གསར་འགོད་པས་རང་སྐྱོང་ལྗོངས་རིག་གནས་དང་ཡུལ་སྐོར་ཐིང་ནས་ཤེས་རྟོགས་བྱས་པར། 2024ལོར་རང་ལྗོངས་ཀྱིས“རིག་གནས་ལ་བརྟེན་ནས་ཡུལ་སྐོར་འཕེལ་རྒྱས་གཏོང་བ་དང་ཡུལ་སྐོར་ལ་བརྟེན་ནས་རིག་གནས་ཀྱི་རྣམ་པ་མངོན་པར་བྱེད་པའི”འཕེལ་རྒྱས་ཀྱི་འདུ་ཤེས་མུ་མཐུད་ཟབ་ཏུ་བཏང་བས་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ཀྱི་གོམ་སྟབས་མངོན་གསལ་དོད་པོས་མགྱོགས་སུ་ཕྱིན་ཡོད། ལྗོངས་ཡོངས་ཀྱི་རིག་གནས་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་111ལྷག་ཙམ་ཟིན་པ་དེ་དུས་མཚུངས་ལས་23.8%འཕར་བ་དང་། ཡུལ་སྐོར་བ་མི་ཐེངས་ཁྲི་6389ལྷག་ཙམ་སྣེ་ལེན་ཞུས་པ་དང་ཡུལ་སྐོར་གྱི་འགྲོ་སོང་དངུལ་འབོར་སྒོར་དུང་ཕྱུར་745ལྷག་ཙམ་ཟིན་པ་དེ་དུས་མཚུངས་ལས་15.8%དང་14.5%སོ་སོར་འཕར་ཏེ་བོད་ཀྱི་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་སྐས་རིམ་གསར་པར་སླེབས་ཡོད་པ་རེད།

ཤེས་རྟོགས་བྱུང་བར་གཞིགས་ན། 2024ལོར་བོད་སྐྱོར་ལས་བྱེད་ཤེས་ལྡན་པའི་ལེགས་ཆ་དང་ཐོན་ཁུངས་མཐུན་སྦྱོར་ལ་བརྟེན་པས་བོད་ཀྱི་རིག་རྩལ་གསར་རྩོམ་ལ་གྲུབ་འབྲས་གཡུར་དུ་ཟ་བ་ཐོབ་ཡོད། གླུ་གར《མཁའ་དབྱིངས་ཀྱི་སྐལ་བཟང་མེ་ཏོག》དང་། ལྷ་མོ《དཀར་གཙང་མཇལ་དར》 གཏམ་བརྗོད་ཟློས་གར《བོད་སྐྱོད་པ་རྒན་གྲས》དང་། 《ལས་གནས་བརྟན་སྲུང》 《ཇོ་མོ་གླང་མ》སོགས་བརྩམས་ཆོས་ཕྱོགས་མང་པོའི་མཐུན་སྦྱོར་འོག་འཁྲབ་སྟོན་གྱི་ནང་དོན་ཕུན་སུམ་ཚོགས་སུ་ཕྱིན་ཡོད།

སྤུས་རྟགས་འཛུགས་སྐྱོང་ཐད་ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་ཁག་གིས་མཉམ་དུ་འབད་བརྩོན་བྱས་པ་བརྒྱུད་བོད་ཀྱི་ཡུལ་སྐོར་གྱི་ཤུགས་རྐྱེན་རྒྱུན་ཆད་མེད་པར་ཆེ་རུ་འགྲོ་བར་སྐུལ་འདེད་ཐེབས་ཡོད། “གངས་རིན་པོ་ཆེ་དང་མ་ཕམ་གཡུ་མཚོ”དང་། “ལོ་ངོ་སྟོང་གི་གནའ་བོའི་ཚྭ་ཞིང” བོད་ལྗོངས་རྟེན་མཛོད་ཁང་སོགས་མཛེས་ལྗོངས་ཁུལ་5Aརིམ་པའི་མཛེས་ལྗོངས་ཁུལ་དུ་གཏོད་པའི་ལས་དོན་ལ་གོ་རིམ་ལྡན་པའི་ངང་སྐུལ་འདེད་བཏང་བ་དང“རི་གཅིག་མཚོ་གཉིས”ཀྱི་ཤུལ་བཞག་རེ་ཞུའི་རྣམ་གྲངས་ལའང་རྒྱབ་སྐྱོར་ཆེན་པོ་ཐོབ་ཡོད། ཐང་བོད་གནའ་ལམ་དང་ཇ་རྟ་གནའ་ལམ་གྱི་བོད་ལྗོངས་དུམ་བུ་དེ《ཀྲུང་གོའི་འཛམ་གླིང་རིག་གནས་ཤུལ་བཞག་གི་གྲ་སྒྲིག་མིང་གཞུང》ནང་བཅུག་ནས་འཛམ་གླིང་གིས་བོད་ཤེས་རྟོགས་བྱེད་པར་སྐར་ཁུང་གསར་པ་བཏོད་ཡོད། ས་གནས་ཀྱི་དུས་ཆེན་དང་བྱེད་སྒོ་ཁག་ཀྱང་བོད་སྐྱོར་གྱི་སྟོབས་ཤུགས་ལ་བརྟེན་ནས་སྤུས་རྟགས་རྒྱུན་མཐུད་ངང་སྟོབས་ཆེར་ཕྱིན་ཡོད། དཔེར་ན། ཧུའུ་ནན་ཞིང་ཆེན་གྱིས་མུ་མཐུད་རམ་འདེགས་བྱས་ནས་བཏོད་པའི་ཡར་ཀླུང་རིག་གནས་སྒྱུ་རྩལ་དུས་ཆེན་ཤུགས་རྐྱེན་རྒྱ་ཁྱབ་ལྡན་པའི་རིག་གནས་དང་ཡུལ་སྐོར་འདུ་ཚོགས་ཤིག་ཏུ་གྱུར་ཡོད།