ལོ་ངོ་སྟོང་གི་ལོ་རྒྱུས་ལྡན་པའི་གནའ་གྲོང་ལྷ་ས་ནི་འོད་ལྷམ་ལྷམ་དུ་འཚེར་བའི་གངས་ལྗོངས་ས་མཐོའི་མུ་ཏིག་གཅིག་དང་འདྲ་བར་ལོ་རྒྱུས་དང་རིག་གནས་ཀྱི་འོད་སྟོང་འབར་བཞིན་ཡོད།　ལྷུན་གྲུབ་རྫོང་ནི་སྐྱེ་ཁམས་བཟང་བའི་གནས་མཆོག་ཅིག་ཡིན་པར་བརྟེན།　སྲོག་ཆགས་བགྲང་ལས་འདས་པ་དེ་གར་འཚོ་ཞིང་གནས་པ་ལས་ཕུན་སུམ་ཚོགས་པའི་སྐྱེ་ཁམས་ཐོན་ཁུངས་དང་དམིགས་བསལ་ཁྱད་ཆོས་ལྡན་པའི་རང་བྱུང་མཛེས་ལྗོངས་ཀྱིས་སྐྱེ་བོ་དུ་མའི་ཡིད་དབང་ཅིག་ཅར་དུ་འཕྲོག་བཞིན་ཡོད།

ཉེ་ཆར།　ལྷ་ས་གྲོང་ཁྱེར་མི་དམངས་སྲིད་གཞུང་གིས་གཙོ་གཉེར་བྱས་པ་དང་།　ལྷ་ས་གྲོང་ཨུད་དྲིལ་བསྒྲགས་པུའུ་དང་ལྷ་ས་གྲོང་ཁྱེར་རིག་གནས་དང་ཡུལ་སྐོར་ཅུས་དང་དེ་བཞིན་ལྷུན་གྲུབ་རྫོང་ཨུད་དང་རྫོང་སྲིད་གཞུང་གིས་གཉེར་འགན་འཁུར་བའི་སྐྱེ་ཁམས་སྒྱུ་རྩལ་མཉམ་སྤྱོད་དུས་ཚིགས་ཀྱི“དགུན་དུས་ལྷ་སར་ཡུལ་སྐོར་བྱེད”ཅེས་པའི་དྲིལ་བསྒྲགས་ཁྱབ་གདལ་བྱེད་སྒོ་དེ་ལྷུན་གྲུབ་རྫོང་སྟག་མགོ་རི་ཆུ་མཛོད་འགྲམ་དུ་གཉེར་ཞིང་།　ལྗོངས་ཕྱི་ནང་ནས་ཡོང་བའི་ཡུལ་སྐོར་བ་མཉམ་དུ་འཛོམས་ནས་ཐུན་མོང་མ་ཡིན་པའི་དགུན་དུས་ཡུལ་སྐོར་འགོ་བཙུགས་ཏེ།　མི་དང་རང་བྱུང་ཁམས་ཞི་མཐུན་མཉམ་གནས་ཀྱི་མཛེས་སྡུག་ལྡན་པའི་རྣམ་པ་བཟང་པོར་མྱོང་རོལ་བྱས།

ལྷ་ས་གྲོང་ཁྱེར་མི་དམངས་སྲིད་གཞུང་གི་ཧྲི་ཀྲང་གཞོན་པ་པད་མ་གཡུ་སྒྲོན་གྱིས་ངོ་སྤྲོད་བྱས་དོན།　ལྷུན་གྲུབ་རྫོང་གིས་ཐུན་མོང་མ་ཡིན་པའི་སྐྱེ་ཁམས་ཐོན་ཁུངས་དང་ཕུན་སུམ་ཚོཌ་པའི་མི་ཆོས་རིག་གནས་ཀྱི་ཡུལ་ལྗོངས་ལ་བརྟེན་པ་ནི་ད་རེས་ཀྱི་བྱེད་སྒོའི་བཀྲག་མདངས་འཚེར་ས་ཞིག་ཏུ་གྱུར་ལ།　ལྷག་པར་དུ།　རྩ་ཆེའི་སྲོག་ཆགས་ཁྲུང་ཁྲུང་སྐེ་ནག་ལྷུན་གྲུབ་རྫོང་ཁོངས་སུ་སྐྱེ་འཕེལ་དང་གནས་བཅའ་བ་དེས་ལྷ་ས་གྲོང་ཁྱེར་གྱི་སྐྱེ་ཁམས་ལ་སྐྱེ་སྟོབས་གསར་པ་ཞིག་སྦྱིན་ནས་ལྷ་སའི་སྐྱེ་ཁམས་དང་།　རིག་གནས།　ཡུལ་སྐོར་བཅས་ཕན་ཚུན་མཉམ་འདྲེས་འཕེལ་རྒྱས་ཕྱིན་པའི་གྲུབ་འབྲས་ཤིག་ཀྱང་གང་ལེགས་མངོན་ཡོད།　ད་རེས་བྱེད་སྒོའི་དམིགས་ཡུལ་ནི་སྐྱེ་ཁམས་དང་ཁྲུང་ཁྲུང་སྐེ་ནག་དྲིལ་བསྒྲགས་ཁྱབ་གདལ་བཏང་བ་བརྒྱུད་ལྷ་ས་གྲོང་ཁྱེར་གྱི་ལོ་རྒྱུས་དང་སྐྱེ་ཁམས།　མི་ཆོས་རིག་གནས་སོགས་ཕྱོགས་མང་པོའི་ཁྱད་ཆོས་གཞི་གཅིག་ཏུ་འདུས་ནས་འཛམ་གླིང་ལ་ཐུན་མིན་ཁྱད་ཆོས་ལྡན་ལ་ཡིད་དབང་འཕྲོག་པའི་གྲོང་ཁྱེར་གྱི་གཟུགས་བརྙན་བཟང་པོ་ཞིག་མངོན་ཆེད་རེད།　ཁོང་གིས“མིག་སྔར་ཁྲུང་ཁྲུང་སྐེ་ནག་ནི་ལྷ་ས་གྲོང་ཁྱེར་གྱི་བྱ་རིགས་རྩ་ཆེན་ཞིག་ཡིན་པས།　ལྷ་སའི‘གྲོང་ཁྱེར་གྱི་བྱར’གྱུར་ཡོད”ཅེས་བཤད།

ས་མཐོའི་བྱ་རིགས་རྩ་ཆེན་ཞིག་ཡིན་པའི་ཁྲུང་ཁྲུང་སྐེ་ནག་ནི་ལྷ་ས་གྲོང་ཁྱེར་དང་ལྷུན་གྲུབ་རྫོང་གི་སྐྱེ་ཁམས་ཁོར་ཡུག་གི་གྲུབ་ཆ་གལ་ཆེན་ཞིག་ཡིན་ཞིང་།　ཀྲུང་གོའི་རི་སྐྱེས་སྲོག་ཆགས་སྲུང་སྐྱོབ་མཐུན་ཚོགས་ཚན་རིག་རྟོག་ཞིབ་ཨུ་ལྷན་གྱི་ཀྲུའུ་རེན་ཨུ་ཡོན་གཞོན་པ་དང་པེ་ཅིང་ནགས་ལས་སློབ་ཆེན་གྱི་འབུམ་རམས་ཞིབ་འཇུག་སློབ་མའི་སློབ་དཔོན་ལི་ལན་ཁྲེང་གིས“ལྷ་ས་འདི་ཉིད་ཁྲུང་ཁྲུང་སྐེ་ནག་དགུན་སྒྲོལ་བྱ་ཡུལ་གཙོ་བོ་ཞིག་ཡིན་པས།　ས་གནས་དེ་གའི་སྲིད་གཞུང་སྡེ་ཚན་དང་སྤྱི་ཚོགས་ལས་རིགས་ཁག་གིས་མཐོང་ཆེན་པོ་བྱས་ཡོད།　ལྷ་སའི་ཁུལ་དུ་དགུན་སྒྲོལ་བྱེད་པར་ཡོང་བའི་ཁྲུང་ཁྲུང་སྐེ་ནག་གི་གྲངས་འབོར་ཟམ་མི་ཆད་པར་འཕར་ནས་དེའི་འཚོ་གནས་བྱ་ཡུལ་རྒྱ་ཆེ་རུ་ཕྱིན་ཡོད།　2022ལོའི་བརྟག་དཔྱད་གྲངས་གཞི་ལས་མངོན་པར།　ལྷ་སའི་ཁུལ་དུ་དགུན་སྒྲོལ་བྱེད་པར་ཡོང་བའི་ཁྲུང་ཁྲུང་སྐེ་ནག་ཁྱུ་ཚོགས་ཀྱི་གྲངས་འབོར་3375ཟིན་པའི་ཁྲོད་ལྷུན་གྲུབ་རྫོང་དུ་2938ཡོད་པ་རེད།　མིག་སྔར།　ལྷུན་གྲུབ་རྫོང་དུ་དགུན་སྒྲོལ་བྱེད་པར་ཡོང་བའི་ཁྲུང་ཁྲུང་སྐེ་ནག་ཁྱུ་ཚོགས་ཀྱི་གྲངས་འབོར་ལ་དམིགས་པའི་རེས་སྐོར་གསར་པའི་བརྟག་དཔྱད་ལས་དོན་ལ་སྐུལ་འདེད་བཏང་དང་གཏོང་བཞིན་ཡོད”ཅེས་བཤད།

“བོད་ཀྱི་རིག་གནས་ཁྲོད་ཁྲུང་ཁྲུང་སྐེ་ནག་ནི་ལྷ་བྱ་དང་བཀྲ་ཤིས་པའི་བྱ་རིགས་ལ་བརྩིས་ནས་རྟེན་འབྲེལ་དང་།　བདེ་སྐྱིད།　ཚེ་རིང་བཅས་མཚོན་གྱི་ཡོད།　ཁྲུང་ཁྲུང་སྐེ་ནག་རང་ཁྱིམ་གྱི་སྒོ་རྩར་དགུན་སྒྲོལ་བྱེད་པར་ཡོང་བས་ང་ལ་ས་མཐོའི་བྱ་རིགས་རྩ་ཆེན་འདིར་སྲུང་སྐྱོང་བྱེད་པའི་འགན་འཁྲི་ཡོད།　ཁྲུང་ཁྲུང་སྐེ་ནག་ལ་ནང་མི་ལྟར་དགའ་པོ་ཡོད་པས།　ངས་སྲུང་སྐྱོང་བྱས་ཏེ་དེ་དག་གནས་བཟོད་བདེ་བའི་ངང་དགུན་སྒྲོལ་ཐུབ་པ་བྱེད་ཀྱི་ཡིན”ཞེས་ལོ་62ལ་སླེབས་པའི་ལྷུན་གྲུབ་རྫོང་མཚོ་སྟོད་ཤང་མཁར་གདོང་གྲོང་ཚོའི་རྒད་པོ་བསྟན་འཛིན་གྱིས་བཤད།

བསྟན་འཛིན་གྱིས་ཁྲུང་ཁྲུང་སྐེ་ནག་ལ་ལྟ་སྲུང་བྱས་ནས་ལོ་བཅུ་གྲངས་ཁ་ཤས་སོང་ཞིང་།　ཁོང་གི་ལྟ་སྐྱོང་ཞིབ་ཚགས་དང་གཅེས་སྐྱོང་འོག་རྨས་སྐྱོན་ཚབས་ཆེན་ཕོག་པའི་ཁྲུང་ཁྲུང་སྐེ་ནག་4སྔ་རྗེས་སུ་བསྐྱབས་པ་དང་།　དེའི་ཁྲོད་ཁྲུང་ཁྲུང་སྐེ་ནག་གཅིག་ཁོང་གིས་ཟླ་བ་བརྒྱད་ཏག་ཏག་གསོས་པ་རེད།　རྨས་སྐྱོན་ཕོག་པའི་ཁྲུང་ཁྲུང་སྐེ་ནག་མཐོང་རིམ་བཞིན་བསྟན་འཛིན་གྱིས་འཕྲལ་མར་རང་ཁྱིམ་དུ་ཁྱེར་ནས་ལྟ་སྐྱོང་ཞིབ་ཚགས་བྱས་པ་བརྒྱུད།　ཁྲུང་ཁྲུང་སྐེ་ནག་ལ་ཚེ་སྲོག་གསར་པ་ཐོབ་ནས་དགུང་སྔོན་དབྱིངས་སུ་གཤོག་རྩལ་ངོམ་ཐུབ་པ་བྱུང་ཡོད།