2021ལོ་ནས་བཟུང་། གྲོང་གསེབ་ཀྱི་སྡོད་མལ་ཁོར་ཡུག་བཅོས་སྒྲིག་ལས་དོན་ལ་མུ་མཐུད་སྐུལ་འདེད་གཏིང་ཟབ་གཏོང་ཆེད། ཁང་དམར་གྲོང་རྡལ་གྱིས་གནད་སྨིན་ཤུགས་འདོན་བྱས་ཏེ། གྲོང་ཚོ་གཙང་བཟོ་སྔོ་འགྱུར་དང་། མཛེས་བཟོ། གསང་སྤྱོད་གསར་བརྗེ། གད་སྙིགས་གཙང་སེལ། སྒོ་ར་སྒྱུར་བཀོད། ཕྱུགས་ར་སྒྱུར་བཀོད་སོགས་ཆེད་དོན་བྱ་སྤྱོད་ཁག་10སྤེལ་ཏེ། གཙང་སྦྲ་དོད་པ་དང་། གོ་རིམ་ལྡན་པ། སྐྱེ་ཁམས་མཛེས་པ་བཅས་ཀྱི་སྡོད་མལ་ཁོར་ཡུག་ནུས་ཤུགས་ཡོད་རྒུས་སྐྲུན་པའི་ཚ་རླབས་ཤིག་འཕྱུར་བར་བྱས་ནས་གྲོང་གསེབ་དར་རྒྱས་ཀྱི་རྣམ་པ་རིམ་བཞིན་མངོན།

མིག་སྔའི་བར། ཁང་དམར་གྲོང་རྡལ་གྱི་ས་ཁོངས་ཡོངས་ཀྱི་གསང་སྤྱོད་215གསར་བརྗེ་དང་། དུད་ཚང་283གྱི་སྒོ་ར་སྒྱུར་བཀོད། ཕྱུགས་ར་54དང་གཡུལ་ཐང་སྒྱུར་བཀོད་སོགས་གྲོང་གསེབ་ཀྱི་སྡོད་མལ་ཁོར་ཡུག་བཅོས་སྒྲིག་ལས་འགན་གཞི་རྩའི་ཆ་ནས་ལེགས་གྲུབ་བྱུང་སྟེ་ད་ཆ་སྔར་བས་རིམ་སྤོར་བྱེད་བཞིན་ཡོད།

2021ལོར་ཁང་དམར་གྲོང་རྡལ་གྱིས་ལོ་གོང་མར་ཕུང་གསོག་ཐེབས་པའི་གྲོང་གསེབ་ཀྱི་གད་སྙིགས་གཙང་སེལ་བྱས་པའི་རྨང་གཞིའི་ཐོག གད་སྙིཌ་གཙང་སེལ་དང་། ཅ་དངོས་ཙག་ཙིག་གཙང་སེལ། བེད་མེད་དུ་བཞག་པའི་ས་ཁང་དང་གྱང་རོ་གཙང་སེལ། ཆུ་ཡུར་དང་རྫིང་བུའི་ཆུ་སྙིགས་གཙང་སེལ། ལྕི་བ་དང་བྱ་བྲུན་གང་བྱུང་དུ་སྤུངས་བའི་རིགས་གཙང་སེལ་བཅས་བྱས་ནས་མང་ཚོགས་ཀྱི་གོམས་གཤིས་ངན་པ་རིམ་བཞིན་བསྒྱུར་བའི“གཙང་སེལ་ལྔ་དང་སྒྱུར་བཀོད་གཅིག”དམ་འཛིན་བྱ་གཞིར་བྱས་ནས་གྲོང་ཚོ་གཙང་སྦྲ་དོད་པའི་བྱ་སྤྱོད་ལ་སྐུལ་འདེད་ཤུགས་ཆེན་བཏང་བ་རེད།

སྡོད་མལ་ཁོར་ཡུག་བཅོས་སྒྲིག་ལ་ཞུགས་པའི་རྒྱ་ཆེའི་མང་ཚོགས་ཀྱི་ཧུར་བརྩོན་རང་བཞིན་སྐུལ་སློང་གང་ལེགས་བྱ་ཆེད། ཁང་དམར་གྲོང་རྡལ་གྱིས་མ་དངུལ་སྒོར་ཁྲི་190ལྷག་ཙམ་བརྩོན་ལེན་ཧུར་ཐག་བྱས་ཏེ། གྲོང་ཚོ་ཁག་གི་སྒོ་ཐེམ་དང་ཁྲོམ་གཞུང་དང་བར་ཐག་ཉེ་བའི་ཁང་ཆུང་སོགས་ཀྱི་སྒྲིག་འགལ་སྐྲུན་དངོས་དང་སྲང་ལམ་གྱི་ཅ་དངོས་ཙག་ཙིག་གཅིག་སྡུད་གཙང་སེལ་བྱས་ནས་དམངས་ལ་ཁོར་ཡུག་ཡག་པོ་བསྐྲུན་པ་དང་། ཚད་ལྡན་གྱི་འཛུགས་སྐྲུན་དང་ལུགས་དང་མཐུན་པའི་སྒྱུར་བཀོད་བྱས་པ་རེད། དེའི་རིང་ཁང་དམར་གྲོང་རྡལ་གྱི་ཏང་ཨུད་དང་སྲིད་གཞུང་གི་འགོ་ཁྲིད་གཙོ་བོས་སྣེ་ཁྲིད་དེ་གྲོང་རྡལ་ཡོངས་ཀྱི་སྲིད་འཛིན་གྲོང་ཚོ་8ལ་ཕྱོགས་ཡོངས་དང་དུས་ངེས་མེད་ཀྱི་ལྟ་སྐུལ་མཛུབ་ཁྲིད་དང་ཞིབ་བཤེར་བྱས་ཏེ་གྲོང་ཚོའི་རྣམ་པ་གསར་རྐྱང་དུ་འགྱུར་བར་སྐུལ་འདེད་བཏང་བས་བཙོག་ཟིང་ཞན་གསུམ་གྱི་རྣམ་པར་འགྱུར་ལྡོག་ཆེན་པོ་བྱུང་བ་རེད།