ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་2024ལོའི་ལོ་འཁོར་གྱི་སྲ་བརྟན་དང་ལེགས་གཏོང(གོང་དཀར་གནམ་ཐང་མཐའ་འཁོར་གྱི་རི་བོ)གི་ལས་གྲྭའི་རྣམ་གྲངས་ལས་ཡུལ་དུ་ཕྱོགས་གསུམ་པའི་ལྟ་སྐུལ་དོ་དམ་པས་ཤིང་སྡོང་སྐྱེ་འཚར་ལ་བརྟག་དཔྱད་བྱེད་བཞིན་པ།

ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་2024ལོའི་དུས་ཐེངས་དང་པོའི་ལས་གྲྭ་སྟེ། གོང་དཀར་རྫོང་གི་ནགས་བཟོའི་རྣམ་གྲངས་ཀྱི་གོང་དཀར་ཡུག་ཁུལ་གཉིས་པར་ས་གནས་དེ་གའི་གྲོང་མིས་ཤིང་འཛུགས་ནགས་བཟོ་བྱེད་བཞིན་པ།

ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་2024ལོའི་ལོ་འཁོར་གྱི་སྲ་བརྟན་དང་ལེགས་གཏོང(གོང་དཀར་གནམ་ཐང་མཐའ་འཁོར་གྱི་རི་བོ)གི་ལས་གྲྭའི་རྣམ་གྲངས་ལས་ཡུལ་དུ་ནགས་ལས་ནད་བཤེར་ཁྲིམས་སྒྱུར་ལས་དོན་པས་ལྕང་སོན་གྱི་སྦར་རྩའི་ཚད་གཞི་ལོན་ཡོད་མེད་ལྟ་བཞིན་པ།

རྒྱུན་མཐུད་འཕེལ་རྒྱས།

ལྷ་སའི་མང་ཚོགས་ཚོར་གྲོང་ཁྱེར་གྱི་ཁོར་ཡུག་ལ་འགྱུར་ལྡོག་གང་འདྲ་བྱུང་མིན་སྐོར་འདྲི་སྐབས། “རི་སྔོ་ཐིང་ཐིང་ཆགས་འདུག”ཅེས་པའི་ལན་དེ་ལས་མང་ཚོགས་ཀྱི་ཐོབ་སྣང་དང་སྐྱིད་སྣང་གང་ལེགས་མཚོན་ཐུབ།

ལྷ་ས་ནི་ལུང་གཞུང་རིང་མོར་ཆགས་པ་དང་། སྐྱིད་ཆུ་ཤང་ཤང་དུ་རྒྱུག་ཅིང་། ངོགས་གཉིས་ནི་མུ་ཁྱུད་དུ་འབྲེལ་བའི་ལྷོ་རི་དང་བྱང་རི་རེད། ཕོ་བྲང་པོ་ཏ་ལའི་ཁ་སྤྲོད་ཀྱི་ལྷོ་ངོས་སུ་སྔོ་ཐིང་ངེར་གནས་པའི་ལྷོ་རི་དང་ལྷ་ས་གྲོང་ཁུལ་གཉིས་སྐྱིད་ཆུས་བར་ཆོད་ནས་གཅིག་གིས་གཅིག་ལ་རྒྱང་ལྟ་བྱེད་པ་ལྟར་དུ་སྣང་། མཐོ་དམའ་མི་འདྲ་བའི་ལྗོན་ཤིང་ཚང་ཚིང་དུ་སྐྱེས་པའི་དབུས་སུ་གྲོང་མི་རྣམས་སྔོ་ལྗང་གིས་བརྒྱན་པའི་འགྲོ་ལམ་བརྒྱུད་བག་ཕེབས་ཀྱི་སྤྲོ་འཆམ་ལ་རོལ་ནས་འདབ་ཆགས་ཀྱི་སྐད་སྙན་འབྱིན་ཞིང་མེ་ཏོག་གི་དྲི་ཞིམ་འཐུལ་བའི་ཁྲོད་རང་བྱུང་གི་མཛེས་སྡུག་ལོངས་སུ་སྤྱོད་བཞིན་མཆིས།

ལོ་10ལྷག་ཙམ་གྱི་གོང་རི་རྒོད་འདིར“ལྕང་མ་སོགས་རྩྭ་རྩི་ཤིང་གང་ཡང་མེད་པས་མཐོང་བ་ཙམ་གྱིས་སྤྲོ་བ་འཕེལ་མི་ཐུབ”ཅེས་ལྷ་སའི་གྲོང་མི་ཆོས་སྒྲོན་གྱིས་ཕྱིར་དྲན་བྱེད་བཞིན་བཤད།

རྩྭ་ས་ཞན་འགྱུར་དང་ས་ཞིང་བྱེ་འགྱུར་སྔོན་འགོག་བྱས་ནས་གྲོང་མིའི་འཚོ་བའི་ཁོར་ཡུག་ལེགས་སུ་གཏོང་ཆེད། 2012ལོར་ལྷ་ས་གྲོང་ཁྱེར་གྱིས་ལྷོ་རིའི་ནགས་བཟོ་སྔོ་འགྱུར་ལས་གྲྭ་གཉེར་འགོ་བཙུགས་ཏེ། ལོ་5ཡི་རིང་ཤིང་འཛུགས་ནགས་བཟོ་ཧུར་ཐག་བྱས་པ་བརྒྱུད། དེ་སྔའི་རི་རྒོད་ད་ཆའི་ལྷ་སའི་ལྷོ་རི་སྤྱི་གླིང་དུ་གྱུར་ཡོད། 2021ལོ་ནས་འགོ་བཙུགས་ཏེ་ལོ་10ཡི་རིང་། བོད་ཀྱིས་ལྷ་སའི་ལྷོ་རི་བྱང་རི་སྔོ་འགྱུར་ལས་གྲྭ་ལག་བསྟར་གྱིས་ནགས་བཟོ་མུའུ་ཁྲི་206.72ལེགས་སྒྲུབ་བྱས་ཏེ། ལྷ་ས་འདི་ཉིད་ལྷོ་རི་བྱང་རི་སྔོ་ལྗང་གིས་བརྒྱན་པ་དང་དྭངས་གཙང་ཆུ་མོས་གནའ་གྲོང་བསྐོར་བའི་སྐྱེ་ཁམས་སྡོད་མལ་ལ་འཚམ་པའི་ས་མཐོའི་གྲོང་ཁྱེར་ཞིག་ཏུ་སྐྲུན་རྩིས་ཡོད་པ་རེད།

ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་ཀྱི་ཤེལ་དཀར་རི་ནི་སྔོན་ཆད་རི་རྒོད་ཅིག་ཡིན་པས་ནོར་ལུག་ཀྱང་འཚོ་གནས་བྱེད་ཁག་པོ་ཡོད། ས་གནས་དེ་གའི་གྲོང་མིས་ལོ་10ལྷག་ཙམ་རིང་ཉིན་གཅིག་ལྟར་རྒྱུན་སྲིང་ལྷོད་མེད་ཀྱིས་ཤིང་འཛུགས་ནགས་བཟོ་བྱས་པ་བརྒྱུད། ད་ཆ་དཔྱིད་དཔལ་བཞད་པའི་དུས་ཚིགས་སུ་དེ་གར་ཡང་སྔོ་ལྗང་གོས་ཀྱིས་བཀླུབས་ནས་དཔྱིད་ཀྱི་ཉམས་འགྱུར་ཡོངས་སུ་མངོན་གྱི་ཡོད།

ཤེལ་དཀར་རི་མཐོ་ཞིང་གཟར་བས་མི་ཐབས་ལ་བརྟེན་ནས་སྐྱེལ་འདྲེན་བྱེད་པར་དུས་ཚོད་རིང་པོ་འགོར་གྱི་ཡོད། དེར་བརྟེན་ས་གནས་དེ་གའི་གྲོང་མིས་འབྲེང་ཟམ་བསྐྲུན་པ་རེད། གསར་འགོད་པས་ཤིང་འཛུགས་ས་ནས་བསྡམས་ཟིན་པའི་ཚོས་སེར་སྡོང་པོ་དང་། རྒྱ་ཤུག སྒྲོན་ཤིང་སོགས་ལྕང་སོན་ཆེན་པོ་དང་དེ་བཞིན་ཟོམ་ནང་བླུགས་པའི་ལྕང་སོན་ཆུང་ཆུང་འབྲེང་ཟམ་བརྒྱུད་རི་རྩེར་དབོར་ནས་ལྕང་སོན་ལ་སྲུང་སྐྱོང་གང་ཐུབ་བྱེད་པ་མཐོང་བྱུང་།

གདོང་དཀར་སྡེ་ཁུལ་གྱི་གྲོང་མི་རྡོ་རྗེས། འབྲེང་ཟམ་བསྐྲུན་རྗེས་སྐར་མ་ཁ་ཤས་ནང་ལྕང་སོན་རི་རྩེར་དབོར་ཚར་གྱི་འདུག་པས་ལས་ཕྱོད་ཆེ་རུ་ཕྱིན་སོང་། ད་ལྟ་ནས་བརྩིས་པའི་ཟླ་8པའི་ཟླ་མཇུག་བར་ང་ཚོས་ཉིན་ལྟར་རི་རྩེར་ལྕང་སོན་དབོར་ནས་འཛུགས་ཀྱི་ཡོད་ཅེས་བཤད།

ཤེལ་དཀར་རི་ནི་ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་བསྡུས་རིས་ཙམ་ཞིག་རེད། བོད་ཀྱི་ལུང་གཞུང་ཁུལ་གྱི་གཞི་ཁྱོན་ཅན་གྱི་སྐྱེ་ཁམས་འཛུགས་སྐྱོང་དང་ཉམས་གསོའི་མཚོན་བྱེད་རང་བཞིན་གྱི་ལས་གྲྭ་ཐོག་མ་ཡིན་པའི་ལྷོ་རི་བྱང་རིའི་སྔོ་འགྱུར་ལས་གྲྭ་ལག་བསྟར་བྱས་པ་ལས་ཆུ་རྩ་གསོ་བ་དང་མཁའ་རླུང་གཙང་སེལ་སོགས་ཀྱི་ཐད་སྐྱེ་ཁམས་ཀྱི་ཕན་འབྲས་ཧ་ཅང་ཆེན་པོ་ཐོན་ཡོད་པ་མ་ཟད། མང་ཚོགས་ལའང་སྐྱེ་ཁམས་ལེགས་སུ་ཕྱིན་པའི་སྡོད་མལ་ལ་འཚམ་པའི་འཚོ་བ་སྐྱེལ་རྒྱུ་བྱུང་ཡོད།

ལྷ་ས་གྲོང་ཁྱེར་ནགས་ལས་དང་རྩྭ་ཐང་ཅུས་ཀྱི་ཅུས་ཀྲང་གཞོན་པ་ཝང་ཧྲང་ཏེས་ངོ་སྤྲོད་བྱས་དོན། ལྷ་སའི་ལྷོ་རི་བྱང་རིར་ནགས་བཟོའི་གསོན་ཚད་མཐོ་བ་དེ་ཚན་རྩལ་གསར་གཏོད་དང་ཁ་འབྲལ་ཐབས་མེད། རྩི་ཤིང་འདེམས་པའི་ཐད་རྒྱང་ཚོར་ལག་རྩལ་སྤྱད་ནས་ས་གནས་དེ་གའི་གནམ་གཤིས་དང་ས་རྒྱུ་སོགས་རང་བྱུང་ཆ་རྐྱེན་ལ་དབྱེ་ཞིབ་གཏིང་ཟབ་བྱས་ཏེ། ཚན་ཞིབ་ཚོགས་པས་ལྷ་སའི་ལྷོ་རི་བྱང་རིར་སྐྱེ་བར་འཚམ་པའི་ཤིང་རིགས་དང་རྩྭ་སོན་བདམས་པ་མ་ཟད། ད་དུང་ཆུ་གྲོན་ཆུང་ཐུབ་པའི་རིག་ནུས་ཆུ་འདྲེན་སྒྲིག་ཆས་སྒྲིག་སྦྱོར་བྱས་པས་ས་རྒྱུ་གཤིན་པོ་ཡོང་བར་ནུས་པ་ཆེན་པོ་ཐོན་ཡོད།

མེ་ཏོག་དང་རྩྭ་རྩི་ཤིང་བཏབ་པ་ལས་སྐྱེ་ཁམས་ཁོར་ཡུག་ལེགས་སུ་ཕྱིན་པ་དང་ཡུལ་མིའི་འཚོ་བའི་སྤུས་ཚད་མཐོ་རུ་ཕྱིན་ཡོད། གྲངས་གཞི་ལས་མངོན་པར། 2022ལོ་ནས་2023ལོའི་བར། ལྷ་སའི་ལྷོ་རི་བྱང་རི་སྔོ་འགྱུར་ལས་གྲྭས་ཁྱོན་ནགས་བཟོ་མུའུ་ཁྲི་39.14ལེགས་གྲུབ་ཟིན་པ་དང་། ནགས་བཟོ་གསོན་ཚད་85%ཡན་ཟིན་པ། མ་དངུལ་སྒོར་དུང་ཕྱུར་30ལྷག་ཙམ་བཏང་བ། ཞིང་འབྲོག་མང་ཚོགས་ནགས་བཟོ་སྔོ་འགྱུར་དང་ལྕང་སོན་ཕྱིར་ཚོང་སོགས་ལ་ཞུགས་པར་ཡོང་འབབ་སྒོར་དུང་ཕྱུར་16ལྷག་ཙམ་བྱུང་བ། སྤྱི་ཚོགས་ཀྱི་མ་རྩ་སྒོར་དུང་ཕྱུར་20ལྷག་ཙམ་རྒྱལ་ཁབ་ས་ཆ་སྔོ་འགྱུར་ལ་སྤྱོད་པར་སྐུལ་ཁྲིད་བྱས་ཡོད།