ནག་ཆུ་གྲོང་ཁྱེར་གྱིས་རྩྭ་ཐང་གི་སྐྱེ་ཁམས་སྲུང་སྐྱོང་བྱ་དགའི་སྲིད་ཇུས་དོན་འཁྱོལ་བྱས་པ།
རྩྭ་ཐང་གི་སྐྱེ་ཁམས་སྲུང་སྐྱོང་ཁ་གསབ་བྱ་དགའི་སྲིད་ཇུས་དོན་འཁྱོལ་ཡག་པོ་བྱེད་པ་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་རྒྱུ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱ་ཆེད། ནག་ཆུ་གྲོང་ཁྱེར་གྱིས་ཚད་མཐོའི་མཐོང་ཆེན་དང་བཀོད་སྒྲིག་ཞིབ་ཚགས་བྱས་ནས་བྱ་དགའ་སྤྲོད་པའི་གོ་རིམ་དོན་འཁྱོལ་དང་། སྲིད་ཇུས་དོན་འཁྱོལ། གྲངས་གཞི་བསྡོམས་རྩིས་ཡག་པོ་རྒྱག་པ་བཅས་ལ་འགན་ལེན་བྱས་པ་རེད།
མ་དངུལ་བསྡོམས་འབོར་དང་ཁྱབ་རྒྱ་ནས་བལྟས་ཚེ་རྩྭ་ཐང་གི་སྐྱེ་ཁམས་སྲུང་སྐྱོང་ཁ་གསབ་བྱ་དགའི་སྲིད་ཇུས་ནི་ནག་ཆུ་གྲོང་ཁྱེར་གྱི་སྐྱེ་ཁམས་ཁོར་ཡུག་སྲུང་སྐྱོང་གི་ཆེས་ཐད་ཀ་དང་། སྲིད་ཇུས་ཀྱི་ཁྱབ་རྒྱ་ཆེ་ཤོས། མང་ཚོགས་ལ་འབབ་འཕར་མང་ཤོས་བཅས་ཀྱི་དམངས་ཁེ་དམངས་ཕན་གྱི་སྲིད་ཇུས་ཤིག་ཡིན་པ་དང་། ལོར་ཆ་སྙོམས་ཁ་གསབ་བྱ་དགའི་མ་དངུལ་སྒོར་དུང་ཕྱུར་10.5དོན་འཁྱོལ་བྱས་པས། ཞིང་འབྲོག་མང་ཚོགས་ཀྱི་དངུལ་སྨར་ཡོང་འབབ་སྒོར་2080ཙམ་འཕར་ཐུབ་ཡོད། 2024ལོའི་སྲིད་ཇུས་ལག་བསྟར་གྱི་ལས་དོན་དུས་ཐོག་ཏུ་ལེགས་གྲུབ་བྱ་ཆེད། ནག་ཆུའི་གྲོང་ཁྱེར་རིམ་པས་སྔ་རྗེས་སུ་བརྡ་ཐོ་ཐེངས་གསུམ་བཏང་ནས་རྩྭ་ཐང་གི་ཁ་གསབ་བྱ་དགའི་སྲིད་ཇུས་དོན་འཁྱོལ་བྱ་རྒྱུར་སྐུལ་འདེད་བཏང་བ་དང་། རྫོང(ཆུས)11ལ་ཁ་གསབ་བྱ་དགའི་མ་དངུལ་སྒོར་དུང་ཕྱུར་12.486སྤྲད་པ་དང་རྒྱུན་གཏན་གྱི་ལས་དོན་སྤེལ་རིང“གཟའ་འཁོར་གྱི་བཀོལ་གཏོང”ལམ་ལུགས་ལག་བསྟར་ནན་པོ་བྱས་པ་དང་སྲིད་ཇུས་དོན་འཁྱོལ་བྱེད་རིང་གནས་པའི་དཀའ་གནད་དུས་ཐོག་ཏུ་ཐག་གཅོད་དང་དབྱེ་ཞིབ་བྱས་པ་རེད།