ལྷོ་རིའི་སྤྱི་གླིང་ནི་ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་ཆ་ཤས་ཤིག་ཡིན་ཞིང་། དེ་ནི་ལྷ་སའི་རོང་ཁུལ་གྱི་གཞི་ཁྱོན་ཅན་གྱི་སྐྱེ་ཁམས་འཛུགས་སྐྱོང་དང་བསྐྱར་གསོའི་ཚབ་མཚོན་རང་བཞིན་གྱི་ལས་གྲྭ་ཐོག་མ་དེ་ཡིན་པ་དང་། ཤིང་འཛུགས་ནགས་བཟོ་བྱས་པ་བརྒྱུད་སྔོན་ཆད་ཀྱི་རི་རྒོད་དེ་ད་ཆ་གྲོང་མིས་ཡུལ་སྐོར་དང་སྤྲོ་གསེང་དུ་འགྲོ་བའི་གནས་ཡག་པོ་ཞིག་ཏུ་གྱུར་ཡོད།

ཀྲུང་གོ་ལྕགས་ལམ་ཅུས་ཉེར་གཅིག་པའི་ཀུང་སི་བཞི་པའི་བོད་ལྗོངས་ཡན་ལག་ཀུང་སིའི་ཅིང་ལི་ལིའུ་ཝུའེ་ཡིས། ལྷོ་རི་བྱང་རིའི་སྔོ་འགྱུར་ལས་གྲྭའི“སྔོན་སྐྱོད་པ”ཡིན་པའི་ཀྲུང་གོ་ལྕགས་ལམ་ཅུས་ཉེར་གཅིག་པའི་ལས་བྱེད་དང་ལས་བཟོས་དཀའ་ངལ་ཁྱད་བསད་ཀྱིས་ལམ་མེད་སར་ལམ་བཟོས་པ་དང་ཆུ་མེད་པའི་རི་རྒོད་དུ་ཆུ་འདྲེན་སྦུག་གུ་ཁྲིད་ནས། འཛུགས་སྐྲུན་ནང་ཞུགས་མཁན་གྱི་ལས་བཟོ་ཡོངས་ཀྱིས་ས་མཐོའི་རི་ཁུལ་ལ་ཆུ་འདྲེན་སྟངས་གསར་པ་འཚོལ་ཞིབ་དང་གསར་གཏོད་ཧུར་ཐག་བྱས་ཏེ། དུས་མཇུག་གི་སྡོང་ཕྲུག་འདེབས་འཛུགས་ལ་རྨང་གཞི་བརྟན་པོ་ཞིག་བཏིང་ཡོད་ཅེས་ཕྱིར་དྲན་བྱེད་བཞིན་དུ་བཤད།

ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭ་ལག་བསྟར་བྱས་ཚུན། རིམ་རྩིས་བྱས་ན་ལྗོན་ཤིང་ཁྲི་2300བཙུགས་པ་དང་ཉིན་ལྟར་ཆ་སྙོམས་མི་5000རི་འགོའི་སྔོ་འགྱུར་ལས་ཀའི་ནང་ཞུགས་ཀྱི་ཡོད། རང་སྐྱོང་ལྗོངས་ཀྱིས་ཡོངས་བསྒྲགས་བྱས་པའི《ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་སྤྱིའི་འཆར་འགོད(2021ལོ་ནས་2030ལོ་བར)》ལ་གཞིགས་ན། ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭས་ལོ་10ཡི་ནང་ས་ཆ་མུའུ་ཁྲི་206.7ལ་ནགས་བཟོ་བྱེད་རྩིས་ཡོད་པ་དང་། 2030ལོར་སླེབས་སྐབས་གསར་དུ་འཕར་བའི་ནགས་བཟོའི་རྒྱ་ཁྱོན་དེ་ད་ཡོད་ཀྱི་ལྷོ་རིའི་སྔོ་འགྱུར་རྒྱ་ཁྱོན་གྱི་ལྡབ་600ཟིན་རྒྱུ་ཡིན་པ་རེད།

ཉེ་བའི་ལོ་ཤས་རིང་རང་ལྗོངས་ཀྱིས“རི་སྔོན་ཆུ་དྭངས་གསེར་དངུལ་རི་ལས་ལྷག་པ་དང་གངས་རི་འཁྱགས་ཀླུང་ཡིན་ཡང་གསེར་དངུལ་རི་ཡིན་པའི”འདུ་ཤེས་བརྟན་པོ་འཛུགས་རྒྱུ་ཐོག་མཐའ་བར་གསུམ་དུ་མཐའ་འཁྱོངས་ཀྱིས་རི་ཆུ་ནགས་ཞིང་མཚེའུ་རྩྭ་བྱེ་འཁྱགས་བཅས་གཞི་གཅིག་ཅན་གྱི་སྲུང་སྐྱོང་དང་བརྒྱུད་རིམ་ལྡན་པའི་བཅོས་སྐྱོང་ལ་སྤྱི་འདོམས་བྱས་ཏེ། སྐྱེ་ཁམས་སྔོན་འཇོག་དང་ལྗང་མདོག་འཕེལ་རྒྱས་ཀྱི་ལམ་བུར་བློ་བརྟན་འགྱུར་མེད་ངང་བསྐྱོད་དེ། དཔལ་འབྱོར་དང་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་ལ་བཀྲག་མདངས་གསར་པ་བསྣན་ཡོད།

2021ལོའི་ཟླ་5ཚེས་1ཉིན། 《བོད་རང་སྐྱོང་ལྗོངས་ཀྱི་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྱོང་སྲོལ་ཡིག》དངོས་སུ་ལག་བསྟར་བྱས་ཤིང་། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་ཐོག་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་ནུས་ཤུགས་ཡོད་རྒུས་འཛུགས་གཏོད་བྱས་ཏེ། སྐྱེ་ཁམས་ཤེས་དཔལ་འཛུགས་སྐྱོང་དེ་རྒྱལ་ཡོངས་ཀྱི་མདུན་གྲལ་དུ་སླེབས་པར་བྱེད་དགོས་ཞེས་བཏོན་ཡོད།

2022ལོར་བོད་ཀྱིས་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྱོང་སྲོལ་ཡིག་དོན་འཁྱོལ་ནན་པོ་བྱས་ཏེ། 《བོད་རང་སྐྱོང་ལྗོངས་ཀྱི་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་སྐྱོང་གི་འཆར་འགོད(2021ལོ་ནས་2035ལོའི་བར)》བཀྲམ་ནས་ལག་བསྟར་བྱས་ཏེ། ལོ་5ཡི་ལག་བསྟར་བསམ་འཆར་དང་ལོ་འཁོར་གྱི་ལས་ཀའི་ཇུས་གཞི་བཟོས་ནས། “སྲོལ་ཡིག་འགན་སྲུང་དུ་བྱེད་པ་དང་། འཆར་འགོད་དཔེ་གཞིར་བྱེད་པ། བསམ་འཆར་མཛུབ་ཁྲིད་དུ་བྱེད་པ། ཇུས་གཞི་ཐབས་ལམ་དུ་བྱེད་པ”བཅས་ཀྱི་མཐོ་ས་འཛུགས་གཏོད་ཀྱི“ཀ་བརྒྱད་དང་གདུང་བཞི”སྤྱིར་ན་གྲུབ་ཡོད།

ལོ་གཅིག་རིང་འབད་བརྩོན་བྱས་པ་བརྒྱུད། མཐོ་ས་འཛུགས་གཏོད་ཀྱི་རིགས་ཆེ་གྲས་དྲུག་གི་དམིགས་ཚད་ཁག་32ནང་རང་ལྗོངས་ཀྱི་དམིགས་ཚད་ཁག་11རྒྱལ་ཡོངས་ཀྱི་མདུན་གྲལ་དུ་སླེབས་ནས་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་ཀྱི་འགོ་ཡག་པོ་བཙུགས་ཡོད། སྐྱེ་ཁམས་ཤེས་དཔལ་གྱི་དཔེ་སྟོན་རིམ་གཉིས་འཛུགས་གཏོད་ནང་རང་ལྗོངས་སུ་རྒྱལ་ཁབ་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཁུལ་3དང་རྒྱལ་ཁབ་ཀྱི“རི་བོ་གཉིས”ཀྱི་རྟེན་གཞི་1གསར་དུ་འཕར་ཡོད་པ་དང་། རང་སྐྱོང་ལྗོངས་རིམ་པའི་སྐྱེ་ཁམས་ཤེས་དཔལ་དཔེ་སྟོན་ཁུལ་གྱི་ཁག་དང་པོའི་མིང་འདོགས་པ་དང་སྒོ་བྱང་སྤྲོད་པ་ལེགས་གྲུབ་བྱུང་ནས་སྐྱེ་ཁམས་ཤེས་དཔལ་དཔེ་སྟོན་ཁུལ་གྱི་ཁུལ་ཁོངས་ཧྲིལ་པོའི་དམངས་ཡོངས་ཀྱི་འཛུགས་གཏོད་ཀྱི་སྤྲོ་སེམས་རབ་ཏུ་འཕེལ་ཡོད།

དེ་དང་ཆབས་ཅིག་རང་ལྗོངས་ཀྱིས་སྐྱེ་ཁམས་བདེ་འཇགས་སྲུང་བཅད་འཛུགས་སྐྱོང་ལ་སྐུལ་འདེད་གཏིང་ཟབ་བཏང་སྟེ་དགུང་སྔོན་གནད་སྨིན་ངང་དོ་དམ་ཚོད་འཛིན་དང་། དྭངས་ཤིང་གཙང་བའི་ཆུ་བོར་བརྒྱུད་རིམ་ལྡན་པའི་ངང་བཅོས་སྐྱོང་། འབྱུང་རྩ་ནས་འགོག་བཅོས་བཅས་བྱས་ཏེ་ས་གཙང་སྲུང་སྐྱོང་བྱས་ཡོད། ལྗོངས་ཡོངས་ཀྱི་གྲོང་ཁྱེར་དང་གྲོང་རྡལ་གཙོ་བོའི་མཁའ་རླུང་གི་སྤུས་ཚད་ལེགས་པའི་ཉིན་གྲངས་ཀྱི་བསྡུར་གྲངས་99.9%ཟིན་ཞིང་། སྦགས་བཙོག་ཆེ་བ་དང་སྦགས་བཙོག་གི་གནམ་གཤིས་བསྟན་མེད་པ་དང་ལྷ་ས་གྲོང་ཁྱེར་གྱི་མཁའ་རླུང་གི་སྤུས་ཚད་ལེགས་ཚད་རྒྱལ་ཡོངས་ཀྱི་གཙོ་གནད་གྲོང་ཁྱེར་168ནང་ཨང་དང་པོར་སླེབས་ཡོད་པ་རེད། ལྗོངས་ཡོངས་ཀྱི་གཙང་པོ་དང་། ཆུ་བོ། མཚོ་བཅས་གཙོ་བོའི་ཆུའི་སྤུས་ཚད་ཚང་མ་རིགས་Ⅲཔའི་ཚད་གཞི་དང་དེ་ལས་ཡག་པའི་ཚད་གཞིར་སླེབས་ཡོད་པ་དང་། གྲོང་ཁྱེར་དང་གྲོང་རྡལ་གྱི་གཅིག་སྡུད་རྣམ་པའི་འཐུང་ཆུའི་ཆུ་འགོའི་ཆུ་སྤུས་ཚད་ལོན་ཚད་100%ཟིན་ཡོད་པ་རེད།