ཉེ་ཆར། རིག་གནས་དང་ཡུལ་སྐོར་པུའུ་དང་། རྒྱལ་ཁབ་ལྕགས་ལམ་ཚོགས་པས་མཛུབ་ཁྲིད་བྱས་པའི་བོད་སྐྱོར་ཡུལ་སྐོར་ཆེད་གཏོང་མེ་འཁོར་པེ་ཅིང་ནས་ཐེངས་དང་པོར་བཏང་ཞིང་། ཐེངས་འདིར་བཏང་བའི“གཅིག་སེམས་གཅིག་སྦྲེལ། ཅིང་བོད་རྟགས་ཅན”གྱི་ཡུལ་སྐོར་མེ་འཁོར་གྱི་ལམ་ཐིག་དུམ་བུ་གཉིས་ལ་དབྱེ་ཡོད། ལམ་དུམ་དང་པོ་ནི་པེ་ཅིང་ནས་ཟི་ལིང་བར་ཏེ་མེ་འཁོར་དཀྱུས་མའི་ཆེད་གཏོགས་འཁོར་སྒྲོམ་ཡིན་པ་དང་། ལམ་དུམ་གཉིས་པ་ནི་ཟི་ལིང་ནས་ལྷ་སའི་བར་ཏེ་ས་མཐོའི་གསོ་རླུང་ལྡན་པའི་ཡུལ་སྐོར་ཆེད་གཏོང་མེ་འཁོར་ཡིན། རིག་གནས་དང་ཡུལ་སྐོར་པུའུ་ཐོན་ཁུངས་གསར་སྤེལ་སིའི་འགན་འཁུར་བས། ཡུལ་སྐོར་ཆེད་གཏོང་མེ་འཁོར་ཐེངས་དང་པོར་བཏང་བ་འདི་ལས“2024ལོའི་རྒྱལ་ཡོངས་ལྕགས་ལམ་ཡུལ་སྐོར་གྱི་ཤིན་སྐྱོར་དང་བོད་སྐྱོར་བྱེད་སྒོ”སྤེལ་འགོ་ཚུགས་པ་མཚོན་ཡོད། གོམ་སྟབས་རྗེས་མར། རིག་གནས་དང་ཡུལ་སྐོར་པུའུ་དང་། རྒྱལ་ཁབ་ལྕགས་ལམ་ཚོགས་པས་ལྕགས་ལམ་ཡུལ་སྐོར་གྱི་ཤིན་སྐྱོར་དང་བོད་སྐྱོར་གྱི་ཁྱབ་སྤེལ་བྱེད་སྒོ་རབ་དང་རིམ་པ་སྤེལ་ནས་ཤིན་ཅང་དང་བོད་ཀྱི་རང་བྱུང་མཛེས་ལྗོངས་དང་། ལོ་རྒྱུས་དང་མི་ཆོས་རིག་གནས། མི་རིགས་ཀྱི་ཡུལ་སྲོལ་གོམས་གཤིས་བཅས་དྲིལ་བསྒྲགས་རྒྱ་ཁྱབ་བྱེད་པ་དང་ཆབས་ཅིག དམངས་འཚོའི་ཐོན་ལས་དང་བདེ་སྐྱིད་ཐོན་ལས་ཡིན་པའི་ཡུལ་སྐོར་གྱི་ནུས་པ་གལ་ཆེན་འདོན་སྤེལ་ཧུར་ཐག་བྱས་ནས། ཡུལ་སྐོར་རྒྱལ་ཁབ་སྟོབས་ཆེན་བསྐྲུན་པར་སྟོབས་ཤུགས་འབུལ་གྱི་ཡིན་ཞེས་བརྗོད་པ་རེད།