“དགུན་དུས་བོད་ལ་ཡུལ་སྐོར”བྱེད་པའི་སྲིད་ཇུས་ཀྱིས་ཁེ་ལས་དང་དམངས་ལ་རྒྱུན་མཐུད་ཕན་པ་བསྐྲུན་པ།
ཡུལ་སྐོར་བ་དེ་བས་མང་བ་ས་མཐོར་ཡོང་རྒྱུའི་ཡིད་དབང་བཀུག་པ།
འདི་ལོའི“དགུན་དུས་བོད་ལ་ཡུལ་སྐོར”བྱེད་པའི་བྱེད་སྒོས“བཟའ་འཐུང་དང་། ཞག་སྡོད། འགྲུལ་བཞུད། སྤྲོ་གསེང་། ཉོ་སྒྲུབ། རོལ་རྩེད”བཅས་རིག་གནས་དང་ཡུལ་སྐོར་གྱི་གཙོ་རྒྱུ་དྲུག་ནས་འགོ་བརྩམས་ཏེ། གཟིགས་སྐྱོང་སྲིད་ཇུས་ཤུགས་ཆེན་བཏོན་པ་དང་། ཐོན་རྫས་མྱོང་རོལ་བྱེད་སྟངས་རྒྱུན་ཆད་མེད་པར་རིམ་སྤོར་ལེགས་གཏོང་བྱེད་པ། རིག་གནས་དང་ཡུལ་སྐོར་མཉམ་འདྲེས་ཀྱི་དར་སོ་ཆེ་བའི་ལས་རྣམ་སྣོན་པ། སྤུས་སྤོར་འགྲུལ་འགུག་ནུས་ལྡན་བཅས་བྱས་ནས། བོད་ཀྱི་རིག་གནས་དང་ཡུལ་སྐོར་འཕེལ་རྒྱས་ལ་སྒུལ་ཤུགས་ཆེན་པོ་བསྣན་པ་རེད།
གཟིགས་སྐྱོང་སྲིད་ཇུས་ལས་མངོན་པར། དགོན་སྡེའི་མཛེས་ལྗོངས་ཁུལ་ཕུད། ལྗོངས་ཡོངས་ཀྱི་Aརིམ་པའི་མཛེས་ལྗོངས་ཁུལ་ཚང་མར་རིན་མེད་ལྟ་སྐོར་བྱེད་ཆོག་པ་དང་། “སྤ་སེ་མི་དགོས་པའི་རྣམ་པ”འགོ་བཙུགས་པས་ཕོ་བྲང་པོ་ཏ་ལ་དང་ནོར་བུ་གླིང་ཁ་སོགས་མཛེས་ལྗོངས་ཁུལ་གྱིས་ཡུལ་སྐོར་བ་མང་པོའི་ཡིད་དབང་འཕྲོག་ཡོད། ལྗོངས་ཡོངས་ཀྱི་སྐར་མ་གསུམ་རིམ་པ(སྐར་མ་གསུམ་རིམ་པ་ཚུད་པ)ཡན་གྱི་མགྲོན་ཁང(གསོལ་མགྲོན་ཁང)དང་དེ་བཞིན་རྒྱལ་སྤྱིའི་སྤུས་རྟགས་དང་རྩེར་སོན་གསོལ་མགྲོན་ཁང་བཅས་ཀྱིས་ཡུལ་སྐོར་བ་ཉུང་བའི་དུས་ཀྱི་རིན་གོང་ལག་ལེན་བསྟར་གྱི་ཡོད།
“དགུན་དུས་བོད་ལ་ཡུལ་སྐོར་བྱེད་པའི་དྲིལ་བསྒྲགས་པར་གཞིས་ངའི་ཡིད་དབང་རྦད་དེ་འཕྲོག་སོང་ལ་སྲིད་ཇུས་ཀྱི་གཟིགས་སྐྱོང་བྱེད་ཤུགས་ཀྱང་ཧ་ཅང་ཆེན་པོ་འདུག ང་ཚོ་སྡོད་སའི་མགྲོན་ཁང་གི་ཁོར་ཡུག་ཡག་པ་དང་ཁྱད་ཆོས་ལྡན་པ་མ་ཟད། རིན་གོང་ཡང་ཁེ་བས་དངོས་འབྲེལ་སྡོད་རིན་ཆོག་པ་ཞིག་འདུག”བྱང་ཤར་རྒྱུད་ནས་ཡོང་བའི་ཡུལ་སྐོར་བརྡར་པ་ཁྲུན་ཁྲུན་དང་རོགས་པ་ཁག་ཅིག་བར་སྐོར་ཉེ་འགྲམ་གྱི་གོར་ཥ་གསོལ་མགྲོན་ཁང་དུ་བསྡད་པ་དང་ད་ཐེངས་བོད་ལ་ཡུལ་སྐོར་དུ་ཡོང་བར་ཁོང་ཧ་ཅང་མོས་པོ་བྱུང་འདུག
བོད་ལྗོངས་ཀྱི་རིག་གནས་དང་ཡུལ་སྐོར་གྱི་ཞབས་ཞུ་མཁོ་སྤྲོད་བྱེད་ཤུགས་སྔར་བས་ལེགས་སུ་དང་རྒྱ་ཆེ་རུ་གཏོང་བ་དང་། འཛད་སྤྱོད་ཀྱི་མི་མངོན་པའི་སྟོབས་ཤུགས་མངོན་པ། མི་དམངས་མང་ཚོགས་ཀྱི་རང་ཉིད་ཀྱི་ཁྱད་ཆོས་ལྡན་པ་དང་། སྣ་མང་ཅན། སྤུས་ལེགས་ཅན་བཅས་ཀྱི་ཞབས་ཞུའི་དགོས་མཁོ་དེ་བས་ལེགས་པའི་སྒོ་ནས་སྐོང་བ་བཅས་བྱས་ཏེ། བོད་ཀྱི་རིག་གནས་དང་ཡུལ་སྐོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད། རང་ལྗོངས་ཀྱི་རིག་གནས་དང་ཡུལ་སྐོར་སྡེ་ཚན་གྱིས་བོད་ལ་ཡོང་བའི་གནམ་གྲུའི་སྤ་སེ་ཁྲི་དང་མེ་འཁོར་སྤ་སེ་ཁྲི་སྤྲོད་པ་དང་། “ཕྲུག་ཁྲིད་ཡུལ་སྐོར”གྱི་འཛད་སྤྱོད་ཞིབ་བཤེར་རྩིས་སུབ་སྤ་སེ་སྤྲོད་པ། དེ་བཞིན “གྲོགས་སྒྲིག་ཡུལ་སྐོར”གྱི་འཛད་སྤྱོད་ཞིབ་བཤེར་རྩིས་སུབ་སྤ་སེ་སྤྲོད་པ་སོགས་ཀྱི་བྱེད་སྒོ་སྤེལ་ནས། ཡུལ་སྐོར་བར་ཕན་པ་དེ་བས་མང་བ་ཐོབ་ཐབས་བྱས་ཡོད་པ་རེད།
“དགུན་དུས་བོད་ལ་ཡུལ་སྐོར་བྱེད་པའི་བྱེད་སྒོ་ལོ་མང་པོ་བསྟུད་མར་སྤེལ་བས་ལས་རིགས་ལ་ཕན་ཐོགས་མངོན་གསལ་དོད་པོ་བྱུང་ཡོད”ཅེས་ཡུན་རིང་ཡུལ་སྐོར་ལས་ཀ་བྱེད་མཁན་ངག་ཕུན་གྱིས་གསར་འགོད་པར་བརྗོད་པ་དང་། ཁོང་གིས་དགུན་དུས་བོད་ལ་ཡུལ་སྐོར་བྱེད་པའི་རིམ་སྤེལ་བྱེད་སྒོ་ཡུན་རིང་དང་སྔར་བས་ལེགས་པའི་སྒོ་ནས་སྤེལ་ཐུབ་རྒྱུའི་རེ་བ་བྱེད་ཀྱི་ཡོད་པ་རེད།