གངས་ལྗོངས་ས་མཐོར་མི་ཚོགས་འདི་འདྲ་ཞིག་ཡོད་པ་དེ་དག་གིས་གཞི་རིམ་དུ་གཞི་ཚུགས་ནས་གཙང་པོ་དང་། ཆུ་བོ། མཚོ་མོ་བཅས་ལ་བདག་སྐྱོང་བྱེད་པའི་ལས་ལ་གཞོལ་བཞིན་མཆིས། ཁོང་ཚོས་ཆུ་བོར་སྐོར་ཞིབ་སྲུང་སྐྱོང་དང་གད་སྙིགས་བསྒྲུགས་ཏེ་བྱ་སྤྱོད་དངོས་ཀྱི་ཐོག་ནས་ཐོག་མའི་བསམ་འདུན་དང་འགན་འཁྲི་ལག་ལེན་བསྟར་བ་དང་རང་ཉིད་ཀྱི་གཏམ་སྤྱོད་ལ་བརྟེན་ནས་ཆུ་བོ་དང་མཚོ་མོ་དྭངས་གཙང་ཡོང་བར་བྱེད་པ་སོགས་ཁོང་ཚོའི་གཟུགས་བརྙན་ཆུ་བོ་དང་། རྩྭ་ཐང་། རྒྱ་ཆེ་བའི་འབྲོག་ཁུལ། གངས་རི་དང་འཁྱག་རོམ་སོགས་སུ་མཐོང་རྒྱུ་ཡོད། ཁོང་ཚོར་ཆུ་དཔོན་དང་མཚོ་དཔོན་དང་དེ་བཞིན་ཆུ་སྐོར་བ་ཟེར་ལ་ས་མཐོའི་ཆུ་བོ་དང་མཚོ་མོ“སྲུང་སྐྱོང་བ”ཞེས་ཀྱང་འབོད་ཀྱི་ཡོད།

ཆུའི་སྐྱེ་ཁམས་བདེ་འཇགས་ཀྱི“དངོས་ལྗོངས་དཔེ་རིས”བཀོད་པ།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས“ཆུའི་སྐྱེ་ཁམས”ཐད་མུ་མཐུད་ལས་དོན་ཡག་པོ་བསྒྲུབས་ནས་ལྷ་ས་སྐྱིད་ཆུའི་གྲོང་ཁུལ་དུམ་བུར་བཀག་སྡོམ་ཆུ་སྒོ་བཟོས་ཏེ་གྲོང་ཁྱེར་གྱི་ཆུ་ཁོངས་རྒྱ་ཁྱོན་སྤྱི་ཆིང་300ལྷག་ཙམ་ཆེ་རུ་བཏང་ནས་ལྷ་ས་སྐྱིད་ཆུའི་རྒྱལ་ཁབ་རིམ་པའི་ཆུ་བེད་མཛེས་ལྗོངས་ཁུལ་གྲུབ་འབྲས་ཐོབ་པའི་ངང་བསྐྲུན་པ་རེད།

ད་ཆ་ལྷ་ས་སྐྱིད་ཆུའི་དེ་སྔའི་རང་བྱུང་གྲམ་ཐང་དེ་ལྷོ་སྐོར་ལམ་དང་གཙང་འགྲམ་ལམ་སོགས་སུ་སྒྱུར་བཀོད་བྱས་པ་དང་ལྷ་ས་སྐྱིད་ཆུར་ཡང་ཟམ་ཆེན་6བརྒྱབ་པས། ཕྱོགས་བཞི་མཚམས་བརྒྱད་ལ་ཤར་གཏོང་ཐུབ་པའི་གྲོང་ཁྱེར་གྱི་འགྲིམ་འགྲུལ་དྲ་བ་ཞིག་ཆགས་ཏེ་ལྷ་ས་སྐྱིད་ཆུ་དེ་བས་མཛེས་སྡུག་དང་ལྡན་པར་གྱུར་ཡོད། ལྷ་ས་སྐྱིད་ཆུའི་ངོགས་ཀྱི་གཙང་འགྲམ་སྤྱི་གླིང་དང་། ལྷོ་རིའི་སྤྱི་གླིང་། ལྷ་ས་གྲོང་ཁྱེར་གྱི་ཀྲུང་ཧྭ་རིག་གནས་སྤྱི་གླིང་སོགས་ཀྱང་གཅིག་རྗེས་གཉིས་མཐུད་ངང་བསྐྲུན་པས། སྔོ་འགྱུར་རྒྱ་ཁྱོན་མུའུ་3052ཆེ་རུ་ཕྱིན་པ་དང་གྲོང་ཁུལ་གྱི་མཁའ་རླུང་བརླན་ཚད་ཆ་སྙོམས་8%ནས་10%བར་འཕར་ཏེ་ས་འོག་ཆུ་ནུས་ལྡན་ངང་གསབ་ཐུབ་པ་བྱུང་ཡོད།

ལྷ་ས་སྐྱིད་ཆུའི་འཕོ་འགྱུར་ཆེན་པོ་ནི་དུས་རབས་གསར་པར་རང་ལྗོངས་ཀྱིས་ཆུའི་སྐྱེ་ཁམས་སླར་གསོ་བཅོས་སྐྱོང་ལ་རྒྱུན་ཆད་མེད་པར་ཤུགས་སྣོན་བརྒྱབ་པའི་བསྡུས་རིས་ཤིག་རེད། དུས་རབས་གསར་པར་རང་ལྗོངས་ཀྱིས་ཡར་འབྲོག་གཡུ་མཚོ་དང་ཡར་ཀླུང་གཙང་པོ་སོགས་རང་སྐྱོང་ལྗོངས་རིམ་པའི་དྭངས་གཙང་ཆུ་བོ་དང་མཚོ་མོ་43བསྐྲུན་ཏེ་ཀྲུང་དབྱང་གི་ཆུའི་སྦགས་བཙོག་འགོག་བཅོས་ཀྱི་མ་དངུལ་སྒོར་དུང་ཕྱུར་3.6བརྩོན་ལེན་ཧུར་ཐག་བྱས་ཏེ་ལྷ་ས་སྐྱིད་ཆུ་དང་། མྱང་ཆུ། རྫ་ཆུ། རྒྱལ་མོ་རྔུལ་ཆུ་སོགས་གཙོ་གནད་ཆུ་བོ་དང་མཚོ་མོ་རྒྱུག་ཁུལ་གྱི་ཆུའི་སྐྱེ་ཁམས་སླར་གསོ་དང་ཆུའི་སྦགས་བཙོག་འགོག་བཅོས་ཀྱི་རྣམ་གྲངས་ལ་རྒྱབ་སྐྱོར་བྱས་པས། སྐྱེ་ཁམས་སླར་གསོའི་རྒྱ་ཁྱོན་སྨི་ངོས་གྲུ་ཁྲི་242.5ཟིན་ཡོད། ལྷ་ས་སྐྱིད་ཆུ་རྒྱུག་ཁུལ་དང་ལྷོ་ཁའི་ཡར་ཀླུང་གཙང་པོ་རྒྱུག་ཁུལ་གྱི་རི་ཆུ་ནགས་ཞིང་དང་མཚེའུ་རྩྭ་བྱེ་མ་བཅས་སྲུང་སྐྱོང་དང་ཉམས་གསོའི་ཚོད་ལྟའི་ལས་གྲྭའི་ས་ཁོངས་ཀྱི་སྐྱེ་ཁམས་ཁོར་ཡུག་གི་ཕན་འབྲས་ལ་དཔྱད་དཔོག་བྱས་ཡོད།

ཆུའི་ཁོར་ཡུག་བཅོས་སྐྱོང་གི“རང་འགུལ་དམག་འཐབ”ཡག་པོ་བརྒྱབ་པ།

“ང་ཚོས་ཉིན་ལྟར་སྔ་དྲོའི་ཆུ་ཚོད་9དང་སྐར་མ་30ལ་ལྷ་ས་སྐྱིད་ཆུའི་ངོགས་ཀྱི་གད་སྙིགས་དང་། གྱོན་ཆས་རྙིང་ཧྲུལ། འགྱིག་ཤོག་སོགས་གཙང་མ་ཕྱགས་ཀྱི་ཡོད། ལྷ་ས་སྐྱིད་ཆུ་སྲུང་སྐྱོང་བྱ་རྒྱུ་དེ་མི་ཚང་མར་འགན་ཡོད་པས་ཆུའི་ཐོན་ཁུངས་ལ་གཅེས་སྤྲས་བྱེད་རོགས”ཞེས་ལྷ་ས་སྐྱིད་ཆུའི་ཆུ་རགས་བདག་སྐྱོང་བ་བློ་བཟང་ཟླ་བས་འབོད་སྐུལ་བྱས།

དུས་རབས་གསར་པར། རང་ལྗོངས་ཀྱི་རིམ་བཞིན་འཐུས་སྒོ་ཚང་དུ་འགྲོ་བའི་ཆུ་དཔོན་དང་མཚོ་དཔོན་གྱི་འགན་འཁྲི་གཙང་སྒྲུབ་དང་དཔེ་སྟོན་ཆུ་བོ་དང་མཚོ་མོ་འཛུགས་སྐྱོང་སོགས་ཀྱི་སྒྲིག་སྲོལ་ལམ་ལུགས་ནི་མེ་ལོང་ཞིག་དང་འདྲ་བར་ལས་ཕྱོད་ཆེ་རུ་ཕྱིན་པ་དང་ལས་ཀའི་སྤུས་ཚད་ལ་འགན་ལེན་ཐུབ་པ་མ་ཟད། ད་དུང་སྒྲིག་ལམ་དང་དར་སྲོལ་བཟང་པོ་ཞིག་ཀྱང་ཆགས་ཡོད།

ཆུ་དཔོན་དང་མཚོ་དཔོན་ཁྲི་1.47གྱིས་ཕྱོགས་ཡོངས་ནས་ལས་འགན་བསྒྲུབས་པ་དང“ཆུའི་སྐྱེ་ཁམས་སྲུང་སྐྱོང་དང་གྲོང་ཚོ་རིམ་པའི་ཆུའི་དོ་དམ་པ”ཁྲི་5.9འཐབ་ས་དང་པོར་བསྐྱོད་དེ་ཆུ་བོ་དང་མཚོ་མོར་སྐོར་ཞིབ་བྱས་པར་རིམ་རྩིས་བྱས་ན་མི་ཐེངས་ཁྲི་132ཀྱིས་ཆུ་བོ་དང་མཚོ་མོར་སྐོར་ཞིབ་བྱས་ཡོད།

2024ལོའི་ཟླ་5ཚེས་30ཉིན། 《བོད་རང་སྐྱོང་ལྗོངས་ཀྱི་ཆུའི་སྦགས་བཙོག་འགོག་བཅོས་སྲོལ་ཡིག》(གཤམ་དུ《སྲོལ་ཡིག》ཅེས་བསྡུ་རྒྱུ)ལ་གྲོས་ཞིབ་བྱས་ནས་གྲོས་འཆམ་བྱུང་བ་དང་འབྲེལ། 2024ལོའི་ཟླ་8ཚེས་1ཉིན་ནས་བཟུང་ལག་བསྟར་བྱས་ཡོད། 《སྲོལ་ཡིག》གི་འཆར་ཟིན་འགོད་པའི་བརྒྱུད་རིམ་ནང་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ཀྱི་དམིགས་ཚད་བླང་བྱ་དང་བོད་ཀྱི་དམིགས་བསལ་གྱི་ཆུའི་སྐྱེ་ཁམས་ཁོར་ཡུག་གི་ད་ལྟའི་གནས་བབ་དང་ཚོར་སྣང་སྐྱེན་པའི་རང་བཞིན་ལ་བསམ་གཞིག་གང་ལེགས་བྱས་ནས་སྐྱེ་ཁམས་སྔོན་འཇོག་དང་། སྔོན་འགོག་གཙོ་བོར་བྱེད་པ། ཁུལ་དབྱེ་རིགས་དབྱེ། བརྒྱུད་རིམ་ལྡན་པའི་སྒོ་ནས་སྲུང་སྐྱོང་སོགས་ཀྱི་རྩ་དོན་གཏན་འཁེལ་བྱས་ཏེ་སྐྱེ་ཁམས་སྲུང་སྐྱོང་གི་དམར་ཐིག་ནན་པོ་བསྲུང་རྒྱུ་མཐའ་འཁྱོངས་བྱེད་པ་དང་། ཧེ་བག་ཅན་གྱི་སྲུང་སྐྱོང་ཐབས་ཇུས་དང་དོ་དམ་བྱ་ཐབས་ལག་བསྟར་བྱེད་པ། ས་མཐོའི་སྐྱེ་ཁམས་མ་ལག་གི་སྤུས་ཚད་དང་བརྟན་པོའི་རང་བཞིན་འགན་ལེན་ཤུགས་ཆེན་བྱེད་པ། སྐྱེ་ཁམས་བདེ་འཇགས་སྲུང་ཡོལ་བརྟན་དུ་གཏོང་བ། རང་ལྗོངས་ཀྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན་འཛུགས་སྐྲུན་ཧུར་ཐག་བྱ་རྒྱུ་རེད།

ཆུའི་གནོད་འཚེ་འགོག་བཅོས་ཀྱི“བདེ་འཇགས་དྲ་བ”ཚགས་དམ་དུ་བཏང་བ།

ཆུ་བེད་ལས་གྲྭའི་འཛུགས་སྐྲུན་ལ་ཞུགས་མཁན་ཚན་པས་ཆུ་ལོག་སྔོན་འགོག་དང་འབྲུབ་ཆུ་རྒྱས་དུས་ལས་སྒྲོལ་བ་དང་མེ་ཟོན་འཕྲལ་སྡོམ་ལ་ཁ་གཏད་གཅོག་ནུས་སྔར་བས་ཆེ་རུ་བཏང་ནས་ཛ་དྲག་གི་གནས་ཚུལ་འོག་མགྱོགས་ལ་ནུས་ཆེའི་སྒོ་ནས་རོགས་སྐྱོབ་ཐུབ་པའི་འགན་ལེན་བྱས་ཏེ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་ཏན་ཏིག་བྱ་ཆེད། 2024ལོའི་ཟླ་5ཚེས་31ཉིན། ལྗོངས་ཆུ་བེད་ཐིང་གིས་2024ལོའི་ཆུ་ལོག་སྔོན་འགོག་དང་འབྲུབ་ཆུ་རྒྱས་དུས་ལས་སྒྲོལ་བ་དང་མེ་ཟོན་གྱི་མཉམ་འབྲེལ་འཕྲལ་སྡོམ་རོགས་སྐྱོབ་ནང་སྦྱོང་བྱེད་སྒོ་སྒྲིག་འཛུགས་ཞིབ་ཚགས་བྱས་ནས་སྤེལ་ཡོད།

ཉེ་བའི་ལོ་ཤས་རིང་། རང་ལྗོངས་ཀྱིས་མི་དམངས་དང་ཚེ་སྲོག་གོང་དུ་བཀུར་རྒྱུ་མཐའ་འཁྱོངས་བྱས་ནས་མཐའ་ཚད་ཀྱི་བསམ་བློ་དང་མཐར་ཟད་ཀྱི་བསམ་བློ་བརྟན་པོ་བཙུགས་ཏེ་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་ཀྱི་མཉམ་འགུལ་ལ་སྤྱི་འདོམས་བྱེད་པ་དང་། འབྲུབ་འགོག་གེགས་སེལ་གྱི་རྨང་གཞིའི་ནུས་པ་འཛུགས་སྐྱོང་ལ་ཤུགས་སྣོན་རྒྱག་པ། གྲོང་ཁྱེར་དང་ཆུ་བོ་རྒྱུག་ཁུལ་གྱི་ཆུ་ལོག་སྔོན་འགོག་མ་ལག་འཐུས་སྒོ་ཚང་དུ་གཏོང་བ། ཆུའི་གནས་ཚུལ་ལ་ལྟ་ཞིབ་ཚད་ལེན་དང་དབྱེ་ཞིབ་བྱེད་པའི་ཆུ་ཚད་མཐོ་རུ་གཏོང་བ། ཆུ་བོ་དང་མཚོ་མོར་རྨང་གཞིའི་ཞིབ་འཇུག་བྱེད་པ། གྲངས་གཞིའི་ཆུ་བེད་ཆ་འདྲ་འཛུགས་སྐྲུན་ལ་སྐུལ་འདེད་གཏོང་བ་བཅས་བྱས་ནས“སྔོན་འགོག་བཞིའི”ནུས་པ་ཆེ་རུ་གཏོང་རྒྱུར་ཤུགས་སྣོན་བརྒྱབ་པས། ཕན་འབྲས་ཡག་པོ་ཐོན་ཏེ་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་སྲུང་སྐྱོང་ཏན་ཏིག་ཐུབ་ཡོད།