ཟླ་10པའི་ཟླ་མཇུག་ཏུ་བོད་ལྗོངས་ནག་ཆུ་གྲོང་ཁྱེར་ཨ་མདོ་རྫོང་གཙང་གསུམ་ཆུ་འགོའི་རང་བྱུང་སྲུང་སྐྱོང་ཁུལ་གྱི་གདང་ལའི་བྱང་རྒྱུད་ས་ཁོངས་ཀྱི་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་10℃ཙམ་བར་ཆག་ཡོད། “ཐེངས་འདི་ནི་ངས་ད་ལོར‘འབྲི་ཆུའི་ཆུ་འགོར’སྐོར་སྲུང་བྱེད་ཐེངས་བཞི་པ་ཡིན། གནམ་གཤིས་ལ་བལྟས་ན་ཁ་བ་འབབ་གྲབས་འདུག” ཞོགས་པའི་ཆུ་ཚོད་དྲུག་པར“དམར་ཆུ་ཤང་འབྲི་ཆུའི་ཆུ་འགོའི་ཏང་ཡོན་མཚེ་འཕྲིན་དང་བླངས་རུ་ཁག”ཅེས་བྲིས་པའི་རླུང་འགོག་གྱོན་ཆས་གྱོན་པའི་ལོ་70ཙམ་ལ་སླེབས་པའི་ཚེ་དགའ་དམར་ཆུ་ཤང་སྲིད་གཞུང་གི་སྒོ་རའི་ནང་ནས་གསར་འགོད་པར་ཏག་ཏག་ཐུག་བྱུང་། མཐའ་འཁོར་དུ་འཇམ་ཐིང་ངེར་གནས་ལ། དགུང་སྔོན་དབྱིངས་སུ་སྐར་ཚོགས་རྣམ་པར་བཀྲ། དེའི་དུས་བྱེས་བགྲོད་རླངས་འཁོར་རྡོག་ཐོན་བྱེད་འགོ་ཚུགས།

ཡུད་ཙམ་སོང་རྗེས་གསར་འགོད་པའི་ལག་ཐོགས་ཁ་པར་གྱི་བརྡ་རྟགས་མེད་པར་གྱུར། བགྲེས་སོང་ཚེ་དགས་ངག་གི་སྨྲ་སྒོ་ཕྱེ།

1968ལོ་ནས་ད་བར་ཚེ་དགའ་ནི་ནོར་ཐེར་གྲོང་ཚོའི་སྨན་པ་ཞིག་ཡིན་པ་དང་། ཁོང་གིས་རྟག་ཏུ་རྐང་ཐང་མར་འགྲོ་བའམ་ཡང་ན་རྟ་བཞོན་ནས་དམར་ཆུ་ཤང་གི་ཡངས་ཤིང་རྒྱ་ཆེ་བའི་འབྲོག་ཁུལ་དུ་ཕར་འགྲོ་ཚུར་འོང་གིས་འབྲོག་པ་ཚོར་སྨན་སྐྱེལ་གྱི་ཡོད། ཁོང་ལ་ད་དུང་ཐོབ་ཐང་གཞན་ཞིག་ཡོད་པ་སྟེ། དམར་ཆུ་ཤང་གི་འབྲི་ཆུའི་ཆུ་འགོའི་ཁོར་ཡུག་སྲུང་སྐྱོང་དང་བླངས་ཞབས་ཞུ་རུ་ཁག་གི་རུ་དཔོན་དང་པོ་དེ་རེད། ཁོང་གིས་དང་བླངས་ཞབས་ཞུའི་རུ་ཁག་ནི་ས་གནས་དེ་གའི་འབྲོག་པ་མང་ཚོགས་དང་བླངས་པ་ལས་གྲུབ་ཡོད། འོན་ཀྱང་ཁོང་གིས་མཐོང་ཆེ་ཤོས་བྱེད་ས་ནི་གུང་ཁྲན་ཏང་ཡོན་གྱི་ཐོབ་ཐང་ཡིན་པ་སྟེ། “ང་1992ལོར་ཏང་ནང་ཞུགས་པ་ཡིན། ཏང་ལོ་32སླེབས་ཀྱི་འདུག”ཅེས་བརྗོད།

1977ལོར། ཁོང་གིས་སྣེ་ཤན་པ་བྱས་ནས་ས་གཤིས་རུ་ཁག་ཅིག་དང་མཉམ་དུ་དུས་ཡུན་ཉིན་40རིང་གི་རྩད་ཞིབ་ཐིག་ལེན་དང་པར་ལེན་གྱི་བྱ་བར་ཞུགས། ཐེངས་དང་པོར་འབྲི་ཆུའི་ཆུ་འགོར་བསྐྱོད་ནས་རི་ཀླུང་གི་མཛེས་པ་དང་སྐྱེ་ཁམས་ཉམས་ཞན་ཡིན་པ་དངོས་སུ་མཐོང་། དེ་རྗེས་ཁོང་གིས་ལས་ཞོར་དུས་ཚོད་སྤྱད་དེ་ལམ་རྒྱུད་དུ་སྐོར་གཡེང་དང་། གད་སྙིགས་སྒྲུག་པ། རི་སྐྱེས་སྲོག་ཆགས་སྲུང་སྐྱོང་བཅས་བྱས་ཡོད། 2016ལོར་ཁོར་ཡུག་སྲུང་སྐྱོང་དང་བླངས་ཞབས་ཞུའི་རུ་ཁག་བཙུགས་རྗེས་ཟླ་རེར་སྐོར་ཞིབ་ཐེངས་ལྔ་ནས་དྲུག་བར་བྱེད་པ་དང་སྐོར་ཞིབ་བྱེད་ཐེངས་རེར་སྤྱི་ལེ་40ལྷག་ཙམ་བསྐྱོད་དགོས་ཀྱི་ཡོད། “འདི་གའི་སྐྱེ་ཁམས་ཧ་ཅང་ཉམས་ཞན་ཡིན་པས་གཏོར་སྐྱོན་ཕོག་ཚེ་སླར་གསོ་ཁག་པོ་ཡོད། དེས་ན་སྲུང་སྐྱོང་ནི་ཧ་ཅང་གལ་འགངས་ཆེ་བ་ཞིག་རེད”ཅེས་ཚེ་དགས་བཤད།

2023ལོའི་ཟླ་7པར་སྐོར་སྲུང་བྱེད་སྐབས་གློ་བུར་དུ་ཆུ་རྒྱས་ནས་ཚེ་དགའ་ཡི་རླངས་འཁོར་ཆུ་ནང་དུ་ཚུད། ཁོང་གིས་རུ་མི་གཞན་དག་སྔོན་ལ་སྐྱོབ་པར་བཅུག་པ་དང་། མཐར་རང་ཉིད་ཕྱིར་འཐེན་མ་ཐུབ་པར་རླངས་འཁོར་ནང་ལུས། རུ་མི་ཚོས་མཚེ་འཕྲིན་བརྒྱུད་ཕྱི་ཕྱོགས་ལ་ཆ་འཕྲིན་བརྒྱུད་སྤྲོད་བྱས་ནས་ཆེད་ལས་རོགས་སྐྱོབ་ལ་བསྒུགས་ནས་བསྡད། དྲག་ཏུ་རྒྱུག་པའི་ཆུ་བོས་རླངས་འཁོར་འཁྱེར་ལ་ཉེ་བས་ཚེ་དགའ་རླངས་འཁོར་གྱི་སྟེང་དུ་འཛེགས་ནས་ཆུ་ཚོད་14ཙམ་ལུས། ཉིན་གཉིས་པའི་ཞོགས་པར་སྲོག་ཉེན་ལས་ཐར་བའི་སྐབས་སུ། ཁོང་ལུས་ཟུངས་ཉམས་ནས་དྲན་པའང་ཐོར།

ཡངས་ཤིང་རྒྱ་ཆེ་བའི་མི་མེད་ལུང་སྟོང་དུ་ལག་ཐོགས་ཁ་པར་ལ་རྟག་ཏུ་བརྡ་རྟགས་མེད་པས་ལབ་པར་རུ་མི་ཚོའི་གལ་ཆེ་ཤོས་དང་བློས་འགེལ་ཆོག་པའི་འཕྲིན་གཏོང་ལག་ཆར་གྱུར། གནས་ཚུལ་འཕྲད་སྐབས་ལབ་པར་ལ་བརྟེན་ནས་ཆ་འཕྲིན་བརྒྱུད་སྤྲོད་བྱེད་དགོས་ཀྱི་ཡོད།

མི་རིང་བའི་གོང་ཚེ་དགའ་དང་རུ་མི་ཚོས་རྒྱུན་གཏན་གྱི་སྐོར་སྲུང་བྱེད་སྐབས། མཚེ་འཕྲིན་ནས“ཚང་མས་དོ་སྣང་གྱིས། སྲུང་སྐྱོང་ཁུལ་དུ་སླེབས་པའི་རླངས་འཁོར་ཞིག་ནང་མི་མང་པོར་ལ་དུག་ཕོག་ནས་སྐྱུག་བཤལ་གྱི་གནས་ཚུལ་ཐོན་འདུག”ཅེས་པའི་འབོད་བརྡ་སླེབས། མཚེ་འཕྲིན་བརྒྱུད་ནས་ཕན་ཚུན་འབྲེལ་བ་མང་པོ་བྱས་མཐར། ཆུ་ཕྲན་ཞིག་གི་འགྲམ་གྱི་རྩྭ་ཐང་ནས་ལག་ཁྱེར་མེད་པའི་བྱེས་བགྲོད་རླངས་འཁོར་དེ་མཐོང་། ཚེ་གང་གྲོང་ཚོའི་སྨན་པ་བྱེད་མྱོང་བའི་ཚེ་དགའ་ནི་ལ་དུག་ཕོག་པར་སྨན་བཅོས་བྱེད་མཁས་པོ་ཡོད། ཁོང་གིས་ལུས་ཐོག་ཏུ་འཁྱེར་བའི་སྨན་རྫས་སྤྱད་དེ་མགྱོགས་མྱུར་ཡུལ་སྐོར་བར་སྨན་བཅོས་བྱས་པ་དང་དུས་མཚུངས་ལབ་པར་སྤྱད་དེ་རུ་མི་གཞན་དག་རོགས་སྐྱོབ་བྱེད་པར་བོས། མཐར་སྲོག་ཉེན་ལས་ཐར་བའི་ཡུལ་སྐོར་བ་ཤང་གི་རི་སྐྱེས་སྲོག་ཆགས་སྲུང་སྐྱོང་ས་ཚིགས་སུ་འཁྲིད་ནས་སྔར་བས་ལྟ་ཞིབ་བྱས་པ་རེད།

ལོ་ལྟར་འཁོར་འཁྲིད་ཡུལ་སྐོར་དུ་ཡོང་མཁན་མང་པོ་ཡོད་མོད། འོན་ཀྱང་བྱེད་སྤྱོད་དེས་འབྲི་ཆུའི་ཆུ་འགོའི་སྐྱེ་ཁམས་ལ་ཚོད་དཔག་བྱེད་ཐབས་བྲལ་བའི་གཏོར་སྐྱོན་ཕོག་ཡོད། དེ་བས་ང་ཚོས་བཀག་འགོག་གང་ཐུབ་བྱེད་པ་དང་འབྲེལ་ཕྱིར་ལོག་རྒྱུའི་ཁ་ཏ་བསླབ་བྱ་བྱེད་ཀྱི་ཡོད། ལོ་འདི་དག་ནང་ཁོར་ཡུག་སྲུང་སྐྱོང་དང་བླངས་རུ་ཁག་གི་ཁོངས་མི་ཇེ་མང་དུ་ཕྱིན་པ་མ་ཟད། ཁོང་གི་བུ་དང་ཚ་བོ་ཡང་དེའི་ནང་ཞུགས་ཡོད་ལ། མཚེ་འཕྲིན་རེ་རེ་ལས་གྲུབ་པའི་ཁོར་ཡུག་སྲུང་སྐྱོང་གི་འགོག་སྲུང་དྲ་བའང་དམ་ཚགས་སུ་འགྲོ་བཞིན་ཡོད་ཅེས་ཚེ་དགས་བཤད།

ད་ཆ་ཚེ་དགའ་ནི་དམར་ཆུ་ཤང་གི་དུས་རབས་གསར་པའི་ཤེས་དཔལ་ལག་ལེན་སུའོ་དམར་ཆུ་ཤང་འབྲི་ཆུའི་ཆུ་འགོའི་ཏང་ཡོན་ལབ་པར་ཞབས་ཞུ་ས་ཚིགས་ཀྱི་ཀྲན་ཀྲང་གཞོན་པ་རེད། ཁོང་གི་སྣེ་ཁྲིད་འོག་ཤང་དེ་ཡོངས་ཀྱི་ཏང་ཡོན་ལས་བྱེད་པ་300ལྷག་ཙམ་རང་འགུལ་ངང་ཞབས་ཞུ་ས་ཚིགས་སུ་ཞུགས་ཏེ་སློབ་སྦྱོང་དང་། སྲིད་ཇུས། ཆ་འཕྲིན། བརྡ་ཐོ། ཞབས་ཞུ་སོགས་ཀྱི་བྱེད་སྒོ་སྣ་ཚོགས་སྤེལ་ནས་ཏང་གི་གསུང་སྒྲ་འཕྲལ་མ་ཉིད་དུ་འབྲོག་ཁུལ་མང་ཚོགས་ལ་བརྒྱུད་བསྒྲགས་བྱེད་ཀྱི་ཡོད།

མི་མེད་ལུང་སྟོང་དུ་ཆུ་ཚོད་5ཙམ་བསྐྱོད་རྗེས་ང་ཚོ་ས་བབ་སྨི་5300ཡོད་པའི་སྐུ་ལྷ་དར་མདུང་གངས་རིའི་འདབས་སུ་འབྱོར། “འབྲི་ཆུའི་ཆུ་འགོ”དང“འབྲི་ཆུའི་ཆུ་ཐིགས་དང་པོ”ཞེས་བརྐོས་ཡོད་པའི་རྡོ་རིང་མདུན་དུ་ཚེ་དགའ་ཡིས་ཁ་སྤྲོད་ཀྱི་འཁྱགས་རོམ་ལ་རྒྱང་ལྟ་བྱེད་བཞིན་དུ“ང་ཐོག་མར་སླེབས་སྐབས་དང་བསྡུར་ན་འཁྱགས་རོམ་ཆུང་དུ་ཕྱིན་འདུག འོན་ཀྱང་ལོ་འདི་དག་ནང་འཁྱགས་རོམ་བཞུར་བའི་མྱུར་ཚད་མངོན་གསལ་དོད་པོས་དལ་དུ་ཕྱིན་འདུག”འབྲི་ཆུའི་ཆུ་འགོའི་རྩྭ་རྩི་ཤིང་ལ་ཁོང་གིས་རྒྱུས་མངའ་ཧ་ཅང་ཆེན་པོ་ཡོད།

“རི་སྐྱེས་སྲོག་ཆགས་ལ་སྲུང་སྐྱོང་བྱ་རྒྱུ་དེའང་ང་ཚོའི་ལས་ཀ་ཞིག་ཡིན། གལ་སྲིད་སྲོག་ཆགས་ལ་རྨས་སྐྱོན་ཕོག་ཚེ་རུ་མི་ཚོས་རོགས་སྐྱོབ་གང་ཐུབ་བྱེད་ཀྱི་ཡོད”ད་ཆ་སྐོར་སྲུང་བྱེད་སྐབས་དྲེད་མོང་དང་། གནའ་བ། གཙོད་སོགས་རི་སྐྱེས་སྲོག་ཆགས་རྟག་ཏུ་མཐོང་རྒྱུ་ཡོད། “དེ་ནི་སྐྱེ་ཁམས་ལེགས་སུ་ཕྱིན་པའི་རྟགས་མཚན་རེད”ཅེས་ཚེ་དགས་གསར་འགོད་པར་བཤད།

(《འོད་ཟེར་ཉིན་རེའི་ཚགས་པར》ལས་བརྒྱུད་འགོད་བྱས)