ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་དོན་འཁྱོལ་གཏིང་ཟབ་བྱེད་ཆེད། 《སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ལས་དོན་སྲོལ་ཡིག》གཞིར་བཟུང་། ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ཚོཌ་ཆུང་དྲུག་པ(གཤམ་དུ་ལྟ་བཤེར་ཚོགས་ཆུང་དྲུག་པ་ཞེས་བསྡུ་རྒྱུ)ཡིས་བོད་རང་སྐྱོང་ལྗོངས་ལ་རེས་སྐོར་གསུམ་པའི་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་བྱས་ཡོད། 2026ལོའི་ཟླ་7ཚེས་28ཉིན། སྐབས་ཉི་ཤུ་པའི་ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་ལས་དོན་འགོ་ཁྲིད་ཚོགས་ཆུང་གི་ཚོགས་འདུ་ཐེངས་དགུ་པའི་ཐོག་ལྟ་བཤེར་སྙན་ཞུར་གྲོས་ཞིབ་བྱས་ནས་གྲོས་འཆམ་བྱུང་ཞིང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། ལྟ་བཤེར་ཚོགས་ཆུང་གིས་2026ལོའི་ཟླ་9ཚེས་29ཉིན་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་ལ་ལན་སྤྲད་པ་རེད། ལྟ་བཤེར་ཚོགས་ཆུང་གི་ཙུའུ་ཀྲང་ཡེ་ཏུང་སུང་གིས་ལྟ་བཤེར་སྙན་ཞུ་བརྡ་ཁྱབ་བཏང་བ་དང་། བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཧུའུ་ཁྲང་ཧྲེང་གིས་རྣམ་འགྱུར་མཚོན་པའི་གཏམ་བཤད་གནང་བ། རང་སྐྱོང་ལྗོངས་ཀྱི་ཀྲུའུ་ཞི་ཀརྨ་ཚེ་བརྟན་གྱིས་ཚོགས་འདུ་གཙོ་སྐྱོང་གནང་བ་རེད། ལྟ་བཤེར་ཚོགས་ཆུང་གི་ཙུའུ་ཀྲང་གཞོན་པ་ཀུའོ་ཧྥང་དང་། ལྟ་བཤེར་ཚོགས་ཆུང་གི་འབྲེལ་ཡོད་མི་སྣ། བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་འབྲེལ་ཡོད་འགོ་ཁྲིད། འབྲེལ་ཡོད་སྡེ་ཚན་དང་ས་ཁུལ་དང་གྲོང་ཁྱེར་ཁག་གི་ཏང་སྲིད་འགན་འཁུར་བློ་མཐུན་གཙོ་བོ་བཅས་ཚོགས་འདུར་ཞུགས་པ་རེད།

ལྟ་བཤེར་བྱས་རྗེས་བོད་རང་སྐྱོང་ལྗོངས་ཀྱིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་དང་བོད་ཀྱི་སྐྱེ་ཁམས་ཁོར་ཡུག་སྲུང་སྐྱོང་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་ལེན་གཏིང་ཟབ་བསྟར་བ་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་གལ་ཆེན་བརྟན་དུ་གཏོང་རྒྱུའི་ཆབ་སྲིད་ཀྱི་འགན་འཁྲི་ཏན་ཏིག་འཁུར་ནས་སྐྱེ་ཁམས་ཁོར་ཡུག་སྲུང་སྐྱོང་ལ་སྐུལ་འདེད་ཏན་ཏིག་བཏང་བར་ཕན་འབྲས་གསར་པ་ཆེ་ཙམ་ཐོབ་ཡོད་པའི་ངོས་འཛིན་བྱས་པ་རེད།

བོད་རང་སྐྱོང་ལྗོངས་ཀྱིས་ཐོག་མཐའ་བར་གསུམ་དུ་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་སློབ་སྦྱོང་དང་ལག་བསྟར་བྱ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་བཀོད་སྒྲིག་གནང་བའི་སྐྱེ་ཁམས་ཀྱི་དོན་ཆེན་དེར་དམ་འཛིན་དང་དོན་འཁྱོལ་ནན་པོ་བྱས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ། རི་འཛེག་བྱེད་སྒོའི་ཁོར་ཡུག་སྲུང་སྐྱོང་ལམ་སྲོལ་འཛུགས་པ་དང་འཐུས་སྒོ་ཚང་དུ་བཏང་ནས་ཇོ་མོ་གླང་མའི་ས་ཁོངས་ཀྱི་གད་སྙིགས་མུ་མཐུད་གཙང་མར་འཕྱག་པ་དང་། རང་སྐྱོང་ལྗོངས་ཀྱི་འཁྱགས་རོམ་སྲུང་སྐྱོང་སྲོལ་ཡིག་དང་འཆར་འགོད་བཟོས་པ་དང་། འཁྱགས་རོམ་སྲུང་སྐྱོང་གི་མིང་གཞུང་ཁྱབ་བསྒྲགས་བྱས་ཏེ་འཁྱགས་རོམ་223ལ་རིམ་པ་ཕྱེ་ནས་སྲུང་སྐྱོང་བྱས་པ། ཀའོ་ལི་ཀུང་རི་བོ(དཔའ་རྟུལ་ལ)ས་ཁུལ་གྱི་སྐྱེ་དངོས་སྐྱེ་ཁམས་སྲུང་སྐྱོང་འཆར་འགོད་བཟོས་ནས་སྐྱེ་དངོས་ཀྱི་སྣ་མང་རང་བཞིན་ལ་སྲུང་སྐྱོང་དང་བདེ་འཇགས་ཉེན་ཟོན་ལས་དོན་ལ་སྐུལ་འདེད་ཧུར་ཐག་བཏང་བ། ཨར་སྐྲུན་གད་སྙིགས་གྲལ་བཤེར་བཅོས་སྒྲིག་བྱས་ནས་ཐོན་ཁུངས་ཅན་གྱི་བེད་སྤྱོད་བྱ་ཡུལ་འཛུགས་སྐྲུན་ལ་སྐུལ་འདེད་བཏང་ཡོད། 

སྐྱེ་ཁམས་སྲུང་སྐྱོང་དང་སླར་གསོའི་གཙོ་གནད་འདུ་འགོད་ལ་མུ་མཐུད་སྐུལ་འདེད་བཏང་བས་ལྷ་ཀླུ་འདམ་རའི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་གྱི་སྐྱེ་ཁམས་སླར་གསོའི་རྣམ་གྲངས་དེ“རི་ཆུའི་འདུ་འགོད”ཀྱི་རྒྱལ་ཡོངས་ཀྱི་དཔེ་མཚོན་རྣམ་གྲངས་ནང་བདམས་ཡོད། ལྷོ་རི་བྱང་རིའི་སྔོ་འགྱུར་ལས་གྲྭ་གཙོ་གནད་དུ་བྱས་པའི་རྒྱལ་ཁབ་ས་ཆ་སྔོ་འགྱུར་བྱ་སྤྱོད་ལག་ལེན་ཤུགས་ཆེན་བསྟར་ཏེ་ནགས་བཟོ་མུའུ་ཁྲི་133.7བྱས་ཡོད། རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་སྐྲུན་མགྱོགས་སུ་བཏང་ནས་2025ལོར་ནུས་རྒྱུ་གཙང་མའི་གློག་གཏོང་ཚད་ཀྱིས་98%བཟུང་ཡོད། “གཙང་པོ་དང་ཆུ་བོའི་ཆུ་འགོ་སྲུང་སྐྱོང”སོགས་བོད་ཀྱི་ཁྱད་ཆོས་ལྡན་པའི་སྦགས་བཙོག་འགོག་བཅོས་ཀྱི་འགག་སྒྲོལ་ལས་དོན་སྤེལ་ཞིང་། གནམ་མཚོ་དང་། ཉང་ཆུ། སྐྱིད་གྲོང་གཙང་པོ་བཅས་རྒྱལ་ཡོངས་ཀྱི་མཛེས་སྡུག་ལྡན་པའི་གཙང་པོ་དང་མཚོ་ཕུལ་བྱུང་དཔེ་མཚོན་གྱི་གྲས་སུ་བདམས་པ་དང་། གཙང་པོ་དང་ཆུ་བོ་དང་མཚོ་ཡི་ཆུ་སྤུས་IIIརིགས་སུ་སླེབས་པའམ་ཡང་ན་དེ་ལས་ལེགས་པའི་བསྡུར་གྲངས་བཟུང་ཚད་100%ཟིན་པ། གནམ་གཤིས་ལེགས་པའི་ཉིན་གྲངས་བསྡུར་ཚད་99%ཡན་ཟིན་ཡོད། བོད་ནི་སྔར་བཞིན་འཛམ་གླིང་ཐོག་སྐྱེ་ཁམས་ཁོར་ཡུག་གི་སྤུས་ཚད་ལེགས་ཤོས་ཀྱི་ས་ཁོངས་ཀྱི་གྲས་ཤིག་ཡིན་པ་དང་མི་རིགས་ཁག་གི་མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་མུ་མཐུད་ཆེ་རུ་ཕྱིན་ཡོད།

བོད་རང་སྐྱོང་ལྗོངས་ཀྱིས་ད་ཐེངས་ཀྱི་ལྟ་བཤེར་ལས་དོན་ལ་ཚད་མཐོའི་མཐོང་ཆེན་བྱས་ཏེ་ལྟ་བཤེར་བྱེད་ཀྱིན་དག་ཐེར་དང་འཕྲལ་སྒྲུབ་འཕྲལ་བཅོས་བྱས་ཤིང་། རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགན་འཁུར་བློ་མཐུན་གཙོ་བོས་ས་ཡུལ་དངོས་སུ་བསྐྱོད་དེ་དག་ཐེར་ལ་མཛུབ་ཁྲིད་དང་། ལྟ་སྐུལ། སྐུལ་འདེད་བཅས་བྱས་ཡོད། 2026ལོའི་ཟླ་7པའི་ཟླ་མཇུག་བར། ལྟ་བཤེར་ཚོགས་ཆུང་གིས་བསྒྲུབ་རྒྱུར་རྩིས་སྤྲད་པའི་མང་ཚོགས་ཀྱིས་ཐེར་འདོན་བྱས་པའི་གནད་དོན་795ཡི་ཁྲོད་གནད་དོན་736ཐག་གཅོད་བྱས་ཟིན་པའམ་ཡང་ན་དུས་མཚམས་རང་བཞིན་གྱི་ཐག་གཅོད་ཐུབ་ཡོད།

ལྟ་བཤེར་བྱས་རྗེས་བོད་རང་སྐྱོང་ལྗོངས་ཀྱི་སྐྱེ་ཁམས་ཁོར་ཡུག་སྲུང་སྐྱོང་ལ་གྲུབ་འབྲས་གསར་པ་གང་ཙམ་ཐོབ་ཡོད་མོད། འོན་ཀྱང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་བསྡུར་བ་དང་། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་གལ་ཆེན་གྱི་འགན་འཁྲི་དང་ལས་འགན་དང་བསྡུར་བ། མཛེས་སྡུག་ལྡན་པའི་སྐྱེ་ཁམས་ཁོར་ཡུག་ལ་བཅངས་པའི་མི་དམངས་མང་ཚོགས་ཀྱི་དགོས་མཁོ་དང་བསྡུར་བ་བཅས་བྱས་ཚེ། ལས་དོན་ཐད་ད་དུང་ཧེ་བག་ཡོད་པ་མ་ཟད། སྐྱེ་ཁམས་ཁོར་ཡུག་གི་མངོན་གསལ་དོད་པའི་གནད་དོན་ཁག་གཅིག་ད་དུང་ཐག་གཅོད་བྱེད་དགོས་ཀྱི་འདུག་ཅེས་བསྟན་པ་སྟེ།

གཅིག་ནས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་ལེན་བསྟར་བ་དང་ད་དུང་ཧེ་བག་ཡོད་ཅིང་། ས་གནས་ཁག་གཅིག་གི་རྒྱུན་གཏན་གྱི་ལས་ཀའི་ཚད་གཞི་མཐོ་པོ་མེད་པ་དང་། ལྟ་འདོམས་བྱེད་ཤུགས་ཆུང་བ། གནོན་ཤུགས་སྤྲོད་ཚད་དང་འགན་འཁྲི་དོན་འཁྱོལ་བྱེད་ཚད་རིམ་བཞིན་ཆུང་དུ་འགྲོ་བ་བཅས་ཀྱི་གནད་དོན་ཅུང་མངོན་གསལ་དོད་པོ་ཡོད། ལས་བྱེད་པ་རེ་ཟུང་གི་ཡང་དག་པའི་སྲིད་དོན་ལས་རྗེས་ལྟ་བ་འཛུགས་ཚད་བརྟན་པོ་མེད་པས་འཕེལ་རྒྱས་དང་སྲུང་སྐྱོང་དབར་གྱི་འབྲེལ་བ་ཐག་གཅོད་ཡང་དག་བྱེད་ཐུབ་མེད། ས་གནས་དང་སྡེ་ཚན་ཁག་གཅིག་གིས་ཆུའི་ཐོན་ཁུངས་གསར་སྤེལ་དང་སྲུང་སྐྱོང་ལ་སྤྱི་འདོམས་བྱེད་སྐབས་བློ་ཐག་ཆོད་པོ་མེད་ཅིང་། ཉེ་བའི་ལོ་ཤས་རིང་སྔར་བཞིན་བླང་བྱ་ལས་འགལ་ཏེ་འབྲེལ་ཡོད་རྣམ་གྲངས་ལག་ལེན་བསྟར་བར་རྒྱུན་མཐུད་སྐུལ་འདེད་གཏོང་གི་ཡོད། ལྷོ་ཁ་གྲོང་ཁྱེར་སྣེ་གདོང་ཆུས་ཀྱིས་ཆུ་ལམ་རྒྱུད་དུ་ཁྲིམས་འགལ་ངང་ཟོག་འགྲུལ་མཛོད་ཁང་དང་དེའི་ལྷན་སྦྱར་སྒྲིག་བཀོད་བསྐྲུན་པ་དང་། ནག་ཆུ་སོགས་ས་ཁུལ་དང་གྲོང་ཁྱེར་གྱི་གཙོ་གནད་བྱེ་འགྱུར་རྫོང་ཁག་གཅིག་གིས་བྱེ་འགོག་བྱེ་བཅོས་ཀྱི་འཆར་འགོད་བཟོས་མེད་པས་བྱེ་བཅོས་ལས་དོན་རྗེས་སུ་ལུས་པ། རང་སྐྱོང་ལྗོངས་ཀྱིས་ཐོག་མཐའ་བར་གསུམ་དུ་གཏན་འབེབས་ལྟར་འཁྱགས་ས་སྲུང་སྐྱོང་སྡེ་ཚན་གྱི་འགན་འཁྲིའི་ལས་བགོས་ཁ་གསལ་བཟོས་མེད་པ་དང་འཁྱགས་སའི་ཁུལ་གྱི་སྲུང་སྐྱོང་ཁྱབ་ཁོངས་དབྱེ་འབྱེད་སོགས་ཀྱི་ལས་དོན་སྤེལ་མེད་པ། ས་གནས་ཁག་གཅིག་ཏུ་ཨར་སྐྲུན་གད་སྙིགས་ཐོན་ཁུངས་ཅན་དུ་བསྒྱུར་ནས་སྤྱོད་པའི་སྒྲིག་བཀོད་མི་འདང་བ་དང་། ཨར་སྐྲུན་རྣམ་གྲངས་ཁག་གཅིག་གིས་ཨར་སྐྲུན་གད་སྙིགས་གཙང་སེལ་གྱི་ཇུས་གཞི་བླང་བྱ་ལྟར་ཐོ་འགོད་སྙན་སེང་མ་ཞུས་པར་ཨར་སྐྲུན་གད་སྙིགས་ཁྲིམས་འགལ་ངང་གཤོ་བའི་སྣང་ཚུལ་ཡང་ཡང་ཐོན་པ་བཅས་རེད།

གཉིས་ནས་སྐྱེ་ཁམས་སྲུང་སྐྱོང་ལ་སྐུལ་འདེད་གཏོང་ཤུགས་འདང་གི་མེད་ཅིང་། ས་གནས་ཁག་གཅིག་ཏུ་ཁྲིམས་འགལ་ངང་རྩྭ་ཐང་བཟུང་སྤྱོད་དང་རྩྭ་ཐང་སྟེང་ཕྱུགས་རིགས་ཚད་ལས་བརྒལ་ནས་འཚོ་བ་སོགས་ཀྱི་གནད་དོན་ཡོད་པ་དང་། ཁེ་ལས་ཁག་གཅིག་གིས་ཁྲིམས་འགལ་ངང་རྩྭ་ཐང་གསར་སྦོལ་དང་བཟུང་སྤྱོད་བྱས་ནས་རྩྭ་ཐང་ལ་གཏོར་སྐྱོན་བཏང་བ་མ་ཟད་ཡུན་རིང་བཅོས་སྒྲིག་བྱས་མེད་པ། གཞུང་ལམ་ཨར་སྐྲུན་ལས་གྲྭ་ཁག་གཅིག་གི་ས་རྒྱུ་ལེན་ས་དང་། རྒྱུ་ཆ་ལེན་ས། རྒྱུ་ཆ་སྤུངས་ས་བཅས་མང་པོ་ཞིག་གིས་འབྲེལ་ཡོད་འགྲོ་ལུགས་གཉེར་མེད་པ་དང་ཨར་སྐྲུན་བྱེད་རིང་སྒྲིག་འགལ་ངང་ལམ་རྒྱུད་ཀྱི་སྤང་ལྗོངས་སུ་ས་སྙིགས་གང་བྱུང་དུ་བཤོ་བ། ཆུས་དང་རྫོང་ཁག་གཅིག་གི་རྩྭ་ཕྱུགས་དོ་སྙོམས་ལས་དོན་སྤེལ་ཤུགས་སྔར་བཞིན་མི་འདང་བ་དང་། རྩྭ་ཁ་བཀག་ཁུལ་དང་རྩྭ་ཁ་གསོ་ཁུལ་དུ་ཕྱུགས་འཚོ་བའི་སྣང་ཚུལ་ཡོད་པ་དང་རྩྭ་གསོ་བདག་སྐྱོང་བྱ་ཐབས་དོན་འཁྱོལ་ནན་པོ་མ་བྱུང་བ། རང་བྱུང་ནགས་ཚལ་ལ་གཏོར་སྐྱོན་ཕོག་པའི་གནད་དོན་མང་བ་དང་། ཁེ་ལས་ཁག་གཅིག་གིས་ཤིང་སྡོང་གཅོད་པ་དང་ནགས་ས་བཀོལ་སྤྱོད་ཀྱི་ཆོག་མཆན་མ་ཐོབ་པར་རང་དགར་ཤིང་སྡོང་བཅད་པ། ཁེ་ལས་ཁག་གཅིག་གིས་རང་དགར་འདམ་ར་བཟུང་སྤྱོད་བྱས་ཏེ་སྒྲིག་འགལ་ངང་ས་སྤུངས་པ་དང་ཨར་སྐྲུན་བྱས་ནས་འདམ་རའི་སྐྱེ་ཁམས་མ་ལག་ལ་གཏོར་སྐྱོན་བཏང་བ། ས་ཆ་ཁག་གཅིག་གིས་ཁྲིམས་འགལ་ངང་ཨར་སྐྲུན་གད་སྙིགས་སྤྱད་དེ་ཆུ་རགས་བརྒྱབ་པ་དང་རྣམ་གྲངས་ཀྱིས་ཆུ་ལམ་བཙན་བཟུང་བྱས་པ། ས་མཐོའི་མཚོ་ཁག་གཅིག་ལ་དོ་དམ་ཚོད་འཛིན་ནན་པོ་བྱས་མེད་པས་ཁྲིམས་འགལ་ངང་ལྟེ་བའི་ཁུལ་དུ་བསྐྱོད་པའི་གནད་དོན་མང་པོ་ཐོན་ཏེ་མཚོའི་སྐྱེ་ཁམས་མ་ལག་ལ་གཏོར་སྐྱོན་ཕོག་པ་བཅས་རེད།

གསུམ་ནས་ཁོར་ཡུག་གི་རྨང་གཞིའི་སྒྲིག་བཀོད་འཛུགས་སྐྲུན་དོ་དམ་ཐད་ཞན་ཆ་ཡོད་ཅིང་། ས་ཁུལ་དང་གྲོང་ཁྱེར་ཁག་གཅིག་གི་བཙོག་ཆུའི་མདོང་དྲ་འཛུགས་སྐྲུན་དང་སྒྱུར་བཀོད་གནད་ལ་འཁེལ་པོ་མ་བྱུང་བ་དང་བཙོག་ཆུ་ཐད་འབུད་ཀྱི་གནད་དོན་མང་པོ་ཡོད་པ་དང་། ས་ཁུལ་དང་གྲོང་ཁྱེར་ཁག་གཅིག་གི་ཆུ་འབུད་མདོང་དྲ་བཅོས་སྒྲིག་རྣམ་གྲངས་འཛུགས་སྐྲུན་རྗེས་སུ་ལུས་ནས་གྲོང་ཁུལ་གཙོ་བོར་སྔར་བཞིན་མདོང་དྲ་མེད་པའི་ཁུལ་ཡོད་པ་དང་འཚོ་བའི་བཙོག་ཆུ་ཁག་གཅིག་གཙང་སེལ་ནུས་ལྡན་ཐུབ་མེད་པ། བཙོག་ཆུའི་མདོང་དྲར་གཏོར་སྐྱོན་ཕོག་པའི་གནད་དོན་མངོན་གསལ་དོད་པ་དང་། ཆུ་བོ་དང་ས་འོག་ཆུ་མདོང་དྲ་བརྒྱུད་བཙོག་ཆུའི་མདོང་དྲར་སིམ་ཏེ་བཙོག་ཆུ་གཙང་གསིང་བཟོ་གྲྭར་སླེབས་པའི་བཙོག་ཆུའི་གར་ཚད་དམའ་པོ་ཆགས་པ། ས་གནས་ཁག་གཅིག་གི་འཚོ་བའི་བཙོག་ཆུ་གཙང་གསིང་སྒྲིག་བཀོད་ཚད་གཞི་མི་འདྲ་བའི་སྒོ་ནས་ཐེག་ཚད་ལས་བརྒལ་ཏེ་སྤྱོད་པ་དང་། བཙོག་ཆུའི་གར་ཚད་དམའ་བ། སྒྲིག་བཀོད་རྒྱུན་གཏན་ལྟར་འཁོར་སྐྱོད་མ་ཐུབ་པ། ཚད་གཞི་ལས་བརྒལ་ནས་འབུད་པ། ཁྲིམས་འགལ་ངང་བཙོག་འབུད་ཆུ་སྒོ་བཟོ་བ་སོགས་ཀྱི་གནད་དོན་ཡོད། སྡེ་ཚན་དང་ས་གནས་ཁག་གཅིག་གི་སྤྱི་འདོམས་འཆར་འགོད་རྗེས་སུ་ལུས་པ་དང་། འཚོ་བའི་གད་སྙིགས་གཙང་སེལ་རྣམ་གྲངས་དོན་འཁྱོལ་བྱེད་འགོར་བ། འཚོ་བའི་གད་སྙིགས་སྦས་ས་ཁག་གཅིག་ཁེངས་པ་དང་ད་དུང་ཁག་གཅིག་ཁེངས་གྲབས་ཡོད་པ་བཅས་རེད། ཆབ་མདོ་གྲོང་ཁྱེར་དཔལ་འབར་རྫོང་གི་འཚོ་བའི་གད་སྙིགས་སྦས་ཡུལ་དང་པོ་ཁེངས་པའི་དབང་གིས་བེད་སྤྱོད་གཏོང་མཚམས་བཞག་པ་དང་འཚོ་བའི་གད་སྙིགས་སྦས་ཡུལ་གཉིས་པར་འགྲོ་ལུགས་ཆ་ཚང་པོ་མེད་པའི་དབང་གིས་སྤྱོད་མཚམས་བཞག་ཡོད།

བཞི་ནས་གཙོ་གནད་དོ་ཁུར་བྱེད་དགོས་པའི་སྐྱེ་ཁམས་ཁོར་ཡུག་གི་གནད་དོན་གཞན་དག་ཡོད་ཅིང་།འཛུགས་སྐྲུན་རྣམ་གྲངས་ཁག་གཅིག་གི་ཨར་སྐྲུན་བརྒྱུད་རིམ་ནང་སྐྱེ་ཁམས་ཁོར་ཡུག་སྲུང་སྐྱོང་བྱེད་ཐབས་དོན་འཁྱོལ་ནན་པོ་མ་བྱུང་བ་དང་། ས་གནས་ཀྱིས་མཐུན་སྦྱོར་སྲུང་སྐྱོང་དང་ལྟ་འདོམས་བྱེད་ཤུགས་མི་འདང་བ། སྒྲིག་འགལ་གྱི་འཛུགས་སྐྲུན་རྣམ་གྲངས་ཁག་གཅིག་ཆུ་ལམ་དང་ཐག་ཉེ་བ། ཐལ་རྡུལ་འཚུབ་པ་དང་འཛུགས་སྐྲུན་གད་སྙིགས་དོ་དམ་དང་ཚོད་འཛིན་ཡག་པོ་མ་བྱུང་བ་བཅས་ཀྱི་རྐྱེན་པས་ས་ཁོངས་ཀྱི་སྐྱེ་ཁམས་ཁོར་ཡུག་ལ་ཤུགས་རྐྱེན་ངན་པ་ཐེབས་ཡོད། ལྗོངས་ཡོངས་སུ་འཛུགས་གཏོད་ཀྱི་ཆ་རྐྱེན་འཛོམས་པའི་ཐོན་སྐྱེད་གཏེར་རི་ཆེ་འབྲིང་ཁྲོད་འཆར་གཞི་ལྟར་ལྗང་མདོག་གཏེར་རི་གཏོད་མཁན་ཕྱེད་ཀ་ཙམ་ཡང་ཟིན་གྱི་མེད། རང་སྐྱོང་ལྗོངས་ཀྱི་སྐྱེ་དངོས་སྣ་མང་རང་བཞིན་སྲུང་སྐྱོང་ལས་དོན་གྱི་ལམ་སྲོལ་ད་དུང་འཐུས་སྒོ་ཚང་པོ་མེད་པ་དང་། གདིང་གཞི་གསལ་པོ་མེད་པ། ལྟ་ཞིབ་ཚད་ལེན་དང་དཔྱད་དཔོག་མ་ལག་འཐུས་སྒོ་ཚང་པོ་མེད་པ་སོགས་ཀྱི་གནད་དོན་ཡོད་ཅིང་། བདག་ཏུ་མ་བཟུང་བའི་ཉ་རིགས་སྲུང་སྐྱོང་དང་ཕྱི་ཕྱོགས་ནས་ཡོང་བའི་དངོས་རིགས་ཀྱི་གནོད་འཚེ་སྔོན་འགོག་དང་ཚོད་འཛིན་སོགས་ཀྱི་ལས་དོན་ཐད་ད་དུང་ཧེ་བག་ཡོད།

ལྟ་བཤེར་བྱས་རྗེས་བོད་རང་སྐྱོང་ལྗོངས་ཀྱིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་དུ་ཏན་ཏིག་བཏང་ནས་མཚོ་བོད་ས་མཐོའི་སྐྱེ་ཁམས་སྲུང་སྐྱོང་དང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བའི་ཐད་གྲུབ་འབྲས་གསར་པ་རྒྱུན་ཆད་མེད་པར་ཐོབ་པར་བྱེད་དགོས། རི་སྔོན་ཆུ་དྭངས་གསེར་དངུལ་རི་ལས་ལྷག་པའི་འདུ་ཤེས་བརྟན་པོ་འཛུགས་པ་དང་། བཅའ་ཁྲིམས་དང་སྒྲིག་སྲོལ་ལྟར་འབབ་རྒྱུད་ཀྱི་གསར་སྤེལ་བཅོས་སྐྱོང་ལ་ཚན་རིག་དང་མཐུན་པའི་སྒོ་ནས་སྐུལ་འདེད་གཏོང་བ། རི་ཆུ་ནགས་ཞིང་མཚོ་རྩྭ་བྱེ་འཁྱགས་བཅས་ལ་གཞི་གཅིག་ཅན་གྱི་སྲུང་སྐྱོང་དང་བརྒྱུད་རིམ་ལྡན་པའི་བཅོས་སྐྱོང་མཐའ་འཁྱོངས་བྱེད་པ། མཚོ་བོད་ས་མཐོའི་སྐྱེ་དངོས་སྣ་མང་རང་བཞིན་སྲུང་སྐྱོང་ལ་སྐུལ་འདེད་གཏོང་བ་བཅས་བྱེད་དགོས། སྦགས་བཙོག་འགོག་བཅོས་ཀྱི་འགག་སྒྲོལ་ལ་རྒྱུན་མཐུད་སྐུལ་འདེད་གཏིང་ཟབ་གཏོང་བ་དང་། བཙོག་ཆུའི་མདོང་དྲ་འཛུགས་སྐྲུན་དང་སྒྱུར་བཀོད་བྱེད་ཤུགས་ཆེ་རུ་གཏོང་བ། འཚོ་བའི་གད་སྙིགས་དང་ཨར་སྐྲུན་གད་སྙིགས་གཙང་སེལ་གྱི་སྒྲིག་བཀོད་འཛུགས་སྐྲུན་ལ་སྐུལ་འདེད་གཏོང་བ་བཅས་བྱེད་དགོས། རྣམ་གྲངས་འཛུགས་སྐྲུན་གྱི་ལྟ་འདོམས་ལ་ཤུགས་སྣོན་བརྒྱབ་ནས་མི་དམངས་མང་ཚོགས་ཉེ་འགྲམ་གྱི་སྐྱེ་ཁམས་ཁོར་ཡུག་གི་གནད་དོན་ཐག་གཅོད་ཏན་ཏིག་བྱེད་དགོས། འགན་འཛོལ་འགན་ཤོར་གྱི་གནད་དོན་ཐད་འབྲེལ་ཡོད་སྡེ་ཚན་ལ་སྔར་བས་བརྟག་དཔྱད་གཏིང་ཟབ་བྱེད་དགོས་པའི་འགན་དཀྲིས་ནས་འབྲེལ་ཡོད་བླང་བྱ་གཞིར་བཟུང་། འགན་འཁྲི་བདའ་འདེད་ནན་པོ་དང་། གནད་སྨིན། ནུས་ལྡན་བཅས་གཏོང་དགོས་པའི་བླང་བྱ་བཏོན་ཡོད།

ལྟ་བཤེར་བྱས་རྗེས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལྟ་བཤེར་སྙན་ཞུ་གཞིར་བཟུང་། 《ཀྲུང་དབྱང་སྐྱེ་ཁམས་ཁོར་ཡུག་སྲུང་སྐྱོང་ལྟ་བཤེར་གྱི་དག་ཐེར་ལས་དོན་སྤེལ་ཐབས》ཀྱི་བླང་བྱར་གཞིགས་ནས། དག་ཐེར་ཇུས་གཞི་དུས་ཚོད་དམ་འཛིན་གྱིས་ཞིབ་འཇུག་བྱས་ནས་བཟོས་ཏེ་ལས་ཀའི་ཉིན་མོ་45ཡི་ནང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་ལ་འབུལ་དགོས། དག་ཐེར་གྱི་ཇུས་གཞི་དང་དག་ཐེར་བྱས་ཚུལ་འབྲེལ་ཡོད་གཏན་འབེབས་ལྟར་སྤྱི་ཚོགས་ལ་ཡོངས་བསྒྲགས་བྱེད་དགོས་པའི་ནན་བཤད་བྱས་ཡོད།

ལྟ་བཤེར་ཚོགས་ཆུང་གིས་ད་དུང་ཤེས་རྟོགས་བྱུང་བའི་སྐྱེ་ཁམས་ཁོར་ཡུག་ལ་གནོད་འཚེ་བཏང་བའི་འགན་འཁྲི་བདའ་འདེད་ཀྱི་གནད་དོན་གསེད་བཀྲོལ་བྱས་པ་དང་། འབྲེལ་ཡོད་གཏན་འབེབས་ལྟར་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་ལ་ཐག་གཅོད་བྱ་རྒྱུར་རྩིས་སྤྲད་ཡོད།