ལྷ་ས་གྲོང་ཁྱེར་ནགས་ཚལ་དང་རྩྭ་ཐང་ཅུས་ཀྱིས།
རང་སའི་ཤིང་རིགས་ཀྱི་སོན་བཟང་འཚོལ་བསྡུ་བྱས་པ།
རང་སའི་ཤིང་རིགས་ཀྱི་སོན་བཟང་འཚོལ་བསྡུ་དང་ཉར་ཚགས་ཀྱི་ལས་དོན་ཡག་པོ་བསྒྲུབས་ནས་རང་སའི་ཤིང་རིགས་ཀྱི་སོན་རྒྱུའི་ཐོན་ཁུངས་མཐིལ་རྟོགས་བྱས་ཏེ་སོན་བཟང་གི་འབྱུང་ཁུངས་ལ་སྲུང་སྐྱོང་དང་བེད་སྤྱོད་ལ་སྔར་བས་སྐུལ་འདེད་བཏང་སྟེ་ནགས་བཟོའི་ལྗོན་ཤིང་གསོན་ཚད་མཐོ་རུ་གཏོང་ཆེད། ཉེ་ཆར། ལྷ་ས་གྲོང་ཁྱེར་ནགས་ཚལ་དང་རྩ་ཐང་ཅུས་ལྟེ་བའི་སྡོང་ཕྲུག་ར་བས་ལྗོན་ཤིང་འདེབས་འཛུགས་ཀྱི་དུས་ཚོད་ཡག་ཤོས་ལ་དམ་འཛིན་བྱས་ནས་དུས་ཡུན་ཉིན་3ནང་ཆེད་ལས་ལག་རྩལ་པ་སྒྲིག་འཛུགས་བྱས་ཏེ་ལྷ་ས་གྲོང་ཁྱེར་ཁྲེང་ཀོན་ཆུས་ཉེ་འཁོར་དུ་སོན་བཟང་གི་ཐོན་ཁུངས་ལ་ས་གནས་ས་ཐོག་ཏུ་ལྟ་ཞིབ་དང་སོན་བསྡུའི་ལས་དོན་སྤེལ་ཏེ་སེ་བ་སོགས་རང་སའི་རྩི་ཤིང་གི་སོན་བཟང་རྒྱ་མ་60ཙམ་བསྡུས་ཡོད།
ལྷ་སའི་རང་བྱུང་ས་གཤིས་ཀྱི་ཆ་རྐྱེན་ལ་གཞིགས་ན། ལྷ་སའི་ཉེ་འཁོར་གྱི་རི་ཁུལ་དུ་སྐྱེས་པའི་སེ་བ་སོགས་རྩི་ཤིང་ལ་མཐུན་འཕྲོད་རང་བཞིན་ཆེ་བ་དང་། བདག་སྐྱོང་མ་གནས་དམའ་བ་སོགས་ཀྱི་ལེགས་ཆ་ལྡན་པས། རང་སའི་ཤིང་རིགས་ཀྱི་སོན་བཟང་ཁོངས་སུ་གཏོགས་ཀྱི་ཡོད། ལྷ་ས་གྲོང་ཁྱེར་ནགས་ཚལ་དང་རྩྭ་ཐང་ཅུས་ལྟེ་བའི་སྡོང་ཕྲུག་ར་བའི་ལས་དོན་པས་ས་གནས་ས་ཐོག་ཏུ་ཞིབ་བཤེར་བྱས་ཏེ་སོན་རྒྱུའི་ཐོན་ཁུངས་ལ་མཐིལ་རྟོགས་བྱས་ནས་འཚོལ་བསྡུའི་ལས་དོན་ལ་རྨང་གཞི་ཡག་པོ་བཏིང་བ་རེད། ས་བོན་གྱི་སྤུས་ཚད་ལ་འགན་ལེན་བྱ་ཆེད། འཚོལ་བསྡུའི་མི་སྣས་སྐྱེ་སྟོབས་ཆེ་བ་དང་། སྡོང་ལག་རྒྱས་པ། གནོད་འབུའི་གནོད་འཚེ་མེད་པ་བཅས་ཀྱི་མ་སྡོང་བདམས་ནས་སྔོན་ལ་མ་སྡོང་ལ་སྲུང་སྐྱོང་བྱེད་པའི་རྩ་དོན་གཞིར་བཟུང་འཚོལ་བསྡུ་བྱེད་ཐབས་ཡང་དག་སྤྱད་དེ་ས་བོན་འཚོལ་བསྡུའི་སྤུས་ཚད་ཀྱི་འགག་སྒོ་ནན་པོར་སྲུང་པ་རེད། གསོག་ཉར་ཚན་རིག་དང་མཐུན་པར་བྱས་ཏེ་ས་བོན་གྱི་སྤུས་ཀར་འགན་ལེན་ཏན་ཏིག་བྱེད་པ་དང་། སྔོག་འཐུ་བྱས་པའི་ས་བོན་གཙང་མར་བཀྲུས་རྗེས་སྐམ་ཤས་ཆེ་བ་དང་། བརླན་བཤེར་ཆུང་ལ་དྲོད་ཚད་དམའ་བ། གསོ་རླུང་ཉུང་བའི་བསིལ་ཞིང་སྐམ་ཤས་ཆེ་བའི་ཁོར་ཡུག་ཏུ་ཉར་ཚགས་བྱས་ནས། ཟད་གྲོན་ཆུང་དུ་གཏོང་གང་ཐུབ་བྱས་ཏེ་ས་བོན་གྱི་སྤུས་ཚད་ལ་འགན་ལེན་ཏན་ཏིག་བྱེད་ཀྱི་ཡོད།
གོམ་སྟབས་རྗེས་མར། ལྷ་ས་གྲོང་ཁྱེར་ནགས་ཚལ་དང་རྩྭ་ཐང་ཅུས་ལྟེ་བའི་སྡོང་ཕྲུག་ར་བས་རང་སའི་ཤིང་རིགས་ཀྱི་སོན་བཟང་འདེབས་འཛུགས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་རྣམ་གྲངས་ལ་སྐུལ་འདེད་གཏོང་བ་དང་བསྟུན་ནས་རང་སའི་ཤིང་རིགས་ཀྱི་སོན་བཟང་འདེབས་གསོ་བྱེད་ཤུགས་ཆེ་རུ་བཏང་སྟེ། རང་སའི་ཤིང་རིགས་ཀྱི་སོན་བཟང་གསོ་སྤེལ་དང་། ཁྱབ་གདལ། བེད་སྤྱོད་བཅས་ཀྱི་ཚན་རྩལ་འདེགས་སྐྱོར་ནུས་པ་ཆེ་རུ་དང་ཆུ་ཚད་མཐོ་རུ་གཏོང་བ་དང་། ལྷ་སའི་ལྷོ་བྱང་རི་བོའི་སྔོ་འགྱུར་ལས་གྲྭར་སྤུས་ལེགས་ཀྱི་སྡོང་ཕྲུག་མཁོ་འདོན་བྱས་ནས་ལྗོན་ཤིང་གི་གྲུབ་ཆ་སྔར་བས་ལེགས་སུ་དང་ནགས་བཟོའི་གསོན་ཤུགས་འཕེལ་བར་བྱེད་རྒྱུ་རེད།