འདི་ནི་ལྷ་ས་སྤྲིན་གནམ་མཚོ་ཡི་སྤྱི་གླིང་ཡིན་པ།

འདི་ནི་ལྷ་ས་སྤྲིན་གནམ་མཚོ་ཡི་སྤྱི་གླིང་གི་བྱང་ངོས་སུ་ལས་མིས་སྡོང་ཕྲུག་ལ་ཆུ་རྒྱག་བཞིན་པ།

འདི་ནི་མི་རྣམས་ཀྱིས་ལྷ་ས་སྤྲིན་གནམ་མཚོ་ཡི་སྤྱི་གླིང་གི་ལན་ཆིའུ་སྤོ་ལོ་ཐང་དུ་སྤོ་ལོ་རྒྱག་བཞིན་པ།

ལྷ་སའི་སྤྲིན་གནམ་མཚོ་ཡི་སྤྱི་གླིང་ནི་ལྷ་ས་གྲོང་ཁྱེར་གྱིས་འགྱིག་བལ་གྲོང་ཁྱེར་གྱི་ཇུས་འགོད་གཞིར་བཟུང་བསྐྲུན་པའི་རྣམ་གྲངས་དང་པོ་ཡིན་པ་རེད། ཀྲུང་ཚའེ་ཁེ་ཕུའུ(པེ་ཅིང)སྐྱེ་ཁམས་ཁོར་ཡུག་ཚད་ཡོད་ཀུང་སིའི་སྤྱི་ཁྱབ་ཅིང་ལི་སུའེ་གཡན་ལི་ཡིས་ཁོར་ཡུག་ཉམས་གསོའི་རིགས་གཅིག་མཁས་ཅན་གྱི་ངོས་ནས་རྣམ་གྲངས་དེའི་ནང་ཁོ་པས་ཞིབ་སྤེལ་བྱས་པའི“ས་རྒྱུའི་ནང་གི་སྲ་གཟུགས་སྙིགས་རོའི་རྩད་ཞིབ་དཔེ་ལེན་སྒྲིག་ཆས”དང་། “ལྕགས་རའི་སྒྲོམ་སྟེགས”སོགས་ཁེ་བེད་བདག་ཐོབ་ཀྱི་ལག་རྩལ་སྤྱད་དེ་ཆུ་ཡག་པོ་སིམ་པའི་འགན་ལེན་བྱས་ནས་ཆུ་འབུད་མ་ལག་གི་གནོན་ཤུགས་ཆུང་དུ་བཏང་བ་རེད། དེ་དང་ཆབས་ཅིག སྤང་གཤོང་དང་ཆར་ཆུའི་མེ་ཏོག་ལྡུམ་ར་སོགས་ཇུས་འགོད་ཀྱི་འདུ་ཤེས་ལས་ཀྱང་ཆར་ཆུ་གསོག་འཇོག་དང་སིམ་པའི་ནུས་པ་གང་ལེགས་ཐོན་ནས་རྩི་ཤིང་དང་བྱེ་སའི་ཕྱོགས་བསྡུས་ནུས་པ་བརྒྱུད་ཆར་ཆུ་དྭངས་གསིང་བྱེད་ཀྱི་ཡོད་པ་རེད། ལག་རྩལ་དེ་དག་སྤྱད་པ་ལས་སྤྱི་གླིང་དེ་ཉིད་ལྷ་སའི་འགྱིག་བལ་སྒྲིག་བཀོད་ཕུན་སུམ་ཚོགས་ཤོས་ཀྱི་འགྱིག་བལ་རྣམ་པའི་སྤྱི་གླིང་གྲས་ཤིག་ཏུ་གྱུར་ནས་སྤྱི་གླིང་གི་སྐྱེ་ཁམས་ཀྱི་ཕན་འབྲས་དང་ཁོར་ཡུག་གི་སྤུས་ཚད་ལེགས་སུ་ཕྱིན་པ་མ་ཟད། ད་དུང་ལྷ་ས་གྲོང་ཁྱེར་གྱི་འགྱིག་བལ་གྲོང་ཁྱེར་འཛུགས་སྐྲུན་ཐད་དཔེ་མཚོན་བཟང་པོ་ཞིག་བཏོད་ཡོད་པ་རེད།

ལྷ་ས་གྲོང་ཁྱེར་གྱི་འགྱིག་བལ་གྲོང་ཁྱེར་དཔེ་སྟོན་འཛུགས་སྐྲུན་གྱི་གཙོ་གནད་རྣམ་གྲངས་ཤིག་ཡིན་པའི་ངོས་ནས། ལྷ་སའི་སྤྲིན་གནམ་མཚོ་ཡི་སྤྱི་གླིང་འཛུགས་སྐྲུན་བྱེད་སྐབས་འགྱིག་བལ་གྲོང་ཁྱེར་འཛུགས་སྐྲུན་གྱི་ཇུས་འགོད་འདུ་ཤེས་སྤྱད་པ་དང་། ལྷོ་ངོས་མཐོ་ལ་བྱང་ངོས་དམའ་བའི་རང་བྱུང་གི་གཟར་ཚད་ལ་བརྟེན་ནས་སྐྱེ་ཁམས་རྫིང་བུ་དང་། ཆུ་ཤུལ་གྱི་སྲུང་རགས། སྤང་གཤོང་། ཆར་ཆུའི་མེ་ཏོག་ལྡུམ་ར། སྐྱེ་ཁམས་རྩྭ་ཁེབས་ཡུར་བུ། ཐོག་ཁའི་སྤང་སོགས་འགྱིག་བལ་སྒྲིག་བཀོད་སྤྱད་པ་བརྒྱུད། ཆར་ཆུ་རང་བཞིན་གྱིས་སིམ་པ་དང་། གསོག་འཇོག འཁྱིལ་བ། གཙང་གསིང་། ཚུར་བསྡུ་བེད་སྤྱོད་བཅས་ཐུབ་ཡོད་པ་རེད། དེས་གྲོང་ཁྱེར་གྱི་འཁྱིལ་ཆུའི་གནོད་སྐྱོན་ཞི་ལྷོད་དུ་ནུས་ལྡན་ཕྱིན་པ་མ་ཟད། ས་ཆ་དེར་སྐྱེ་སྟོབས་དང་གསོན་ཤུགས་ཀྱང་རྒྱུན་མཐུད་སྦྱིན་ཡོད་པ་རེད།

སུའེ་གཡན་ལིས་གསར་འགོད་པར“སྤྱི་གླིང་བསྐྲུན་རྗེས། ལོ་རེའི་ཆར་ཆུ་རྒྱུག་ཚད་85%ཚོད་འཛིན་ཐུབ་ཟིན་རྒྱུ་དང་། སྤང་གཤོང་དང་ཆུ་གསོག་རྫིང་བུ་སོགས་འགྱིག་བལ་སྒྲིག་བཀོད་ཀྱིས་ཆར་ཆུ་སྨི་རྒྱ་དཔངས་གྲུ་བཞི་ཁྲི་2.8ཙམ་བསྐྱིལ་ཐུབ་ཅིང་། སྤྲིན་གནམ་མཚོ་ཡི་སྤྱི་གླིང་གི་ཆར་ཆུ་གང་ལེགས་སྤྱད་དེ་རྩི་ཤིང་ལ་ཆུ་འདྲེན་པ་དང་སྤྱི་པའི་གསང་སྤྱོད་ཆུ་བཤལ་གཏོང་བ་སོགས་བྱེད་ཐུབ”ཅེས་བཤད།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་མ་ལག་ཅན་དང་ས་ཁོངས་ཡོངས་ཀྱི་སྒོ་ནས་འགྱིག་བལ་གྲོང་ཁྱེར་འཛུགས་སྐྲུན་ལ་སྐུལ་འདེད་བཏང་ནས་འགྱིག་བལ་གྲོང་ཁྱེར་འཛུགས་སྐྲུན་གྱི་ལག་བསྟར་ཐབས་ལམ་འཚོལ་ཞིབ་དང་། ས་ཁོངས་ཀྱི་འབབ་རྒྱུད་ལ་དམིགས་པ། གྲོང་ཁྱེར་གྱི་ཆུ་ལོག་དང་ཞོད་སྐྱོན་སྤྱི་འདོམས་བཅོས་སྐྱོང་བཅས་བྱས་ནས“དབུགས་རྔུབ་གཏོང་གི་འགྱིག་བལ་གྲོང་ཁྱེར”ཧུར་ཐག་བཏོད་ཡོད། ལྷ་ས་གྲོང་ཁྱེར་དུ་དུས་ཚིགས་རང་བཞིན་གྱི་ཆར་པ་འབབ་པ་སོགས་གནམ་གཤིས་ཀྱི་ཤུགས་རྐྱེན་ཐེབས་སླ་བ་དང་དུས་ཐུང་ནང་དྲག་ཆར་ཡང་ཡང་འབབ་ཀྱི་ཡོད། དེའི་ཁར་གྲོང་ཁྱེར་གྱི་ས་བབ་དང་ས་འོག་ཆུ་འགྲོའི་མདོང་ལམ་དྲ་བ་རྙོག་འཛིང་ཆེ་ལ་མདོང་ལམ་ཆུང་བ་སོགས་ཀྱི་གནད་དོན་ཡོད་པའི་དབང་གིས། ལྷ་ས་གྲོང་ཁྱེར་གྱི་ལམ་དུམ་ཁག་གཅིག་གི་དམའ་སར་དུས་ཐུང་ནང་རྟག་པར་ཆུ་འཁྱིལ་བའི་གནས་ཚུལ་ཡང་ཡང་ཐོན་གྱི་ཡོད། ལོ་ཤས་གོང་ལྷ་སའི་གྲོང་མི་ཆུ་ལ་བརྒལ་ནས་ཕྱིར་སྐྱོད་པའི་ཐད་མྱོང་ཚོར་ཟབ་མོ་ཡོད་ཅིང་། དེ་ནི་ཆར་དུས་སུ་གྲོང་མི་རྣམས་སྐྱོད་སྐབས་ཀྱི་སེམས་ནད་ལྟ་བུར་གྱུར་ཡོད།

ལྷ་ས་གྲོང་ཁྱེར་གྱི་མིག་སྔའི་གནད་དོན་ཕྱོཌ་བསྡུས་ཐག་གཅོད་བྱེད་པ་དང་། གྲོང་ཁྱེར་འཛུགས་སྐྲུན་གྱི་ཕྱོགས་བསྡུས་འགན་ལེན་ནུས་པ་ཆེ་རུ་གཏོང་བ། ཆུ་ལོག་དང་ཞོད་སྐྱོན་འགོག་པའི་མ་ལག་ལ་ཤུགས་སྣོན་རྒྱག་པ་བཅས་བྱ་ཆེད། ལྷ་ས་གྲོང་ཁྱེར་གྱིས་འགྱིག་བལ་གྲོང་ཁྱེར་འཛུགས་སྐྲུན་ལ་ཁྱོན་ཡོངས་ནས་སྐུལ་འདེད་བཏང་ཞིང་། ལྷག་པར་དུ“འགྱིག་བལ+”ཞེས་པའི་འདུ་ཤེས་དང་མཉམ་འདྲེས་བྱས་ཏེ་ཟླ་5པའི་ཟླ་དཀྱིལ་ནས་བཟུང་འགྲོ་ལམ་12སྒྱུར་བཀོད་བྱས་པ་མ་ཟད། འགྱིག་བལ་གྲོང་ཁྱེར་གྱི་འདུ་ཤེས་དང་ཟུང་འབྲེལ་གྱིས་ཆར་ཆུའི་མདོང་ལམ་གཙོ་བོ་དང་། བཙོག་ཆུའི་མདོང་ལམ་གཙོ་བོ། ཆུ་འབུད་མདོང་ལམ་གཙོ་བོ། ཞིབ་བཤེར་ཁྲོན་པ་བཅས་མང་དུ་བཏང་ཞིང་། ཆུ་འབུད་འགྲོ་ལམ་འཐུས་སྒོ་ཚང་དུ་བཏང་ནས་གྲོང་ཁྱེར་གྱི་བཙོག་ཆུ་དང་ཆར་ཆུ་བསྡུ་རུབ་ནུས་པ་ལེགས་སུ་ཤུགས་ཆེན་བཏང་བ་དང་། གྲོང་ཁུལ་གྱི་མདོང་དྲའི་འཁྱིལ་ཆུ་ཕྱིར་འབུད་དང་འབྲུབ་འགོག་མ་ལག་ལ་ཤུགས་སྣོན་བརྒྱབ་ཡོད། གཞན་ཡང་རྐང་ཐང་འགྲོ་སའི་ལམ་དེའང་སྔོ་འགྱུར་དང་རྫིང་བུ། ཆུ་སིམ་ཨར་འདམ་སོགས་འགྱིག་བལ་རིགས་ཀྱི་ལས་གྲྭའི་ནང་བཅུག་ནས་ལྷ་སའི་ཆུ་འབུད་བྱེད་ནུས་མངོན་གསལ་དོད་པོས་ཆེ་རུ་སོང་ཡོད།