འདི་ནི་བྱིས་པའི་ཕོ་བྲང་གི་སློབ་མས་བྲག་གསུམ་མཚོའི་གཞོན་ནུ་ལོ་ཆུང་གི་བྱེད་སྒོའི་སྒར་སར་དབྱར་སྒར་གྱི་བྱེད་སྒོ་སྤེལ་བཞིན་པ།

བྱིས་པའི་ཕོ་བྲང་གི་སློབ་མས་ཞབས་བྲོ་སྦྱོང་བཞིན་པ།

བྱིས་པའི་ཕོ་བྲང་གི་སློབ་མ་ཚོས་རྔ་རྡུང་སྟངས་སྦྱོང་བཞིན་པ།

བྱིས་པའི་ཕོ་བྲང་གི་དགེ་རྒན་གྱིས་སློབ་མར་ཡིག་གཟུགས་འབྲི་སྟངས་སློབ་བཞིན་པ།

བྱིས་པའི་ཕོ་བྲང་གི་སློབ་མས་བརྒྱངས་དཀྲོལ་རོལ་ཆ་དཀྲོལ་བཞིན་པ།

བྱིས་པའི་ཕོ་བྲང་གི་སློབ་མས་སྒྲ་སྙན་གཏོང་བཞིན་པ།

པར་①ནི་བྱིས་པའི་ཕོ་བྲང་གི་སློབ་མས་རྐང་རྩེད་སྤོ་ལོ་རྒྱག་བཞིན་པ།

པར་②ནི་བྱིས་པ་ཚོས་རང་གི་བརྩམས་ཆོས་སྟོན་བཞིན་པ།

པར་③ནི་ལྷ་ས་གྲོང་ཁྱེར་སྤྱི་བདེ་ཅུས་ཁྲིམས་སྒྱུར་ལྟ་སྐུལ་ཉིང་ལག་རུ་ཁག་གི་མི་དམངས་ཉེན་རྟོག་པས་བྱིས་པ་ཚོར་རང་སྲུང་གི་སློབ་ཚན་ཁྲིད་བཞིན་པ།

པར་④ནི་སློབ་མས་རི་མོ་འབྲི་བཞིན་པ།

ས་སྐྱེས་རྡོ་སྐྱེས་ཀྱི་ལྷ་ས་བ་ཞིག་དང་ལྷག་པར་དུ“70ནང་སྐྱེས”དང་། “80ནང་སྐྱེས”“90ནང་སྐྱེས”ཀྱི་ངོས་ནས་བརྗོད་ན། ལྷ་ས་གྲོང་ཁྱེར་ལོ་ཆུང་བྱིས་པའི་བྱེད་སྒོ་ལྟེ་གནས(གཤམ་དུ“བྱིས་པའི་ཕོ་བྲང”ཞེས་བསྡུ་རྒྱུ)ནི་ཁོང་ཚོ་བྱིས་པའི་དུས་སུ་སྐྱོད་ས་ཡག་ཤོས་ཤིག་རེད།

བྱིས་པའི་ཕོ་བྲང་1980ལོར་བསྐྲུན་པ་དང་1984ལོར་བོད་རང་སྐྱོང་ལྗོངས་ཀྱི་གཙོ་གནད་འདུ་འགོད་ཁག་43ནང་བཅུག་སྟེ་བསྐྱར་སྐྲུན་རྒྱས་སྐྲུན་བྱས་ནས། ཚན་རྩལ་ཐོག་ཁང་དང་རིག་རྩལ་ཐོག་ཁང་བསྐྲུན་ཡོད། 2010ལོར་ཅང་སུའུ་ཞིང་ཆེན་གྱི་བོད་སྐྱོར་མ་དངུལ་གྱི་རོགས་རམ་འོག མ་དངུལ་སྒོར་ཁྲི་2000ལྷག་ཙམ་བཏང་བ་དང་། ས་ཁྱོན་མུའུ་20ལྷག་ཙམ་ཟིན་པ། ཨར་སྐྲུན་རྒྱ་ཁྱོན་སྨི་ངོས་གྲུ་5033.9ཟིན་པའི་ལྷ་ས་གྲོང་ཁྱེར་གཞོན་ནུ་ལོ་ཆུང་གི་བྱེད་སྒོའི་ལྟེ་གནས་ཀྱི་མཁར་ཆེན་དེ་ཅང་སུའུ་ལམ་ཆེན་ནུབ་འདབས་ལམ་གཉིས་པར་གསར་དུ་བསྐྲུན་ཡོད། ད་ཕན་ལོ་ཤས་རིང་། ཅང་སུའུ་ཞིང་ཆེན་གྱིས་བྱིས་པའི་ཕོ་བྲང་འཛུགས་སྐྲུན་ལ་རྒྱུན་མཐུད་རྒྱབ་སྐྱོར་བྱས་པ་མ་ཟད། 2021ལོར་སླར་ཡང་མ་དངུལ་བཏང་ནས་བྱིས་པའི་ཕོ་བྲང་གི་སློབ་ཁྲིད་ཐོག་ཁང་དང་། ནུས་མང་ཁང་། རྐང་རྩེད་སྤོ་ལོའི་ཐང་སོགས་ལ་ཕྱོགས་ཡོངས་ནས་སྒྱུར་བཀོད་དང་ལེགས་སུ་བཏང་བ་དང་། ལྷག་པར་དུ། ནུས་མང་ཁང་གི་སྒྲིག་ཆས་གསར་པ་བརྗེས་ནས་རྒྱ་ཆེའི་གཞོན་ནུ་ལོ་ཆུང་ལ་སྤུས་ལེགས་ཀྱི་བྱེད་སྒོའི་ལས་སྟེགས་དང་རང་ཉིད་ཀྱི་རྩལ་ནུས་ངོམ་པའི་གོ་སྐབས་མཁོ་འདོན་བྱས།

ལྷ་ས་གྲོང་ཁྱེར་ལོ་ཆུང་བྱིས་པའི་བྱེད་སྒོ་ལྟེ་གནས་ཀྱི་ཀྲུའུ་རེན་ཚེ་ཕན་གྱིས། མི་རིགས་ཀྱི་ཕུལ་བྱུང་རིག་གནས་རྒྱུན་འཛིན་དང་དར་སྤེལ་གཏོང་ཆེད། བྱིས་པའི་ཕོ་བྲང་གིས་རྒྱ་ཆེའི་གཞོན་ནུ་ལོ་ཆུང་གི་དགའ་མོས་ལ་གཞིགས་ནས། མི་རིགས་ཀྱི་ཁྱད་ཆོས་ལྡན་པ་དང་ཀྲུང་ཧྭའི་མི་རིགས་ཀྱི་ཕུལ་བྱུང་རིག་གནས་རྒྱུན་འཛིན་ཐུབ་པའི་སྤུས་ལེགས་ཀྱི་སློབ་ཁྲིད་རྣམ་གྲངས་ཁག་ནང་འདྲེན་བྱས་པ་མ་ཟད། ཕུན་སུམ་ཚོགས་པའི་སློབ་ཚན་དང་དགེ་རྒན་གྱི་དཔུང་ཁག་སྟོབས་ཆེན་བཀོད་སྒྲིག་ཀྱང་བྱས་པས། ཁྱིམ་བདག་དང་སློབ་མ་མང་པོས་དེར་དགའ་པོ་བྱེད་ཀྱི་འདུག་ཅེས་ངོ་སྤྲོད་བྱས།

མིག་སྔར་བྱིས་པའི་ཕོ་བྲང་གིས་ལྷ་མོ་དང་། རལ་པ། སྒྲ་སྙན། རོལ་ཆ་དབྱང་ཆིན་དང་། བརྒྱངས་གྲོལ། བོད་ཡིག་དང་རྒྱ་ཡིག་གི་ཡིག་གཟུགས། རི་མོ། མིག་མངས། ཐའེ་ཆོན་དྲག་རྩལ། བྱིས་པའི་རྐང་རྩེད་སྤོ་ལོ། ཤིན་ཧྭའི་གསར་འགོད་པ་ཆུང་ཆུང་། སྐད་ཆ་ཤོད་རྩལ། བྱིས་པའི་མོ་ཐྲོལ། འཕྲུལ་མིའི་བརྒྱུད་རིམ་སྒྲིག་བཟོ་སོགས་ཀྱི་སློབ་ཚན་བཀོད་སྒྲིག་བྱས་ཏེ་ལོ་ལྟར་སློབ་མ་2000ལྷག་ཙམ་བསྡུ་གི་ཡོད་པ་རེད།

མངོན་མིན་རིག་གནས་ཤུལ་བཞག་གི་རྒྱུན་འཛིན་ཡག་པོ་བྱས་པ་ཕུད། བྱིས་པའི་ཕོ་བྲང་གིས་ད་དུང་སློབ་མས་དགའ་པོ་བྱེད་པའི“དར་སྲོལ”སློབ་ཚན་ཁག་གཅིག་ཁྱབ་གདལ་བཏང་བས་གྲུབ་འབྲས་བཟང་པོ་ཐོབ་ཡོད། ཞབས་བྲོ་སྦྱོང་མཁན་སློབ་མ་ཚོ་རྒྱལ་སྤྱིའི“སློབ་མའི་བུམ་པའི”ཞབས་བྲོའི་འགྲན་བསྡུར་ཆེ་མོར་ཞུགས་མྱོང་ཡོད་ཅིང་། བརྩམས་ཆོས《གཞིས་རྩེར་བཅངས་པའི་བརྩེ་སེམས》ལ་བྱ་དགའ་ཨང་དང་པོ་ཐོབ་པ་དང་། 《སླར་ཡང་གླུ་ཞིག་བླངས་ནས་ཏང་ལ་འབུལ》ལ་གསེར་གྱི་བྱ་དགའ་ཐོབ་ཡོད། བོད་ལྗོངས་ལྷ་སའི“བྱིས་པའི་སེམས་པ་ཏང་ལ་ཕྱོགས”ཀྱི་ལོ་ཆུང་བྱིས་པའི་རིག་རྩལ་འགྲན་བསྡུར་སྐབས་དང་པོར་ཞུགས་པར་བརྩམས་ཆོས《རོལ་དབྱངས་ཁྲོད་ཀྱི་གཤོག་རྩལ》ལ་བྱ་དགའ་ཨང་དང་པོ་ཐོབ་ཡོད། བོད་ལྗོངས་ལྷ་སའི“བྱིས་པའི་སེམས་པ་ཏང་ལ་ཕྱོགས”ཀྱི་ལོ་ཆུང་བྱིས་པའི་རིག་རྩལ་འགྲན་བསྡུར་སྐབས་གཉིས་པར་ཞུགས་པར་བརྩམས་ཆོས《བཀྲ་ཤིས་ལྷ་མོ》ལ་བྱ་དགའ་ཨང་དང་པོ་ཐོབ་ཡོད། ཐའེ་ཆོན་དྲག་རྩལ་སྦྱོང་མཁན་སློབ་མ་ཚོ་རང་སྐྱོང་ལྗོངས་ཀྱི་དམངས་ཡོངས་ལུས་སྦྱོང་གི་བྱེད་སྒོའི་ཐའེ་ཆོན་དྲག་རྩལ་གྱི་འགྲན་བསྡུར་ནང་ཞུགས་ནས་གསེར་གྱི་རྟགས་མ་7དང་། དངུལ་གྱི་རྟགས་མ་2 ཟངས་ཀྱི་རྟགས་མ་4བཅས་ཀྱི་ཕུལ་བྱུང་གྲུབ་འབྲས་ཐོབ་ཡོད།

བོད་ཀྱི་བྲག་གསུམ་མཚོའི་གཞོན་ནུ་ལོ་ཆུང་བྱེད་སྒོའི་སྒར་ས་དང་། བོད་ཀྱི་རྩ་ཆེའི་སྲོག་ཆགས་དང་རྩི་ཤིང་རྟེན་མཛོད་ཁང་། མཚོ་མཇུག་གྲོང་ཚོའི་སྐྱེ་ཁམས་གླིང་གི་ཉམས་ལེན་རྟེན་གཞི་བཅས་སུ་སློབ་གྲྭ་འབྲིང་ཆུང་14ནས་ཡོང་བའི་ལོ་ཆུང་བྱིས་པ་52ཀྱིས་མཉམ་དུ་སློབ་སྦྱོང་དང་། འཚོ་བ། སྤེལ་རེས་བཅས་བྱས་པ་བརྒྱུད་རང་ཚུགས་རང་བརྟེན་དང་མཐུན་སྒྲིལ་མཉམ་ལས་དང་དེ་བཞིན་མི་དང་འབྲེལ་གཏུག་བྱེད་པའི་ནུས་པ་ཆེ་རུ་ཕྱིན་ཡོད་པ་དང་། མི་རིགས་མི་འདྲ་བའི་ཡུལ་སྲོལ་གོམས་གཤིས་མྱོང་ཚོར་ཐུབ་པ། མི་རིགས་མི་འདྲ་བའི་ལོ་ཆུང་བྱིས་པའི་དབར་གྱི་མཛའ་གཅུགས་ཟབ་ཏུ་ཕྱིན་པ་བཅས་བྱུང་ཡོད་ལ། བྱིས་པའི་ཕོ་བྲང་གི་བྱེད་སྒོ་རེ་རེས་བྱིས་པ་ཚོར་དགའ་བ་ཚད་མེད་སྦྱིན་ཡོད། “བྱིས་པའི་ཕོ་བྲང་གིས་ངའི་ཕྲུ་གུར་ཕྱིའི་འཚོ་བ་ཉམས་ལེན་བྱེད་པའི་གོ་སྐབས་གནང་བར་ཐུགས་རྗེ་ཆེ་ཞུ་རྒྱུ་ཡིན། དངུལ་སྐར་ལི་གཅིག་ཀྱང་གཏོང་དགོས་མེད་པ་མ་ཟད། ད་དུང་ཕྲུ་གུ་ཚོའི་བསམ་འདུན་ཡང་འགྲུབ་ནས་མཐོང་རྒྱ་ཆེ་རུ་ཕྱིན་སོང”ཞེས་བྱེད་སྒོར་ཞུགས་མཁན་སློབ་མའི་ཁྱིམ་བདག་སྒྲོལ་མས་སེམས་འགུལ་ཆེན་པོ་ཐེབས་བཞིན་དུ་བཤད།