བོད་ཀྱི་ཞིབ་སྦྱོང་ཡུལ་སྐོར་སྤུས་ཚད་མཐོ་པོས་འཕེལ་རྒྱས་འགྲོ་བར་སྐུལ་འདེད་གཏོང་བ་དང་བོད་འདི་ཉིད་འཛམ་གླིང་གི་ཡུལ་སྐོར་དམིགས་ས་གལ་ཆེན་དུ་མགྱོགས་མྱུར་བསྐྲུན་ཆེད། ཉིན་ཤས་གོང་ལྗོངས་ཡུལ་སྐོར་འཕེལ་རྒྱས་ཐིང་གིས་ལྷ་ས་བར་གནས་སྒྱུ་རྩལ་ལྟེ་གནས་སུ་བོད་ཀྱི་ཞིབ་སྦྱོང་ཡུལ་སྐོར་བགྲོ་གླེང་ཚོགས་འདུ་འཚོགས་པ་རེད། ལྗོངས་ཡུལ་སྐོར་འཕེལ་རྒྱས་ཐིང་དང་། ལྗོངས་ཆེད་དོན་ཡུལ་སྐོར་མཐུན་ཚོགས། ཀྲུང་གོ་ཚན་རིག་ཁང་མཚོ་བོད་སུའོ། སྤྱི་ཚོགས་ཚན་རིག་ཁང་མི་རིགས་སུའོ། རང་སྐྱོང་ལྗོངས་ཏང་གི་སློབ་གྲྭ། བོད་ལྗོངས་སློབ་ཆེན་སོགས་ཚན་པའི་འགན་འཁུར་བ་དང་རིགས་གཅིག་མཁས་ཅན་དང་སྒྲིག་གཞིའི་འཐུས་མི་ད་ཐེངས་ཀྱི་ཚོགས་འདུར་ཞུགས་པ་རེད།
ཚོགས་འདུའི་ཐོག སྤུས་ཚད་མཐོ་བའི་ཆེད་དོན་ཡུལ་སྐོར་བྱེད་སྒོ་ཞིག་ཡིན་པའི་ཞིབ་སྦྱོང་ཡུལ་སྐོར་གྱིས་བོད་ཀྱི་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བར་ནུས་པ་གལ་ཆེན་ལྡན་ཡོད། ཚོགས་ཞུགས་འཐུས་མི་ཚོས་འཕེལ་རྒྱས་ཀྱི་གོ་སྐབས་དམ་འཛིན་དང་། གཞོགས་འདེགས་དམ་ཟབ། མཉམ་ལས་ཧུར་ཐག་བཅས་བྱས་ཏེ། ཡུལ་སྐོར་གྱི་སྤུས་ཚད་མཐོ་བའི་འཕེལ་རྒྱས་ཀྱི་ནང་དོན་ཁོང་དུ་གཏིང་ཟབ་ཆུད་པར་བྱེད་པ་དང་། བོད་ཀྱི་ཕུན་སུམ་ཚོགས་པའི་རང་བྱུང་མཛེས་ལྗོངས་དང་གཏིང་ཟབ་པའི་རིག་གནས་སྒྱུ་རྩལ་གྱི་ནང་དོན་ལ་བརྟེན་པ། མང་ཚོགས་ཀྱི་དགོས་མཁོར་དམིགས་པ་བཅས་བྱས་ཏེ། བོད་ཀྱི་རིག་གནས་ཀྱི་ནང་དོན་དང་མི་ཆོས་རིག་གནས་ཀྱི་སྙིང་སྟོབས་མཚོན་པའི་ཁྱད་ལྡན་ཞིབ་སྦྱོང་ཡུལ་སྐོར་གྱི་སྤུས་རྟགས་དེ་བས་མང་བ་བཏོད་ནས“ཞིབ་སྦྱོང་དང་ཡུལ་སྐོར”མཉམ་འདྲེས་ལ་སྐུལ་འདེད་དང་རང་སོ་སོའི་ཁྱད་ཆོས་མངོན་པ་དང་། བོད་ཀྱི་ཆེད་དོན་ཡུལ་སྐོར་ཐོན་ལས་རིམ་སྤོར་ལ་སྐུལ་འདེད་བཏང་སྟེ། འཕེལ་རྒྱས་ཀྱི་གྲུབ་འབྲས་རྒྱ་ཆེའི་མང་ཚོགས་ལ་དེ་བས་མང་བ་དང་དེ་བས་ལེགས་པའི་སྒོ་ནས་ཐོབ་པར་བྱེད་དགོས་ཞེས་བསྟན་པ་རེད།
རང་སྐྱོང་ལྗོངས་ཆེད་དོན་ཡུལ་སྐོར་མཐུན་ཚོགས་ཀྱི་འཐུས་མིས་བོད་ཀྱི་ཞིབ་སྦྱོང་ཡུལ་སྐོར་ལམ་ཐིག་ངོ་སྤྲོད་ཞིབ་ཕྲ་བྱས་པ་རེད། ཁྱབ་ཁོངས་ཁག་གི་རིགས་གཅིག་མཁས་ཅན་དང་སྒྲིག་གཞིའི་འཐུས་མིས་བོད་ཀྱི་ཞིབ་སྦྱོང་ཡུལ་སྐོར་འཕེལ་རྒྱས་ཀྱི་ད་ལྟའི་གནས་བབ་དང་འཕེལ་ཕྱོགས་ལ་དམིགས་ནས། རང་ངོས་ཀྱི་དོན་དངོས་ལ་གཞི་ཚུགས་ཏེ་རང་ཉིད་ཀྱི་ལྟ་ཚུལ་གླེང་ནས་གྲོས་བསྡུར་འཁྲུག་པོ་བྱས་པ་རེད། ཚོགས་འདུ་གྲོལ་རྗེས་རིམ་པ་དང་པོའི་སྐོར་གཟིགས་པ་དབང་ཞའོ་ཏུང་གིས་རིགས་གཅིག་མཁས་ཅན་དང་སྒྲིག་གཞིའི་འཐུས་མིར་བློ་འདྲི་བའི་གདན་ཞུས་ལག་ཁྱེར་སྤྲད་པ་རེད།