ཉེ་ཆར། གསར་འགོད་པར་རང་སྐྱོང་ལྗོངས་ཞིང་ལས་གྲོང་གསེབ་ཐིང་ནས་ཤེས་རྟོགས་བྱུང་བར། འདི་ལོའི་འབྲུ་རིགས་ཐོན་ཚད་ཏུན་ཁྲི་100ཡན་བརྟན་པོ་ཡོང་བའི་བརྩོན་ལེན་བྱ་ཆེད། རང་ལྗོངས་ཀྱི་ས་གནས་ཁག་གིས་སོ་ནམ་དུས་ཚོད་དམ་འཛིན་ཧུར་ཐག་བྱས་ཏེ་སྔ་ཙམ་བཀོད་སྒྲིག་དང་། སྔ་ཙམ་ཇུས་འགོད། སྔ་ཙམ་དོན་འཁྱོལ་བཅས་བྱས་ནས་དཔྱིད་རྨོད་དཔྱིད་གྲབས་ཀྱི་ལས་དོན་ནུས་ཤུགས་ཡོད་རྒུས་ལེགས་པར་བསྒྲུབས་ཡོད། ཟླ་3ཚེས་17ཉིན་བར། ལྗོངས་ཡོངས་ཀྱིས་དཔྱིད་འདེབས་རྒྱ་ཁྱོན་མུའུ་ཁྲི་1.14ལེགས་སྒྲུབ་བྱས་ཡོད་པ་རེད།

འདི་ལོ། ལྗོངས་ཡོངས་སུ་དཔྱིད་འདེབས་བྱེད་རྩིས་ཡོད་པའི་རྒྱ་ཁྱོན་མུའུ་ཁྲི་368.1ཟིན་པ་དང་། དེའི་ནང་ནས་མུའུ་ཁྲི་225.04དང་། སྔོ་ཚལ་མུའུ་ཁྲི་40.79 པད་ཁ་མུའུ་ཁྲི་28.94 གཟན་རྩྭ་མུའུ་ཁྲི་33.04 སྐྱེ་དངོས་གཞན་དག་མུའུ་ཁྲི་8.4བཅས་ཡོད་པ་རེད། མིག་སྔར་རང་ལྗོངས་ཀྱིས་གྲ་སྒྲིག་བྱས་ནས་དམིགས་སར་འབྱོར་བའི་ནས་སོན་སྤྱི་རྒྱ་ཁྲི་3099ཟིན་པ་དེས་སྤྱིའི་འཆར་གཞིའི་79.5%བཟུང་བ་དང་། ཁྱིམ་ལུད་ཏུན་ཁྲི་468.33བསགས་པ་དེས་སྤྱིའི་འཆར་གཞིའི་85.15%བཟུང་བ། རྫས་ལུད་ཏུན་ཁྲི་2.02གཏོང་འདྲེན་བྱས་པ་དེས་ཉོ་སྒྲུབ་འཆར་གཞིའི་39.3%བཟུང་ཡོད་པ་རེད།