འདི་ནི་ལྷ་སའི་སྐྱིད་ཆུའི་རྒྱུག་ཁུལ་ཡིན་པ།

ཆུ་བོ་དང་མཚོ་ནི་སྐྱེ་ཁམས་མ་ལག་ཁྲོད་མེད་དུ་མི་རུང་བའི་ཆ་ཤས་ཤིག་ཡིན་པའི་ངོས་ནས། འདི་ནི་ཆུའི་ཐོན་ཁུངས་ཀྱི་གཞི་རྟེན་ཞིག་རེད་ལ། སྐྱེ་ཁམས་ཁོར་ཡུག་གི་གྲུབ་ཆ་གལ་ཆེན་ཞིག་ཀྱང་རེད། ཆུ་བོ་དང་མཚོའི་བཅོས་སྐྱོང་ལ་ཤུགས་སྣོན་རྒྱག་པ་ནི་ཆུའི་ཐོན་ཁུངས་སྲུང་སྐྱོང་དང་། ཆུའི་སྦགས་བཙོག་འགོག་བཅོས། ཆུའི་ཁོར་ཡུག་ལེགས་གཏོང་། ཆུའི་སྐྱེ་ཁམས་ཉམས་གསོ་བཅས་བྱེད་པར་དོན་སྙིང་གལ་ཆེན་ལྡན་ཡོད་ལ། མཛེས་སྡུག་ལྡན་པའི་བོད་ལྗོངས་འཛུགས་སྐྲུན་བྱེད་པའི་གྲུབ་ཆ་གལ་ཆེན་ཞིག་ཀྱང་རེད།

ཉེ་བའི་ལོ་ཤས་རིང་། བོད་རང་སྐྱོང་ལྗོངས་ཆུ་བེད་ཚན་པས“དོན་ཆེན་བཞི”དང“གསར་གཏོད་བཞིར”དམིགས་པ་དང“རི་སྔོ་ཆུ་དྭངས་ནི་གསེར་རི་དང་དངུལ་རི་ཡིན”ཞེས་པའི་འདུ་ཤེས་ལག་ལེན་གཏིང་ཟབ་བྱས་ཏེ། ཆུ་དཔོན་དང་མཚོ་དཔོན་གྱི་འགན་འཁྲི་དམ་འཛིན་དང་ནན་ཏན་ངང་དཀྲི་བ་དང་། ལས་ཀ་བྱེད་སྟངས་དང་བྱེད་ཐབས་གསར་གཏོད། སྤུས་ཚད་མཐོ་པོས་ཆུ་དཔོན་དང་མཚོ་དཔོན་གྱི་ལམ་ལུགས་ལ་སྐུལ་འདེད་བཅས་བཏང་སྟེ། སྐྱེ་ཁམས་ཉམས་གསོར་སྐུལ་འདེད་ཧུར་ཐག་དང་ཆུ་ལམ་གྱི་བྱེ་མ་སྔོག་འདོན་གྱི་དོ་དམ་བྱེད་ཤུགས་ཆེ་རུ་བཏང་བས་ཆུ་བོ་དང་མཚོའི་བཅོས་སྐྱོང་ལས་དོན་ལ་ཕན་འབྲས་མངོན་གསལ་དོད་པོ་ཐོབ་ཡོད།

སྤུས་ཚད་མཐོ་པོས་ཆུ་དཔོན་དང་མཚོ་དཔོན་གྱི་ལམ་ལུགས་ལ་སྐུལ་འདེད་བཏང་ནས་ས་མཐོའི་ཆུའི་འབྱུང་རྩྭར་སྲུང་སྐྱོབ་བྱེད་པ།

2017ལོ་ནས་བཟུང་། བོད་དུ་ཆུ་དཔོན་དང་མཚོ་དཔོན་གྱི་ལམ་ལུགས་ཁྱོན་ཡོངས་ནས་ཁྱབ་གདལ་བཏང་བ་དང་། རིམ་ཁག་ཏང་ཨུད་དང་སྲིད་གཞུང་གིས་རང་ངོས་ཀྱི་འགན་འཁྲི་དོན་འཁྱོལ་ནན་པོ་བྱས་ནས། རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགོ་ཁྲིད་གཙོ་བོས་རང་སྐྱོང་ལྗོངས་ཀྱི་སྤྱིའི་ཆུ་དཔོན་གྱི་འགན་འཁུར་བ་དང་། རང་སྐྱོང་ལྗོངས་རིམ་པའི་འགོ་ཁྲིད་22ཀྱིས་རང་སྐྱོང་ལྗོངས་རིམ་པའི་ཆུ་དཔོན་དང་མཚོ་དཔོན་གྱི་འགན་འཁུར་གྱི་ཡོད། ལྗོངས་ཡོངས་ཀྱི་ཆུ་དཔོན་དང་མཚོ་དཔོན་ཁྱོན་ཁྲི་1.47གྱི་འགན་འཁྲི་འཁུར་ཤུགས་ཆེ་རུ་བཏང་ནས་ཆུ་དཔོན་དང་མཚོ་དཔོན་གྱི་ལམ་ལུགས་དོན་ཐོག་ཏུ་འཁྱོལ་བར་འགན་ལེན་བྱས་ཡོད། 2024ལོའི་ལོ་མཇུག་བར། རིམ་རྩིས་བྱས་ནས་རིམ་ཁག་ཆུ་དཔོན་དང་མཚོ་དཔོན་གྱིས་ཆུ་བོ་དང་མཚོར་སྐོར་ཞིབ་མི་ཐེངས་ཁྲི་138.9བྱས་པ་དང་། ཆུ་བོར་སྐོར་ཞིབ་བྱེད་མཁན་མི་ཁྲི་5.9ཡིས་ཆུ་བོ་དང་མཚོར་རྒྱུན་གཏན་གྱི་སྐོར་ཞིབ་དོ་དམ་སྲུང་སྐྱོང་གི་ལས་དོན་དོན་འཁྱོལ་བྱས་ནས“རིམ་པ་གཅིག་གིས་རིམ་པ་གཅིག་ལ་དམ་འཛིན་དང་རིམ་པ་ཚང་མས་དོན་འཁྱོལ་དམ་འཛིན”བྱེད་པའི་ལས་ཀའི་རྣམ་པ་བཟང་པོ་ཞིག་ཆགས་ཡོད་པ་རེད།

ཀྲུང་ཆུས་བདེ་སྐྱིད་གཙང་པོའི་འགྲམ་དུ་བསྐྱོད་སྐབས་ཆུ་དཔོན་དང་མཚོ་དཔོན་ལམ་ལུགས་ཀྱི་དོ་དམ་སྤྱི་བསྒྲགས་ཀྱི་བྱང་བུ་གང་སར་མཐོང་རྒྱུ་ཡོད་ལ། ལམ་བར་དུ་རིམ་པ་ཁག་གི་ཆུ་དཔོན་དང་མཚོ་དཔོན་གྱིས་ཆུ་བོར་སྐོར་ཞིབ་དང་སྲུང་སྐྱོབ་ཀྱི་ལས་ཀ་ལས་བཞིན་པའི་གཟུགས་བརྙན་ཡང་མཐོང་རྒྱུ་ཡོད། ཁྲེང་ཏུའུ་ནས་ཡོང་བའི་ཡུལ་སྐོར་བ་ཞའོ་ཐང་གིས“ས་བབ་སྨི་4000ཡན་གྱི་ས་མཐོར་སྐྱེ་ཁམས་སྲུང་སྐྱོང་ཡག་པོ་འདི་འདྲ་བྱུང་བ་དངོས་གནས་ལས་སླ་པོ་ཞིག་མ་རེད། ཆུ་ངོགས་གཙང་ཞིང་ཆུ་ལམ་འགག་པའི་གནས་ཚུལ་མཐོང་རྒྱུ་མི་འདུག”ཅེས་བཤད།

འདི་ནི་མངའ་རིས་ས་ཁུལ་སྤུ་ཧྲིང་རྫོང་ཁོངས་ཀྱི་མཛེས་སྡུག་རྣམ་པར་བཀྲ་བའི་ལག་ངར་མཚོ་ཡིན་པ།

ཉེ་བའི་ལོ་ཤས་རིང་། མངའ་རིས་ས་ཁུལ་གྱིས་སྐྱེ་ཁམས་དཔལ་ཡོན་འཛུགས་སྐྱོང་བྱེད་མགྱོགས་སུ་གཏོང་བ་དང་ཆུ་དཔོན་དང་མཚོ་དཔོན་ལམ་ལུགས་ཕྱོགས་ཡོངས་ནས་ཁྱབ་སྤེལ་གཏོང་བའི་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་གཏིང་ཟབ་དང་། ས་ཨུད་ཀྱི“12114”ལས་ཀའི་བསམ་ཕྱོགས་དོན་འཁྱོལ་བྱས་ཏེ། ཆུ་དཔོན་དང་མཚོ་དཔོན་ལམ་ལུགས་ཀྱི་རྩ་འཛུགས་མཐུན་སྦྱོར་དང་། བཀོད་གཏོང་ལྟ་སྐུལ། ཞིབ་བཤེར་དཔྱད་ཞིབ་སོགས་ཀྱི་འགན་འཁྲི་དོན་འཁྱོལ་གང་ལེགས་ཀྱིས་སྔོན་ལ་ཆུ་གྲོན་ཆུང་དང་། འབྱུང་ཁམས་སྙོམས་སྒྲིག མ་ལག་བཅོས་སྐྱོང་། ཕྱོགས་གཉིས་པོས་ཕན་ཚུན་དམ་འཛིན་གྱིས་ཆུ་བཅོས་སྐྱོང་བྱེད་ཤུགས་ཆེ་རུ་གཏོང་བའི་བསམ་ཕྱོགས་མཐའ་འཁྱོངས་བྱས་ཏེ། ཕྱོགས་ཡོངས་ནས་ཆུ་དཔོན་དང་མཚོ་དཔོན་ལམ་ལུགས་དེ“མིང་ཡོད་པ”ནས“དངོས་སུ་ཡོད་པའི”བར་དང་། “ཆུ་དཔོན་ཡོད་པ”ནས“ལག་ལེན་དོན་འཁྱོལ་ཐུབ་པའི”བར། དེ་ནས“ཕན་འབྲས་ཡག་པོ་ཐོན་པའི”བར་ཕྱོགས་ཡོངས་ནས་སྐུལ་འདེད་བཏང་ཡོད།

ཆུ་བོ་དང་མཚོ་དྭངས་གཙང་ཡོང་བ་དེ་ང་ཚོས་སྐྱེ་ཁམས་བདེ་འཇགས་ཀྱི་སྲུང་བཅད་བརྟན་པོ་འཛུགས་པ་དང་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྲུན་གྱི་འགན་འཁྲིའི་གསལ་ཐོ་གལ་ཆེན་གྱི་གྲས་ཤིག་ཏུ་འགྱུར་བར་འགན་ལེན་བྱེད་དགོས། མངའ་རིས་ས་ཁུལ་ཆུ་བེད་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། མིག་སྔར་ས་ཆ་འདའི་ས་ཁུལ་དང་། རྫོང་། ཤང་། གྲོང་ཚོ་བཅས་རིམ་པ་བཞིར་ཆུ་དཔོན་དང་མཚོ་དཔོན་གྱི་མ་ལག་ཡོད་ལ། རིམ་པ་ཁག་གི་ཆུ་དཔོན་དང་མཚོ་དཔོན་གྱིས་འགན་འཁྲི་ཧུར་ཐག་འཁུར་ནས་ཆུ་བོ་དང་མཚོའི་དོ་དམ་སྲུང་སྐྱོང་གི་འགན་འཁྲིའི་འབྲེལ་ཐག་མུ་མཐུད་འཐུས་སྒོ་ཚང་དུ་བཏང་སྟེ་རྒྱུན་རྣམ་ཅན་གྱི་ཆུ་བོ་དང་མཚོའི་སྐོར་སྲུང་ལས་དོན་སྤེལ་བཞིན་ཡོད།

ཀྲུང་ཆུས་བདེ་སྐྱིད་གཙང་པོའི་ད་ཆའི་མཛེས་ལྗོངས་ནི་མངའ་རིས་ས་ཁུལ་གྱིས་སྤུས་ཚད་མཐོ་པོས་ཆུ་ལམ་བཅོས་སྐྱོང་ལས་དོན་ལ་སྐུལ་འདེད་བཏང་བའི་བསྡུས་རིས་ཤིག་རེད། ལྗོངས་ཡོངས་ཀྱི་ངོས་ནས་བརྗོད་ན་ཀྲུང་ཆུས་བདེ་སྐྱིད་གཙང་པོ་བཅོས་སྐྱོང་བྱས་པ་བརྒྱུད་སླར་ཡང་མཛེས་ལྗོངས་མངོན་བཞིན་པའི་ཆུ་བོ་དང་མཚོ་ཡི་གྱོད་དཔེ་མང་པོ་མཐོང་རྒྱུ་ཡོད་ལ། དེ་དག་ཐུན་མོང་ཐོག་བོད་ཀྱི་སྐྱེ་ཁམས་ཀྱི་མཛེས་སྡུག་ལྡན་པའི་མིང་བྱང་ཞིག་ཏུའང་འགྱུར་ཡོད།

སྐྱེ་ཁམས་སླར་གསོ་ཧུར་ཐག་བྱས་ནས་ས་མཐོའི་ཆུའི་རིག་གནས་ཀྱི་གྲོང་ཁྱེར་བསྐྲུན་པའི་ལག་ལེན་དངོས་བསྟར་བ།

ལྷ་ས་སྐྱིད་ཆུའི་འགྲམ་དུ་འཆམ་འཆམ་ལ་སྐྱོད་དུས། གཙང་པོའི་འགྲམ་ངོགས་ཡངས་ཤིང་རྒྱ་ཆེ་ལ་ཆུ་རགས་བརྟན་ཞིང་བརྗིད་པ། ལྟ་ན་སྡུག་པའི་ཡུལ་ལྗོངས་ལས་མི་རྣམས་ལ་ལོངས་སྤྱོད་འཛད་མཐའ་མེད་པ་ཉམས་སུ་མྱོང་དུ་འཇུག་གི་ཡོད། གྲམ་པའི་ངོགས་སུ་འདབ་ཆགས་ཅི་དགར་འཕུར་ལྡིང་བྱེད་པ་དང་། དྭངས་གཙང་གི་ཆུ་ཁར་ལྟོ་དཀར་ཉ་མོ་འཁྱུག་བགྲོད་ཀྱི་རྩལ་ལ་སྙེམས་བཞིན་ཡོད་པས། ཆུ་མོ་དྭངས་ཁྲུམ་ཁྲུམ་གྱི་རྒྱུ་བས་ཡིད་ཁམས་དྭངས་བར་བྱེད། འདི་ནི་གྲོང་མི་རྣམས་འཆམ་འཆམ་དུ་སྐྱོད་སའི་ས་ཆ་ཡག་ཤོས་ཀྱི་གྲས་ཤིག་ཏུ་གྱུར་ཡོད།

སྔོན་ཆད་ཀྱི་ལྷ་སའི་སྐྱིད་ཆུ་ནི་འདི་འདྲ་ཞིག་གཏན་ནས་མ་ཡིན། “ཆུ་ལམ་གུ་དོག་ལ་བྱེ་འདམ་གང་སར་ཁེངས་པས། གཙང་པོའི་གཞོགས་གཉིས་ཀ་གདོད་མའི་སྤང་ལྗོངས་དང་ཐར་ཐོར་གྱི་ཞིང་ཐང་ཡིན་པས། མཛེས་པའི་སྣང་བ་ཅི་ཡང་མེད་ཅེས་ལབ་ཆོག་ལ་འཆམ་འཆམ་དུ་ཡོང་མཁན་དག་དེ་བས་བཤད་མི་དགོས”ཞེས་གྲོང་མི་ཚེ་དབང་སྒྲོལ་མས་བརྗོད།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་ས་མཐོའི་ཆུའི་རིག་གནས་ཀྱི་གྲོང་ཁྱེར་བསྐྲུན་པའི་ལས་ལ་རྩེ་གཅིག་ཏུ་གཞོལ་ཏེ་ལྷ་སའི་སྐྱིད་ཆུར་དམིགས་ནས་སྐྱེ་ཁམས་སླར་གསོ་དང་ཕྱོགས་བསྡུས་བཅོས་སྐྱོང་གི་ལས་གྲྭ་རབ་དང་རིམ་པ་སྤེལ་ཡོད།

2013ལོར། ལྷ་ས་གྲོང་ཁྱེར་གྱིས་ལྷ་སའི་གཙང་འགྲམ་གྱི་གྲོང་ཁུལ་ལམ་དུམ་དུ་ཕྱོགས་བསྡུས་བཅོས་སྒྲིག་གི་ལས་གྲྭ་གོ་རིམ་ལྡན་པའི་སྒོ་ནས་ལག་ལེན་བསྟར་ཏེ། ལྷ་སའི་གཙང་འགྲམ་གྱི་གྲོང་ཁུལ་ལམ་དུམ་དཀྱིལ་གྱི་སྤྱི་ལེ་20ཡི་ཁྱབ་ཁོངས་སུ་ཆུ་རགས་ལས་གྲྭ་6འཆར་འགོད་ཀྱིས་འཛུགས་སྐྲུན་བྱས་པས། ཆུ་བོའི་རྒྱུག་ཤུགས་ལ་སྙོམས་སྒྲིག་ནུས་ལྡན་བྱས་པ་མ་ཟད། ད་དུང་གཙང་འགྲམ་སྔོ་འགྱུར་འཛུགས་སྐྲུན་ལ་འདེགས་སྐྱོར་ནུས་ལྡན་མཁོ་འདོན་བྱས་ཡོད། ལས་གྲྭའི་ལས་དོན་གཏིང་ཟབ་སྤེལ་བ་དང་ཆབས་ཅིག སྤྱི་ལེ་20ལྷག་ཙམ་ས་ཡི་ལྗང་མདོག་ཁུལ་རིམ་བཞིན་ཆགས་ནས་གྲོང་ཁྱེར་ལ་མཛེས་སྡུག་ལྡན་པའི་ཡུལ་ལྗོངས་ཤིག་གསར་དུ་བསྣན་ཡོད།

2019ལོར་ལྷ་ས་གྲོང་ཁྱེར་གྱིས་ལྷ་སའི་གཙང་འགྲམ་གྱི་གྲོང་ཁུལ་གྱི་ཕྱོགས་བསྡུས་བཅོས་སྐྱོང་དང་སྐྱེ་ཁམས་སླར་གསོའི་ལས་གྲྭ་སླར་ཡང་སྤེལ་འགོ་ཚུགས་ཏེ། གཙང་འགྲམ་གྱི་ལམ་དུམ་7ལ་ཕྱོགས་ཡོངས་ནས་བཅོས་སྐྱོང་བྱས་ཤིང་། གཙང་འགྲམ་ལམ་གྱི་སྤྱི་གླིང་དང་། ལྷོ་རིའི་སྤྱི་གླིང་། ལྷ་ས་གྲོང་ཁྱེར་ཀྲུང་ཧྭའི་རིག་གནས་སྤྱི་གླིང་སོགས་ཀྱི་ལེ་ལག་ཚང་བའི་གཙང་འགྲམ་གྱི་སྐྱེ་ཁམས་ཡུལ་ལྗོངས་སྔ་རྗེས་སུ་བསྐྲུན་ཟིན་པ་དང་སྔོ་འགྱུར་རྒྱ་ཁྱོན་ཁྱོན་མུའུ་3052གསར་སྣོན་བྱས་ཡོད། ལས་གྲྭའི་འཛུགས་སྐྲུན་དེ་དག་གིས་ཆུ་བོ་དང་མཚོའི་སྐྱེ་ཁམས་ཁོར་ཡུག་མངོན་གསལ་དོད་པོས་ལེགས་སུ་བཏང་བ་མ་ཟད། གྲོང་ཁྱེར་གྱི་བྱེད་ནུས་སྤུས་ཚད་ཀྱང་མཐོ་རུ་ཕྱིན་ནས་རི་སྔོན་ཆུ་དྭངས་ཁྲོད་གྲོང་མི་རྣམས་ཀྱི་སྐྱིད་སྣང་རྒྱུན་ཆད་མེད་པར་ཆེ་རུ་ཕྱིན་ཡོད།

འདི་ནི་ལྷ་སའི་སྐྱིད་ཆུའི་ངོགས་གཅིག་ཡིན་པ།

ལྷ་ས་གྲོང་ཁྱེར་གྱིས་ད་དུང་ལྟེ་བའི་གྲོང་ཁུལ་གྱི་ཆུ་རྒྱུད་ཉམས་གསོ་དང་སྐྱེ་ཁམས་བཅོས་སྐྱོང་ལས་གྲྭ་ལག་བསྟར་ཧུར་ཐག་བྱས་ཏེ། ཆུ་རྒྱུད་ཉམས་གསོ་དང་བཅོས་སྐྱོང་གི་ལམ་ཚད་སྤྱི་ལེ་53.1ཟིན་པས། ཆུ་རྒྱུད་དུ་ཡོད་པའི་བཙོག་ཆུ་ཕྱིར་འབུད་ས་ཕྱོགས་ཡོངས་ནས་མེད་པར་བཟོས་ནས་གྲོང་ཁྱེར་གྱི་གནས་འཕྲོད་ཐུབ་ཚད་ནུས་ལྡན་ངང་མཐོ་རུ་བཏང་ཡོད།

ད་ཆ་ལྷ་སའི་ཆུ་བོ་དང་མཚོ་མང་ཆེ་བ་ལྷ་སའི་སྐྱིད་ཆུ་དང་འདྲ་བར་ཕྱོགས་བསྡུས་བཅོས་སྐྱོང་དང་སྐྱེ་ཁམས་ཉམས་གསོ་བྱས་པ་བརྒྱུད་འདི་དག་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད་པ་སྟེ། ནག་ཆུ་གྲོང་ཁྱེར་གྱིས་ཆུ་བོ་དང་མཚོར“གང་བྱུང་བཞི་གཙང་སེལ”བྱེད་པ་རྒྱུན་ལྡན་ཅན་དང་ཚད་ལྡན་ཅན་དུ་སྐུལ་འདེད་བཏང་བས་བྲག་ཆུས་གཙང་པོའི(ལྷ་རི་ཆུ)སྔོན་མའི་ཡུལ་ལྗོངས་བསྐྱར་དུ་མངོན་ཐུབ་པ་བྱུང་ཡོད།

ལོ་ངོ་40ལྷག་ཙམ་ནགས་ཚལ་འཛུགས་སྐྲུན་བྱས་པ་བརྒྱུད། ལྷོ་ཁ་གྲོང་ཁྱེར་གྱི་ཡར་ཀླུང་གཙང་པོའི་དབུས་ཁུལ་དུ“ལྗང་མདོག་གི་ལྕགས་རི་རིང་པོ”ཞིག་ཆགས་ཡོད། ཆབ་མདོ་གྲོང་ཁྱེར་དང་། ནག་ཆུ་གྲོང་ཁྱེར། ཉིང་ཁྲི་གྲོང་ཁྱེར། དེ་བཞིན་མཚོ་སྔོན་ཞིང་ཆེན་གྱི་ཡུལ་ཤུལ་ཁུལ་དང་སི་ཁྲོན་ཞིང་ཆེན་གྱི་དཀར་མཛེས་ཁུལ་སོགས་འདབས་འབྲེལ་གྱི་ས་ཁུལ་དང་མཉམ་དུ་འགོག་བཅོས་དང་ལྟ་སྡོམ་དང་བཅོས་སྐྱོང་གི་གྲོས་མཐུན་བཞག་ནས། ས་ཁོངས་བརྒལ་བའི་ཆུ་བོ་དང་མཚོར་སྐོར་ཞིབ་ཀྱི་ལས་དོན་ཐུན་མོང་ཐོག་སྤེལ་ནས་རྫ་ཆུ་དང་འབྲི་ཆུ་སོགས་ཆུ་ཁོངས་ཀྱི་སྐྱེ་ཁམས་སྔོན་མ་ནང་བཞིན་སླར་གསོ་ཐུབ་པ་བྱས་ཡོད།

ལྗོངས་ཡོངས་ནས་བསམ་གཞིག་བྱེད་སྐབས། ཆུ་དཔོན་དང་མཚོ་དཔོན་གྱི་ལམ་ལུགས་ལག་བསྟར་བྱས་པ་བརྒྱུད། ཆུ་བོ་དང་མཚོ་བཅོས་སྐྱོང་དང་གསར་སྤེལ་བྱས་ནས་ཆུ་བོ་དང་མཚོའི་ཁོར་ཡུག་མུ་མཐུད་དུ་ལེགས་སུ་བཏང་ཡོད། ལྗོངས་ཡོངས་ཀྱི་གཙང་པོ་དང་། མཚོ། མཚེའུ་གཙོ་བོའི་ཆུའི་སྤུས་ཚད་ཁྱོན་ཡོངས་ནས་ཡག་པོ་ཡོང་བ་རྒྱུན་འཁྱོངས་བྱས་ཤིང་། རྫོང་གྲོང་74རུ“ཆུ་བཙོག་པ་དྲི་ངན་ཁ་བའི”ཆུ་གཞུང་མེད་པར་བཟོས་པ་དང་རྒྱལ་ཁབ་དང་ཞིང་ཆེན་གྱི་ཚོད་འཛིན་གྱི་བཅད་ངོས་ཀྱི་ཆུའི་སྤུས་ཚད་ཆ་སྙོམས་100%ཟིན་པས། རིགས་གསུམ་པའི་ཚད་གཞིར་སླེབས་པའམ་ཡང་ན་དེ་ལས་ལྷག་པ་བྱུང་ནས། “ཆུ་མོ་ཤང་ཤང་དུ་རྒྱུག་ཐུབ་པ་དང་། ཆུ་མོ་དྭངས་ཞིང་གཙང་བ། ཆུ་ངོགས་ལྗང་ཐིང་ཐིང་། ཡུལ་ལྗོངས་ལྟ་ན་སྡུག་པ། མི་སེམས་འཆམ་མཐུན་ཡོང་བ”བཅས་ཀྱི་ལྟ་བས་མི་ངོམ་པའི་སྐྱེ་ཁམས་མཛེས་པོ་ཞིག་གྲུབ་ཡོད།

ཆུ་ལམ་གྱི་བྱེ་མ་སྔོག་འདོན་གྱི་དོ་དམ་ལ་ཤུགས་སྣོན་བརྒྱབ་སྟེ་ཆུ་བོ་དང་གཙང་པོའི་སྐྱེ་ཁམས་སྲུང་སྐྱོང་ལ་འགན་སྲུང་ཡག་པོ་བྱེད་པ།

སྒྲིག་འཛུགས་མེད་ལ་ཚུལ་མིན་གྱི་བྱེ་མ་སྔོག་འདོན་བྱས་ཏེ། ཆུ་ལམ་ལ་གཏོར་བཤིག་ཚབས་ཆེན་ཕོག་པ་ནི་ཆུ་བོ་དང་མཚོ་བཅོས་སྐྱོང་ཐད་འགོག་རྐྱེན་བཟོ་བའི་དོན་གནད་ཆེན་པོ་ཞིག་རེད།

རང་སྐྱོང་ལྗོངས་ཆུ་བེད་མ་ལག་གིས་ཆུ་བོ་འབྲིང་ཆུང་འབབ་རྒྱུད་ཀྱི་ཕྱོགས་བསྡུས་བཅོས་སྐྱོང་ལ་མུ་མཐུད་སྐུལ་འདེད་བཏང་ནས་ཆུའི་ཐོན་ཁུངས་ཀྱི་དོ་དམ་ལ་ཤུགས་སྣོན་རྒྱག་པ་དང་། ཆུ་ལམ་དུ་ཁྲིམས་འགལ་ངང་བྱེ་མ་སྔོག་འདོན་གྱི་ཆེད་དོན་བཅོས་སྐྱོང་གི་བྱ་སྤྱོད་གཏིང་ཟབ་སྤེལ་བ། ཆུ་བོ་དང་འབྲེལ་བའི་འཛུགས་སྐྲུན་རྣམ་གྲངས་ལ་དོ་དམ་ནན་པོ་བྱེད་པ། འབྱུང་འཕྲོད་ཀྱི་ཆུ་བོ་དང་མཚོ་འཛུགས་སྐྲུན་ཤུགས་ཆེན་བཅས་བྱས་ནས་རིམ་པ་ཁག་གི་ཆུ་དཔོན་དང་མཚོ་དཔོན་དང་འབྲེལ་ཡོད་སྡེ་ཚན་གྱིས་རང་འགན་གཙང་སྒྲུབ་ལ་སྐུལ་འདེད་གཏོང་བ། ཆུ་དཔོན་དང་མཚོ་དཔོན་ལམ་ལུགས་དེ“མིང་དང་འགན་འཁྲི་ཡོད་པ”ནས“ནུས་པ་དང་ཕན་ནུས་ཡོད་པར”སྐུལ་འདེད་བཅས་བཏང་ཡོད།

རང་སྐྱོང་ལྗོངས་ཀྱིས་ཆུ་བོ་དང་མཚོར་བཅོས་སྐྱོང་དང་སྲུང་སྐྱོང་བྱེད་རིང་ཁྲིམས་འགལ་ངང་བྱེ་མ་སྔོག་འདོན་བྱས་ནས་ཆུ་བོར་ཤུགས་རྐྱེན་བཟོས་པ་དང་། ཆུ་བོ་དང་མཚོའི་སྐྱེ་ཁམས་ལ་གཏོར་བཤིག་བཏང་བ། ཁྲིམས་འགལ་ངང་ཆུ་ཁོངས་མཚོ་རྒྱུད་བཙན་བཟུང་བྱས་པ། ཆུ་ལོག་སྔོན་འགོག་བྱེད་པའི་བདེ་འཇགས་ལ་ཤུགས་རྐྱེན་བཟོས་པ་སོགས་ཀྱི་གནད་དོན་ཤེས་རྟོགས་བྱུང་བར་དམིགས་ནས། གཞིས་རྩེ་གྲོང་ཁྱེར་གྱི་འབྲེལ་ཡོད་སྡེ་ཚན་གྱིས་དུས་ཐོག་ཏུ་བཅོས་སྒྲིག་དང་རྗེས་འདེད་བཅོས་སྒྲིག་བྱས་ཏེ། ཆུ་ལམ་གྱི་བྱེ་མ་སྔོག་འདོན་བྱེད་པའི་ཁྱབ་ཁོངས་ཀྱི་གནད་དོན་ནུས་ལྡན་ངང་བཅོས་སྒྲིག་བྱས་ནས་ཆུ་བོ་དང་མཚོའི་བཅོས་སྐྱོང་སྲུང་སྐྱོང་བྱེད་ཤུགས་ཆེ་རུ་བཏང་ཡོད།

འདི་ནི་ཉིང་ཁྲི་གྲོང་ཁྱེར་སྤོ་བོ་རྫོང་གི་དྭངས་གསལ་མཐིལ་མཐོང་གི་ཀ་གནམ་མཚོ་ཡིན་པ།

གཞིས་རྩེ་གྲོང་ཁྱེར་ཆུ་བེད་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། 2024ལོའི་ཟླ་4ཚེས་1ཉིན་ནས་ཟླ་6ཚེས་30ཉིན་བར། གཞིས་རྩེ་གྲོང་ཁྱེར་གྱིས་དུས་ཡུན་ཟླ་བ་གསུམ་གྱི་ཆུ་ལམ་དུ་ཁྲིམས་འགལ་ངང་བྱེ་མ་སྔོག་འདོན་བྱེད་པའི་ཆེད་དོན་བཅོས་སྒྲིག་བྱ་སྤྱོད་སྒྲིག་འཛུགས་བྱས་ནས་སྤེལ་ཡོད། “བཅོས་སྒྲིག་བྱེད་སྒོ་སྤེལ་རིང་ང་ཚོས་ཆུ་ལམ་དུ་ཁྲིམས་འགལ་ངང་བྱེ་མ་སྔོག་འདོན་བྱེད་པ་དེ་གྲོང་ཁྱེར་དང་། རྫོང་། ཤང་། གྲོང་ཚོ་བཅས་རིམ་པ་བཞིའི་ཆུ་དཔོན་དང་མཚོ་དཔོན་གྱིས་ཆུ་བོ་དང་མཚོར་སྐོར་ཞིབ་བྱེད་པའི་གཙོ་གནད་ལས་དོན་ལ་བརྩིས་ཏེ། རྫོང་དང་ཆུས་ཁག་གིས་མཐིལ་རྟོགས་ཞིབ་བཤེར་ཐེངས་60ལྷག་ཙམ་བྱས་པ་དང་ཁྲིམས་འཛིན་མི་སྣ་མི་ཐེངས་300ལྷག་ཙམ་བཀོད་སྒྲིག་བྱས་ཡོད། སྟེགས་བུ་མང་པོའི་ཐོག་བཅོས་སྒྲིག་བྱེད་པའི་སྤྱི་བསྒྲགས་ཁྱབ་བསྒྲགས་བྱས་པ་བརྒྱུད་གྲོང་ཁྱེར་དང་རྫོང་གིས་མཉམ་འགུལ་གྱི་སྐོར་ཞིབ་བྱེད་ཚད་མང་དུ་བཏང་ནས་ཁྲིམས་འགལ་ངང་བྱེ་མ་སྔོག་པའི་བྱེད་སྤྱོད་15ཞིབ་བཤེར་ཐག་གཅོད་བྱས་པ་དང་། འབྲེལ་ཡོད་ཁྲིམས་སྲོལ་གཞིར་བཟུང་ཁྲིམས་འགལ་གྱི་ཐོབ་ཆ་སྒོར་ཁྲི་11.5ལྷག་ཙམ་གཞུང་བཞེས་བཏང་བ་དང་དངུལ་ཆད་སྒོར་ཁྲི་4བཏང་སྟེ། ཆུ་ལམ་དུ་ཁྲིམས་འགལ་ངང་བྱེ་མ་སྔོག་པའི་བྱེད་སྤྱོད་ལ་རྡུང་རྡེག་ནུས་ལྡན་བཏང་སྟེ་ཆུ་ལམ་གྱི་སྐྱེ་ཁམས་ཁོར་ཡུག་ལ་སྲུང་སྐྱོང་བྱས་ཡོད”ཅེས་བཤད།

དེ་དང་ཆབས་ཅིག གཞིས་རྩེ་གྲོང་ཁྱེར་གྱིས་ཁྲིམས་འགལ་ངང་ཆུ་ལམ་གྱི་བྱེ་མ་སྔོག་འདོན་བྱེད་པར་ཡུན་རིང་དོ་དམ་བྱེད་ཤུགས་ཆེ་རུ་བཏང་བ་དང་། སྲུང་སྐར་རྒྱང་ཚོར་གྱི་ལྟ་ཞིབ་ཚད་ལེན་དང་མི་མེད་གནམ་གྲུའི་མཁའ་ཐོག་པར་ལེན་སོགས་དེང་རབས་ཚན་རྩལ་བྱ་ཐབས་སྤྱད་དེ་གྲོང་ཁྱེར་ཡོངས་ཀྱི་ཆུ་བོ་དང་མཚོ་གཙོ་བོའི“གང་བྱུང་བཞི་གཙང་སེལ”གྱི་གནད་དོན་ལ་ཞིབ་བཤེར་བྱས་ཡོད། ཆུ་ལམ་གྱི་བྱེ་མ་སྔོག་འདོན་བྱེད་པའི་བྱ་སྤྱོད་སྔར་བས་ཚད་ལྡན་དུ་གཏོང་ཆེད། གཞིས་རྩེ་གྲོང་ཁྱེར་ཆུ་བེད་ཅུས་ཀྱིས་གྲོང་ཁྱེར་ཡོངས་ཀྱི་ཆུ་ལམ་གྱི་བྱེ་མ་སྔོག་འདོན་བྱེད་པའི་སྤྱིའི་འཆར་འགོད་བཟོ་བཞིན་ཡོད་ལ། 《གཞིས་རྩེ་གྲོང་ཁྱེར་ཆུ་ལམ་གྱི་བྱེ་མ་སྔོག་འདོན་བྱེད་པའི་དོ་དམ་སྲོལ་ཡིག》བཟོ་བཅོས་ཀྱང་རྒྱག་བཞིན་ཡོད། འགན་འཁུར་བས“མ་འོངས་པར་ང་ཚོས་ཀྱང་མུ་མཐུད་ལྟ་སྐུལ་དོ་དམ་ལ་ཤུགས་སྣོན་བརྒྱབ་སྟེ་གཞིས་རྩེ་གྲོང་ཁྱེར་གྱི་ཆུའི་ཐོན་ཁུངས་ལ་སྲུང་སྐྱོང་ཡག་པོ་བྱེད་རྒྱུ་ཡིན”ཞེས་བཤད།

ཆབ་མདོ་གྲོང་ཁྱེར་དུ་གཙང་པོ་དང་ཆུ་བོ་ཆེ་གྲས་མང་པོ་ཞིག་ཡོད་པས་ཆུ་ལམ་གྱི་བྱེ་མ་སྔོག་འདོན་དོ་དམ་ཐད་ཀྱི་ལས་དོན་དེ་བས་རྙོག་འཛིང་ཆེན་པོ་ཡོད། ཁྲོན་བོད་ལྕགས་ལམ་དང་རྫ་ཆུའི་ཆུ་རྒྱུད་ཀྱི་གཞུང་ལམ་སོགས་འཛུགས་སྐྲུན་རྣམ་གྲངས་ཆེ་གྲས་ཀྱི་ཆུ་ལམ་གྱི་བྱེ་མ་སྔོག་འདོན་དང་། ཆུ་བོ་དང་འབྲེལ་བའི་ཞིབ་མཆན། ཆུའི་ཐོན་ཁུངས་ལ་རིགས་པས་ཁུངས་སྐྱེལ། ས་ཆུ་སྲུང་འཛིན་གྱི་ཞིབ་མཆན་སོགས་འགོད་པའི་དུས་འགོའི་ལས་དོན་ལ་གཞོགས་འདེགས་ཧུར་ཐག་བྱས་པ་མ་ཟད། དེ་དང་དུས་མཚུངས་ཆུ་དཔོན་དང་མཚོ་དཔོན་ལམ་ལུགས་ཀྱི་ལས་དོན་དེ་གྲོང་ཨུད་ཏང་གི་སློབ་གྲྭའི་སྐྱེ་ཁམས་དཔལ་ཡོན་གྱི་ཆེད་དོན་གསོ་སྦྱོང་ནང་དོན་དུ་བཅུག་ནས། གྲོང་ཁྱེར་དང་རྫོང་རིམ་པ་གཉིས་ཀྱི་ལས་སྒོའི་རྐང་འཛིན་པ་སྒྲིག་འཛུགས་བྱས་ཏེ་ཆུ་བོ་དང་མཚོའི་དོ་དམ་སྲུང་སྐྱོང་དང་ཁྲིམས་འཛིན་ལྟ་སྐུལ་དོ་དམ་སོགས་ཀྱི་ལས་སྒོའི་གསོ་སྦྱོང་ལ་ཞུགས་སུ་བཅུག་གི་ཡོད།

བྱེ་མ་སྔོག་མཁན་དོ་བདག་གིས་ཁྲིམས་འགལ་ངང་བྱེ་མ་སྔོག་འདོན་དང་བྱེ་མ་ལྐོག་ཏུ་སྔོག་འདོན་བྱེད་པ་སོགས་ཀྱི་སྣང་ཚུལ་ལ་བཀག་སྡོམ་ཐེངས་མང་བྱས་ཀྱང་གནས་ཚུལ་འདི་རིགས་ཡང་སེ་ཐོན་པ་དང་། ལས་སྣོན་བཟོ་གྲྭའི་ཐལ་རྡུལ་གྱིས་མཁའ་རླུང་གི་སྤུས་ཚད་ལ་ཤུགས་རྐྱེན་ངན་པ་བཟོ་བ། ཆུ་ལམ་རྒྱུད་དུ་གད་སྙིགས་གང་བྱུང་དུ་སྤུང་པ་གསོག་པ་སོགས་ཀྱི་གནད་དོན་ལ་དམིགས་ནས། ཉིང་ཁྲི་གྲོང་ཁྱེར་གྱིས་ནུས་ལྡན་བྱ་ཐབས་སྤྱད་དེ་སྐྱེ་ཁམས་མ་ལག་སྲུང་སྐྱོང་དང་ཉམས་གསོ་བྱེད་ཤུགས་མུ་མཐུད་ཆེ་རུ་བཏང་སྟེ། བྱེ་རྡོའི་ལས་རིགས“ཟང་ཟིང”ནས“བཅོས་སྐྱོང”བྱེད་པའི་ཕྱོགས་སུ་འགྱུར་བར་སྐུལ་འདེད་བཏང་ཡོད།

དུས་རབས་གསར་པའི་ཆུ་བོ་དང་མཚོའི་བཅོས་སྐྱོང་གི་ལམ་བུའི་ཐོག རང་སྐྱོང་ལྗོངས་ཀྱིས་ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་བསམ་བློ་མུ་མཐུད་ལག་བསྟར་གཏིང་ཟབ་བྱས་ཏེ། ཆུ་བོ་དང་མཚོའི་ཕྱོགས་བསྡུས་བཅོས་སྐྱོང་གི་དམིགས་ཚད་དང་ལས་འགན་ལ་དམིགས་ནས། ནུས་ཤུགས་གཅིག་སྒྲིལ་དང་དཀའ་སྤྱད་འབད་བརྩོན་གྱིས་ཆུ་དཔོན་དང་མཚོ་དཔོན་ལམ་ལུགས་ཀྱི་ལས་ཀའི་ཇུས་གཞི་མུ་མཐུད་འཐུས་སྒོ་ཚང་དུ་གཏོང་རྒྱུ་དང་། རྒྱལ་ཁབ་ཀྱི་སྐྱེ་ཁམས་དཔལ་ཡོན་གྱི་མཐོ་ས་དང་རྒྱལ་ཁབ་ཀྱི་སྐྱེ་ཁམས་བདེ་འཇགས་ཡོལ་བ་བརྟན་དུ་བཏང་སྟེ་སླར་ཡང་གྲུབ་འབྲས་གསར་པ་ཐོན་པར་བྱེད་རྒྱུ་ཡིན་པ་རེད། (བསོད་ནམས་མཚོ་མོ་དང་། ཉི་མ་ཚེ་རིང་། ཚེ་བརྟན་རྡོ་རྗེ་བཅས་ཀྱིས་བསྒྱུར)