ཉེ་བའི་ལོ་ཤས་རིང་ནག་ཆུ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་གཏིང་ཟབ་བྱས་ཤིང་། འདྲི་གཅོད་ཀྱི་འགན་ནུས་ལ་གཞི་ཚུགས་ཏེ་ཁྲིམས་འཛིན་གྱི་འགན་ནུས་རྒྱུན་མཐུད་བཏོན་ནས་སྐྱེ་ཁམས་ཁྲིམས་འཛིན་གྱི་སྲུང་སྐྱོང་ལམ་སྲོལ་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་དང་། སྐྱེ་ཁམས་ཁྲིམས་འཛིན་སྲུང་སྐྱོང་གི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ལ། “ཁྲིམས་སའི་འདྲི་ཞིབ་དང་་ཁྲིམས་ལུགས་ཁྱབ་གདལ”ཟུང་འབྲེལ་དང“ཡུལ་སྐོར་དང་ཁྲིམས་ལུགས་ཁྱབ་གདལ”ཟུང་འབྲེལ་བརྒྱུད་ནས། “ཆད་གཅོད་དང་ཉམས་གསོ། དྲིལ་བསྒྲགས”བཅས་ཟུང་འབྲེལ་གྱི་སྐྱེ་ཁམས་སྲུང་སྐྱོང་ལག་བསྟར་བྱས་ཏེ། ཁྲིམས་འཛིན་གྱི་སྟོབས་ཤུགས་ལ་བརྟེན་ནས་བྱང་ཐང་གི་ས་གཞི་ཆེ་མོའི་རང་བྱུང་སྐྱེ་ཁམས་སྲུང་བ་དང་། སྐྱེ་ཁམས་ཤེས་དཔལ་གྱི་མཐོ་ས་གཏོད་ཆེད་ཁྲིམས་འཛིན་གྱི་སྟོབས་ཤུགས་སྐྱེས་སུ་ཕུལ་ཡོད།

ལྷ་རི་རྫོང་མི་དམངས་ཁྲིམས་ཁང་སྙེའུ་ཤང་མི་དམངས་ཁྲིམས་རའི་ལས་བྱེད་ཉེན་རྟོག་པས་ཁམ་བུའི་མེ་ཏོག་དུས་ཆེན་གྱི་བྱེད་སྒོ་སྤེལ་ཡུལ་དུ་བསྐྱོད་ནས་བཅའ་ཁྲིམས་བློ་འདྲིའི་ལས་སྟེགས་བཙུགས་པ་དང་། ཁྲིམས་ལུགས་ཁྱབ་གདལ་ཡི་གེ་བཀལ་ནས་ནགས་ཤིང་གང་བྱུང་དུ་གཅོད་པ་དང་། ཁྲིམས་འགལ་ངང་རྔོན་རྒྱག་པ། ཆུ་ཁུངས་སྦགས་བཙོག་སོགས་ཀྱི་དཔེ་མཚོན་གྱོད་དཔེ་དང་ཟུང་འབྲེལ་གྱིས་གོ་སླ་བའི་ངང་བཅའ་ཁྲིམས་གསལ་འགྲེལ་བྱས་པ་དང་། མང་ཚོགས་ལ“རང་བྱུང་ཁམས་ལ་སྲུང་སྐྱོང་བྱེད་པ་ནི་ཁྱིམ་གཞིས་སྲུང་སྐྱོང་བྱེད་པ་ཞིག་ཡིན་པའི”སྐྱེ་ཁམས་ཤེས་དཔལ་གྱི་འདུ་ཤེས་འཛུགས་རྒྱུར་ཁྲིད་སྟོན་བྱས་ཡོད།

འབྲི་རུ་རྫོང་མི་དམངས་ཁྲིམས་ཁང་བན་དཀར་ཤང་མི་དམངས་ཁྲིམས་ར་ཡིས་ཤང་སྲིད་གཞུང་དང་མཉམ་དུ་ཁོངས་གཏོགས་ཁུལ་གྱི་ཨར་སྐྲུན་ཚན་པ་12ཀྱི་འགན་འཁུར་བ་སྒྲིག་འཛུགས་བྱས་ནས“བཅའ་ཁྲིམས་དོན་ཚན་གསལ་འགྲེལ་དང་གྱོད་དཔེ་དྲངས་ནས་ཉེན་བརྡ་གཏོང་བ”ཟུང་འབྲེལ་གྱི་བྱེད་ཐབས་སྤྱད་དེ་ཨར་སྐྲུན་ཐལ་རྡུལ་སྦགས་བཙོག་ལ་དོ་དམ་ཚོད་འཛིན་དང་། བེད་མེད་ཟོག་རོ་གཙང་སེལ། སྒྲིག་འགལ་ངང་ཨར་སྐྲུན་གད་སྙིགས་གཤོ་བ། རྩྭ་ཐང་གི་སྔོ་ཁེབས་ལ་གཏོར་བཤིག་གཏོང་བ་སོགས་ལ་དམིགས་ཏེ“སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས”ཀྱི་འདུ་ཤེས་གཙོ་གནད་ཐོག་གསལ་འགྲེལ་བྱས་ནས་ཨར་སྐྲུན་རུ་ཁག་གིས་སྐྱེ་ཁམས་སྲུང་སྐྱོང་བྱེད་པའི་ཁེ་ལས་ཀྱི་བྱེད་པོའི་འགན་འཁྲི་དང་བཅའ་ཁྲིམས་ཀྱི་འོས་འགན་གསལ་རྟོགས་ཐུབ་རྒྱུར་ཁྲིད་སྟོན་བྱས་པ་དང་། བཟོ་པ་ཚོའི་ཁོར་ཡུག་སྲུང་སྐྱོང་གི་འདུ་ཤེས་དང་ཁྲིམས་སྐྱོང་གི་འདུ་ཤེས་ཟབ་ཏུ་བཏང་ནས་ཨར་སྐྲུན་གྱི“ཁོར་ཡུག་སྲུང་སྐྱོང་གི་འགག་སྒོ”ནན་པོར་བསྲུངས་ཡོད།

ཤེས་རྟོགས་བྱུང་བར་གཞིགས་ན། གོམ་སྟབས་རྗེས་མར་ནག་ཆུ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་ནག་ཆུའི་རིན་ཐང་ཆེ་ཤོས་ནི་སྐྱེ་ཁམས་ལ་ཐུག་པ་དང་། གདིང་ཤུགས་ཆེ་ཤོས་ནི་སྐྱེ་ཁམས་ལ་ཐུག་པ། ལེགས་སྐྱེས་ཆེ་ཤོས་ཀྱང་སྐྱེ་ཁམས་ལ་ཐུག་པ་བཅས་ཀྱི་ངོས་འཛིན་རྒྱུན་མཐུད་ཟབ་ཏུ་བཏང་ནས། ས་ཁོངས་ཀྱི་ཁྱད་ཆོས་དང་ཟུང་འབྲེལ་གྱིས་ཁྲིམས་ལུགས་ཁྱབ་གདལ་གཏོང་སྟངས་གསར་གཏོད་དང་ས་ཁོངས་དེ་གའི་ཁྱད་ཆོས་དང་འཚམ་པའི་སྐྱེ་ཁམས་ཀྱི་མིང་བྱང་གཏོད་རྒྱུ་ཡིན་ཞིང་། གྱོད་དཔེ་དྲངས་ནས་ཁྲིམས་ལུགས་འགྲེལ་བཤད་ཀྱིས་སྐྱེ་ཁམས་ཉམས་གསོ་དང་ཁྲིམས་འཛིན་སྲུང་སྐྱོང་གོམ་སྟབས་གཅིག་གྱུར་དང་ཕྱོགས་མཐུན་ཤུགས་འདོན་ཐུབ་པར་བྱ་རྒྱུ་རེད།