ཚེས་21ཉིན་གྱི་སྔ་དྲོར། གསར་འགོད་པས་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་དོན་ཁང་གིས་འཚོགས་པའི་ལྷ་སའི་ལྷོ་རི་བྱང་རིའི་སྔོ་འགྱུར་དང“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་སྤྱི་ཕན་རྣམ་གྲངས་ཀྱི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར། 2022ལོའི་ཟླ་8པར“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་ལྷ་སའི་ལྷོ་རི་བྱང་རིའི་སྔོ་འགྱུར་གྱི་སྤྱི་ཕན་རྣམ་གྲངས་ལག་བསྟར་བྱས་པ་ནས་བཟུང་སྤྱི་ཚོགས་ལས་རིགས་ཁག་གིས་དོ་ཁུར་དང་རྒྱབ་སྐྱོར་ཐོབ་ལ། ཞུགས་མཁན་ཡང་མང་པོ་ཡོད། མིག་སྔར་ཞལ་འདེབས་དངུལ་སྒོར་ཁྲི་5100ལྷག་ཙམ་གྲབས་གསོག་བྱས་པ་དང་རིམ་རྩིས་བྱས་ན་སྡོང་ཕྲུག་ཁྲི་133ལྷག་ཙམ་ཞལ་འདེབས་བརྒྱབ་ཡོད་ཅིང་། མང་ཚོགས་རྣམ་གྲངས་ནང་ཞུགས་པ་ལས་ཡོང་འབབ་མངོན་གསལ་དོད་པོས་མང་དུ་ཕྱིན་ཡོད།

སྤྱི་ཕན་རྣམ་གྲངས་ལག་བསྟར་བྱས་ཚུན། ལྷ་ས་དང་། ལྷོ་ཁ། གཞིས་རྩེ་སོགས་གྲོང་ཁྱེར་གྱི་རིམ་ཁག་སྲིད་གཞུང་གིས་ངལ་ནུས་ཕྱིར་གཏོང་སྒྲིག་འཛུགས་ཧུར་ཐག་བྱས་ཤིང་། ཞིང་འབྲོག་པ་མང་ཚོགས་ལ་ཁྲིད་སྟོན་བྱས་ཏེ་ལྷོ་རི་བྱང་རིའི་ནགས་བཟོ་སྔོ་འགྱུར་རྣམ་གྲངས་ཀྱི་ས་ཁོད་སྙོམས་པ་དང་། སྡོང་ཕྲུག་འདེབས་འཛུགས། བདག་སྐྱོང་སོགས་ཀྱི་ལས་དོན་ནང་ཞུགས་ཡོད། མིག་སྔའི་བར་ལྷོ་རི་བྱང་རིའི་སྔོ་འགྱུར་ནང་ཞུགས་མཁན་མི་ཐེངས་ཁྲི་330ཟིན་ནས་མང་ཚོགས་ལ་འབབ་འཕར་སྒོར་དུང་ཕྱུར་10བྱུང་ཡོད། དེ་དང་ཆབས་ཅིག་ཞིང་འབྲོག་པས་ད་དུང་ས་གནས་རང་གི་ཤིང་སྣ་འདེབས་འཛུགས་དང་སྡོང་ཕྲུག་ཕྱིར་ཚོང་སོགས་ཀྱི་བྱེད་ཐབས་བརྒྱུད་འབབ་འཕར་ཕྱུག་འགྱུར་བྱུང་ཡོད།

ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭ་འཛུགས་སྐྲུན་གྱི་ཁྱབ་ཁོངས་ལྷ་ས་གྲོང་ཁྱེར་ཁྲེང་ཀོན་དང་། སྣེའུ་ཁུལ་གསར། སྟོད་ལུང་བདེ་ཆེན། སྟག་རྩེ། ཆུ་ཤུར། མལ་གྲོ་གུང་དཀར། ལྷུན་གྲུབ་བཅས་དང་དེ་བཞིན་ལྷོ་ཁ་གྲོང་ཁྱེར་སྣ་དཀར་རྩེ་དང་གོང་དཀར་སོགས་རྫོང(ཆུས)9ཡི་ཤང་དང་གྲོང་རྡལ་35ལ་ཁྱབ་ཡོད། ལས་གྲྭའི་འཆར་འགོད་དུས་ཡུན་ལོ་10(2021ལོ་ནས་2030ལོའི་བར)ཡིན་པ་དང་། ནགས་ཚལ་མུའུ་ཁྲི་206.72འཛུགས་རྒྱུ་དང་ནགས་ཚལ་མུའུ་ཁྲི་2.26གི་སྤུས་ཚད་མཐོར་གཏོང་དང་ཕན་འབྲས་ཆེ་རུ་གཏོང་རྩིས་ཡོད་པ་རེད། ལས་གྲྭ་ལག་བསྟར་བྱས་ནས་ལོ་གཉིས་སོང་རིང་རིམ་རྩིས་བྱས་ན་སྡོང་ཕྲུག་སྣ་ཚོགས་ཁྲི་4700ལྷག་ཙམ་བཙུགས་ནས་མུའུ་ཁྲི་35.31གི་ནགས་བཟོའི་ལས་འགན་ལེགས་སྒྲུབ་བྱས་པའི་ནང་2022ལོར་མུའུ་ཁྲི་19.18ཀྱི་ནགས་བཟོའི་ལས་འགན་ཚང་མ་ལེགས་སྒྲུབ་བྱས་པ་དང་། 2023ལོར་ནགས་བཟོ་མུའུ་ཁྲི་16.13བྱས་པ་དེས་ལོ་འཁོར་གྱི་འཆར་གཞིའི་ལས་འགན་གྱི་90%ཙམ་བཟུང་ཡོད།

རང་སྐྱོང་ལྗོངས་ནགས་ཚལ་དང་རྩྭ་ཐང་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན།“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་སྤྱི་ཕན་རྣམ་གྲངས་སྤེལ་ཚུན། བོད་ཀྱི་དགེ་སྒྲུབ་སྤྱི་ཁྱབ་ཚོགས་པས་བོད་སྐྱོར་ཞིང་ཆེན(གྲོང་ཁྱེར)17སོགས་དང་མཉམ་འགུལ་ཧུར་ཐག་བྱས་ནས་ས་གནས་ཁག་ཏུ་ཡོངས་བསྒྲགས་ངང་ཞལ་འདེབས་བསྡུ་བའི་བྱེད་སྒོ་སྤེལ་ཡོད། བརྡ་ཁྱབ་བྱང་བུ་དང་LEDབརྙན་ཤེལ་སོགས་བརྒྱུད“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་སྤྱི་ཕན་བྱེད་སྒོ་དྲིལ་བསྒྲགས་དང་ཁྱབ་གདལ་ཧུར་ཐག་བཏང་ནས་མི་ཚང་མས་སེམས་ཁུར་དང་། མི་ཚང་མས་རྒྱབ་སྐྱོར། མི་ཚང་མ་རྒྱལ་ཁབ་ཀྱི་ས་ཆ་སྔོ་འགྱུར་ནང་ཞུགས་པ་བཅས་ཀྱི་རྣམ་པ་བཟང་པོ་ཞིག་བཏོད་ཡོད། དེ་དང་ཆབས་ཅིག་སྤྱི་ཚོགས་ཡོངས་ཀྱིས་དངུལ་དང་དངོས་པོ་ཞལ་འདེབས་བརྒྱབ་ནས་ལྷ་སའི་ལྷོ་རི་བྱང་རིའི་སྔོ་འགྱུར་ནང་ཞུགས་རྒྱུར་སྐུལ་ལྕག་བྱས་ཏེ“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་ཞལ་འདེབས་ལས་སྟེགས་བཏོད་དེ་རིམ་པ་མང་བ་དང་ཐབས་ལམ་མང་པོར་བརྟེན་ནས་ལྷོ་རི་བྱང་རིའི་སྔོ་འགྱུར་ལས་དོན་དྲིལ་བསྒྲགས་བྱས་པ་དང་། དྲ་ཐོག་དང་དྲ་ཕྱི་ཟུང་འབྲེལ་གྱིས་མ་དངུལ་བསྡུ་སྒྲིལ་གྱི་ཐབས་ལམ་སྣ་ཚོགས་ཕྱོགས་བསྡུས་བེད་སྤྱོད་བྱས་ཏེ་ལྷོ་རི་བྱང་རིའི་སྔོ་འགྱུར་གྱི་ཆེད་དོན་མ་དངུལ་གྲབས་གསོག་བྱེད་སྟངས་ཕུན་སུམ་ཚོགས་སུ་བཏང་ཡོད།

གོམ་སྟབས་རྗེས་མར“སྔོ་ལྗང་གི་ཡུལ་ལྗོངས”ཞེས་པ་བརྗོད་དོན་གཙོ་བོར་བྱས་ནས“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་སྤྱི་ཕན་རྣམ་གྲངས་ནང་དམངས་ཡོངས་ཞུགས་པའི་རྣམ་པ་ཞིག་བཏོད་དེ་ཚང་མ་ལྷ་སའི་ལྷོ་རི་བྱང་རིའི་སྔོ་འགྱུར་ནང་མཉམ་དུ་ཞུགས་པ་དང་བོད་ཀྱི་སྐྱེ་ཁམས་སྲུང་སྐྱོང་གི་བྱ་སྤྱོད་ནང་ཞུགས་རྒྱུའི་འབོད་སྐུལ་བྱེད་པ་དང་། ལྷ་ས་གྲོང་ཁྱེར“ལྷོ་རི་བྱང་རི་སྔོ་ལྗང་དུ་འགྱུར་བ་དང་དྭངས་ཤིང་གཙང་བའི་ཆུ་བོས་གནའ་གྲོང་སྐོར་བའི”སྐྱེ་ཁམས་སྡོད་མལ་ལ་འཚམ་པའི་ས་མཐོའི་ལྟེ་བའི་གྲོང་ཁྱེར་དུ་བསྐྲུན་ནས། “ལོ་ལྔའི་ནང་རི་ཀླུང་སྔོ་ལྗང་གིས་བཀླུབས་པ་དང་ལོ་བཅུའི་ནང་ལྷ་སར་སྔོ་ལྗང་གིས་ཁེངས་པའི”དམིགས་ཚད་མངོན་འགྱུར་བྱས་ཏེ། ས་གཞི་ཡོངས་སྔོ་ལྗང་གིས་ཁེངས་པ་དང་དུས་བཞི་ཚང་མར་སྔོ་ཐིང་ངེར་གནས་པ་ལྷ་སའི་མཛེས་སྡུག་ལྡན་པའི་རང་མདངས་སུ་འགྱུར་བར་བྱ་རྒྱུ་རེད།