ཉིང་ཁྲི་གྲོང་ཁྱེར་གྱི་འཛམ་གླིང་རིམ་པའི་སྐྱེ་ཁམས་རིག་གནས་ཡུལ་སྐོར་དམིགས་ས་འཛུགས་སྐྲུན་ལ་སྐུལ་འདེད་མགྱོགས་པོ་བཏང་སྟེ་ཉིང་ཁྲིའི་སྒྱུར་བཅོས་སྒོ་དབྱེ་སྔོན་ལ་སྤེལ་བ་དང་ཡུལ་སྐོར་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད། ཉེ་ཆར། ཉིང་ཁྲི་གྲོང་ཁྱེར་གྱིས“ཡུལ་སྐོར་བ་ཉིང་ཁྲིར་གདན་འདྲེན་པ”དང་དབྱར་ཁའི་གུང་གསེང་རིང་གི་ཡུལ་སྐོར་གཟིགས་སྐྱོང་སྲིད་ཇུས་སྔ་རྗེས་སུ་བཏོན་ནས་ཡུལ་སྐོར་འཕེལ་རྒྱས་ལ་སླར་ཡང་ཚ་རླབས་འཕྱུར་བར་སྐུལ་འདེད་བཏང་བ་རེད།

ཉིང་ཁྲི་གྲོང་ཁྱེར་གྱི“ཡུལ་སྐོར་བ་ཉིང་ཁྲིར་འདྲེན་པར”བརྟེན་ནས་ཡུལ་སྐོར་འཛད་སྤྱོད་ཁྲོམ་རར་སྐུལ་འདེད་གཏོང་བའི་བྱ་དགའ་སྤྲོད་ཐབས་ནང་ཉིང་ཁྲིར་ཕེབས་བསུའི་བྱ་དགའ་དང་། སྣེ་ལེན་གྱི་བྱ་དགའ། ཉིང་ཁྲིར་འཁོར་ཁྲིད་ཡུལ་སྐོར་གྱི་བྱ་དགའ། ཡུལ་སྐོར་ལས་དོན་ཁང་སྤུས་ལེགས་བྱ་དགའ། ཡུལ་སྐོར་སྣེ་ཤན་པ་གྲགས་ཅན་གྱི་བྱ་དགའ་སོགས་བྱ་དགའ་ཁག་7གཏན་འཁེལ་བྱས་ནས་བྱ་དགའ་རེ་ཞུའི་ཆ་རྐྱེན་འཛོམས་པའི་ལྗོངས་ཕྱི་ནང་གི་ཡུལ་སྐོར་ལས་དོན་ཁང་ལ་ཡུལ་སྐོར་བའི་མི་གྲངས་གཞིར་བཟུང་བྱ་དགའ་ངེས་ཅན་སྤྲོད་རྒྱུ་དང་། ཉིང་ཁྲི་གྲོང་ཁྱེར་ལ་ཐོ་བཀོད་པའི་ཡུལ་སྐོར་ལས་དོན་ཁང་ནང་ལས་ཀ་བྱེད་པ་མ་ཟད། ད་དུང་བྱེད་སྒོ་སྤེལ་རིང་རྒྱལ་ཡོངས་ཀྱི་འབྲིང་རིམ་དང་མཐོ་རིམ་ཡུལ་སྐོར་སྣེ་ཤན་པའི་ཐོབ་ཐང་ལག་ཁྱེར་ཐོབ་མཁན་གྱི་ཡུལ་སྐོར་སྣེ་ཤན་པར་རིམ་པ་མི་འདྲ་བའི་ཐེངས་གཅིག་རང་བཞིན་གྱི་ཁ་གསབ་སྤྲོད་རྒྱུ་རེད། བྱ་ཐབས་དེའི་དམིགས་ཡུལ་ནི་ཡུལ་སྐོར་འཛད་སྤྱོད་ཁྲོམ་རའི་གསོན་ཤུགས་སྔར་བས་འཕེལ་བ་དང་། ལྗོངས་ཕྱི་ནང་གི་ཡུལ་སྐོར་ལས་དོན་ཁང་གིས་ཉིང་ཁྲིར་ཡུལ་སྐོར་ལ་ཡོང་མཁན་ཡུལ་སྐོར་བའི་ཁྲོམ་ར་གསར་སྤེལ་ཧུར་ཐག་བྱ་རྒྱུར་སྐུལ་ཁྲིད་བྱེད་པ། ཉིང་ཁྲི་གྲོང་ཁྱེར་གྱི་ཡུལ་སྐོར་ཁྱབ་ཁོངས་དང་དུས་འཁོར་ཧྲིལ་པོ་འཕེལ་རྒྱས་འགྲོ་རྒྱུར་སྐུལ་མ་གཏོང་བ་བཅས་བྱ་རྒྱུ་དེ་རེད།

དབྱར་གསེང་རིང་གི་ཡུལ་སྐོར་ལ་དམིགས་ནས་ཉིང་ཁྲི་གྲོང་ཁྱེར་གྱིས“རྒྱལ་ཡོངས་ཀྱི་2024ལོའི་སློབ་དུས་འདིའི་མཐོ་རྒྱུགས་གཏོང་མཁན་སློབ་མས་རིན་མི་དགོས་པར་ཉིང་ཁྲི་གྲོང་ཁྱེར་གྱི་མཛེས་ལྗོངས་ཁུལ་དུ་ཡུལ་སྐོར་བྱེད་ཆོག་པའི་གཟིགས་སྐྱོང་བྱེད་སྒོའི་སྲིད་ཇུས”བཏོན་ནས་རིག་གནས་ཡུལ་སྐོར་གྱི་འཛད་སྤྱོད་སྔར་བས་རྒྱ་ཆེར་གཏོང་བ་དང་དབྱར་གསེང་རིང་གི་ཡུལ་སྐོར་འཛད་སྤྱོད་ཁྲོམ་རར་རམ་འདེགས་བྱས་ཡོད། རྒྱལ་ཡོངས་ཀྱི་2024ལོའི་སློབ་དུས་འདིའི་མཐོ་རྒྱུགས་གཏོང་མཁན་སློབ་མས་ཟླ་6ཚེས་9ཉིན་ནས་ཟླ་8ཚེས་31ཉིན་བར་རང་ཉིད་ཀྱི་མཐོ་རྒྱུགས་རྒྱུགས་སྤྲོད་ལག་ཁྱེར་དང་། ཐོབ་ཐང་ལག་ཁྱེར། སློབ་མའི་ལག་ཁྱེར། སློབ་ཐོན་ལག་ཁྱེར་བཅས་ལ་བརྟེན་ནས་སྤ་སེ་ཉོ་མི་དགོས་པར་ཉིང་ཁྲི་གྲོང་ཁྱེར་གྱི་མཛེས་ལྗོངས་ཁུལ་ཚང་མར་ཡུལ་སྐོར་བྱེད་ཆོག་གི་ཡོད་པ་རེད།