ད་ལོའི་ཟླ་4ཚེས་2ཉིན་གྱི་ཆུ་ཚོད་0ནས་ཟླ་6ཚེས་1ཉིན་གྱི་ཆུ་ཚོད་24བར་ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱིས་ཡུལ་སྐོར་བར“ཡུལ་སྐོར་བྱ་ཡུལ་གྱི་སྤྱི་དམངས་འགན་འཁྲིའི་འགན་བཅོལ”ཉོ་རྒྱུ་ཡིན་པ།
ད་ལོའི་ཟླ་4ཚེས་2ཉིན་གྱི་ཆུ་ཚོད་0ནས། ཉིང་ཁྲི་གྲོང་ཁྱེར་བྲག་ཡིབ་ཆུས་ལ་ཁྱབ་པའི“ཡུལ་སྐོར་བྱ་ཡུལ་གྱི་སྤྱི་དམངས་འགན་འཁྲིའི་འགན་བཅོལ”ལ་དངོས་སུ་ནུས་པ་ཐོན་རྒྱུ་རེད། ཟླ་4ཚེས་2ཉིན་གྱི་ཆུ་ཚོད་0ནས་ཟླ་6ཚེས་1ཉིན་གྱི་ཆུ་ཚོད་24བར། བྲག་ཡིབ་ཆུས་སུ་ཡུལ་སྐོར་ལ་ཡོང་མཁན་ཚང་མར་མི་ལུས་བདེ་འཇགས་ཀྱི་དོན་རྐྱེན་ཉེན་ཁའི་འགན་ལེན་ཞིག་རིན་མེད་ངང་ཐོབ་རྒྱུ་རེད།
འདི་ནི་ད་ལོ་བྲག་ཡིབ་ཆུས་རིག་གནས་ཡུལ་སྐོར་ཅུས་ཀྱིས་འཚོལ་ཞིབ་ཧུར་ཐག་བྱས་ནས་ཀྲུང་གོ་མི་དམངས་རྒྱུ་ནོར་འགན་བཅོལ་མ་རྐང་ཚད་ཡོད་ཀུང་སི་ཉིང་ཁྲི་ཡན་ལག་ཀུང་སི་དང་ཐོག་མར་མཉམ་ལས་བྱས་ཏེ་སྤེལ་བའི་ཁམ་བུའི་མེ་ཏོག་དུས་ཆེན་གྱི་ཡུལ་སྐོར་བའི་མི་ལུས་བདེ་འཇགས་འགན་ལེན་བྱེད་པའི་བྱེད་སྒོ་ཞིག་རེད། དེ་ནི་རང་སྐྱོང་ལྗོངས་ཀྱི་ཁྱབ་ཁོངས་སུའང་ཐོག་མར་སྤེལ་བའི་གསར་གཏོད་ཞབས་ཞུ་ཞིག་རེད།
ཀྲུང་གོ་མི་དམངས་རྒྱུ་ནོར་འགན་བཅོལ་མ་རྐང་ཚད་ཡོད་ཀུང་སི་ཉིང་ཁྲི་ཡན་ལག་ཀུང་སི་བྲག་ཡིབ་ཆུས་ཡན་ལག་ཀུང་སིའི་ཅིང་ལི་ཀྲེང་ནཱ་ཡིས། དེ་གོང་ཀུང་སིས་དུས་ཐུང་གི་འགན་བཅོལ་འདི་འདྲ་སྤེལ་མྱོང་མེད། ད་ཐེངས་བྲག་ཡིབ་ཆུས་རིག་གནས་ཡུལ་སྐོར་ཅུས་དང་མཉམ་དུ་གྲོས་མཐུན་བྱུང་བའི་རྨང་གཞིའི་ཐོག་ཁམ་བུའི་མེ་ཏོག་དུས་ཆེན་དང་བསྟུན་ནས་གང་ལ་དེ་འཚམ་གྱིས་བཟོས་པའི་འགན་བཅོལ་རིགས་ཤིག་རེད་ཅེས་བཤད།
ཀྲེང་ནཱ་ཡིས་ངོ་སྤྲོད་བྱས་པར། འགན་འཛིན་དེས་ཁམ་བུའི་མེ་ཏོག་དུས་ཆེན་རིང་ཡུལ་སྐོར་བ་འཆི་རྨས་དང་། རྒྱུ་ནོར་གྱོང་གུན། བཅའ་ཁྲིམས་ཀྱི་འགྲོ་གྲོན་བཅས་ལ་འགན་ལེན་བྱ་ཆེད་རིམ་རྩིས་བརྒྱབ་ན་སྒོར་ཁྲི་500ཡི་གུན་གསབ་མཁོ་འདོན་བྱ་རྒྱུ་རེད། བྲག་ཡིབ་ཆུས་ཀྱིས་ཁས་ལེན་པའི་མཛེས་ལྗོངས་ཁུལ་གྱི་ཁྱབ་ཁོངས་ནང་ཡུལ་སྐོར་བྱེད་སྒོར་ཞུགས་སྐབས་འགན་བཅོལ་འགན་འཁྲིའི་ཁྱབ་ཁོངས་ཀྱི་ཐོལ་བྱུང་དོན་རྐྱེན་ཐོན་ཚེ། ཀྲུང་གོ་མི་དམངས་རྒྱུ་ནོར་འགན་བཅོལ་མ་རྐང་ཚད་ཡོད་ཀུང་སིས་གཏན་འབེབས་བཞིན་གུན་གསབ་སྤྲོད་རྒྱུ་ཡིན་ཞིང་། མི་རེར་ཐེངས་རེར་དངུལ་གྲངས་མང་ཤོས་ལ་སྒོར་ཁྲི་20འཇལ་སྤྲོད་བྱ་རྒྱུ་རེད། (ཞིབ་ཕྲའི་ངེས་བཟུང་ཚད་གཞི་དང་འཇལ་སྤྲོད་དངུལ་གྲངས་འགན་བཅོལ་དེའི་དོན་ཚན་ལ་གཞི་འཛིན་རྒྱུ) གལ་ཏེ་ཐོལ་བྱུང་དོན་རྐྱེན་ཐོན་ཚེ་ཡུལ་སྐོར་བས་དུས་ཐོག་ཏུ་ཉེ་འཁོར་གྱི་ལས་དོན་པར་རེ་ཞུ་འབུལ་ཆོག་པ་མ་ཟད། ད་དུང་ཆུ་ཚོད་24ཡི་ཞབས་ཞུའི་ཐད་སྦྲེལ་ཁ་པར་95518བརྒྱབ་ནས་བློ་འདྲི་དང་གུན་གསབ་ལེན་ཆོག
བྲག་ཡིབ་ཆུས་རིག་གནས་ཡུལ་སྐོར་ཅུས་ཀྱི་ཅུས་ཀྲང་དབྱངས་ཅན་མཚོ་མོས་གསར་འགོད་པར། ཁམ་བུའི་མེ་ཏོག་དུས་ཆེན་རིང་། བྲག་ཡིབ་ཆུས་སུ་ཡོང་བའི་ཡུལ་སྐོར་བ་ཡིན་ཕྱིན། འགན་བཅོལ་འགྲོ་ལུགས་གཉེར་དགོས་མེད་པར་འགན་བཅོལ་དེ་རིན་མེད་དུ་ལོངས་སྤྱོད་བྱེད་ཆོག་གི་ཡོད། བྱེད་ཐབས་འདི་འདྲ་བརྒྱུད། ཡུལ་སྐོར་བར་སྔར་ལས་སྤུས་ལེགས་དང་བདེ་འཇགས་ཀྱི་ཉམས་ལེན་མཁོ་འདོན་བྱས་ནས་ཚང་མ་བློ་བདེ་སེམས་སྐྱིད་ངང་ཡུལ་སྐོར་བྱེད་ཆོག་གི་ཡོད་ཅེས་བཤད།
ཤེས་རྟོགས་བྱུང་བར་གཞིགས་ན། ཉེ་བའི་ལོ་ཤས་རིང་། བྲག་ཡིབ་ཆུས་ཀྱིས་ཉིང་ཁྲིའི་སྒྱུར་བཅོས་སྒོ་དབྱེའི་སྔོན་སྤེལ་ཁུལ་གྱི་གདོང་དམག་ལ་དཔེ་བསྡུར་བྱས་ནས་རིག་གནས་ཡུལ་སྐོར་ཐོན་ལས་ཐད་བྱ་ཐབས་གསར་པ་ཡང་སེ་བཏོན་ཡོད། 2024ལོར་བྲག་ཡིབ་ཆུས་ཀྱིས་ཡུལ་སྐོར་བ་མི་ཐེངས་ཁྲི་434.82ལ་སྣེ་ལེན་ཞུས་པར། ཡུལ་སྐོར་ཕྱོགས་བསྡུས་ཡོང་འབབ་སྒོར་དུང་ཕྱུར་40.59བྱུང་ཡོད། ད་ཐེངས་ཀྱི“ཡུལ་སྐོར་བྱ་ཡུལ་གྱི་སྤྱི་དམངས་འགན་འཁྲིའི་འགན་བཅོལ”དོན་འཁྱོལ་བྱེད་པ་དེ་ནི་བྲག་ཡིབ་ཆུས་ཀྱི་ཡུལ་སྐོར་རིག་གནས་ཁྱབ་ཁོངས་ཀྱི་འགན་བཅོལ་རིགས་ཀྱི་གསར་གཏོད་ཅིག་རེད་ལ། ཡུལ་སྐོར་བ་ཁག་གཅིག་གི་ཁེ་དབང་སྲུང་སྐྱོང་གི་དཀའ་གནད་ཐག་གཅོད་བྱེད་པའི་ཚོད་ལྟ་ཡག་པོ་ཞིག་ཀྱང་རེད།