བོད་ལྗོངས་ཉིན་རེའི་ཚགས་པར་དང་སི་ཁྲོན་ཉིན་རེའི་ཚགས་པར་གྱི་ཁྲོན་བོད་ལམ་ཐིག་མཉམ་འབྲེལ་འཕྲིན་སྤེལ་ཚོགས་ཆུང་གིས།

རྒྱལ་ལམ་318ལམ་རྒྱུད་དུ་ཕར་འགྲོ་ཚུར་འོང་བྱེད་མཁན་རླངས་འཁོར་མང་ལ་ཡུལ་ལྗོངས་ཀྱང་མཛེས་ཤིང་ལྟ་ན་སྡུག་པས་ཡུལ་སྐོར་བས་ལམ་བར་དུ་པར་ཡང་ཡང་རྒྱག་གི་ཡོད། འཕྲིན་སྤེལ་ཚོགས་ཆུང་དང་བཅས་པ་དཔའ་ཤོད་རྫོང་ར་འོག་གྲོང་རྡལ་དུ་འབྱོར་མ་ཐག་དེ་གའི་ཡིད་དུ་འོང་བའི་མཚོ་དང་བརྗིད་ཆགས་ཤིང་ཉམས་དགའ་བའི་འཁྱགས་རོམ་གྱིས་ཡིད་དབང་རབ་ཏུ་འཕྲོག རྒྱང་རིང་གི་འཁྱགས་རོམ་བཞུར་ཆུ་ར་འོག་མཚོའི་ནང་དལ་གྱིས་རྒྱུག་བཞིན་ཡོད་ལ། མཚོ་ངོགས་སུ་སྐྱེ་སྟོབས་ཀྱིས་དཔལ་འབར་བའི་གྲོང་ཚོ་ཞིག་ཀྱང་འདུག

ར་འོག་མཚོ་མཛེས་ལྗོངས་ཁུལ་དོ་དམ་ཨུ་ལྷན་གྱི་ཀྲུའུ་རེན་ཉི་མ་ཚེ་རིང་གིས་2005ལོར་ཁོང་ལས་ཀར་ཞུགས་མ་ཐག་སྐབས་ཀྱི་ལ་སྒོ་གྲོང་ཚོའི་རྣམ་པ་ད་ལྟའང་གསལ་ལེར་དྲན་གྱི་ཡོད།

ཁོང་གིས་ངོ་སྤྲོད་བྱས་པར་གཞིགས་ན། ད་ཆ་ར་འོག་གྲོང་རྡལ་ནས་ལ་སྒོ་གྲོང་ཚོའི་བར་ཤར་བགྲོད་ཐུབ་པའི་འགྲོ་ལམ་ནི་རྒྱལ་ལམ་559རེད། འོན་ཀྱང་2016ལོའི་གོང་དུ་ལམ་དེ་ནི་བྱེ་རྡོའི་ལམ་ཞིག་ཡིན་པ་དང་། གྲོང་ཚོར་ཐ་ན་གློག་ཀྱང་ཤར་གཏོང་ཐུབ་མེད། ཆར་པ་དང་གངས་འབབ་སྐབས་མི་སེར་ཚོ་ཕྱིར་སྐྱོད་པར་དཀའ་ངལ་འཕྲད་ཀྱི་ཡོད།

ཉི་མ་ཚེ་རིང་གིས“སྐབས་དེ་དུས་མང་ཚོགས་ཕར་འགྲོ་ཚུར་འོང་བྱེད་སྐབས་རྟ་ཁོ་ནར་བརྟེན་དགོས་ཀྱི་ཡོད། འགྲོ་ལམ་ཤར་གཏོང་ཐུབ་མེད་པས་གནའ་བོའི་འཁྱགས་རོམ་དེ་རི་ཁུག་ཏུ་གནས་པས་མི་རྣམས་ཀྱིས་ཤེས་ཚོར་ཐུབ་ཀྱི་མེད་ལ། གློག་མེད་པས་འཁྱགས་སྒམ་དང་གོས་འཁྲུའི་འཕྲུལ་ཆས་སོགས་ནི་གྲོང་མི་ཚོས་བསམ་ཀྱང་མི་ཕོད་པའི་དངོས་པོ་རེད”ཅེས་བཤད། 

ད་ཆ་འགྲོ་ལམ་ཤར་གཏོང་ཐུབ་པ་དང་བསྟུན་ནས་ཡུལ་སྐོར་དུ་ཡོང་མཁན་མང་དུ་སོང་ཞིང་། གྲོང་ཚོའི་རྨང་གཞིའི་སྒྲིག་བཀོད་འཐུས་སྒོ་ཚང་དུ་ཕྱིན་ནས། མགྲོན་ཁང་དང་དམངས་སྲོལ་གནས་ཚང་གཉེར་བ་དང་། བོད་ཁྱིམ་སྤྲོ་སྐྱིད་ཁང་དང་། ཇ་ཁང་། གསོལ་མགྲོན་ཁང་། སྒོ་རྩིས་ཚོང་ཁང་བཅས་ཀྱི་ཚོང་ཡག་པོ་ཡོད་པ། ཡུལ་སྐོར་དཔལ་འབྱོར་འཕེལ་རྒྱས་ཕྱིན་པས་གྲོང་མི་ཚོའི་འབབ་ཁུངས་ཀྱང་ཉིན་རེ་ལས་མ་འདས་པར་སྣ་མང་ཅན་དུ་གྱུར་ཡོད།

ལ་སྒོ་འཁྱགས་རོམ་མཛེས་ལྗོངས་ཁུལ་གྱི་ཡུལ་སྐོར་ལྟེ་གནས་སུ་ལས་ཀ་བྱེད་མཁན་ལ་སྒོ་གྲོང་ཚོའི་གྲོང་མི་མང་ཤོས་ལ་མི་17ཡོད་ཅིང་། ལ་སྒོ་གྲོང་ཚོའི་ཏང་ཀྲི་པུས་ད་དུང་བོད་ལྗོངས་གསང་མདའ་གེ་སར་གྲོང་གསེབ་ཡུལ་སྐོར་ཆེད་ལས་མཉམ་ལས་ཁང་དང་། དེ་བཞིན་ལ་སྒོ་འཁྱགས་རོམ་དང་། གདོང་དཀར་འཁྱགས་རོམ། རྡོ་གསུམ་མཚོའི་སྤྲོ་གསེང་དྲེལ་པ་རུ་ཁག་བཅས་བཙུགས་ཏེ་དུད་ཚང་107ལ་འབབ་འཕར་ཕྱུག་འགྱུར་ཡོང་བར་ཐད་ཀར་སྐུལ་ཁྲིད་བྱས་ཡོད།

འཁྱགས་རོམ་རྔམ་བརྗིད་ཆེ་བ་དང་དེའི་སྐྱེ་ཁམས་ཁོར་ཡུག་ཞན་ལ་གནམ་གཤིས་འགྱུར་ལྡོག་ཀྱང་ཆེན་པོ་ཡོད། འཁྱགས་རོམ་ལ་སྲུང་སྐྱོང་ཡག་པོ་བྱ་ཆེད། ལ་སྒོ་གྲོང་ཚོས་སྐྱེ་ཁམས་ཀྱི་མཐའ་ཚད་བརྟན་པོར་བསྲུངས་ཤིང་། གནས་དེའི་མི་ཚང་མ་ཁོར་ཡུག་སྲུང་སྐྱོང་གི་སྲུང་དམག་ཡིན་པ་དང་། གྲོང་མི་ཚོས་དུས་བཀག་ལྟར་སྐོར་བཤེར་གྱིས་གད་སྙིགས་གཙང་སེལ་བྱེད་ཀྱི་ཡོད་ལ། སྐྱེ་ཁམས་སྲུང་སྐྱོང་ཁུལ་དུ་འཛུགས་སྐྲུན་གང་བྱུང་བྱེད་དུ་འཇུག་གི་མེད། ཕྱི་ནས་ཡོང་བའི་ཡུལ་སྐོར་བར་ཆ་མཚོན་ན་ཁོང་ཚོས་དྲིལ་བསྒྲགས་ཧུར་ཐག་བྱས་ཏེ་ཡུལ་སྐོར་བས་སྐྱེ་ཁམས་ཁོར་ཡུག་ལ་རང་རྟོགས་ངང་གཅེས་སྤྲས་བྱེད་པར་ཁྲིད་སྟོན་བྱེད་ཀྱི་ཡོད།

ལ་སྒོ་གྲོང་ཚོའི་ཏང་ཀྲི་པུའུ་ཡིས“ཏང་འཛུགས་སྐྱོང་དང་རིག་གནས་ཡུལ་སྐོར་ཟུང་དུ་འབྲེལ་བའི”ཁྱད་ལྡན་ཏང་འཛུགས་སྐྱོང་གི་སྤུས་རྟགས་བཏོད་ནས། ཏང་ཡོན་ཡོངས་ཀྱིས“གསར་བརྗེའི་ཁྱིམ་གཞིས་ཀྱི་སྲུང་དམག”གི་གདོང་མཆོང་གོས་དང“འཁྱགས་རོམ་སྲུང་དམག”གི་སྟོད་ཀོར་གྱོན་ནས། ཡུལ་སྐོར་སྣེ་ལེན་དང་། སྐྱེ་ཁམས་སྲུང་སྐྱོང་། ཕྱི་རོལ་རོགས་སྐྱོབ། དམངས་ཕན་ཞབས་ཞུ་སོགས་ཀྱི་བྱེད་སྒོ་སྤེལ་གྱི་ཡོད།

སི་ཁྲོན་ནས་ཡིན་པའི་སྐུ་ཞབས་ལི་ལགས་ཀྱིས་རང་འཁོར་བཏང་སྟེ་ཕྲུ་གུ་ཁྲིད་ནས་རྒྱལ་ལམ་318བརྒྱུད་དུ་འཁྱགས་རོམ་ལ་ལྟ་བར་ཡོང་ཡོད། ཡར་ཀླུང་འཁྱགས་རོམ་གྱི་གཤམ་དུ་གསར་སྤེལ་བྱེད་མི་ཐུབ་པའི་བྱེ་རྡོའི་ལམ་ཞིག་ཡོད་པ་དེར་དྲེལ་པ་ཚོའང་འགྲོ་མི་ཐུབ་པ་དང་ཕྲུ་གུ་ཆུང་ཆུང་ཡིན་པ་མཐོང་བས“འཁྱགས་རོམ་སྲུང་དམག”གིས་ཕྲུ་གུ་པང་དུ་བཏབ་ནས་མདུན་དུ་བསྐྱོད། དེ་རྗེས་ཁོང་གིས“བརྗིད་ཆགས་ཡིད་དུ་འོང་བའི་འཁྱགས་རོམ་དེ་ནི་དངོས་གནས་ཧང་སངས་དགོས་པ་ཞིག་འདུག་ལ། ལས་དོན་པ་ཚོའི་ཞབས་ཞུའང་ཧ་ཅང་ཡག་པོ་འདུག་པས་ཁོང་ཚོར་བསྔགས་བརྗོད་བྱེད་ཀྱི་ཡིན”ཞེས་སེམས་འགུལ་ཆེན་པོ་ཐེབས་བཞིན་བཤད།

ཉི་མ་ཚེ་རིང་གིས“ར་འོག་མཚོ་དང་ལ་སྒོ་འཁྱགས་རོམ་གྱི་ཡུལ་སྐོར་ལ་མདུན་ལམ་ཡངས་བས། ང་ཚོས་རྨང་གཞིའི་སྒྲིག་བཀོད་མུ་མཐུད་འཐུས་སྒོ་ཚང་དུ་གཏོང་བ་དང་། སྐྱེ་ཁམས་སྲུང་སྐྱོང་ལས་དོན་སྔར་བས་ཡག་པོ་སྒྲུབ་པ། མཛེས་ལྗོངས་ཁུལ་གསར་སྤེལ་ཐལ་དྲགས་རྒྱུ་མེད་པ་བཅས་བྱས་ཏེ་རི་ཀླུང་མཐའ་དག་སྲུང་སྐྱོང་ཡག་པོ་བྱས་ཚེ་གསེར་རི་དངུལ་རིར་རིམ་བཞིན་འགྱུར་ཐུབ”ཅེས་བཤད།