ཟླ་3ཚེས་12ཉིན་ནི་ཤིང་འཛུགས་དུས་ཆེན་ཐེངས་47པ་ཡིན་ཞིང་། གཞིས་རྩེ་གྲོང་ཁྱེར་རྣམ་གླིང་རྫོང་ཨེ་མ་ཤང་དུ་སྡོང་ཕྲུག་རེ་རེ་བཞིན་སྐྱེ་འཚར་ལེགས་པ་དང་བསྟུན་ནས། རྣམ་གླིང་རྫོང་གི་ལས་བྱེད་པ་དང་མང་ཚོགས་ཚོས་ཡར་ཀླུང་གཙང་པོའི་བྱང་རྒྱུད་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་དུ་སླར་ཡང་སྡོང་ཕྲུག་ཡུག་ཅིག་བཏབ་པ་རེད།

ཡར་ཀླུང་གཙང་པོའི་བྱང་རྒྱུད་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་ནི་རང་ལྗོངས་གྱི“གཙང་པོ་གཉིས་དང་ཆུ་བོ་བཞིའི”འབབ་རྒྱུད་ཀྱི་ནགས་བཟོ་སྔོ་འགྱུར་ལས་གྲྭའི་འགོ་ཚུགས་ས་དང་དཔེ་སྟོན་ཁུལ་ཞིག་རེད་ལ། གཞིས་རྩེ་གྲོང་ཁྱེར་གྱིས་ནུས་ཤུགས་ཡོད་རྒུས་བསྐྲུན་པའི་ཡར་ཀླུང་གཙང་པོའི་ངོགས་གཉིས་ཀྱི་མུའུ་ཁྲི་བརྒྱའི་སྐྱེ་ཁམས་ཁུལ་འཛུགས་སྐྲུན་གྱི་དཔེ་སྟོན་ལས་གྲྭ་ཞིག་ཀྱང་རེད། 2014ལོར་ལས་གྲྭ་ལག་བསྟར་བྱས་ཚུན། དཔེ་སྟོན་ཁུལ་དུ་ཁྱོན་བསྡོམས་ལྕང་འཛུགས་ནགས་བཟོ་མུའུ་ཁྲི་3.6ལྷག་ཙམ་བྱས་ནས་ཤིན་ཅང་གི་སྦྱར་པ་དང་། ཡོ་འབོག གླ་ཚེར་སོགས་སྡོང་ཕྲུག་སྣ་ཚོགས་ཁྲི་288ལྷག་ཙམ་བཏབ་ཡོད་པ་རེད།

རྣམ་གླིང་རྫོང་རང་བྱུང་ཐོན་ཁུངས་དང་ནགས་ལས་རྩྭ་ཐང་ཅུས་ཀྱི་ཅུས་ཀྲང་སུའུ་ཅན་གྱིས། ཡར་ཀླུང་གཙང་པོའི་བྱང་རྒྱུད་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་གྱི་སྤྱིའི་འཆར་འགོད་རྒྱ་ཁྱོན་མུའུ་ཁྲི་42ཟིན་པ་དང་། ལོ་ལྟར་ལྕང་འཛུགས་ནགས་བཟོ་རྒྱུན་མཐུད་བྱས་པ་བརྒྱུད་གྲམ་ཐང་དེ་ས་མཐོའི་ལྗང་མདོག་གླིང་ཕྲན་ཞིག་ཏུ་གྱུར་ཡོད། ད་ཐེངས་ཀྱི་ལྕང་འཛུགས་བྱེད་སྒོར་རྣམ་གླིང་རྫོང་གི་ལས་བྱེད་ལས་བཟོ་དང་། ནགས་སྲུང་བ། དེ་བཞིན་བོད་སྐྱོར་ལས་བྱེད་པ་སོགས་མི་200ལྷག་ཙམ་གྱིས་སྡོང་རྐང་4200བཏབ་ཡོད་ཅེས་ངོ་སྤྲོད་བྱས།

ལྗོན་ཤིང་འཛུགས་ཡུལ་དུ། ལོ་51ལ་སླེབས་པའི་ནགས་སྲུང་བ་མིག་དམར་གྱིས་སྡོང་ཕྲུག་རེ་རེ་བཞིན་ས་དོང་ནང་གཟབ་གཟབ་སིལ་སིལ་ངང་བཙུགས་ཏེ་ཆག་སྐྱོན་མི་ཤོར་བ་བྱས་ཤིང་། ཁོང་གིས། “ཤིང་འཛུགས་ནགས་བཟོ་ནི་བྱ་བ་བཟང་པོ་ཞིག་རེད། ས་སྟོང་འདིར་ལོ་ལྟར་སྔོ་ལྗང་ཇེ་མང་དུ་ཕྱིན་པ་མཐོང་སྐབས་སེམས་གཏིང་ནས་དགའ་ཚོར་ཆེན་པོ་སྐྱེ་གི་འདུག ནགས་སྲུང་བ་ཞིག་ཡིན་པའི་ངས་མུ་མཐུད‘ལྗང་མདོག་གླིང་ཕྲན’འདི་སྲུང་སྐྱོང་ཡག་པོ་བྱས་ཏེ་སྡོང་ཕྲུག་དེ་དག་མཁའ་ལ་སྙེག་པའི་སྡོང་ཆེན་དུ་འགྱུར་བར་བྱས་ནས་བུ་རབས་ཚ་རྒྱུད་ལ་ཕན་བདེ་བསྐྲུན་རྒྱུ་ཡིན”ཞེས་བཤད།

དཔེ་སྟོན་ཁུལ་གྱི་སྡོང་ཕྲུག་དོ་དམ་སྲུང་སྐྱོང་ལས་དོན་ལ་ཤུགས་སྣོན་རྒྱག་ཆེད། རྣམ་གླིང་རྫོང་གིས་ཆེད་མངགས་ཆུ་འདྲེན་དང་། ལུད་རྒྱག ཡལ་བཞུར། ནད་འབུ་འགོག་བཅོས། ར་སྐོར་སྲུང་སྐྱོང་། དགུན་དུས་ལྗོན་ཤིང་བདག་སྐྱོང་། དཀར་རག་བྱུག་པ། མེ་ཟོན་བཅས་ཀྱི་ལས་འགན་འཁུར་མཁན་ལས་མི་60ལས་གྲུབ་པའི་བདག་སྐྱོང་རུ་ཁག་ཅིག་བཙུགས་ནས། ནགས་བཟོ་འཆར་འགོད་ཇུས་འགོད་དང་། སྡོང་ཕྲུག་གི་སྤུས་ཚད། དོང་འདྲུའི་ཚད་གཞི། འདེབས་འཛུགས་ལག་རྩལ། ཆུ་འདྲེན་ས་བཅུད་སྣོན་པ་བཅས་ཀྱི་འགག་སྒོར་དམ་འཛིན་ཡག་པོ་བྱེད་པ་དང་། ནད་འབུའི་གནོད་འཚེ་དང་། སྡོང་པོ་སྐམ་པ། ལྐོག་གཅོད། ཕྱུགས་རིགས་ཀྱིས་ཟ་བ། ཁྲིམས་འགལ་ངང་བཙན་བཟུང་། ནགས་ཚལ་མེ་སྐྱོན་བཅས་སྔོན་འགོག་ནན་པོ་བྱས་ཏེ་ཁུག་གསང་མི་ལུས་པའི་དོ་དམ་ཐུབ་ཡོད།

གསར་འགོད་པས་ཁྲུང་ཁྲུང་སྐེ་ནག་ཁྱུ་ཞིག་དཔེ་སྟོན་ཁུལ་གྱི་ཞིང་ནང་དུ་བག་ཕེབས་ངང་ཟས་འཚོལ་བཞིན་པ་མཐོང་བྱུང་། གནམ་གཤིས་སྡེ་ཚན་གྱིས་བསྡོམས་རྩིས་བྱས་པར་གཞིགས་ན། ཡར་ཀླུང་གཙང་པོའི་བྱང་འདབས་ཀྱི་རྣམ་གླིང་རྫོང་སྐྱེ་ཁམས་དཔེ་སྟོན་ཁུལ་དུ་ཤིང་འཛུགས་ནགས་བཟོ་དང་བྱེ་འགོག་བྱེ་བཅོས་ལས་གྲྭ་ལག་བསྟར་བྱས་ཚུན། དཔེ་སྟོན་ཁུལ་མཐའ་འཁོར་དུ་བྱེ་རླུང་འཚུབ་ཐེངས་1/3ཉུང་དུ་དང་། གསོ་རླུང་འདུས་ཚད་5%མང་དུ། མཁའ་རླུང་གཤེར་ཚད་10%མང་དུ་བཅས་ཕྱིན་པ་དེས་རི་སྐྱེས་སྲོག་ཆགས་ཀྱི་སྐྱེ་འཕེལ་དང་འཚོ་སྡོད་ལ་ཕན་ཆེན་པོ་ཐོགས་ཡོད་པ་རེད།