ཡར་ཀླུང་གཙང་པོའི་བྱང་ངོགས་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་གྱི་མཁའ་དབྱིངས་སུ་འཕུར་བཞིན་པའི་ཁྲུང་ཁྲུང་སྐེ་ནག

ཉེ་ཆར། གསར་འགོད་པ་རླངས་འཁོར་ལ་བསྡད་དེ་ལང་ལོང་དུ་རྒྱུག་པའི་ཡར་ཀླུང་གཙང་པོའི་བཞུར་རྒྱུན་དེད་ནས་གཞིས་རྩེ་གྲོང་ཁྱེར་རྣམ་གླིང་རྫོང་ཨེ་མར་ཤང་དུ་བཅར་འདྲི་བྱེད་པར་བསྐྱོད་པ་ཡིན། ལམ་བར་དུ་ང་ཚོའི་མཐོང་ཆོས་སུ་གྱུར་པ་ནི་ཡུག་གཅིག་ཏུ་འབྲེལ་བའི་ཤིང་ནགས་སྟུག་པོ་དག་ཡིན་ཞིང་། ད་དུང་གོ་ཐོས་ལྟར་ན་ཟླ་བ་གཅིག་ཙམ་སོང་རྗེས་ཁྲུང་ཁྲུང་སྐེ་ནག་སྟོང་ཕྲག་མང་པོ་དེ་གར་དགུན་སྒྲོལ་དུ་ཡོང་གི་ཡོད་པ་རེད།

ཁྲུང་ཁྲུང་སྐེ་ནག་ནི་རྒྱལ་ཁབ་ཀྱི་རིམ་པ་དང་པོའི་གཙོ་གནད་སྲུང་སྐྱོང་གི་རི་སྐྱེས་སྲོག་ཆགས་ཤིག་ཡིན་པ་དང་། རྒྱ་མཚོའི་ངོས་ལས་མཐོ་ཚད་སྨི་2500ནས་5000བར་གྱི་ས་མཐོ་དང་སྤང་ལྗོངས་སོགས་སུ་འཚོ་སྡོད་བྱེད་ཅིང་། དེ་ནི་འཛམ་གླིང་ཐོག་གི་ཁྲུང་ཁྲུང་རིགས་15ཡི་ཁྲོད་ས་མཐོར་འཚོ་གནས་དང་སྐྱེ་འཕེལ་བྱེད་པའི་ཁྲུང་ཁྲུང་གི་རིགས་གཅིག་པུ་དེ་རེད།

གཞིས་རྩེ་གྲོང་ཁྱེར་རྣམ་གླིང་རྫོང་རང་བྱུང་ཐོན་ཁུངས་དང་ནགས་ལས་རྩྭ་ཐང་ལས་ཁུངས་ཀྱི་འབྲེལ་ཡོད་འགོ་ཁྲིད་ཀྱིས། “ཁྲུང་ཁྲུང་སྐེ་ནག་རྩྭ་སྟུག་པོ་དང་ཆུ་ཕྲན་མཉམ་འདྲེས་ཀྱི་ས་ཆར་འཚོ་སྡོད་ལ་དགའ་བ་དང་རྩི་ཤིང་གི་སྡོང་རྐང་དང་ལོ་མ་ཟ་བ་མ་ཟད། ཞིང་ནང་གི་སྐྱེ་དངོས་ལྷག་མ་ཡང་ཟ་གི་ཡོད་པར་བརྟེན། མང་ཚོགས་ཀྱིས་སྐབས་རེ་གྲོང་ཚོའི་འགྲམ་ནས་ཁྲུང་ཁྲུང་སྐེ་ནག་མཐོང་ཐུབ་ཅེས་བརྗོད་པ་དང་། ཡང་ཁོང་གིས། སྔོན་ཆད་རྫོང་ཁོངས་ཀྱི་ཆུ་བོའི་ངོགས་གཉིས་གྲམ་ཐང་ཡིན་པས་དགུན་དཔྱིད་གཉིས་སུ་བྱེ་རླུང་འཚུབ་ཀྱི་ཡོད། ཞིང་པ་ཚོ་ཞིང་ལས་བྱེད་སྐབས་བྱེ་རླུང་འཚུབ་དུས་ལམ་རྒྱགས་བླུགས་པའི་ལྟོ་ཕད་ཀྱང་བྱེ་མས་བསྣུབས་ཀྱི་ཡོད་པས་ཁྲུང་ཁྲུང་སྐེ་ནག་དེ་གར་དགུན་སྒྲོལ་ཐུབ་རྒྱུ་ལྟ་ཅི་ཞེས་བརྗོད།

བོད་ལྗོངས་ཀྱི་ཡར་ཀླུང་གཙང་པོའི་དབུས་རྒྱུད་རོང་སའི་ཁྲུང་ཁྲུང་སྐེ་ནག་གི་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དང་ཡར་ཀླུང་གཙང་པོའི་བྱང་ངོགས་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་བཙུགས་པ་སོགས། ལོ་མང་རིང་བོད་ཀྱི་རིམ་ཁག་ཏང་ཨུད་དང་སྲིད་གཞུང་། ཁ་གཏད་བོད་སྐྱོར་ཞིང་ཆེན་དང་གྲོང་ཁྱེར་གྱིས་མ་དངུལ་སྒོར་དུང་ཕྱུར་2.4ལྷག་ཙམ་བཏང་ནས་སྐྱེ་ཁམས་སྣོད་བཅུད་བསྐྲུན་པ་དང་། གསར་དུ་བཙུགས་པའི་དཔེ་སྟོན་ཁུལ་དུ་ནགས་གསོ་མུའུ་ཁྲི་4ལྷག་ཙམ་བྱས་པར། དེ་སྔའི་གྲམ་ཐང་དག་ད་ལྟ་གཙང་འགྲམ་གྱི་སྔོ་ལྗང་ཁུལ་དུ་གྱུར་ནས་ཁྲུང་ཁྲུང་སྐེ་ནག་དགུན་སྒྲོལ་བྱ་ཡུལ་ཡག་ཤོས་སུ་གྱུར་ཡོད། བསྡོམས་རྩིས་བརྒྱབ་པར་གཞིགས་ན། བོད་ལྗོངས་ཀྱི་ས་ཁོངས་ནང་ཁྲུང་ཁྲུང་སྐེ་ནག་གི་གྲངས་འབོར་དུས་རབས་20པར་3000ཡང་མ་ཟིན་པ་ནས་མིག་སྔའི་ཁྲི་1ལྷག་ཙམ་བར་མང་དུ་ཕྱིན་པ་དང་ཁྱུ་ཚོགས་ཀྱི་གྲངས་འབོར་བསྟུད་མར་འཕར་ཡོད།

སྟོན་དགུན་དུ་ཁྲུང་ཁྲུང་གི་སྙན་འཇེབས་ལྡན་པའི་སྐད་སྒྲར་ཉན་པ་དང་ལྡེམ་ཞིང་འཁྱུག་པའི་གར་གྱི་སྟངས་སྟབས་ལ་ལྟ་བ་དེ་གངས་ལྗོངས་ས་མཐོའི་མང་ཚོགས་ཀྱི་རྒྱུན་གཏན་འཚོ་བའི་གྲུབ་ཆ་ཞིག་ཏུ་གྱུར་ཡོད། ཨེ་མར་ཤང་སླེའུ་ཀོག་གྲོང་ཚོའི་ལོ་38ལ་སླེབས་པའི་ཡུལ་མི་བུ་ཆུང་2015ལོར་ནགས་སྲུང་བར་བསྡུས་པ་དང་ནམ་རྒྱུན་ཤིང་ནགས་ལ་སྐོར་གཡེང་དང་བདག་སྲུང་གི་འགན་འཁུར་གྱི་ཡོད། གནམ་གཤིས་གྲང་དུ་འགྲོ་རིམ་བཞིན་ཁོང་གིས་ཁྲུང་ཁྲུང་སྐེ་ནག་ཕྱིར་ལོག་རྒྱུའི་རེ་སྒུག་བྱེད་ཀྱི་ཡོད། བུ་ཆུང་གིས་ལོ་ལྟར་གྱི་ཟླ་བ་བཅུ་པ་ནས་སང་ལོའི་ཟླ་བ་གསུམ་པའི་བར་ཁྲུང་ཁྲུང་སྐེ་ནག་ཁྱུ་དང་ཁྱུ་ནགས་གསེབ་ཏུ་འཕུར་བ་དང་། མཁའ་དབྱིངས་སུ་འཕུར་ལྡིང་བྱེད་པ། འདམ་རར་བབས་པ་བཅས་མཐོང་རྒྱུ་ཡོད་ཅེས་བརྗོད།

བུ་ཆུང་གིས། སྟོན་བསྡུའི་དུས་སུ་ཁྲུང་ཁྲུང་སྐེ་ནག་དགུན་སྒྲོལ་བྱེད་སའི་ཉེ་འཁོར་གྱི་ཞིང་དུད་མི་ཉུང་བ་ཞིག་གིས་འདམ་རའི་ཉེ་འགྲམ་དུ་བཏབ་པའི་ནས་དང་ཞོག་ཁོག་སོགས་ཞིང་ལས་སྐྱེ་དངོས་ཁག་གཅིག་མ་བསྡུས་པར་ཁྲུང་ཁྲུང་སྐེ་ནག་ལ་འཇོག་གི་ཡོད། སྐོར་སྲུང་བྱེད་རིམ་བཞིན་ངས་ནས་དང་གྲོ་རྡོག་འཁྱེར་ཏེ་གཙང་འགྲམ་གྱི་ནགས་གསེབ་ཏུ་གཏོར་ནས་ཁྲུང་ཁྲུང་སྐེ་ནག་ལ་སྟེར་གྱི་ཡོད་ཅེས་བརྗོད།