ཉེ་ཆར། གསར་འགོད་པར“སྙེ་མོའི་ལུང་ཤུར་ཆེ་མོ། སྤོས་ཀྱི་འབྱུང་ཁུངས་ཐོན་པ།”ཞེས་པའི་སྤོས་ཀྱི་རིག་གནས་ཡུལ་སྐོར་དུས་ཆེན་སྐབས་གསུམ་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར། སྐབས་འདིའི་རིག་གནས་ཡུལ་སྐོར་དུས་ཆེན་2024ལོའི་ཟླ་8ཚེས་16དང་17ཉིན་བར་ལྷ་ས་གྲོང་ཁྱེར་སྙེ་མོ་རྫོང་ཐོན་པ་མཛེས་ལྗོངས་ཁུལ་དུ་གཉེར་རྒྱུ་ཡིན་པ་རེད།

ད་ཐེངས་ཀྱི་རིག་གནས་ཡུལ་སྐོར་དུས་ཆེན་གྱིས“མར་རྐྱང་ཤང་གི་གངས་རིའི་འདབས་ཀྱི་རྟ་རྒྱུག་དུས་ཆེན”དང་། རིག་གནས་ཡུལ་སྐོར་འོས་སྦྱོར་ངོ་སྤྲོད་ཚོགས་འདུ། སྤོས་ཀྱི་རིག་གནས་ཡུལ་སྐོར་དུས་ཆེན། རིག་གནས་ཉམས་ལེན་ཉིན་མོའི་བྱེད་སྒོ མངོན་མིན་ཤུལ་བཞག་ཐོན་རྫས་འགྲེམས་སྟོན་འགྲེམས་ཚོང་། ཁྱད་ལྡན་ཞིམ་ཟས་ཁྲོམ་གཞུང་བྱེད་སྒོ་བཅས་ཁྱོན་བྱེད་སྒོ་ཆེ་གྲས་5སྤེལ་རྒྱུ་རེད།

སྙེ་མོའི་སྤོས་རྒྱུན་འཛིན་དང་སྲུང་སྐྱོང་དེ་བས་ལེགས་པ་ཐུབ་ཆེད། ཉེ་བའི་ལོ་ཤས་རིང་། སྙེ་མོ་རྫོང་ཨུད་དང་རྫོང་སྲིད་གཞུང་གིས་སྲོལ་རྒྱུན་གྱི་ལག་ཤེས་བཟོ་རྩལ་སྣ་ཚོགས་རྒྱུན་འཛིན་ཡག་པོ་བྱེད་པ་དང་དུས་མཚུངས། སྤོས་ཀྱི་རིག་གནས་ཐོན་ལས་སྣེ་འདྲེན་ཐོན་ལས་དང་རྫོང་དར་དམངས་ཕྱུག་གི་ཀ་རྟེན་ཐོན་ལས་ལ་བརྩིས་ནས་སྔ་རྗེས་སུ་ལག་བཟོས་སྤོས་ཐོན་སྐྱེད་ལྟེ་གནས་དང་། སྤོས་ཞིབ་འཇུག་གསར་སྤེལ་ལྟེ་གནས། མངོན་མིན་རིག་གནས་ཤུལ་བཞག་འགྲེམས་སྟོན་ལྟེ་གནས། དེང་རབས་ཀྱི་སྤོས་ཐོན་ལས་གླིང་བཅས་བསྐྲུན་ནས་སྙེ་མོ་རྫོང་གི་སྤོས་ཀྱི་རིག་གནས་ཐོན་ལས་ཀྱི་གཞི་ཁྱོན་རྒྱུན་ཆད་མེད་པར་འཕེལ་རྒྱས་དང་སྟོབས་ཆེར་བཏང་ཡོད། མིག་སྔར། སྙེ་མོ་རྫོང་དུ་སྤོས་བཟོ་མཁན་མཉམ་ལས་ཁང་7དང་། སྤོས་བཟོ་མཁན་ཁེ་ལས（སྒེར་གཉེར）2 སྤོས་ཐོན་ལས་གླིང་1བཅས་ཡོད། 2023ལོར་རྫོང་ཡོངས་ཀྱི་སྤོས་ཀྱི་ཐོན་རྫས་རིན་ཐང་སྒོར་ཁྲི་3634ཟིན་པ་དང་། 2024ལོའི་ཟླ་6པའི་བར། ལོ་ཕྱེད་ནང་སྤོས་ཀྱི་ཐོན་རྫས་རིན་ཐང་སྒོར་ཁྲི་2370ཟིན་ཡོད་པ་རེད།