ཚེས་19ཉིན། ཀྲུང་གོའི་སྐྱེ་ཁམས་ཤེས་དཔལ་གླེང་སྟེགས་ཀྱི་ལོ་ཚོགས་ནན་ཁྲང་དུ་འཚོགས་ཤིང་། ལོ་ཚོགས་ཐོག་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཁུལ་ཁག་དྲུག་པ་དང་། “རི་སྔོན་ཆུ་དྭངས་གསེར་དངུལ་རི་ལས་ལྷག་པའི”ལག་ལེན་གསར་གཏོད་རྟེན་གཞི་ཁག་དྲུག་པ། ཀྲུང་གོའི་སྐྱེ་ཁམས་ཤེས་དཔལ་བྱ་དགའ་སྐབས་གསུམ་པ་སོགས་ལ་དངོས་སུ་མིང་བཏགས་ནས་གཟེངས་བསྟོད་བྱས་པ་རེད། གསར་འགོད་པས་འབྲེལ་ཡོད་ཚན་པ་ནས་ཤེས་རྟོགས་བྱས་པར་གཞིགས་ན། རང་ལྗོངས་ཀྱི་ཆབ་མདོ་གྲོང་ཁྱེར་འཇོ་མདའ་རྫོང་དང་། ཉིང་ཁྲི་གྲོང་ཁྱེར་སྤོ་བོ་རྫོང་། ལྷོ་ཁ་གྲོང་ཁྱེར་འཕྱོངས་རྒྱས་རྫོང་བཅས་རྫོང་གསུམ་ལ་རྒྱལ་ཁབ་ཀྱི“སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཁུལ་ཁག་དྲུག་པའི”མིང་ཐོབ་ཡོད།

དེ་དང་ཆབས་ཅིག་ཉིང་ཁྲི་གྲོང་ཁྱེར་བྲག་ཡིབ་ཆུས་ལ“རི་སྔོན་ཆུ་དྭངས་གསེར་དངུལ་རི་ལས་ལྷག་པའི”ལག་ལེན་གསར་གཏོད་རྟེན་གཞིའི་མིང་ཐོབ་པ་དང་། རང་སྐྱོང་ལྗོངས་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་ལྟེ་གནས་ལ“ཀྲུང་གོའི་སྐྱེ་ཁམས་ཤེས་དཔལ་བྱ་དགའ་སྐབས་གསུམ་པའི”སྔོན་ཐོན་མཉམ་སྡེབ་ཀྱི་མཚན་སྙན་ཐོབ་ཡོད་པ་རེད། མངའ་རིས་ས་ཁུལ་སྒེར་རྩེ་རྫོང་ནགས་ཚལ་དང་རྩྭ་ཐང་ཅུས་བྱང་ཐང་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ཉིའུ་གད་ཞོད་དོ་དམ་ས་ཚིགས་ཀྱི་ཚེ་བརྟན་ཁྱུང་འབྲུག་དང་ལྷོ་ཁ་གྲོང་ཁྱེར་གོང་དཀར་རྫོང་དགོན་སྟོད་གྲོང་ཚོ་ཨུ་ཡོན་ལྷན་ཁང་གི་ལྷག་སྒྲོན་ལ“ཀྲུང་གོའི་སྐྱེ་ཁམས་ཤེས་དཔལ་བྱ་དགའ་སྐབས་གསུམ་པའི”སྔོན་ཐོན་མི་སྒེར་གྱི་མཚན་སྙན་ཐོབ་ཡོད་པ་རེད།

འོས་འདེམས་བྱེད་སྒོའི་ཐོག་རང་སྐྱོང་ལྗོངས་སྐྱེ་ཁམས་ཁོར་ཡུག་སྲུང་སྐྱོང་ཐིང་གིས་ལེགས་འདེམས་ཀྱི་རྩ་དོན་མཐའ་འཁྱོངས་བྱས་ནས་ས་ཁོངས་ཧྲིལ་པོ་དང་དམངས་ཡོངས་ཀྱི་སྐྱེ་ཁམས་ཤེས་དཔལ་གྱི་དཔེ་སྟོན་འཛུགས་གཏོད་སོགས་ཀྱི་ལས་དོན་ལ་སྐུལ་འདེད་ཏན་ཏིག་བཏང་བ་རེད། མིག་སྔར་ལྗོངས་ཡོངས་སུ་གྲོང་ཁྱེར་དང་ས་ཁུལ་5དང་རྫོང་དང་ཆུས་9ལ་རྒྱལ་ཁབ་ཀྱི“སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཁུལ”གྱི་མིང་ཐོབ་པ་དང་། རྫོང་དང་གྲོང་ཚོ་3ལ“རི་སྔོན་ཆུ་དྭངས་གསེར་དངུལ་རི་ལས་ལྷག་པའི”ལག་ལེན་གསར་གཏོད་རྟེན་གཞིའི་མིང་ཐོབ་པ་རེད། རང་ལྗོངས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཐད་ལ་ཕྱོགས་ཡོངས་ནས་འཛུགས་གཏོད་དང་། ས་ཁོངས་ཧྲིལ་པོ་མཐུན་སྦྱོར། དམངས་ཡོངས་ཞུགས་པ་བཅས་ཀྱི་རྣམ་པ་ཞིག་རགས་ཙམ་ཆགས་ཡོད་པ་རེད།