ཉེ་བའི་ལོ་ཤས་རིང་། རང་ལྗོངས་ཀྱིས་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་ཀྱི་འཐབ་ཇུས་ངེས་གནས་གལ་ཆེན་ལ་གཞི་ཚུགས་ནས《བོད་ཀྱི་སྐྱེ་ལྡན་ཞིང་ལས་ཐོན་རྫས་ཀྱི་ཁས་ལེན་དཔང་འདོན་དང་རྟེན་གཞི་འཛུགས་གཏོད་ཀྱི་བྱ་སྤྱོད་ཇུས་གཞི(2022ལོ་ནས་2025ལོ་བར)》སོགས་ཀྱི་ཇུས་གཞི་སྔ་རྗེས་སུ་བཀྲམ་ནས་ལག་བསྟར་བྱས་ཏེ་སྤྱིའི་བསམ་ཕྱོགས་དང་། གཞི་རྩའི་རྩ་དོན། འཕེལ་རྒྱས་ཀྱི་དམིགས་ཚད། འཕེལ་རྒྱས་ཀྱི་བཀོད་ཇུས། གཙོ་གནད་ལས་གྲྭ ལོ་འཁོར་གྱི་འཆར་གཞི། མ་འཇོག་གི་གཞི་ཁྱོན་སོགས་ཀྱི་ཐད་ནས་ལྗང་མདོག་སྐྱེ་ལྡན་ཞིང་འབྲོག་ལས་འཕེལ་རྒྱས་གཏོང་བར་བཀོད་སྒྲིག་འཆར་འགོད་བྱས་ཡོད། རང་སྐྱོང་ལྗོངས་ཀྱི་ལྗང་མདོག་སྐྱེ་ལྡན་རྟེན་གཞི་འཛུགས་སྐྲུན་བཀོད་སྒྲིག་གཞིར་བཟུང་སྔ་ཕྱི་བར་གསུམ་དུ་ལྗང་མདོག་བཟའ་བཅའི་རྒྱུ་ཆའི་ཚད་ལྡན་ཅན་གྱི་ཐོན་སྐྱེད་རྟེན་གཞི་དང་སྐྱེ་ལྡན་ཐོན་རྫས་རྟེན་གཞི་འཛུགས་སྐྲུན་བྱ་རྒྱུ་ལས་དོན་གལ་ཆེན་དུ་བརྩིས་ནས་ལས་དོན་ཆེད་སྒྲུབ་ཚོགས་ཆུང་འཛུགས་རྒྱུར་ཆེད་མངགས་སྐུལ་འདེད་བཏང་སྟེ་ལྗང་མདོག་སྐྱེ་ལྡན་ཐོན་སྐྱེད་རྟེན་གཞི་འཛུགས་སྐྲུན་ལ་སྐུལ་འདེད་གང་མགྱོགས་བཏང་བས། སྐྱེ་ཁམས་ཀྱི་ལེགས་ཆ་ཐོན་ལས་ཀྱི་ལེགས་ཆར་བསྒྱུར་བའི་ཐབས་ལམ་གསར་པ་འཚོལ་ཞིབ་བྱས་ཏེ་ལྗང་མདོག་སྐྱེ་ལྡན་དེ་བོད་ཀྱི་ཞིང་འབྲོག་ལས་འཕེལ་རྒྱས་ཀྱི་གདིང་གཞིར་གྱུར་ཡོད།

སྐྱེ་ལྡན་རྟེན་གཞི་སྐྱེད་སྲིང་བྱས་པ།

བོད་ལྗོངས་དགའ་བདེ་སྐྱེ་ཁམས་འབྲོག་ལས་ཐོན་ལས་འཕེལ་རྒྱས་ཚད་ཡོད་ཀུང་སིས(གཤམ་དུ“དགའ་བདེ་སྐྱེ་ཁམས་འབྲོག་ལས་ཀུང་སི”ཞེས་བསྡུ་རྒྱུ)ལོ་ཁ་ཤས་རིང་འཚོལ་ཞིབ་བྱས་པ་བརྒྱུད“འདུ་ཤེས་”དང“རྩིས་གཞོང”གཉིས་ལ་དམ་འཛིན་མཐའ་འཁྱོངས་བྱས་ནས“ལྗང་མདོག་དང་། སྐྱེ་ལྡན། རྒྱུན་མཐུད་ཆོག་པ་བཅས་ཀྱི་གཉེར་སྐྱོང་འཕེལ་རྒྱས་ཀྱི་འདུ་ཤེས་གྲུབ་པ་དང་རང་བརྟེན་གསར་གཏོད་བྱས་ནས“དགའ་བདེའི”ས་མཐོའི་ཁྱད་ལྡན་དཀར་ཆུའི་སྤུས་རྟགས་བཏོད་དེ། ཚོང་རྟགས་རིགས་44དང་དྲ་སྦྲེལ་ཁོངས་མིང་རིགས་22ཐོ་འགོད་བྱས་པ་དང་། “ནག་ཆུའི་འབྲི་གཡག”གི་ས་ཁམས་མཚོན་རྟགས་ཐོ་འགོད་ལེགས་གྲུབ་བྱུང་བ། སྐྱེ་ལྡན་ཕྱུགས་རྩྭ་དང་། སྐྱེ་ལྡན་འབྲི་གཡག སྐྱེ་ལྡན་འབྲིའི་འོ་མ་སོགས་ཀྱི་ལག་ཁྱེར་རག་པ་རེད།

དགའ་བདེ་སྐྱེ་ཁམས་འབྲོག་ལས་ཐོན་ལས་ཀུང་སིར་དགའ་བདེ་སྐྱེ་ཁམས་འབྲོག་ལས་ཐོན་ལས་དཔེ་སྟོན་རྟེན་གཞི་ཡོད་པ་དང་དུས་མཚུངས་གསེར་རྙེད་ཆུས་ཀྱི་ཤང་དང་གྲོང་རྡལ་12དང་གྲོང་ཚོ་134དང་ཐོན་ལས་མནའ་འབྲེལ་བཙུགས་ནས། ཤང་དང་གྲོང་རྡལ་དུ་རིམ་པ་དང་པོའི་དཀར་ཆུའི་ས་ཚིགས་10དང་གྲོང་ཚོ་དང་གྲོང་ལྷན་དུ་གྲོང་ཚོ་རིམ་པའི་དཀར་ཆུའི་མཁོ་སྤྲོད་ས་ཚིགས་100བཙུགས་ཡོད་པ་རེད། ཀྲུང་གོའི་ལྗང་མདོག་བཟའ་བཅའི་འཕེལ་རྒྱས་ལྟེ་གནས་ཀྱིས་ཁས་ལེན་དཔང་འདོན་བྱས་པ་བརྒྱུད། རང་ལྗོངས་ཀྱིས་རྒྱལ་ཡོངས་ཀྱི་ལྗང་མདོག་བཟའ་བཅའི་རྒྱུ་ཆའི་ཚད་ལྡན་ཅན་གྱི་ཐོན་སྐྱེད་རྟེན་གཞི་1དང་སྐྱེ་ལྡན་ཞིང་ལས་ཐོན་རྫས་རྟེན་གཞི་4བདེ་བླག་ངང་བཙུགས་པ་རེད།

བཟའ་བཅའི་གྲུབ་ཆ་ལེགས་སུ་བཏང་བ།

སྐྱེ་ལྡན་ཞིང་འབྲོག་ལས་འཕེལ་རྒྱས་བཏང་ཚེ་སྤུས་ལེགས་ཞིང་འབྲོག་ཐོན་རྫས་མཁོ་སྤྲོད་བྱེད་ཚད་ནུས་ལྡན་ངང་མང་དུ་ཕྱིན་ནས་མི་དམངས་མང་ཚོགས་ཀྱི་སྤུས་ལེགས་འཚོ་བའི་དགོས་མཁོ་དེ་བས་ལེགས་པའི་སྒོ་ནས་བསྐངས་ཐུབ་པ་མ་ཟད། རང་ལྗོངས་ཀྱི་གྲོང་མིའི་བཟའ་བཅའི་འཚོ་བཅུད་གྲུབ་ཆ་ལེགས་སུ་གཏོང་བར་ཡང་རྨང་གཞི་བརྟན་པོ་འདིང་ཐུབ།

བོད་ལྗོངས་ལྗང་མདོག་འབྱུང་ཁུངས་དེང་དུས་ཞིང་ལས་ཚན་རྩལ་མ་རྐང་ཚད་ཡོད་ཀུང་སི(གཤམ་དུ“ལྗང་མདོག་འབྱུང་ཁུངས་དེང་དུས་ཞིང་ལས་ཚན་རྩལ་ཀུང་སི”ཞེས་བསྡུ་རྒྱུ)ནི་འཛུགས་སྐྲུན་དང་། ཞིབ་སྤེལ། འདེབས་འཛུགས། ཕྱིར་ཚོང་། སྤུས་རྟགས་གཏོད་པ་བཅས་གཞི་གཅིག་ཏུ་འདུས་པའི་ས་མཐོའི་སྐྱེ་ལྡན་སྔོ་ཚལ་དང་ཤིང་འབྲས་ཐོན་ལས་གླིང་ཞིག་ཡིན་པ་དང་ས་མཐོའི་སྐྱེ་ལྡན་སྔོ་ཚལ་དང་ཤིང་འབྲས་འདེབས་པ་དེས་མང་ཚོགས་ལ་གནོད་མེད་བཟའ་བཅའ་མཁོ་འདོན་བྱས་ཡོད།

བོད་ལྗོངས་ཁ་དྲོའི་འབྲུ་རིགས་ཞིང་ལས་འཕེལ་རྒྱས་མ་རྐང་ཚད་ཡོད་ཀུང་སི་ལྷ་ས་གྲོང་ཁྱེར་དང་བོད་རང་སྐྱོང་ལྗོངས་ཀྱི“ཚན་རྩལ་རྣམ་པའི”ཁེ་ལས་དང་འབྲོག་ལས་ཐོན་ལས་ཅན་གྱི“སྣེ་འདྲེན་ཁེ་ལས”ལ་གཏན་འཁེལ་བྱས་པ་དང་། ལྷ་ས་གྲོང་ཁྱེར་གྱི་ཚན་རིག་ལག་རྩལ་བྱ་དགའ་ཁག་གཅིག་དང་ནས་ཀྱི་རྒྱ་ཐུག་སྐམ་ཆུན་དང་། ནས་ཀྱི་མགྱོགས་ཟས་ཐུག་པ། རྩམ་པ་བཅས་ལ་ཀྲུང་གོའི་སྟབས་བདེའི་བཟའ་བཅའི་བྱ་དགའ་སྔ་རྗེས་སུ་ཐོབ་པ་རེད། དེའི་ཁོངས་གཏོགས་ཀྱི“ཁ་དྲོའི་འབྲུ་རིགས”ཀྱི་ཚོང་རྟགས་དེ་ཀྲུང་གོའི་གྲགས་ཅན་ཚོང་རྟགས་སུ་གཏན་འཁེལ་བྱས་པ་རེད།

དུས་ཚིགས་དང་པོར་རང་ལྗོངས་ཀྱི་ཞིང་ལས་ཐོན་རྫས་གཙོ་བོར་འབོར་ཚད་གཏན་འཁེལ་གྱི་འཐེན་བཤེར་ཁག་ཐེངས་8325བྱས་པར་ཚད་ལོན་ཚད་97.8%ཡན་ཟིན་པ་དེ་ན་ནིང་ལས་བརྒྱ་ཆའི་གྲངས་0.1གིས་མཐོ་རུ་ཕྱིན་ཡོད།

འཕེལ་རྒྱས་ཀྱི་ཕན་འབྲས་ཆེ་རུ་བཏང་བ།

ཉེ་བའི་ལོ་ཤས་རིང་། རང་ལྗོངས་ཀྱིས་སྤྱི་གནོད་མེད་པའི་ཞིང་ལས་ཐོན་རྫས་དང་། ལྗང་མདོག་བཟའ་བཅའ། སྐྱེ་ལྡན་བཟའ་བཅའ། ས་ཁམས་མཚོན་རྟགས་སྲུང་སྐྱོང་གི་ཞིང་ལས་ཐོན་རྫས་སོགས་བདེ་འཇགས་དང་སྤུས་ལེགས་ཀྱི་ཞིང་ལས་ཐོན་རྫས་ཀྱི་སྤྱི་པའི་སྤུས་རྟགས་འཕེལ་རྒྱས་གཏོང་བར་རྒྱབ་སྐྱོར་ཤུགས་ཆེན་བྱས་ཡོད། རི་བོ་ཆེའི་འབྲི་གཡག་དང་། གམ་པའི་ལུག ཀོང་པོ་རྒྱ་མདའི་བོད་ཕག ལྷུན་རྩེའི་ནས་ནག ཉིང་ཁྲིའི་ཀུ་ཤུ་སོགས་ནི་ཀུན་གྱིས་རྒྱུས་མངའ་ཆེ་བའི་བདེ་འཇགས་ཀྱི་ཞིང་འབྲོག་ཐོན་རྫས་སྤུས་ལེགས་ཀྱི་མིང་ཚབ་ཏུ་གྱུར་ནས་སྤུས་རྟགས་ཀྱི་ཤུགས་རྐྱེན་རིམ་བཞིན་མངོན་གསལ་དོད་དུ་ཕྱིན་ཏེ་རང་ལྗོངས་ཀྱི་ཞིང་འབྲོག་ཐོན་ལས་འཕེལ་རྒྱས་ཀྱི་འཕར་སྣེ་གསར་པར་གྱུར་བཞིན་ཡོད་པ་རེད། 2023ལོར་ལྗང་མདོག་འབྱུང་ཁུངས་དེང་དུས་ཞིང་ལས་ཚན་རྩལ་ཀུང་སིའི་ས་མཐོའི་སྐྱེ་ལྡན་སྔོ་ཚལ་དང་ཤིང་འབྲས་ཐོན་ལས་གླིང་གིས་དུད་ཚང་100ལྷག་ཙམ་དང་མི་500ལྷག་ཙམ་ལ་ཕན་པ་ཐོབ་ནས་ཡོང་འབབ་སྒོར་ཁྲི་200ལྷག་ཙམ་འཕར་རྒྱུར་སྐུལ་ཁྲིད་བྱས་པ་དེའི་ནང་གླ་ཕོགས་རང་བཞིན་གྱི་ཡོང་འབབ་སྒོར་ཁྲི་90ཙམ་དང་། ཉོ་སྒྲུབ་མ་དངུལ་སྒོར་ཁྲི་40ཙམ་འཕྲུལ་ཆས་ཀྱི་བོགས་དངུལ་སྒོར་ཁྲི་75ཙམ་བཅས་ཟིན་ཡོད། ལྗང་མདོག་འབྱུང་ཁུངས་དེང་དུས་ཞིང་ལས་ཚན་རྩལ་ཀུང་སིའི་འཕེལ་རྒྱས་ཀྱི་དཔེ་དབྱིབས་དེས་ལྗང་མདོག་སྐྱེ་ལྡན་ཐོན་ལས་འཕེལ་རྒྱས་གཏོང་བ་དང“ཆུང་ལ་སྤུས་ཀ་ལེགས་པ”དང“ཉུང་ལ་སྤུས་ཀ་ལེགས་པའི”ཐོན་ལས་འཁོར་འབྲེལ་གཏོད་བར་ཐབས་ལམ་གསར་པ་ཞིག་འཚོལ་ཞིབ་བྱས་པ་རེད།