སྡོད་མལ་ཁོར་ཡུག་བཅོས་སྒྲིག་གིས། མཛེས་སྡུག་ལྡན་པའི་ཁྱིམ་གཞིས་བསྐྲུན།
སྡོད་མལ་ཁོར་ཡུག་བཅོས་སྒྲིག་ལས་དོན་གྱི་སྤུས་ཚད་མཐོ་རུ་དང་ཕན་འབྲས་ཆེར་གཏོང་ལ་སྔར་བས་སྐུལ་འདེད་བཏང་ནས་བཅོས་སྒྲིག་གི་གྲུབ་འབྲས་སྲ་བརྟན་དུ་གཏོང་ཆེད། འདི་ལོ་ཚུན་དུ། ཆབ་མདོ་གྲོང་ཁྱེར་དཔའ་ཤོད་རྫོང་སྤོམ་མདའ་གྲོང་རྡལ་ཏང་ཨུད་དང་སྲིད་གཞུང་གིས་བཀོད་སྒྲིག་ཞིབ་ཚགས་དང་གཅིག་གྱུར་འཆར་འགོད་བྱས་ཏེ། སྤོམ་མདའ་གྲོང་རྡལ་གྱི་གྲོང་སྡོད་ལས་དོན་གྱི་སྐབས་འཕྲལ་ཏང་ཀྲི་པུས་གྲོང་སྡོད་ལས་དོན་རུ་ཁག་ཁག་དང་མཉམ་དུ་ཐབས་མང་མཉམ་སྤྱོད་དང་དཔེ་སྟོན་སྣེ་ཁྲིད་བྱས་ཏེ། སྤོམ་མདའ་གྲོང་རྡལ་གྱི་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་གཏིང་ཟབ་དང་ཏན་ཏིག་སྤེལ་བར་སྐུལ་འདེད་གཏིང་ཟབ་བཏང་ཡོད།
ཞོགས་པ་སྔ་པོར། ཆབ་མདོ་གྲོང་ཁྱེར་དཔའ་ཤོད་རྫོང་སྤོམ་མདའ་གྲོང་རྡལ་ཐོག་གཉིས་གྲོང་ཚོའི་གྲོང་སྡོད་ལས་དོན་རུ་ཁག་གི་སྒྲིག་འཛུཊ་འོག སྟོད་གོས་དམར་པོ་གྱོན་པའི་གྲོང་མིའི་འཐུས་མི་ཁ་ཤས་ཐོག་གཉིས་གྲོང་ཚོའི་ཏང་དང་མང་ཚོགས་བྱེད་སྒོ་ལྟེ་གནས་སུ་ཡོང་སྟེ་ཁོང་ཚོས་རེས་སྐོར་གསར་པའི་འཕྲོད་བསྟེན་གཙང་སྦྲ་བྱེད་འགོ་ཚུགས།
རྒྱལ་ལམ་318ལམ་རྒྱུད་དུ་ཁོང་ཚོས་ལམ་ངོས་དང་ཡུར་བུ་སོགས་ཀྱི་གད་སྙིགས་གཙང་སེལ་བྱས་པ་དང་ཆབས་ཅིག གྲོང་མི་ཚོས་ད་དུང་མཐའ་འཁོར་གྱི་ཞིང་འབྲོག་མང་ཚོགས་དང་ཕར་འགྲོ་ཚུར་འོང་བྱེད་མཁན་ཡུལ་སྐོར་བར་ཤེས་དཔལ་མཉམ་སྤྱོད་ཀྱི་འདུ་ཤེས་དྲིལ་བསྒྲགས་བྱས་ཏེ། ཞིང་འབྲོག་མང་ཚོགས་གྲོང་རྡལ་ཡོངས་ཀྱི་ཁོར་ཡུག་གཙང་སྦྲའི་ལས་དོན་ནང་ཧུར་ཐག་ཞུགས་ནས་གཙང་ལ་གྲལ་འགྲིག་པ་དང་ཤེས་དཔལ་གོ་རིམ་ལྡན་པའི་སྡོད་མལ་ཁོར་ཡུག་མཉམ་དུ་གཏོད་པར་ཁྲིད་སྟོན་ཧུར་ཐག་བྱས་ཡོད།
སྡོད་མལ་ཁོར་ཡུག་བཅོས་སྒྲིག་བྱེད་པའི་ལས་དོན་ལ་རྒྱུན་མཐུད་སྐུལ་འདེད་གཏོང་བའི་ཁྲོད་སྤོམ་མདའ་གྲོང་རྡལ་གྱིས་གཙོ་གནད་ལྷུ་ཚིགས་ལ་དམ་པོར་དམིགས་ཏེ་ཞིབ་ཕྲ་དང་ཆུང་ཙག་ནས་འགོ་ཚུགས་ཏེ་དམ་འཛིན་ཡག་པོ་བྱས་ནས་སྟོབས་ཤུགས་གཅིག་སྒྲིལ་གྱིས་རྒྱལ་ལམ་གཞོགས་གཉིས་ཀྱི་ཡུལ་སྐོར་གད་སྙིགས་དང་། རྣམ་གྲངས་ཨར་སྐྲུན་བྱ་ཡུལ་གྱི་འཛུགས་སྐྲུན་གད་སྙིགས། ཞིང་འབྲོག་མང་ཚོགས་ཀྱི་ཁང་པའི་རྒྱབ་མདུན་དུ་སྤུངས་པའི་དངོས་རྫས། སྤྱི་པའི་གསང་སྤྱོད་མཐའ་འཁོར་གྱི་གད་སྙིགས། མཛེས་ལྗོངས་ཁུལ་གྱི་གད་སྙིགས། ཆུ་ཡུར་གཞོགས་གཉིས་ཀྱི་གད་སྙིགས་སོགས་ཚང་མར་ལེབ་བཤེར་རྣམ་པའི་གཙང་སེལ་བཅོས་སྒྲིག་བྱས་པ་དང་གྱང་རོ་དང་། མཁོ་མེད་པང་ལེབ། གང་བྱུང་དུ་བརྒྱབ་པའི་སྐྲུན་དངོས་སོགས་ཀྱི་ཁྱབ་ཁོངས་གཙོ་གནད་བཤིག་ནས་ཁོད་སྙོམས་པོ་བཟོས་ཏེ་གཙང་ལ་གྲལ་འགྲིག་པ་དང་སྐྱིད་སྣང་དོད་པའི་ཁོངས་གཏོགས་ཁུལ་གྱི་ཁོར་ཡུག་བསྐྲུན་གང་ཐུབ་བྱས་པ་རེད།
སྤོམ་མདའ་གྲོང་རྡལ་སྤོམ་མདའ་གྲོང་ཚོའི་ཏང་དང་མང་ཚོགས་བྱེད་སྒོ་ལྟེ་གནས་སུ་སླེབས་སྐབས་ཁོར་ཡུག་གཙང་ལ་སྐར་ལྔའི་དར་དམར་ལྷབ་ལྷུབ་ཏུ་གཡོ་བཞིན་མཆིས། སྡོད་མལ་ཁོར་ཡུག་བཅོས་སྒྲིག་ལས་དོན་ལ་ཕན་འབྲས་ཡག་པོ་ཐོན་ཆེད། སྤོམ་མདའ་གྲོང་རྡལ་སྲིད་གཞུང་གིས་མི་སྣ་སྒྲིག་འཛུགས་བྱས་ནས་སྡོད་མལ་ཁོར་ཡུག་གི་ཆེད་དོན་ལྟ་སྐུལ་འགོ་ཁྲིད་ཚོགས་ཆུང་བཙུགས་ཏེ། གྲོང་ཚོ་ཁག་གི་དོན་དངོས་དང་ཟུང་འབྲེལ་དམ་ཟབ་བྱས་ནས“གྲོང་ཚོ་གཅིག་ལ་དེབ་གཅིག”གི་གནད་དོན་དག་ཐེར་དང་བཅོས་སྒྲིག་གི་ལས་ཐོ་བཟོས་ཏེ། གྲོང་ཚོ་ཁག་ལ་དུས་བཀག་ནང་རྣམ་གྲངས་རེ་རེ་བཞིན་བཅོས་སྒྲིག་བྱེད་དུ་བཅུག་ནས་ལས་འགན་ཁག་དོན་འཁྱོལ་དང་ལེགས་སྒྲུབ་ཡག་པོ་བྱེད་དགོས་པའི་བླང་བྱ་བཏོན་ཡོད།
དེ་དང་ཆབས་ཅིག སྤོམ་མདའ་གྲོང་རྡལ་གྱིས་མི་སྣ་སྒྲིག་འཛུགས་བྱས་ནས་རྒྱལ་གཅེས་འཕྲོད་བསྟེན་གྱི་དྲིལ་བསྒྲགས་བྱེད་སྒོ་རབ་དང་རིམ་པ་རྒྱུན་མཐུད་སྤེལ་ཏེ། སྐད་འཕྲིན་སྤྱི་རྟགས་དང་། དྲིལ་བསྒྲགས་བརྡ་སྦྱོར་སྦྱར་བ། དྲིལ་བསྒྲགས་ཤོག་ལྷེ་སྤྲོད་པ་སོགས“དྲ་ཐོག་དང་དྲ་ཕྱི་ཟུང་འབྲེལ”གྱི་བྱ་ཐབས་སྤྱད་ནས་མང་ཚོགས་ཀྱི་ཤེས་དཔལ་གྱི་འདུ་ཤེས་དང་། འཕྲོད་བསྟེན་གྱི་འདུ་ཤེས། ཁོར་ཡུག་གི་འདུ་ཤེས་བཅས་ཟབ་ཏུ་གཏོང་བར་ཁྲིད་སྟོན་བྱས་ཏེ། སྡོད་མལ་ཁོར་ཡུག་བཅོས་སྒྲིག་ནང་ཞུགས་མཁན་མང་ཚོགས་ཀྱི་རང་རྟོགས་རང་བཞིན་དང་རང་འགུལ་རང་བཞིན་ཆེ་རུ་བཏང་ནས་མི་ཚང་མ་ཞུགས་པ་དང་མི་ཚང་མས་གཅེས་སྐྱོང་བྱེད་པའི་རྣམ་པ་ཟབ་མོ་ཞིག་བཏོད་ཡོད།