ཉེ་བའི་ལོ་ཤས་རིང་། རང་ལྗོངས་ཀྱིས་རི་སྐྱེས་སྲོག་ཆགས་ལ་སྲུང་སྐྱོང་བྱེད་ཤུགས་རྒྱུན་ཆད་མེད་པར་ཆེ་རུ་བཏང་ནས། རང་བྱུང་སྲུང་སྐྱོང་ཁུལ་གྱི་རྨང་གཞིའི་སྒྲིག་བཀོད་ཕྱོགས་ཡོངས་ནས་ལེགས་སུ་དང་དོ་དམ་ཆུ་ཚད་མཐོ་རུ་བཏང་བ་དང་རི་སྐྱེས་སྲོག་ཆགས་སྲུང་སྐྱོང་གི་བཅའ་ཁྲིམས་ཁྲིམས་སྲོལ་འཐུས་སྒོ་ཚང་དུ་བཏང་བས་རི་སྐྱེས་སྲོག་ཆགས་སྲུང་སྐྱོང་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ཡོད། མི་རིགས་ཁག་གི་ལས་བྱེད་པ་དང་མང་ཚོགས་ཀྱི་སྲུང་སྐྱོང་འདུ་ཤེས་རྒྱུན་ཆད་མེད་པར་ཟབ་ཏུ་ཕྱིན་པ་དང་བསྟུན་ནས་ཁྲུང་ཁྲུང་མགོ་ཁྲ་དང་མཆུ་དམར་ཆུ་སྐྱར་སོགས་སྲུང་སྐྱོང་སྲོག་ཆགས་མང་པོ་ཞིག་བོད་དུ་དགུན་སྒྲོལ་ལ་སླེབས་ཤིང་། དེ་དག་བོད་ཀྱི་ཆུ་འགྲམ་ཁག་ཏུ་འདུས་ནས་སྐབས་རེ་མཁའ་དབྱིངས་སུ་ལྡིང་སྐོར་རྒྱག་པ་དང་སྐབས་རེ་ཆུ་ཐོག་ཏུ་ཅི་དགར་རོལ་ནས་དགུན་དུས་ཀྱི་ལྟ་ན་སྡུག་པའི་མཛེས་ལྗོངས་ཤིག་གྲུབ་ཡོད། འདི་ནི་ལྷ་ས་གྲོང་ཁྱེར་ལྷུན་གྲུབ་རྫོང་ཁོངས་ཀྱི་ཆུ་ངོས་སུ་འཕུར་བཞིན་པའི་ཁྲུང་ཁྲུང་མགོ་ཁྲ་ཡིན་པ།