ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ཉེ་ཆར་གསར་འགོད་པས་ལྷ་སར་འཚོགས་པའི་མཚོ་བོད་ཚན་རིག་རྟོག་ཞིབ་ཐེངས་གཉིས་པའི་གྲུབ་འབྲས་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར། 2017ལོར་མཚོ་བོད་ཚན་རིག་རྟོག་ཞིབ་ཐེངས་གཉིས་པ་སྤེལ་འགོ་ཚུགས་ཚུན་ཚན་རིག་རྟོག་ཞིབ་རུ་མིས་དངོས་རིགས་སྣ་ཁ་གསར་པ་3000ལྷག་ཙམ་ཤེས་རྟོགས་ཐུབ་ནས་དངོས་རིགས་སྣ་མང་རང་བཞིན་གྱི་ཞིབ་འཇུག་ཐད་གྲུབ་འབྲས་མངོན་གསལ་དོད་པོ་ཐོབ་ཡོད།

ཀྲུང་གོ་ཚན་རིག་ཁང་གི་ཡོན་ཧྲི་མཚོ་བོད་ཚན་རིག་རྟོག་ཞིབ་ཐེངས་གཉིས་པའི་རུ་ཁག་གི་རུ་དཔོན་ཡའོ་ཐན་ཏུང་གིས་མཚོ་བོད་ས་མཐོ་ནི་རང་རྒྱལ་དང་ཐ་ན་ཨེ་ཤེ་ཡའི་སྐྱེ་ཁམས་བདེ་འཇགས་སྲུང་བཅད་གལ་ཆེན་དང་གོ་ལ་ཧྲིལ་པོའི་སྐྱེ་དངོས་སྣ་མང་རང་བཞིན་གྱི་དམིགས་བསལ་ས་ཁུལ་ཞིག་རེད། ད་ཐེངས་ཀྱི་ཚན་རིག་རྟོག་ཞིབ་ཀྱིས་མཚོ་བོད་ས་མཐོའི་ཉམས་ཞན་དང་འགག་རྩའི་ས་ཁོངས་སུ་ཕྱི་རོལ་རྟོག་ཞིབ་འབོར་ཆེན་བྱས་པ་བརྒྱུད་མེ་ཏོག་རྫོང་ནས་མེ་ཏོག་འདབ་བཞི་དང་རྫ་ཡུལ་རྫོང་ནས་སྦྲུལ་ཁྲ་ཁྲ་སོགས་དངོས་རིགས་སྣ་ཁ་གསར་པ་3000ལྷག་ཙམ་ཤེས་རྟོགས་བྱུང་བའི་ནང་སྲོག་ཆགས་ཀྱི་དངོས་རིགས་སྣ་ཁ་གསར་པ་205དང་། རྩི་ཤིང་གི་དངོས་རིགས་སྣ་ཁ་གསར་པ་388 སྐྱེ་དངོས་ཕྲ་རབ་ཀྱི་དངོས་རིགས་སྣ་ཁ་གསར་པ་2593བཅས་ཚུད་ཡོད་ཅེས་བརྗོད་པ་རེད།

ཚན་རིག་རྟོག་ཞིབ་བྱས་པ་བརྒྱུད་ད་དུང་ཤེས་རྟོགས་བྱུང་བར་སྐབས་ཤིག་རིང་རྩ་མེད་དུ་སོང་བའི་མེ་ཏོག་རྫོང་གི་ལུག་མཉེ་སོགས་རྩི་ཤིང་སླར་ཡང་མི་རྣམས་ཀྱིས་མཐོང་ཐུབ་ཡོད། གསའ་དང་། སྤྲིན་གཟིག བྷང་ག་ལའི་སྟག འཕར་སྤྱང་སོགས་རྩ་ཆེའི་སྲོག་ཆགས་ཀྱང་ཕྱི་རོལ་གྱི་བརྙན་ཤེལ་ཁྲོད་ནས་ཡང་ཡང་མཐོང་ཐུབ་ཡོད། ལྷག་པར་དུ་བྷང་ག་ལའི་སྟག་བོད་ཀྱི་མེ་ཏོག་ས་ཁུལ་དུ་ཡང་ཡང་མཐོང་བ་དེ་ཐོག་ནས་མེ་ཏོག་ས་ཁུལ་གྱི་སྐྱེ་ཁམས་མ་ལག་གི་གྲུབ་ཆ་དང་ནུས་པ་ཆ་ཚང་བ་དང་གོ་ལ་ཧྲིལ་པོའི་རྩ་ཆེ་ཞིང་སྟོངས་ལ་ཉེ་བའི་རི་སྐྱེས་སྲོག་ཆགས་སྲུང་སྐྱོང་ཁྲོད་ཀྱི་གནས་བབ་གལ་ཆེན་མངོན་ཡོད།