ཉེ་ཆར། ལྷོ་ཁ་གྲོང་ཁྱེར་མི་དམངས་སྲིད་གཞུང་དང་ལྷོ་ཁ་གྲོང་ཁྱེར་གྱི་རྫོང(གྲོང་ཁྱེར་དང་ཆུས)12ཀྱི་མི་དམངས་སྲིད་གཞུང་གིས་གཙོ་གཉེར་དང་ལྷོ་ཁ་གྲོང་ཁྱེར་ཡུལ་སྐོར་འཕེལ་རྒྱས་ཅུས་སོགས་ཚན་པས་གཉེར་འགན་འཁུར་བའི་2023ལོའི“དགུན་དུས་ལྷོ་ཁར་ཡུལ་སྐོར་བྱེད་པའི”ཡུལ་སྐོར་ཐོན་ཁུངས་དང་ལམ་ཐིག་ཐོན་རྫས་ཀྱི་འོས་སྦྱོར་ཚོགས་འདུ་ལྷོ་ཁ་གྲོང་ཁྱེར་དུ་འཚོགས་པ་རེད།

འོས་སྦྱོར་ཚོགས་འདུར་ལྷོ་ཁ་གྲོང་ཁྱེར་གྱིས“‘དགུན་དུས་ལྷོ་ཁར་ཡུལ་སྐོར་བྱེད་པའི’ཁྱད་ལྡན་ཡུལ་སྐོར”དང“ཧི་མ་ལ་ཡ་སྒྲོལ་བའི་ཡུལ་སྐོར”“སྐུ་ལྷ་མཁའ་རིར་རྐང་ཐང་མར་སྐྱོད་པའི་ཡུལ་སྐོར”དེ་བཞིན“ཁྱིམ་གཞིས་ནི་ཡུལ་སྨད་དང་རྒྱལ་ཁོངས་ནི་ཀྲུང་གོ་ཡིན”གསར་བརྗེའི་ཡུལ་སྨད་ཀྱི་ཁྱད་ལྡན་ཐོན་རྫས་སོགས་ཡུལ་སྐོར་ལམ་ཐིག་དང་ཐོན་རྫས་ཁག་4ཐེངས་གཅིག་ལ་བཏོན་ནས་ལྷོ་ཁ་གྲོང་ཁྱེར་གྱི་རང་བྱུང་མཛེས་ལྗོངས་དང་། རིག་གནས་ཤུལ་བཞག གསར་བརྗེའི་ཐོན་ཁུངས་བཅས་ཡག་ཤོས་དག་གཅིག་ཏུ་སྦྲེལ་ཏེ། ཡུལ་སྐོར་བ་དང་། ཡུལ་སྐོར་ཚོང་པ། མ་རྩ་འཇོག་མཁན་བཅས་ལ་ལྷོ་ཁའི་ཁྱད་ལྡན་ཡུལ་སྐོར་གྱི“གཅེས་ནོར”འོས་སྦྱོར་བྱས་པ་རེད།

འོས་སྦྱོར་ཚོགས་འདུའི་ཐོག་ད་དུང་སྣ་དཀར་རྩེ་རྫོང་ཡུལ་སྐོར་འཕེལ་རྒྱས་ཅུས་དང་ཆིང་ཧོ་ཡུལ་སྐོར་གསར་སྤེལ་ཚད་ཡོད་འགན་འཁྲི་ཀུང་སི་སོགས་ཚན་པ་དང་ཁེ་ལས་ལ་ལྷོ་ཁའི་ཡུལ་སྐོར་ཐོན་ལས་ཀྱི་རོགས་སྐྱོར་བྱ་དགའི་དངུལ་སྤྲད་པ་རེད། བྱ་དགའི་དངུལ་དེར“ཤེས་ལྡན་མི་སྣ་འཛུགས་སྐྱོང་བྱ་དགའ”དང་། “ཚོང་གཉེར་བྱེད་སྒོའི་བྱ་དགའ” “ཡུལ་སྐོར་གཙོ་རྒྱུའི་བྱ་དགའ”སོགས་བྱ་དགའ་ཁག་གསུམ་བཀོད་སྒྲིག་བྱས་ཡོད་པ་དང་ཁྱོན་བྱ་དགའི་དངུལ་འབོར་སྒོར་ཁྲི་བརྒྱ་ལས་བརྒལ་ཡོད། དེ་དང་ཆབས་ཅིག ལྷོ་ཁ་གྲོང་ཁྱེར་ཡུལ་སྐོར་སྡེ་ཚན་གྱིས་ལྗོངས་ཕྱི་ནང་གི་ཡུལ་སྐོར་ཚོང་པ་མང་པོ་དང་ཡུལ་སྐོར་བའི་འགྲུལ་ཁུངས་ཁྲོམ་ར་གསར་སྤེལ་དང་མཉམ་ལས་ཀྱི་གན་རྒྱ་བཞག་ནས་ལྷོ་ཁའི་ཡུལ་སྐོར“ཕྱིར་བསྐྱོད་པ”དང་ལྗོངས་ཕྱིའི་ཡུལ་སྐོར་བ“ལྷོ་ཁར་ཡོང་བར”སྐུལ་འདེད་ཧུར་ཐག་བཏང་བ་རེད།