ཟླ་དྲུག་པའི་ཉིང་ཁྲིར་རྩྭ་རྩི་ཤིང་གི་ལོ་འདབ་རབ་ཏུ་རྒྱས་ནས་སྔོ་ཐིང་ངེར་གྱུར། ནམ་ལངས་མ་ཐག་ལོ་59ལ་སླེབས་པའི་ནགས་སྲུང་བ་སྟོབས་རྒྱལ་གྱིས་ནགས་སྲུང་ལས་གོས་ལྗང་ཁུ་ཞིག་གྱོན་ཏེ་རྩམ་པ་དང་ཆུ་དམ་སྒལ་པར་ཁུར་ནས་སྦི་གླིང་གྲོང་ཚོའི་གངས་བཙན་རི་བོར་རི་སྐོར་ལ་སྐྱོད་འགོ་ཚུགས།

“ང་ཆུང་བྱིས་པའི་དུས་ནས་གྲོང་ཚོར་འཚོ་བ་བསྐྱལ་བས་ཉེ་འཁོར་གྱི་ནགས་རིར་རྒྱུས་མངའ་ཆེན་པོ་ཡོད། ཤིང་ནགས་ཇེ་སྟུག་ཏུ་འགྲོ་བ་དང་རྩྭ་རྩི་ཤིང་གི་ལོ་འདབ་རབ་ཏུ་རྒྱས་པ་མཐོང་སྐབས་ང་རང་ཧ་ཅང་དགའ་པོ་འདུག”ཅེས་སྟོབས་རྒྱལ་གྱིས་འཛུམ་དམུལ་དམུལ་ངང་བཤད།

“སྔོན་མ་ངའི་ཁྱིམ་ཚང་དངོས་གནས་སྐྱོ་པོ་ཡིན། ཕྲུ་གུ་གསུམ་པོ་སློབ་གྲྭར་འགྲོ་མུས་དང་། ང་རང་གི་འབབ་ཁུངས་ཀྱང་གཅིག་རྐྱང་ཡིན་པས་འཚོ་བར་དཀའ་ངལ་ཧ་ཅང་ཆེན་པོ་བྱུང”ཞེས་སྟོབས་རྒྱལ་གྱིས་བཤད།

2018ལོར་སྦི་གླིང་གྲོང་ཚོའི་ཡུལ་མིའི་ཚོགས་ཆེན་ཐོག་བརྡས་ཐག་བཅད་པ་བརྒྱུད། སྟོབས་རྒྱལ་སྐྱེ་ཁམས་ལས་གནས་ཀྱི་ནགས་སྲུང་བར་གྱུར་ནས་ལོ་ལྟར་ཡོང་འབབ་བརྟན་པོ་ཡོད། “རི་སྐོར་དུ་འགྲོ་སྐབས་ངས་རྔོན་རྒྱག་དང་། མེ་རྒྱག ཤིང་གཅོད་སོགས་ཀྱི་གནས་ཚུལ་ཡོད་མེད་གཙོ་གནད་དུ་བཟུང་ནས་ལྟ་ཞིབ་བྱེད་ཀྱི་ཡོད”ཅེས་སྟོབས་རྒྱལ་གྱིས་བཤད།

ཟླ་རེར་ཉུང་མཐར་ཡང་སྐོར་གཡེང་བྱེད་པར་ཉིན་20འགྲོ་དགོས་ལ་འགྲོ་ཐེངས་རེར་སྤྱི་ལེ་བཅུ་གྲངས་ཟིན་གྱི་ཡོད། སྟོན་དཔྱིད་དུས་ཚིགས་གཉིས་སུ་སྟོབས་རྒྱལ་གྱིས་ཉིན་ལྟར་ཞོགས་པའི་ཆུ་ཚོད་དྲུག་པ་ནས་རི་སྐོར་དུ་བསྐྱོད་ཀྱི་ཡོད་པ་དང་དུས་ཆེན་འཆར་རིམ་བཞིན་ཞོགས་པའི་ཆུ་ཚོད་བཞི་པ་ལྔ་པ་ནས་ཐོན་དགོས། རི་སྐོར་བརྒྱབ་པ་དང་ཆབས་ཅིག རིར་ཡོང་མཁན་ལ་ད་དུང་ནགས་ཚལ་རྩྭ་ཐང་གི་མེ་ཟོན་ཤེས་བྱ་དྲིལ་བསྒྲགས་བྱེད་ཀྱི་ཡོད།

ནགས་སྲུང་བའི་འགན་འཁུར་ཚུན། སྟོབས་རྒྱལ་གྱིས་ནགས་སྲུང་ཁུལ་དུ་བསྐྱོད་དེ། ནགས་ཁུལ་ཆགས་ཚུལ་དང་ཐོན་ཁུངས་ཀྱི་གནས་ཚུལ་ཤེས་རྟོགས་ཞིབ་ཕྲ་བྱས་པས་མེ་སྐྱོན་གྱི་མངོན་མེད་རྐྱེན་ངན་20ལྷག་ཙམ་བསལ་བ་མ་ཟད། ད་བར་ཁོང་གིས་འོས་འགན་འཁུར་སའི་ནགས་ཁུལ་ནས་ནགས་ཚལ་ལ་གཏོར་བཤིག་གཏོང་བའི་གྱོད་གཞི་གཅིག་ཀྱང་ཐོན་མྱོང་མེད།

པ་ཕའི་ཤུགས་རྐྱེན་འོག སྟོབས་རྒྱལ་གྱི་བུ་མོ་གཉིས་པོའང་སློབ་གྲྭ་ཐོན་རྗེས་ཕ་ཡུལ་དུ་ལོག་ནས་གྲོང་གསེབ་དར་རྒྱས་གཏོང་མཁན་ཆེད་བསྐོས་ལས་བྱེད་པར་གྱུར། ལས་ཞོར་དུ་ཁོང་གཉིས་པོས“རི་སྔོན་ཆུ་དྭངས་གསེར་དངུལ་རི་ལས་ལྷག གངས་རི་འཁྱགས་ཀླུང་ཡིན་ཡང་གསེར་དངུལ་རི”ཞེས་པའི་འདུ་ཤེས་ཉེ་འགྲམ་གྱི་མི་ཚང་མར་དྲིལ་བསྒྲགས་བྱས་ཏེ། རང་ཉིད་ཀྱི་བྱ་སྤྱོད་དངོས་ལ་བརྟེན་ནས་ཁོར་ཡུག་སྲུང་སྐྱོང་གི་འདུ་ཤེས་མི་སེམས་སུ་གཏིང་ཟབ་ཏུ་ཟུག་པར་སྐུལ་འདེད་གཏོང་གི་ཡོད།

ད་ཆ་སྟོབས་རྒྱལ་གྱི་ཕྲུ་གུ་ཚོ་སྔ་རྗེས་སུ་སློབ་གྲྭ་ཐོན་པ་དང་ཁྱིམ་ཚང་གི་འཚོ་བའི་ཆ་རྐྱེན་ལེགས་སུ་ཕྱིན་མོད། འོན་ཀྱང་ཁོང་གིས་སྔར་བཞིན་སྐད་གྲགས་གང་ཡང་མེད་པར་ནགས་སྲུང་གི་ལས་གནས་བརྟན་སྲུང་བྱེད་ཀྱི་ཡོད། “སྐྱེ་ཁམས་ཡག་པོ་བྱུང་ན་གཞི་ནས་འཚོ་བ་ཡག་པོ་ཡོང་ཐུབ། ངས་ནགས་རིར་ལྟ་སྐྱོང་ཡག་པོ་བྱས་ནས་ཚང་མས་ང་ལ་ཡིད་ཆེས་བྱས་པ་སྟོང་ཟད་དུ་གཏོང་གི་མིན”ཞེས་སྟོབས་རྒྱལ་གྱིས་བཤད།