ལྷ་ཀླུ་འདམ་རར་སྐྱོད་སྐབས་སྙན་ངག་གི་བརྗོད་དོན་གྱིས་ཕྱུག་ཅིང་རི་མོ་ལྟར་མཛེས་པའི་ཡུལ་མཆོག་ཏུ་སླེབས་པ་དང་གཉིས་སུ་མ་མཆིས། འདམ་རའི་མཁའ་རླུང་ནང་འདམ་བག་དང་རྩྭ་རྩི་ཤིང་གི་དྲི་བསུང་འཐུལ་ནས་མི་རྣམས་ལ་བློ་བདེ་བག་ཕེབས་ཀྱི་སྣང་བ་ཞིག་སྦྱིན་གྱི་ཡོད། མཐོང་རྒྱ་ཆེ་ཤོས་ཀྱི་ས་ནས་བལྟས་ཚེ། ཉེ་འཁོར་དུ་ཉ་དང་བྱ་རྣམས་རྩེད་འཇོར་ཅི་དགར་རོལ་བ་དང་། ཐག་རིང་དུ་ཕོ་བྲང་པོ་ཏ་ལ་འགྱིང་ངེར་གནས་པ་ནི་ཁ་ཁུ་སིམ་པའི་རི་མོ་ཞིག་དང་འདྲ། ཉེ་ཆར་གསར་འགོད་པ“གངས་ལྗོངས་ས་མཐོའི་རྣམ་པ་གསར་པའི”བཅར་འདྲི་ཚོགས་པ་དང་མཉམ་དུ་ལྷ་ས་གྲོང་ཁྱེར་ལྷ་ཀླུ་འདམ་རར་སྐྱོད་སྐབས་མཛེས་ལྗོངས་དེ་ལྟ་བུ་མིག་ལམ་དུ་དངོས་སུ་འཆར་བྱུང་།

ལྷ་ཀླུ་འདམ་ར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ནི་མིག་སྔར་འཛམ་གླིང་དུ་ས་བབ་མཐོ་ཤོས་དང་རྒྱལ་ནང་དུ་རྒྱ་ཁྱོན་ཆེ་ཤོས་ཀྱི་གྲོང་ཁྱེར་གྱི་སྐམ་སའི་དབུས་ཁུལ་གྱི་རང་བྱུང་འདམ་ར་ཞིག་ཡིན་པ་དང་སྲུང་སྐྱོང་ཁུལ་གྱི་སྤྱིའི་རྒྱ་ཁྱོན་ལ་སྟོང་སྨི་ངོས་གྲུ་12.2ཡོད། འདམ་ར་འདི་ནི་ཐུན་མོང་མ་ཡིན་པའི་མཚོ་བོད་ས་མཐོའི་མཐོ་གྲང་འདམ་རའི་སྐྱེ་ཁམས་མ་ལག་གི་རིགས་སུ་གཏོགས་པས། ཁྲུང་ཁྲུང་སྐེ་ནག་དང་བྱ་རྒོད་སོགས་སྟོངས་ཉེར་ཡོད་པའི་རྩ་ཆེའི་སྲོག་ཆགས་འཚོ་སྡོད་བྱ་ཡུལ་ཡིན་ལ། ལྷ་ས་གྲོང་ཁྱེར་གྱི་སྐྱེ་ཁམས་དོ་སྙོམས་དང་། སྐྱེ་དངོས་སྣ་མང་རང་བཞིན་རྒྱུན་འཁྱོངས། ཆུ་ལོག་སྙོམས་གསོག རླུང་འགོག་བྱེ་འཇགས། མིའི་འཚོ་སྡོད་འགན་ལེན་སོགས་ལ་གཞན་གྱིས་ཚབ་བྱེད་ཐབས་བྲལ་བའི་ནུས་པ་ལྡན་པར་བརྟེན“ལྷ་སའི་གློ་བ”ཞེས་སུ་གྲགས།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་སྐྱེ་ཁམས་ཤེས་དཔལ་འཛུགས་སྐྱོང་དང་སྐྱེ་ཁམས་ཁོར་ཡུག་སྲུང་སྐྱོང་གི་ལས་དོན་རབ་དང་རིམ་པ་སྤེལ་བ་བརྒྱུད། འདམ་རའི་སྐྱེ་ཁམས་ཁོར་ཡུག་མངོན་གསལ་དོད་པོས་ལེགས་སུ་ཕྱིན་ནས་འདབ་ཆགས་རིགས་བརྒྱ་ཕྲག་ཁ་ཤས་འཚོ་གནས་དང་རེ་ཞིག་སྡོད་པའི་ཡིད་དབང་བཀུག་པ་དང་། “མཐོང་དཀོན་པའི་མགྲོན་པོ”མི་ཉུང་བ་ཞིག“རྒྱུན་ཕེབས་མགྲོན་པོར”གྱུར་པ། སྲོག་ཆགས་དང་རྩི་ཤིང་གི་རིགས་ཚོགས་དང་སྐྱེ་དངོས་ཐོན་ཁུངས་སླར་གསོ་དང་འཕེལ་རྒྱས་ཕྱིན་པ། སྲུང་སྐྱོང་ཁུལ་གྱི་ཆུ་རྩ་གསོ་ནུས་ཆེ་རུ་ཕྱིན་པ། ས་ཞིང་བྱེ་འགྱུར་གྱི་སྣང་ཚུལ་ཡང་ཚོད་འཛིན་ནུས་ལྡན་ཐུབ་པ་བཅས་བྱུང་ཡོད།

སྐྱེ་ཁམས་བཟང་མིན་སྲོག་ཆགས་ཀྱིས་ཤེས། “2023ལོའི་བརྟག་དཔྱད་བྱས་འབྲས་གསར་ཤོས་ལས་མངོན་པར་གཞིགས་ན། ལྷ་ཀླུ་འདམ་རའི་སྲུང་སྐྱོང་ཁུལ་དུ་འདབ་ཆགས་རིགས་167དང་རྒྱལ་ཁབ་ཀྱི་གཙོ་གནད་སྲུང་སྐྱོང་སྲོག་ཆགས་རིགས་40ཡོད་ལ་འདམ་རར་དགུན་སྒྲོལ་གྱི་དུས་བྱ་ཡང་མངོན་གསལ་དོད་པོས་མང་དུ་ཕྱིན་ཡོད”ཅེས་ལྷ་ཀླུ་འདམ་ར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དོ་དམ་ཅུས་ཀྱི་ཅུས་ཀྲང་ལྷ་མོ་ཚེ་རིང་གིས་བཤད།

གྲངས་གཞི་དེ་དག་ནི་ལས་དོན་མི་སྣ་མང་པོས་ཉིན་ལྟར་ལས་གནས་བརྟན་སྲུང་བྱས་པ་ལས་བྱུང་ཞིང་། འདམ་རའི་སྐོར་སྲུང་བ་དབང་ཕྱུག་གིས་དེ་གར་ལས་ཀ་ལོ་17ཏག་ཏག་བྱས་པ་དང་ད་ལྟ་ཁོང་གིས་ལས་རོགས་50ལྷག་ཙམ་དང་མཉམ་དུ་འདམ་ར་དེ་སྲུང་སྐྱོང་བྱེད་བཞིན་ཡོད། དབང་ཕྱུག་གིས“དུས་བཀག་ལྟར་ཕྱི་སྐོར་ཆུ་རྒྱུད་ལ་གད་སྙིགས་གཙང་འཕྱག་བྱེད་དགོས་པ་མ་ཟད། ད་དུང་དགུན་ཁར་དེ་གར་དགུན་སྒྲོལ་བྱེད་པའི་དུས་བྱར་བཟའ་བཅའ་མི་འདང་བའི་སྐབས་སུ་འདམ་རའི་སྲུང་སྐྱོང་པས་གྲང་ངར་ལ་མ་འཛེམས་པར་ཆུ་ནང་དུ་འཛུལ་ནས་དུས་བྱར་ལྟོ་སྟེར་དགོས་ཀྱི་ཡོད”ཅེས་བཤད།

“གནམ་གཤིས་ལེགས་པའི་སྐབས་སུ་ངས་ཕྲུ་གུ་ཁྲིད་དེ་འདམ་རའི་སྤྱི་གླིང་དུ་འཆམ་འཆམ་དུ་ཡོང་གི་ཡོད། ལྗོངས་གཟིགས་སྟེགས་བུར་ལངས་ནས་མཚོ་དང་སྲོག་ཆགས་ཆུང་ཆུང་ལ་ལྟ་བཞིན་རང་བྱུང་ཁམས་ཀྱི་མཛེས་པ་མྱོང་རོལ་བྱེད་ཀྱི་ཡོད་པས་ཚོར་སྣང་དེ་ཧ་ཅང་སྐྱིད་པོ་འདུག”ཅེས་གྲོང་མི་ཉི་མའི་ནང་མིས་གཟའ་མཇུག་ཏུ་སྐོར་སྲུང་རྐང་ལམ་དུ་འཆམ་འཆམ་དུ་སྐྱོད་བཞིན་ལྷ་སའི་སྐྱེ་ཁམས་ཁོར་ཡུག་ལ་བསྔགས་བརྗོད་དེ་འདྲ་བྱས།