ཉེ་བའི་ལོ་ཤས་རིང་། ཉིང་ཁྲི་གྲོང་ཨུད་དང་གྲོང་ཁྱེར་སྲིད་གཞུང་གིས་ཉིང་ཁྲིའི་སྤུས་ཚད་མཐོ་བའི་འཕེལ་རྒྱས་དང་སྒྱུར་བཅོས་སྒོ་དབྱེ་སྔོན་སྤེལ་ལ་སྐུལ་འདེད་གཏོང་བར་དམིགས་ཏེ། ལྗང་མདོག་ཕྱོགས་སྒྱུར་གྱི་སྣེ་ཁྲིད་ཁུལ་འཛུགས་སྐྲུན་ཐད་རྒྱུན་མཐུད་ཤུགས་སྣོན་བརྒྱབ་ནས་ཁོར་ཡུག་སྲུང་སྐྱོང་དང་། ལྗང་མདོག་འཕེལ་རྒྱས། དམངས་འཚོ་ལེགས་གཏོང་བཅས་ཀྱི་དོན་ཆེན་ཐུན་མོང་ཐོག་ཏན་ཏིག་བསྒྲུབས་ཡོད།

ལྗང་མདོག་དཔལ་འབྱོར་འཕེལ་རྒྱས་བཏང་སྟེ།

མི་དམངས་ཀྱི་འཚོ་བ་སྔར་བས་བདེ་སྐྱིད་ལྡན་པར་གྱུར་པ།

ཉེ་བའི་ལོ་ཤས་རིང་། ཉིང་ཁྲི་གྲོང་ཁྱེར་གྱིས་ལྗང་མདོག་སྐྱེ་ཁམས་ཀྱི་མིང་བྱང་ལེགས་སུ་གཏོང་བ་དང་ཐོན་ལས་གྲུབ་ཆ་དང་རྣམ་གྲངས་གལ་ཆེན་ལེགས་སྒྲིག་མགྱོགས་སུ་བཏང་སྟེ། ཁྱད་ལྡན་ཞིང་འབྲོག་དང་ནགས་གསེབ་དཔལ་འབྱོར་སོགས་ཐོན་ལས་ཀྱི་རྣམ་པ་གསར་པ་འཚོལ་ཞིབ་ཧུར་ཐག་བྱས་ནས་ཡུལ་སྐོར་དེ་ཉིད་དམངས་ཕྱུག་ཐོན་ལས་ལ་བརྩིས་ནས་འཕེལ་རྒྱས་དང་སྐྱེད་སྲིང་བྱས་ཁར། ཡུལ་སྐོར་ཁྲོམ་ར་སྣ་ཚོགས་ལ་བརྟེན་ནས་ཞིང་འབྲོག་པ་ལས་ཞུགས་གཞན་སྒྱུར་ལ་སྐུལ་ཁྲིད་བཏང་སྟེ“སྔོ་ལྗང་རི་ཀླུང”མི་རིགས་ཁག་གི་མང་ཚོགས་ཀྱི“བདེ་སྐྱིད་ཀྱི་རྒྱབ་རྟེན”དུ་འགྱུར་བར་འབད་བརྩོན་བྱེད་བཞིན་ཡོད།

ཉེ་བའི་ལོ་ཤས་རིང་། ཀ་ལ་གྲོང་ཚོས་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱེད་པ་དང་། གྲོང་གསེབ་དར་རྒྱས་གཏོང་བ་དམ་འཛིན་བྱ་གཞིར་བྱ་རྒྱུ་མཐའ་འཁྱོངས་བྱེད་པ། “ཡུལ་སྐོར+”ཀྱི་ལས་དོན་ཡག་པོ་སྒྲུབ་པ་བཅས་བྱས་པས། “ཁམ་བུའི་མེ་ཏོག་གི་འབྱུང་ཁུངས”མཛེས་ལྗོངས་ཁུལ་གཙོ་བོར་བྱེད་པ་དང་ཞིང་འབྲོག་པའི་སྐྱེལ་འདྲེན་རུ་ཁག་དང་ལྟ་སྐོར་འཐུ་འཐོག་གླིང་ཁུལ་མཉམ་དུ་འཕེལ་རྒྱས་འགྲོ་བའི་ཐོན་ལས་ཁག་གསུམ་ཆགས་ཏེ། གྲོང་ཚོའི་མཉམ་སྡེབ་དཔལ་འབྱོར་ཉིན་བཞིན་སྟོབས་ཆེར་ཕྱིན་པ་དང་ཆབས་ཅིག གྲོང་མིའི་དངུལ་ཁུག་ཀྱང་ལྗིད་ཏིག་ཏིག་དུ་གྱུར་ཡོད། 2023ལོར་ཀ་ལ་གྲོང་ཚོའི་གྲོང་གསེབ་དཔལ་འབྱོར་གྱི་ཡོང་འབབ་བསྡོམས་འབོར་སྒོར་ཁྲི་1302.3ཟིན་པ་དང་། གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་བསྡོམས་འབོར་སྒོར་ཁྲི་490ལྷག་ཙམ་ཟིན་པ། མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་3.67ཟིན་གྱི་ཡོད་པ་རེད།

སྲུང་སྐྱོང་དང་འཕེལ་རྒྱས་ལ་སྤྱི་འདོམས་བྱས་ཏེ།

སྐྱེ་ཁམས་ཁོར་ཡུག་རྒྱུན་མཐུད་ལེགས་སུ་བཏང་བ།

“དེ་གར་ཆུ་མོ་དྭངས་ཞིང་གཙང་ལ་གང་སར་སྔོ་ལྗང་གོས་ཀྱིས་བཀླུབས་པས། བསིལ་རླུང་ལྡང་སྐབས་ཚ་གདུག་ཡོངས་སུ་སེལ་ཐུབ”ཅེས་པེ་ཅིང་ནས་ཡོང་བའི་ཡུལ་སྐོར་བ་སྐུ་ཞབས་དབྱང་ལགས་ཀྱིས་ཡར་ཉང་རྒྱལ་ཁབ་འདམ་རའི་སྤྱི་གླིང་གི་ལྗོངས་གཟིགས་སྟེགས་བུར་ལངས་ནས་ལག་ཐོགས་ཁ་པར་ནས་མིག་མདུན་གྱི་མཛེས་ལྗོངས་པར་ལེན་བྱེད་བཞིན་ཡོད།

སྐྱེ་ཁམས་ཁོར་ཡུག་སྲུང་སྐྱོང་སྲིད་ཇུས་ཀྱི་སྐུལ་སྤེལ་འོག ཡར་ཉང་རྒྱལ་ཁབ་འདམ་རའི་སྤྱི་གླིང་གི་རྣམ་པ་གསར་རྐྱང་དུ་གྱུར་པ་ཙམ་མ་ཟད། ཉེ་བའི་ལོ་ཤས་རིང་། ཉིང་ཁྲི་གྲོང་རྡལ་ཀ་ལ་གྲོང་ཚོས“རི་སྔོན་ཆུ་དྭངས་གསེར་དངུལ་རི་ལས་ལྷག་པའི”འདུ་ཤེས་ལག་ལེན་ཧུར་ཐག་བསྟར་བ་དང་སྲུང་སྐྱོང་སྔོན་ལ་བྱེད་པའི་རྩ་དོན་མཐའ་འཁྱོངས་ཀྱིས་འབྱོར་འབྲིང་དཔེ་སྟོན་གྲོང་ཚོ་དང་། མཛེས་སྡུག་ལྡན་པའི་གྲོང་གསེབ། ཞིང་ལས་དང་ཡུལ་སྐོར་ཕྱོགས་བསྡུས་སྒྲིག་གཞི་སོགས་ཀྱི་རྣམ་གྲངས་འཛུགས་སྐྲུན་ལ་སྐུལ་འདེད་ཏན་ཏིག་བཏང་བ་དང་། འགྲོ་ལམ་མཁྲེགས་འགྱུར་དང་། མི་ཕྱུགས་ལོགས་དབྱེ། སྡོད་ཁང་གསང་སྤྱོད་སྒྱུར་བཀོད། ཤིང་འཛུགས་ནགས་བཟོ་སོགས་ཀྱི་ལས་གྲྭ་གཅིག་སྡུད་ཐོག་སྤེལ་བ། ལྗང་མདོག་ར་སྐྱོར་དང་ཤིང་འབྲས་སྒོ་ར་འཛུགས་སྐྲུན་དང“ལྗང་མདོག་དངུལ་ཁང”གསར་འཛུགས་སོགས་བྱས་པས་སྔོན་ཆད་ཀྱི“ཤིང་གཅོད་གྲོང་ཚོ”ད་ཆ་ཉེ་རིང་གང་སར་སྐད་གྲགས་ཆོད་པའི་སྐྱེ་ཁམས་སྡོད་མལ་ལ་འཚམ་པའི་ཤེས་དཔལ་དཔེ་སྟོན་གྲོང་ཚོར་གྱུར་ཡོད། མིག་སྔའི་ཀ་ལ་གྲོང་ཚོའི་རྡོ་གཅལ་གཙང་ཞིང་གྲལ་ཧ་ཅང་འགྲིག་པོ་ཡོད།

ཀ་ལ་གྲོང་ཚོའི་འགྱུར་ལྡོག་ནི་ཉིང་ཁྲི་གྲོང་ཁྱེར་གྱི་མི་རིགས་ཁག་གི་མང་ཚོགས་ཀྱིས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་དོན་འཁྱོལ་བྱས་པའི་བསྡུས་རིས་ཤིག་རེད།

བོད་ལྗོངས་ཡར་ཉང་འདམ་རའི་སྐྱེ་ཁམས་མ་ལག་གི་རྒྱལ་ཁབ་ཀྱི་ས་འཛུགས་ལྟ་ཞིབ་ཚད་ལེན་ཞིབ་འཇུག་ས་ཚིགས་འཛུགས་པ་དང་། ཉིང་ཁྲིའི་མཁའ་རླུང་སྤུས་ཚད་རྒྱལ་ཡོངས་ཀྱི་ས་ཁུལ་རིམ་པ་ཡན་གྱི་གྲོང་ཁྱེར་339ནང་ལོ་7བསྟུད་མར་ཨང་དང་པོར་སླེབས། 2022ལོའི་ལྗོངས་ཡོངས་ཀྱི་སྐྱེ་ཁམས་ཁོར་ཡུག་སྲུང་སྐྱོང་ཁྲིམས་སྒྱུར་དམག་སྦྱོང་ཆེན་པོའི་དཔྱད་བསྡུར་ཞིབ་བཤེར་ནང་ཨང་དང་པོ་ཐོབ་པ། “རྒྱལ་ཁབ་ཀྱི་ནགས་ཚལ་གྲོང་ཁྱེར”གྱི་མཚན་སྙན་ཐོབ་པ་སོགས་འབད་བརྩོན་ལྷོད་མེད་བྱས་པ་ལས་ད་ཆ་ཉིང་ཁྲི་གྲོང་ཁྱེར་གྱིས་སྐྱེ་ཁམས་ཤེས་དཔལ་འཛུགས་སྐྱོང་གི་འཕེལ་རིམ་ཁྲོད་བཀྲག་མདངས་འཚེར་བའི་གྲུབ་འབྲས་རབ་དང་རིམ་པ་བཏོད་ཡོད།

སེམས་སྒྲིལ་བློ་སྦྱོང་ལ་ཤུགས་སྣོན་བརྒྱབ་སྟེ།

གསར་བརྗེའི་སློབ་གསོས་མ་འོངས་ཀྱི་ལམ་བུ་བཏོད་པ།

“འགྲེམས་སྟོན་ཁང་གིས་2021ལོའི་ཟླ་7ཚེས་21ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོར་རྟོག་ཞིབ་གནང་སྐབས་ཀྱི་གནས་ཚུལ་ཇི་མ་ཇི་བཞིན་སླར་གསོ་བྱས་ཤིང་། དེ་ཡང་མཛེས་སྡུག་ལྡན་པའི་ཀ་ལ་གྲོང་ཚོ་དང་། མཐུན་སྒྲིལ་ཟབ་པའི་ཀ་ལ་གྲོང་ཚོ། བདེ་སྐྱིད་ལྡན་པའི་ཀ་ལ་གྲོང་ཚོ་བཅས་ལེའུ་གསུམ་ལ་ཕྱེ་ཡོད”“ཚང་མ་རུབ་ཙམ་གནང་རོགས། ང་ཚོས་སྐར་མ་གསུམ་རིང་གི་བརྙན་ཐུང་ཞིག་བསྟན་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀ་ལ་གྲོང་ཚོར་གྲོང་མི་དང་བྱམས་བརྩེ་ངང་སྤེལ་རེས་གནང་ཚུལ་བསྐྱར་དྲན་བྱ་རྒྱུ་ཡིན”ཞེས་ཉིང་ཁྲི་གྲོང་ཁྱེར་བྲག་ཡིབ་ཆུས་ཉིང་ཁྲི་གྲོང་རྡལ་ཀ་ལ་གྲོང་ཚོའི་གསར་བརྗེ་ཞིབ་འཇུག་སློབ་སྦྱོང་གི་བརྗོད་དོན་གཙོ་བོའི་སློབ་གསོའི་འགྲེམས་སྟོན་ཁང་དུ་ཀ་ལ་གྲོང་ཚོའི་ཏང་ཀྲི་པུའུ་དྲིལ་བསྒྲགས་ཨུ་ཡོན་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་ཉི་མ་རྡོ་རྗེས་ལྟ་སྐོར་ལ་ཡོང་མཁན་བཅར་འདྲི་ཚོགས་པར་དེ་ལྟར་བརྗོད། འགྲེལ་བཤད་རྒྱག་པའི་བར་གསེང་དུ། ཉི་མ་རྡོ་རྗེས་གསར་འགོད་པར“2022ལོར་འགྲེམས་སྟོན་ཁང་སྒོ་ཕྱེ་བ་ནས་བཟུང་། རྒྱལ་ཁབ་ཕྱི་ནང་གི་ལྟ་སྐོར་ཚོགས་པ་800ལྷག་ཙམ་གྱི་མི་ཐེངས་ཁྲི་3ལྷག་ཙམ་ལ་སྣེ་ལེན་ཞུས་པ་ཡིན”ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱི“དར་དམར་ལ་བསྟོད་གླུ་འབུལ”ཞེས་པའི་གསར་བརྗེའི་སྤུས་རྟགས་ཡུལ་སྐོར་ལམ་ཐིག་རྩེ་གྲའི་གྲས་ཤིག་ཡིན་པའི་ཀ་ལ་གྲོང་ཚོའི་གསར་བརྗེ་ཞིབ་འཇུག་སློབ་སྦྱོང་གི་བརྗོད་དོན་གཙོ་བོའི་སློབ་གསོའི་འགྲེམས་སྟོན་ཁང་གིས་པར་རིས་རྙིང་པ་སླར་གསོ་དང་། དངོས་རྫས་རྙིང་པ་འགྲེམས་སྟོན། བརྒྱུད་ལམ་སྣེ་མང་གི་བརྙན་ལམ་འགྲེམས་སྟོན་མ་ལག གློག་རྡུལ་གྱི་ལངས་གཟུགས་ལྗོངས་དབྱིབས་སོགས་སྤྱད་དེ་ཏང་ཡོན་གྱི་ཐོག་མའི་བསམ་འདུན་སློབ་ཁང་དང་། “འཛུམ་མདངས་གྱང”པར་ལེན་དང་ལན་འཇོག་མ་ལག ཁམ་བུའི་མེ་ཏོག་གི་དངོས་ལྗོངས་པར་ལེན་ཁུལ་སོགས་བརྒྱུད་མཉམ་འགུལ་ཉམས་ལེན་གྱི་ནུས་པ་ཆེ་རུ་བཏང་ཡོད།

ཉེ་བའི་ལོ་ཤས་རིང་། ཉིང་ཁྲི་གྲོང་ཁྱེར་གྱིས་གསར་བརྗེའི་ཐོན་ཁུངས་སྔོག་འདོན་གང་ལེགས་བྱས་ནས་གསར་བརྗེའི་ཡུལ་སྐོར་རྟེན་གཞི་བཏོད་དེ་གསར་བརྗེའི་རིག་གནས་ལས་ཡིད་འགུག་ནུས་པ་དེ་བས་ཆེ་བ་མངོན་པར་བྱས་ཏེ་གསར་བརྗེའི་ཡུལ་སྐོར་འཕེལ་རྒྱས་ཀྱི་སྒུལ་ཤུགས་གསར་པ་ཞིག་ཆགས་པར་བྱས་ཡོད། “ད་ཆ་ཀ་ལ་གྲོང་ཚོར་ཡོང་མཁན་ཡུལ་སྐོར་བ་མང་དུ་ཕྱིན་པ་དང་ཆབས་ཅིག་དམངས་སྲོལ་གནས་ཚང་གི་ཚོང་ཡང་ཡག་ཏུ་ཕྱིན་ནས་ཡོང་འབབ་ཀྱང་ལོ་རེ་ལས་མ་འདས་པར་མང་དུ་འགྲོ་བཞིན་འདུག”ཅེས་གྲོང་མི་ཚེ་གཡང་གིས་བརྗོད་པ་རེད།