འདི་ནི་མེ་འཁོར་གྱི་ལས་དོན་པས་ཕྲུ་གུར་ལྟ་རྟོག་བྱེད་བཞིན་པ།

འདི་ནི་མེ་འཁོར་གྱི་ལས་དོན་པས་འགྲུལ་པར་རྨ་རས་དཀྲི་བཞིན་པ།

འདི་ལོའི་རྒྱལ་སྟོན་དང་ཟླ་མཆོད་དུས་ཆེན་མཉམ་དུ་འཁེལ་ཅིང་། གསར་འགོད་པས་མཚོ་བོད་ཚོགས་པ་ཀུང་སི་ནས་ཤེས་རྟོགས་བྱུང་བར། “དུས་ཆེན་གཉིས”རིང་གི་ལྕགས་ལམ་སྐྱེལ་འདྲེན་དེ་ཟླ་9ཚེས་27ཉིན་ནས་འགོ་བཙུགས་ཏེ་ཟླ་10ཚེས་8ཉིན་མཇུག་འགྲིལ་རྒྱུ་ཡིན་པ་དང་། མཚོ་བོད་ཚོགས་པ་ཀུང་སིས་སྔོན་དཔག་ལྟར་ན་འགྲུལ་པ་མི་ཐེངས་ཁྲི་63སྐྱེལ་འདྲེན་བྱ་རྒྱུ་རེད། སྔོན་དཔག་ལྟར་ན་འགྲུལ་རྒྱུན་མང་ཤོས་ནི་ཟླ་9ཚེས་28དང་29ཉིན་དང་ཟླ་10ཚེས་6དང་7ཉིན་རེད། མྱུར་བགྲོད་ལྕགས་ལམ་དང་། འགྲུལ་སྐྱེལ་གྱི་ཆེད་སྤྱོད་ལམ་ཐིག མྱུར་ཚད་དཀྱུས་མའི་ལམ་ཐིག་བཅས་ཚང་མར་ཡུལ་སྐོར་བྱེད་མང་ཤོས་ཀྱི་འཆར་འགོད་ལྟར་སྐྱེལ་འདྲེན་བྱ་རྒྱུ་རེད།

ཤེས་རྟོགས་བྱུང་བར་གཞིགས་ན། “དུས་ཆེན་གཉིས”རིང་མཚོ་བོད་ཚོགས་པ་ཀུང་སིས་དོ་དམ་བྱེད་ཁོངས་སུ་ལྷ་ས་ནས་ཉིང་ཁྲི་བར་དང་། ལྷ་ས་ནས་གཞིས་རྩེ་བར་གྱི་འགྲུལ་སྐྱེལ་མེ་འཁོར་ཆ་3མང་དུ་གཏོང་རྒྱུ་དང་། ཟི་ལིང་ནས་ལྷ་ས་བར་གྱི་མྱུར་ཚད་དཀྱུས་མའི་འགྲུལ་སྐྱེལ་མེ་འཁོར་ཆ་2མང་དུ་གཏོང་རྒྱུ། ཟི་ལིང་ནས་ཚྭ་ཁའི་བར་གྱི་འགྲུལ་སྐྱེལ་མེ་འཁོར་ཆ་1མང་དུ་གཏོང་རྒྱུ་བཅས་རེད། དེ་དང་ཆབས་ཅིག“དུས་ཆེན་གཉིས”རིང་འགྲུལ་པ་སྐྱེལ་འདྲེན་གྱི་ཁྱད་ཆོས་ལ་གཞིགས་ནས་སྤ་སེ་འཚོང་བའི་ཐབས་ཇུས་ལེགས་སུ་ཧུར་ཐག་བཏང་སྟེ། སྤ་སེ་འཚོང་སའི་སྒེའུ་ཁུང་སྟབས་བསྟུན་ལེགས་སྒྲིག་གིས་ཉིན་མཚན་དབྱེར་མེད་དུ་སྤ་སེ་འཚོང་རྒྱུ་དང་། སྐྱེལ་འདྲེན་བྱེད་ཤུགས་ཆེ་རུ་བཏང་ནས་ཤུགས་འགྲེམས་མེ་འཁོར་མཉམ་དུ་བཀོད་སྒྲིག་དང་མང་དུ་གཏོང་རྒྱུ། མེ་འཁོར་གྱི་འཁོར་སྐྱོད་ལམ་ཐིག་བཀོད་སྒྲིག་ལུགས་མཐུན་བྱས་ནས་མེ་འཁོར་འཁོར་སྐྱོད་བྱེད་མགྱོགས་སུ་བཏང་སྟེ“ཉིན་རེར་འཆར་འགོད་རེའི”ལམ་སྲོལ་འདོན་སྤེལ་གང་ལེགས་ཀྱིས་འགྲུལ་སྐྱེལ་གྱི་འགྱུར་ལྡོག་ལ་གཞིགས་ནས་དུས་ཐོག་ཏུ་འཁོར་སྒྲོམ་མང་དུ་གཏོང་རྒྱུ་བཅས་རེད།