ད་ལོའི་ལོ་སྟོད་དུ་རང་སྐྱོང་ལྗོངས་ཆུ་བེད་ཐིང་གིས་དུས་སྐབས་གསར་པའི་ཆུ་བཅོས་སྐྱོང་གི་བསམ་བློ་དོན་འཁྱོལ་གཏིང་ཟབ་བྱས་ཤིང་། ཆུ་བེད་སྒྱུར་བཅོས་དང་འཕེལ་རྒྱས་ཀྱི་རྩ་བའི་དགོངས་གཞི་ལག་བསྟར་ཧུར་ཐག་བྱས་ཏེ་རང་ལྗོངས་ཀྱི་ཆུ་བེད་སྒྱུར་བཅོས་དང་འཕེལ་རྒྱས་མགྱོགས་སུ་འགྲོ་བར་སྐུལ་འདེད་བཏང་བས། ཆུའི་ཐོན་ཁུངས་ལ་དོ་དམ་ནན་ཤོས་དང་། ས་ཆུ་སྲུང་འཛིན། ཆུ་བོ་དང་མཚོར་དོ་དམ་སོགས་ཀྱི་ལས་དོན་ཁག་དུས་བཀག་ལྟར་ལེགས་གྲུབ་བྱུང་ཡོད།

རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་པར་མགྱོགས་མྱུར་སྐུལ་འདེད་གཏོང་བ་དང་། མཛེས་སྡུག་དང་བདེ་སྐྱིད་ལྡན་པའི་བོད་ལྗོངས་འཛུགས་སྐྲུན། མི་དམངས་མང་ཚོགས་ལ་འཚོ་སྡོད་ཀྱི་ཁོར་ཡུག་བཟང་པོ་མཁོ་འདོན་བཅས་བྱ་ཆེད། རང་སྐྱོང་ལྗོངས་ཆུ་བེད་ཐིང་གིས་ལས་ཀའི་འགན་འཁྲི་དོན་འཁྱོལ་ནན་པོ་བྱས་ནས་གོ་རིམ་ལྡན་པའི་ངང་ལས་དོན་ཁག་ལ་སྐུལ་འདེད་བཏང་བ་རེད།

ཆུའི་ཐོན་ཁུངས་དོ་དམ་ནན་ཤོས་ལ་མུ་མཐུད་ཤུགས་སྣོན་བརྒྱབ་ཅིང་། རང་སྐྱོང་ལྗོངས་ཀྱི་རིམ་པ་དེ་གའི་2022ལོ་འཁོར་གྱི་ཆུའི་ཐོན་ཁུངས་དོ་དམ་ལམ་ལུགས་ནན་ཤོས་ཀྱི་དཔྱད་ཞིབ་རང་བཤེར་སྙན་ཞུ་ལེགས་སྒྲུབ་བྱས་པ་དང་རང་སྐྱོང་ལྗོངས་མི་དམངས་སྲིད་གཞུང་གིས་ཞིབ་བཤེར་བྱས་ནས་རྒྱལ་སྲིད་སྤྱི་ཁྱབ་ཁང་ལ་ཕུལ་བར་དཔྱད་འབྲས་ཡག་པོ་བྱུང་བ་དང་། རང་སྐྱོང་ལྗོངས་རིམ་པ་དེ་གའི་2023ལོ་འཁོར་གྱི་ཆུ་ལེན་ཆོག་འཐུས་དང་འཛུགས་སྐྲུན་རྣམ་གྲངས་ཀྱི་ཆུའི་ཐོན་ཁུངས་ཀྱི་རིགས་པས་ཁུངས་སྐྱེལ་ལག་རྩལ་ཞིབ་དཔྱད་བྱས་ནས་ཆུ་ལེན་ཆོག་འཐུས་ཞིབ་མཆན་དང་ལྟ་སྐུལ་དོ་དམ་སྔར་བས་ཚད་ལྡན་དུ་བཏང་ཁར། གྲོན་ཆུང་ངང་ཆུ་སྤྱོད་པའི་ལས་དོན་ལ་མུ་མཐུད་སྐུལ་འདེད་བཏང་ནས་རང་ལྗོངས་ཀྱི་ཆུའི་ཐོན་ཁུངས་བེད་སྤྱོད་ཀྱི་ལས་ཕྱོད་དང་ཕན་འབྲས་ཆེ་རུ་ཧུར་ཐག་བཏང་བ་རེད། མེ་ཏོག་དང་ཟངས་རི། ལྷུན་གྲུབ་བཅས་རྫོང་3གྱི་རྫོང་ཁོངས་ཀྱི་ཆུ་གྲོན་ཆུང་རྣམ་པའི་སྤྱི་ཚོགས་ཀྱི་ཚད་ལོན་འཛུགས་སྐྱོང་ལ་གཙོ་གནད་ཐོག་སྐུལ་འདེད་བཏང་ཞིང་། བོད་ལྗོངས་ཉེན་རྟོག་མཐོ་རིམ་ཆེད་ཚན་སློབ་གྲྭ་དང་། ལྷ་ས་དགེ་འོས་མཐོ་རིམ་ཆེད་ཚན་སློབ་གྲྭ། ཆབ་མདོ་ལས་རིགས་སློབ་གྲྭ་བཅས་ཆུ་གྲོན་ཆུང་རྣམ་པའི་མཐོ་སློབ་3བསྐྲུན་རྒྱུར་སྐུལ་འདེད་བཏང་ཡོད།

སྐྱེ་ཁམས་ཆུ་རྒྱུན་གྱི་ལྟ་ཞིབ་ཚད་ལེན་ལ་མུ་མཐུད་སྐུལ་འདེད་བཏང་ཞིང་། སྐྱེ་ཁམས་ཆུ་རྒྱུན་ལྟ་ཞིབ་ཚད་ལེན་གྱི་སྔོན་བརྡ་དང་དོ་དམ་ཚོད་འཛིན་གྱི་ལམ་སྲོལ་ཧུར་ཐག་གིས་བཙུགས་ནས་ལྷ་ས་སྐྱིད་ཆུ་དང་། མྱང་ཆུ། ཉང་ཆུ། ཡར་ཀླུང་གཙང་པོ་བཅས་ཀྱི་སྐྱེ་ཁམས་ཆུ་རྒྱུན་གྱི་ལྟ་ཞིབ་ཚད་ལེན་ལས་དོན་རྒྱུན་རྣམ་ངང་ཡག་པོ་བསྒྲུབས་པ་དང་། བོད་ཀྱི་གཙོ་གནད་གཙང་པོ་དང་། ཆུ་བོ་དང་མཚེའུ། ས་ངོས་ཆུའི་རྒྱལ་ཁབ་ཀྱི་གཙོ་གནད་ཆུ་སྤུས་ས་ཚིགས། རྒྱལ་ཁབ་ཀྱི་འཐུང་ཆུའི་ཆུ་འགོ་གལ་ཆེན་སོགས་ཆུ་སྤུས་ས་ཚིགས་101གི་ཆུའི་སྤུས་ཚད་ལྟ་ཞིབ་ཚད་ལེན་ལས་དོན་སྤེལ་ནས། རང་ལྗོངས་ཀྱི་ཆུའི་སྐྱེ་ཁམས་ཁོར་ཡུག་གི་སྤུས་ཚད་འགན་ལེན་དང་མཐོ་རུ་གཏོང་ཆེད་གཡས་གཞོགས་གཡོན་འདེགས་བྱས་པ་རེད།

ས་ཆུ་སྲུང་འཛིན་གྱི་སྐྱེ་ཁམས་རྣམ་གྲངས་བཅོས་སྐྱོང་ལ་མུ་མཐུད་སྐུལ་འདེད་བཏང་ཞིང་། ས་ཆུ་སྲུང་འཛིན་གྱི་སྐྱེ་ཁམས་འཛུགས་སྐྲུན་རྣམ་གྲངས་ལག་བསྟར་ཤུགས་ཆེན་བྱས་ནས་རང་ལྗོངས་ཀྱི་ས་ཆུ་ཤོར་བའི་གནད་དོན་བཀག་འགོག་ནུས་ལྡན་བྱས་ཡོད། ཟླ་6པའི་ཟླ་མཇུག་བར་མ་དངུལ་སྒོར་དུང་ཕྱུར་1.17ལྷག་ཙམ་བཏང་སྟེ་ས་ཆུ་ཤོར་ཁྱོན་སྤྱི་ལེ་ངོས་གྲུ་252.7བཅོས་སྒྲིག་བྱས་ཤིང་། ལྷ་སའི་ལྷོ་རི་བྱང་རིའི་སྔོ་འགྱུར་ནགས་བཟོ་འགན་གཙང་འགན་ལེན་ལས་དོན་ལ་མུ་མཐུད་སྐུལ་འདེད་བཏང་བ་དང་ཆེད་དོན་ཚན་ཁག་བཙུགས་ཏེ། ནགས་བཟོ་འགན་གཙང་ལེན་མཁན་གྱི་ཁེ་ལས་དང་འབྲེལ་གཏུག་མཐུན་སྦྱོར་ལ་ཤུགས་སྣོན་བརྒྱབ་པ་དང་། འགན་གཙང་བླངས་པའི་ནགས་བཟོའི་ལས་དོན་གྱི་འཕེལ་རིམ་ལ་རྒྱུནམཐུད་རྗེས་སྙེགས་ཀྱིས་ལྷ་སའི་མཐའ་འཁོར་གྱི་སྐྱེ་ཁམས་ཁོར་ཡུག་དང་འཚོ་སྡོད་ཁོར་ཡུག་ལེགས་སུ་གཏོང་ཆེད་རང་འགན་གཙང་སྒྲུབ་བྱས་ཡོད།

2023ལོའི་རང་སྐྱོང་ལྗོངས་ཀྱི་རིམ་པ་དེ་གའི་ས་ཆུ་ཤོར་ཚུལ་གྱི་འགུལ་རྣམ་ལྟ་ཞིབ་ཚད་ལེན་ལས་དོན་ཕྱོགས་ཡོངས་ནས་སྤེལ་ཏེ་རྒྱུན་རྣམ་ཅན་གྱི་ལྟ་ཞིབ་ཚད་ལེན་བྱེད་ནུས་ཆེ་རུ་བཏང་ཡོད། ཟླ་6པའི་ཟླ་མཇུག་བར་རྫོང་དང་ཆུས་49ཡི་རྒྱང་ཚོར་བརྙན་ཕབ་འདེམས་པའི་ལས་དོན་ལེགས་སྒྲུབ་བྱས་པ་དང་དུས་གཅིག་ཏུ་རྫོང་དང་ཆུས་32ཀྱི་རྒྱང་ཚོར་བརྙན་ཕབ་འགྲེལ་བཤད་དང་ཆེད་དོན་ཆ་འཕྲིན་ལེན་པའི་ལས་དོན་སྤེལ་ཞིང་། 2023ལོ་འཁོར་གྱི་ཐོན་སྐྱེད་འཛུགས་སྐྲུན་རྣམ་གྲངས་དང་རྒྱལ་ཁབ་ཀྱི་ས་ཆུ་སྲུང་འཛིན་གྱི་གཙོ་གནད་ལས་གྲྭ་ལག་བསྟར་བྱས་ཚུལ་གྱི་ས་གནས་ས་ཐོག་གི་ལྟ་སྐུལ་ཞིབ་བཤེར་ཆ་འཕྲིན་ཅན་གྱི་བཀོལ་སྤྱོད་བྱས་པ་རེད། ཟླ་6པའི་ཟླ་མཇུག་བར་ཐོན་སྐྱེད་འཛུགས་སྐྲུན་རྣམ་གྲངས་5དང་རྒྱལ་ཁབ་ཀྱི་ས་ཆུ་སྲུང་འཛིན་གྱི་གཙོ་གནད་ལས་གྲྭ་1ལག་བསྟར་བྱས་ཚུལ་གྱི་ལྟ་སྐུལ་ཞིབ་བཤེར་ཆ་འཕྲིན་ཅན་གྱི་བཀོལ་སྤྱོད་བྱས་ཡོད།

ཆུ་བོ་དང་མཚོར་དོ་དམ་དང་། བདེ་སྐྱིད་ཆུ་བོ་དང་མཚོའི་འཛུགས་སྐྲུན་ལ་མུ་མཐུད་ཤུགས་སྣོན་བརྒྱབ་ཅིང་། རང་སྐྱོང་ལྗོངས་ཀྱི་ཆུ་དང་མཚོའི་སྤྱི་དཔོན་གྱིས《བོད་རང་སྐྱོང་ལྗོངས་ཀྱི་2023ལོའི་ཆུ་དཔོན་དང་མཚོ་དཔོན་ལམ་ལུགས་ཀྱི་ལས་ཀའི་གཙོ་གནད》ལ་ཐུན་མོང་ཐོག་མིང་རྟགས་བཀོད་དེ། 2023ལོའི་ལྗོངས་ཡོངས་ཀྱི་ཆུ་དཔོན་དང་མཚོ་དཔོན་ལམ་ལུགས་ཀྱི་གཙོ་གནད་ལས་དོན་དང་དམིགས་ཚད་ལས་འགན་ཕྱོགས་ཡོངས་ནས་བཀོད་སྒྲིག་བྱས་ཏེ་ལས་འགན་ཁག་གི་འགན་འཁྲིའི་ཚན་པ་ཁ་གསལ་བཟོས་པ་དང་། ཆུ་བོ་དང་མཚོའི“གང་བྱུང་བཞི་གཙང་སེལ”རྒྱུན་རྣམ་ཅན་དང་ཚད་ལྡན་ཅན་ལ་མུ་མཐུད་སྐུལ་འདེད་བཏང་སྟེ། གྲོང་ཁྱེར་དང་ས་ཁུལ་ཁག་གིས་ཆུ་བོ་དང་མཚོའི“གང་བྱུང་བཞི་གཙང་སེལ”གྱི་རང་བཤེར་རང་བཅོས་ལས་དོན་མུ་མཐུད་སྤེལ་ནས་ཆུ་བོ་དང་མཚོའི་སྐྱེ་ཁམས་ཁོར་ཡུག་བཟང་པོ་སྲུང་སྐྱོང་ཧུར་ཐག་བྱེད་པ་དང་། འབྲི་ཆུ་དང་རྒྱལ་མོ་རྔུལ་ཆུའི་ཆུ་འགོ་དང་ཆུ་བོ་གཅིག་ལ་ཇུས་གཞི་གཅིག་དང་། ཆུ་བོ་གཅིག་ལ་ཡིག་ཚཌ་གཅིག བདེ་ཐང་གདེང་འཇོག དོ་དམ་ཁྱབ་ཁོངས་དབྱེ་བ། མཚོ་རྒྱུད་སྲུང་སྐྱོབ་དང་བེད་སྤྱོད་འཆར་འགོད་སོགས་ཀྱི་རྨང་གཞིའི་དཔྱད་ཡིག་བཟོ་བཅོས་དང་འཐུས་སྒོ་ཚང་དུ་བཏང་ནས་རང་ལྗོངས་ཀྱི་གཙང་པོ་དང་ཆུ་བོའི་ཆུ་འགོ་སྲུང་སྐྱོབ་ལ་རྨང་གཞི་བརྟན་པོ་ཞིག་བཏིང་བ་རེད།

དེ་དང་ཆབས་ཅིག་ཆུ་ལམ་གྱི་བྱེ་མ་སྔོག་འདོན་དོ་དམ་བྱ་ཐབས་ལ་དམ་འཛིན་བྱས་ཏེ་ཆུ་ལམ་དོ་དམ་ཁྱབ་ཁོངས་ཁྲོད་འཛུགས་སྐྲུན་རྣམ་གྲངས་དོ་དམ་བྱ་ཐབས་སོགས་ཀྱི་ལམ་ལུགས་བཟོས་ནས་ཆུ་བོ་དང་མཚོར་དོ་དམ་སྲུང་སྐྱོང་ལས་དོན་གྱི་ཆུ་ཚད་ཟམ་མི་ཆད་པར་མཐོ་རུ་བཏང་ཡོད། ཆུ་ལམ་གྱི་བྱེ་འདོན་གློག་རྡུལ་ལག་ཁྱེར་ཁྱོན་ཡོངས་ནས་སྤྱོད་འགོ་ཚུགས་ཤིང་། ལྗོངས་ཡོངས་ཀྱི་གྲོང་ཁྱེར་དང་ས་ཁུལ་7གྱིས་ལས་སྟེགས་ཚད་ལེན་ཚོད་ལྟའི་ལས་དོན་ལེགས་སྒྲུབ་བྱས་པ་དང་བྱེ་འདོན་ལག་ཁྱེར་122ཀྱི་ཆ་འཕྲིན་ཕབ་འཇུག་བྱས་ཡོད། བདེ་སྐྱིད་ཆུ་བོ་དང་མཚོའི་འཛུགས་སྐྲུན་ལ་ཤུགས་སྣོན་རྒྱག་པ་དང་། ཆུ་བོ་དང་མཚོའི་གདེང་འཇོག་དང་བདེ་ཐང་ཡིག་ཚགས་བཟོ་བའི་ལས་དོན་ཕྱོགས་ཡོངས་ནས་སྤེལ་ཏེ་གདེང་འཇོག་ཁྱབ་ཁོངས་དང་། གདེང་འཇོག་བྱེད་པོ། ལས་ཀའི་འཕེལ་རིམ་བཅས་ཁ་གསལ་བཟོས་པ་རེད། མིག་སྔར་བདེ་སྐྱིད་ཆུ་བོ་དང་མཚོ་10བསྐྲུན་ཟིན་པ་མ་ཟད། རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་རྒྱུར་མུ་མཐུད་སྐུལ་འདེད་གཏོང་བཞིན་ཡོད་པ་རེད།