིག་ཡིན་པ་དང་རྒྱུན་དུ་གཞུང་ཕྱོགས་ཀྱི་འགྲན་བསྡུར་ནང་སྤྱོད་ཀྱི་ཡོད་། མིག་དམར་དོན་གྲུབ་ཀྱིས། རང་ལྗོངས་ཀྱི་གྲོང་ཁྱེར་དང་ས་ཁུལ་ཁག་གི་གཞུང་ཕྱོགས་དང་དེ་བཞིན་དམངས་ཁྲོད་ཀྱི་འགྲན་བསྡུར་ཁྲོད་ཁོང་རྟག་ཏུ་ཤན་འབྱེད་པའམ་ཡང་ན་དཔྱད་འདེམས་པ་བྱེད་པར་གདན་ཞུ་བྱས་པར་སྐྱོད་ཀྱི་ཡོད། ས་གནས་མང་ཚོགས་ཀྱི་ཀེ་རོམ་གྱི་རྨང་གཞི་ཧ་ཅང་ཡག་པོ་ཡོད་པ་དང་འགྲན་བསྡུར་གྱི་རྣམ་པ་ཡང་ཧ་ཅང་ཟབ་མོ་ཡོད་པ་ཤེས་རྟོགས་བྱུང་བ་དེ་ཐོག་ནས་ཀེ་རོམ་དེ་ཉེ་བའི་ལོ་ཤས་རིང་འཕེལ་རྒྱས་ཡག་པོ་བྱུང་བ་མཚོན་ཡོད་ཅེས་དགའ་ཚོར་ཆེན་པོས་བཤད།

ཀེ་རོམ་གྱི་རིག་གནས་སྔར་བས་རྒྱུན་འཛིན་དང་ཁྱབ་གདལ་བཏང་ནས་མང་ཚོགས་ཀྱི་རིག་གནས་འཚོ་བ་དང་ལུས་རྩལ་བྱང་ཚད་ཕུན་སུམ་ཚོགས་སུ་གཏོང་ཆེད། 2023ལོའི་ཟླ་5་པར་བོད་རང་སྐྱོང་ལྗོངས་ཀྱི་བོད་ལུགས་ཀེ་རོམ་མཐུན་ཚོགས་ལྷ་སར་བཙུགས་ནས་བོད་ཀྱི་ལུས་རྩལ་རྐྱང་པའི་སྤྱི་ཚོགས་ཚོགས་པ་25པར་གྱུར་པ་དང་མིག་དམར་དོན་གྲུབ་ཀྱིས་ཚོགས་གཙོ་དང་པོའི་འགན་འཁུར་བ་རེད། མཐུན་ཚོགས་བཙུགས་རྗེས་གཟའ་འཁོར་རེའི་གཟའ་ཉི་མ་དེ་མཐུན་ཚོགས་ཀྱི་གཏན་འཇགས་འགྲན་བསྡུར་ཉིན་མོར་གཏན་འཁེལ་བྱས་པ་དང་འབྲེལ། སྐར་གསོག་འགྲན་བསྡུར་བྱས་ནས་ཀེ་རོམ་གྱི་འཕེལ་རྒྱས་ལ་སྐུལ་འདེད་གཏོང་གི་ཡོད།

བོད་ཀྱི་དཔལ་འབྱོར་དང་རིག་གནས་ལ་འཕེལ་རྒྱས་དང་སྤྱི་ཚོགས་ལ་འཕོ་འགྱུར་བྱུང་བ་དང་བསྟུན་ནས། གནའ་བོའི་རོལ་རྩེད“ཀེ་རོམ”དེ་བློ་རིག་བསྡུར་བ་དང་སྤྲོ་སྣང་འཕེལ་བའི་ཁྱད་ཆོས་ལ་བརྟེན་ནས་བོད་མི་རིགས་ཀྱི་རྒྱུན་གཏན་འཚོ་བའི་ཁྲོད་མེད་དུ་མི་རུང་བའི་རོལ་རྩེད་ཅིག་ཏུ་གྱུར་ཡོད། ད་ཆ་མིག་དམར་དོན་གྲུབ་དང་ལས་རོགས་ཚོས་སྔར་བཞིན“ཀེ་རོམ”གྱི་འགྲན་བསྡུར་སྒྲིག་སྲོལ་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ་དང་། གཞོན་ནུ་ལོ་ཆུང་གི་ཀེ་རོམ་སློབ་སྦྱོང་དང་གསོ་སྦྱོང་ལས་དོན་ལ་སྐུལ་འདེད་གཏོང་བ། ལས་རིགས་ཀྱི་ཚད་གཞི་དེ་བས་ཞིབ་ཕྲ་བཟོ་བ་བཅས་བྱས་ནས་མང་ཚོགས་ལ་ཧུར་བརྩོན་ཡར་ཐོན་གྱི་སློབ་སྦྱོང་དང་འགྲན་བསྡུར་ཁོར་ཡུག་ཅིག་བཏོད་དེ། ཕུལ་བྱུང་གི་མི་རིགས་ཀྱི་སྲོལ་རྒྱུན་ལུས་རྩལ་རོལ་རྩེད་རྣམ་གྲངས་རྒྱུན་འཛིན་དང་དར་སྤེལ་གཏོང་བཞིན་ཡོད།