གྲངས་གཞི་མང་པོ་ཞིག་ལས་མངོན་གསལ། འདི་ལོའི་“རྒྱལ་སྟོན”གྱི་རྫོགས་ལྡན་གཟའ་འཁོར་རིང་རང་ལྗོངས་སུ་རྒྱལ་ཁབ་ཕྱི་ནང་གི་ཡུལ་སྐོར་བ་འབོར་ཆེན་སླེབས་ཡོད། གསར་འགོད་པས་བོད་རང་སྐྱོང་ལྗོངས་རིག་གནས་དང་ཡུལ་སྐོར་ཐིང་ནས་ཤེས་རྟོགས་བྱས་པར་གཞིགས་ན། 2024ལོའི་རྒྱལ་སྟོན་ངལ་གསོའི་རིང་ལྗོངས་ཡོངས་ཀྱིས་རྒྱལ་ཁབ་ཕྱི་ནང་གི་ཡུལ་སྐོར་བ་མི་ཐེངས་ཁྲི་294.23ལ་སྣེ་ལེན་ཞུས་པ་དེ་དུས་མཚུངས་ལས་3.15%འཕར་བ་དང་། ཡུལ་སྐོར་གྱི་སྤྱིའི་འགྲོ་གྲོན་སྒོར་དུང་ཕྱུར་15.36ཟིན་པ་དེ་དུས་མཚུངས་ལས་2.81%འཕར་ཡོད་པ་རེད།

ཞེ་ཁྲེང་ཚོགས་པའི་འབྲེལ་ཡོད་གྲངས་གཞི་ལས་མངོན་པར། ཟླ་10ཚེས་1ཉིན་གྱི་རྒྱལ་སྟོན་ངལ་གསོའི་ཉིན་དང་པོར་རང་ལྗོངས་ཀྱིས་ཡུལ་སྐོར་བ་འབོར་ཆེན་ཞིག་བསུས་ཤིང་། ཡུལ་སྐོར་བའི་ཡོང་ཁུངས་གཙོ་བོ་ནི་ཧྲང་ཧའེ་དང་། པེ་ཅིང་། ཁྲེང་ཏུའུ། ཧྲེན་ཀྲེན། ཀོང་ཀྲོའུ་བཅས་ནས་ཡིན་པ་དང་། བོད་ཀྱི་གྲོང་མི་མང་པོ་ཞིག་ཁྲེང་ཏུའུ་དང་། ཁྲུང་ཆིང་། ཤིས་ཨན། ཁུན་མིང་། པེ་ཅིང་སོགས་ལ་བསྐྱོད་རྒྱུར་དགའ་པོ་བྱེད་ཀྱི་ཡོད་པ་རེད། ལྗོངས་ནང་ཁུལ་གྱི་ཕོ་བྲང་པོ་ཏ་ལ་དང་། ཡར་ཀླུང་གཙང་པོའི་རོང་ཆེན། གནམ་མཚོ། ཇོ་མོ་གླང་མའི་སྒར་ས་ཆེན་པོ་སོགས་ནི་སྔར་བཞིན་ཡུལ་སྐོར་བས་ཧ་ཅང་དགའ་པོ་བྱེད་པའི་ཡུལ་སྐོར་མཛེས་ལྗོངས་ཁུལ(ས་ཚིགས)ཞིག་ཡིན་པ་དང་ཕོ་བྲང་པོ་ཏ་ལའི་སྤ་སེ་ཧ་ཅང་དཀོན་པོ་ཡོད་པ་རེད། པེ་ཅིང་གི་ཡུལ་སྐོར་བ་སྐུ་ཞབས་ཀྲའོ་ལགས་ཀྱིས“ང་ཚོས་ཟླ་9པའི་ཟླ་སྟོད་ནས་ཕོ་བྲང་པོ་ཏ་ལའི‘རྒྱལ་སྟོན’ངལ་གསོའི་སྒོ་འཛིན་སྔོན་མངགས་བྱས་པ་ཡིན་པས། སྟབས་ལེགས་པ་ཞིག་ལ་ཕོ་བྲང་པོ་ཏ་ལའི་སྒོ་འཛིན་རག་བྱུང”ཞེས་བརྗོད།

ལྷ་ས་ནི་མི་མང་ཆེ་བ་བོད་དུ་ཡུལ་སྐོར་ལ་སྐྱོད་སའི་ས་ཚིགས་དང་པོ་དེ་ཡིན། ཡུལ་སྐོར་ཁྲོམ་རའི་ཁོར་ཡུག་ཡག་པོ་ཞིག་གཏོད་ཆེད། ལྷ་ས་གྲོང་ཁྱེར་རིག་གནས་དང་ཡུལ་སྐོར་ཅུས་ཀྱིས་འབྲེལ་ཡོད་སྡེ་ཚན་དང་མཉམ་དུ་དུས་ཆེན་གོང་དུ་རིག་གནས་དང་ཡུལ་སྐོར་ཁྲོམ་རར་ཆེད་དོན་ཞིབ་བཤེར་བྱས་ཤིང་། ཁྱབ་ཁོངས་ལས་བརྒལ་ནས་གཉེར་སྐྱོང་བྱས་མིན་དང་། ཡུལ་སྐོར་གན་རྒྱ་གཞིར་བཟུང་འོས་འགན་སྒྲུབ་མིན། དྲིལ་བསྒྲགས་རྫུན་མ་བྱས་ནས་ཡུལ་སྐོར་བར་མགོ་སྐོར་བཏང་མིན་སོགས་ཀྱི་བྱེད་སྤྱོད་ལ་གཙོ་གནད་ཐོག་ཞིབ་བཤེར་བྱས་པ་མ་ཟད། སྐར་གསུམ་རིམ་པ་ཡན་གྱི་མགྲོན་ཁང(གསོལ་མགྲོན་ཁང)དུ་བདེ་འཇགས་ཐོན་སྐྱེད་ཀྱི་འགན་འཁྲི་གཙོ་བོ་དོན་འཁྱོལ་བྱས་ཚུལ་ལ་ཞིབ་བཤེར་ཡང་བྱས་ནས་ཡུལ་སྐོར་བའི་ཁྲིམས་མཐུན་ཁེ་དབང་སྲུང་སྐྱོང་བྱས་པ་རེད།