ཉིན་ཤས་གོང་། ཀྲུང་གོ་འགྲིམ་འགྲུལ་ཅུས་དང་པོ་ཚོགས་པ་ཚད་ཡོད་ཀུང་སིས་བསྐྲུན་འགན་འཁུར་བའི་སྟག་རྩེའི་ལྗང་མདོག་སྒུལ་ནུས་གསར་པའི་ཐོན་ལས་གླིང་གི་དུས་ཐེངས་དང་པོའི་རྣམ་གྲངས་ཀྱི་ཐོག་བདེ་བླག་ངང་བཀབ་པ་དེ་ལས་རྣམ་གྲངས་ཀྱི་སྒྲོམ་གཞི་གཙོ་བོའི་ཨར་ལས་མཇུག་འགྲིལ་ནས་མཛེས་རྒྱན་སྤྲོས་པའི་དུས་མཚམས་སུ་དངོས་སུ་སླེབས་པ་མཚོན་ཡོད།

ལྷ་ས་གྲོང་ཁྱེར་སྟག་རྩེ་ཆུས་བདེ་ཆེན་གྲོང་རྡལ་བསམ་གྲུབ་གླིང་གྲོང་ཚོར་གནས་པའི་སྟག་རྩེའི་ལྗང་མདོག་སྒུལ་ནུས་གསར་པའི་ཐོན་ལས་གླིང་གི་གླིང་ཁུལ་གྱི་ས་ཆའི་སྤྱིའི་རྒྱ་ཁྱོན་ལ་སྨི་ངོས་གྲུ་ཁྲི་3.65ཙམ་དང་འཛུགས་སྐྲུན་གྱི་སྤྱིའི་རྒྱ་ཁྱོན་ལ་སྨི་ངོས་གྲུ་ཁྲི་10.8ཙམ་ཡོད་པ་དེ་ནུས་པའི་ཁུལ་གསུམ་དུ་འཆར་འགོད་བྱས་པ་སྟེ། དུས་ཐེངས་དང་པོའི་ལྗང་མདོག་ཐོན་ལས་ཁུལ(ས་མཐོའི་སྐྱེ་དངོས་དང་བོད་ལུགས་གསོ་རིག་ཐོན་ལས)དང་། དུས་ཐེངས་གཉིས་པའི་སྒུལ་ནུས་གསར་པའི་ཐོན་ལས་ཁུལ(ནུས་རྒྱུ་གསར་པ་དང་འཕྲུལ་གློག་བཟོ་སྐྲུན) དུས་ཐེངས་གསུམ་པའི་མི་རིགས་རིག་གནས་ལག་ཤེས་བཟོ་ལས་ཁུལ་བཅས་རེད། སྟག་རྩེའི་ལྗང་མདོག་སྒུལ་ནུས་གསར་པའི་ཐོན་ལས་གླིང་གི་དུས་ཐེངས་དང་པོའི་རྣམ་གྲངས་ནི་ལྷ་ས་གྲོང་ཁྱེར་སྟག་རྩེ་ཆུས་ཀྱི་ལྗང་མདོག་ཐོན་ལས་དང་ནུས་རྒྱུ་གསར་པའི་ཐོན་ལས་ཀྱི་ཕྱོགས་བསྡུས་སྒྲིག་གཞི་ཐོག་མ་དེ་ཡིན་ལ། སྟག་རྩེ་ཆུས་ཨུད་དང་ཆུས་སྲིད་གཞུང་གིས་གཙོ་གནད་དོ་ཁུར་བྱེད་པའི་དམངས་འཚོའི་རྣམ་གྲངས་ཤིག་ཀྱང་ཡིན་ཞིང་། དེའི་ནང་ཚོང་ལས་གཞུང་ལས་ཐོག་ཁང་དང་། ལས་ཤག བཟའ་བཏུང་ཚོང་ཁང་སོགས་ཚུད་ཡོད།

ཤེས་རྟོགས་བྱུང་བར་གཞིགས་ན། ཐོན་ལས་གླིང་བསྐྲུན་ནས་སྤྱོད་འགོ་ཚུགས་རྗེས་སྟག་རྩེ་ཆུས་ཀྱི་ལྗང་མདོག་ཐོན་ལས་གསར་པ་འཕེལ་རྒྱས་ཤུགས་ཆེན་བཏང་ནས། སྟག་རྩེ་ཆུས་དང་ཐ་ན་ལྷ་ས་གྲོང་ཁྱེར་གྱི་ལྗང་མདོག་དང་ཚན་རྩལ་ཐོན་ལས་ཀྱི་མིང་བྱང་གསར་པ་ཞིག་ཏུ་རིམ་བཞིན་འཕེལ་རྒྱས་འགྲོ་རྒྱུ་ཡིན་པ་དེས་བོད་ཀྱི་ལྗང་མདོག་སྒུལ་ནུས་གསར་པའི་ཐོན་ལས་འཕེལ་རྒྱས་མ་ལག་འཛུགས་པ་དང་དངོས་ཚན་དཔལ་འབྱོར་ཕྱོགས་སྒྱུར་རིམ་སྤོར་ལ་སྐུལ་འདེད་མྱུར་པོ་གཏོང་བར་དོན་སྙིང་གལ་ཆེན་ལྡན་ཡོད།