རྣམ་གླིང་རྫོང་གི་གྲོང་གསེབ་ཏུ་སྐྱོད་སྐབས་མཛེས་སྡུག་དང་འབྱོར་ཕྱུག འཆམ་མཐུན་བདེ་སྐྱིད་བཅས་ལྡན་པའི་གྲོང་གསེབ་གསར་པའི་རྣམ་པ་ཞིག་གང་སར་མཐོང་རྒྱུ་ཡོད། སྐྱེ་ཁམས་ཁོར་ཡུག་མཛེས་སྡུག་ལྡན་པ་དང་། གྲོང་ཚོའི་བཀོད་པ་གཙང་བ། སྤྱི་པའི་ཞབས་ཞུའི་སྒྲིག་བཀོད་འཐུས་ཚང་བཅས་ལས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་འགྲོ་བཞིན་པ་མངོན།

ཉེ་བའི་ལོ་ཤས་རིང་། གཞིས་རྩེ་གྲོང་ཁྱེར་རྣམ་གླིང་རྫོང་གིས་སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་གཏོང་རྒྱུ་མཐའ་འཁྱོངས་ཀྱིས་སྐྱེ་ཁམས་ཁོར་ཡུག་སྲུང་སྐྱོང་གི་འགག་སྒྲོལ་དམག་འཐབ་རྒྱུན་མཐུད་ངང་ཡག་པོ་བརྒྱབ་པ་དང་། རང་བྱུང་གི་སྐྱེ་ཁམས་སྲུང་ཡོལ་བརྟན་དུ་བཏང་ནས་ལྗང་མདོག་འཕེལ་རྒྱས་ཀྱི་རྒྱུགས་ཤོག་རིང་མོའི་ཐོག་བློ་ཡིད་ཚིམ་པའི་རྒྱུགས་ལན་ཤིག་ཕུལ་ཡོད།

ས་ཁོངས་ཧྲིལ་པོ་སྔོ་འགྱུར་བྱས་ནས“སྐྱེ་ཁམས་ལ་མཐོང་ཆེན”བྱེད་པ་ནས“སྐྱེ་ཁམས་འཛུགས་སྐྱོང”བར།

ཡར་ཀླུང་གཙང་པོའི་དབུས་རྒྱུད་དུ་གནས་པའི་རྣམ་གླིང་སྐྱེ་ཁམས་དཔེ་སྟོན་ཁུལ་ནི་དེ་སྔ་གྲམ་ཐང་ཡིན་པ་དང་། ས་ཆ་བྱེ་འགྱུར་ཚབས་ཆེ་ལ་དགུན་དུས་གང་སར་བྱེ་རླུང་འཚུབ་ཀྱི་ཡོད། “ས་སྟེང་དུ་རྩྭ་མི་སྐྱེ་བ་དང་རྡུལ་རླུང་འཚུབ་དུས་རྡོ་ཧྲུག་འཁྱེར”ཞེས་པ་ནི་དེ་གའི་རྣམ་པ་དངོས་དེ་ཡིན་པ་རེད།

2014ལོ་ནས་2017ལོ་བར། རྣམ་གླིང་རྫོང་ཨུད་དང་རྫོང་སྲིད་གཞུང་གིས་རྫོང་ཡོངས་ཀྱི་སྟོབས་ཤུགས་བཏོན་ནས་ཡུལ་བབ་དང་བསྟུན་པའི་རྩ་དོན་ལྟར་ཤིང་འཛུགས་ནགས་བཟོ་བྱས་ཏེ་ཡར་ཀླུང་གཙང་པོའི་བྱང་ངོགས་ཀྱི་རྣམ་གླིང་སྐྱེ་ཁམས་དཔེ་སྟོན་ཁུལ་གྱི་རྣམ་གྲངས་ནུས་ཤུགས་ཡོད་རྒུས་བཏོད་ཡོད།

ཤེས་རྟོགས་བྱུང་བར་གཞིགས་ན། 2014ལོ་ནས་བཟུང་རྣམ་གྲངས་དེར་རིམ་རྩིས་བྱས་ན་མ་དངུལ་སྒོར་དུང་ཕྱུར་2.4བཏང་ནས་ཤིང་འཛུགས་ནགས་བཟོ་མུའུ་ཁྲི་3.6ལེགས་སྒྲུབ་བྱས་པ་དང་། དཔེ་སྟོན་ཁུལ་དུ་སྡོང་ཕྲུག་སྣ་ཚོགས་ཁྲི་288ལྷག་ཙམ་བཙུགས་པར་གསོན་ཚད་95%ཟིན་ནས་ཤིང་ནགས་ཡུག་སྦྲེལ་དང་། ཞིང་ཆུང་གྲུ་བཞི། འགྲོ་ལམ་དྲ་བ། ཡུར་བུ་འབྲེལ་ཆགས་བཅས་ཀྱི་སྐྱེ་ཁམས་འཛུགས་སྐྱོང་གི་རྣམ་པ་ཞིག་རགས་ཙམ་ཆགས་ཡོད་པ་རེད།

(པར་ངོས་གསུམ་པར་གཟིགས) (པར་ངོས་དང་པོར་མཐུད) རྫོང་ཡོངས་ཀྱི་ནགས་སའི་སྤྱིའི་རྒྱ་ཁྱོན་སྤྱི་ཆིང་157916.649ཟིན་པ་དང་། རྩྭ་ཐང་གི་སྤྱིའི་རྒྱ་ཁྱོན་སྤྱི་ཆིང་526767.74ཟིན་པ། བདག་སྐྱོང་བ་566བཀོད་སྒྲིག་བྱས་པ། ནགས་ལས་སྒྱུར་བཅོས་འཕེལ་རྒྱས་དང་ནགས་ཚལ་སྐྱེ་ཁམས་ཕན་འབྲས་ཀྱི་ཁ་གསབ་མ་དངུལ་སྒོར་ཁྲི་524.64དོན་འཁྱོལ་བཅས་བྱས་ཡོད། 2021ལོའི་ལོ་མཇུག་བར“ཉེ་འགྲམ་བཞིར”ཤིང་འཛུགས་མུའུ་5760ལྷག་ཙམ་དང་སྡོང་ཕྲུག་རྐང་ཁྲི་28.8ལྷག་ཙམ་བཙུགས་པ་སོགས་ཀྱི་གྲངས་གཞི་ནི་རྣམ་གླིང་རྫོང་དུ་ཤིང་འཛུགས་སྔོ་འགྱུར་བྱས་པ་དང་། སྐྱེ་ཁམས་ཉམས་གསོ་བཅོས་སྐྱོང་ལ་ཤུགས་སྣོན་རྒྱག་པ། ལྗང་མདོག་འཕེལ་རྒྱས་ལ་གཞི་ཚུགས་པ་བཅས་ཀྱི་གསོན་ཉམས་དོད་པའི་མཚོན་ཚུལ་ཞིག་རེད།

གནད་ལ་འཕིགས་པའི་བརྟག་དཔྱད་བྱས་ནས་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་པ།

ཉེ་བའི་ལོ་ཤས་རིང་། རྣམ་གླིང་རྫོང་གིས་ཁོར་ཡུག་བཅོས་སྐྱོང་དམ་འཛིན་བྱ་གཞིར་བྱས་ནས་བཀོད་སྒྲིག་ཞིབ་ཚགས་དང་། སྐོར་ཞིབ་ལ་ཤུགས་སྣོན། ཁྲིམས་འཛིན་ནན་པོ་བཅས་བྱས་ཏེ་གནད་སྨིན་སྦགས་བཅོས་དང་། ཚན་རིག་དང་མཐུན་པའི་སྦགས་བཅོས། ཁྲིམས་ལྟར་སྦགས་བཅོས་བཅས་མཐའ་འཁྱོངས་བྱས་ནས། བྱེད་ཐབས་སྣ་མང་སྤྱད་དེ་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ཡག་པོ་བརྒྱབ་པ་རེད།

རྣམ་གླིང་རྫོང་གིས་རླུང་ཁམས་ཆེ་མོའི་སྦགས་བཙོག་འགོག་བཅོས་ཀྱི་འཕྲལ་སྡོམ་དང་ལེན་ཇུས་གཞི་བཟོས་ནས་མཁའ་རླུང་སྤུས་ཚད་ལ་དོ་དམ་ཚོད་འཛིན་གནད་སྨིན་བྱེད་པར་ཤུགས་སྣོན་བརྒྱབ་ཡོད། བཙོག་ཆུ་གཙང་གསིང་གི་འཛུགས་སྐྲུན་ལ་སྐུལ་འདེད་བརྟན་པོ་བཏང་བ་དང་། ཆུ་བོ་དང་། གཅིག་སྡུད་འཐུང་ཆུའི་ཆུ་འགོར་ཞ་ཉེ་དང་། ཁད། ཟངས། ཏི་ཚ་སོགས་ལ་ཞིབ་བཤེར་ཚད་ལེན་བྱས་པ་མ་ཟད། འཐུང་ཆུའི་ཆུ་འགོར་ར་སྐྱོར་འགོག་སྲུང་དང་། མཚོན་རྟགས་བྱང་བུ་འཛུགས་པ། རྒྱུན་གཏན་གྱི་བདག་སྐྱོང་བཅས་ལ་ཤུགས་སྣོན་བརྒྱབ་སྟེ་འཐུང་ཆུའི་ཆུ་འགོའི་ཆུ་སྤུས་ལ་འགན་ལེན་ནུས་ལྡན་བྱས་ཡོད།

དམ་པ་དོན་གཉེར་གྱི་བྱ་ཐབས་རབ་དང་རིམ་པ་ནི་རྣམ་གླིང་རྫོང་གིས་སྐྱེ་ཁམས་ཁོར་ཡུག་བཅོས་སྐྱོང་ལ་ཤུགས་སྣོན་བརྒྱབ་ནས་ས་གནས་དེ་གའི་མི་སེར་ལ་བདེ་སྐྱིད་བསྐྲུན་པའི་གསོན་ཉམས་དོད་པའི་མཚོན་ཚུལ་ཞིག་རེད། 2021ལོར་རྫོང་དེས་ཤང་དང་གྲོང་རྡལ་17དང་། ཤངས་ཆུའི་རྒྱུད། ཁོངས་གཏོགས་ཁུལ་གྱི་གཙོ་གནད་རྣམ་གྲངས། ཨེ་མ་ཤང་རྩེ་གདོང་ཆུ་མཛོད། བྱེ་རྡོ་སྔོག་འདོན་ཁུལ་བཅས་ལ་བསྡོམས་ཆེད་དོན་ཁྲིམས་འཛིན་ཞིབ་བཤེར་ཐེངས་60ལྷག་ཙམ་བྱས་པ་དང་དུས་བཀག་དག་ཐེར་གྱི་བརྡ་ཐོ་ཐེངས་12བཏང་སྟེ། སྨན་བཅོས་ཟོག་རོ་གཞན་སྒྱུར་གྱི་མཉམ་འབྲེལ་ཤོག་བྱང་སོགས་ཀྱི་གནད་དོན་ཐག་གཅོད་ནུས་ལྡན་བྱས་པས་སྦགས་བཙོག་འགོག་བཅོས་ལ་ཕན་འབྲས་དངོས་ཐོན་ཡོད།

དྲིལ་བསྒྲགས་ལ་ཤུགས་སྣོན་བརྒྱབ་ནས་ཁོར་ཡུག་སྲུང་སྐྱོང་གི་འདུ་ཤེས་མི་སེམས་སུ་ཟུག་པར་བྱས་པ།

ཉེ་བའི་ལོ་ཤས་རིང་། རྣམ་གླིང་རྫོང་གིས་འཛམ་གླིང་ཁོར་ཡུག་ཉིན་མོ་གོ་སྐབས་སུ་བྱས་ནས་འཕྲེད་འགེལ་སྦྱར་ཡིག་འགེལ་བ་དང་། དྲིལ་བསྒྲགས་དཔྱད་ཡིག་སྤྲོད་པ། སྤྱི་པའི་བློ་འདྲི་དང་ལེན་བྱེད་པ་སོགས་ཀྱི་བྱེད་ཐབས་བརྒྱུད། སྐྱེ་ཁམས་ཁོར་ཡུག་སྲུང་སྐྱོང་གི་དྲིལ་བསྒྲགས་བྱེད་སྒོ་ཏན་ཏིག་སྤེལ་བ་དང་རྒྱ་ཆེའི་ཞིང་འབྲོག་མང་ཚོགས་སྐྱེ་ཁམས་ཁོར་ཡུག་སྲུང་སྐྱོང་ལ་ཧུར་ཐག་ཞུགས་པའི་སྐུལ་སློང་བྱས་པས་སྐྱེ་ཁམས་ཁོར་ཡུག་སྲུང་སྐྱོང་གི་འདུ་ཤེས་མི་སེམས་ལ་གཏིང་ཟབ་ཟུག་ཡོད།

རྣམ་གླིང་རྫོང་གིས་སྐྱེ་ཁམས་ཁོར་ཡུག་སྲུང་སྐྱོང་གི་དྲིལ་བསྒྲགས་ལས་དོན་ལ་རྒྱུན་གཏན་ནས་དམ་འཛིན་བྱེད་པ་དང་། ཉིན་རེའི་ལས་ཀར་མཉམ་འདྲེས་ཐུབ་པ། རྒྱུན་གཏན་ནས་ནན་པོ་བྱེད་པ་བཅས་བྱས་ཏེ། དམ་འཛིན་ལྷོད་མེད་ཡོང་བར་བྱས་ཡོད། རྒྱ་ཆེའི་ཞིང་འབྲོག་མང་ཚོགས་ཀྱི་ཁོར་ཡུག་སྲུང་སྐྱོང་གི་འདུ་ཤེས་ཟམ་མི་ཆད་པར་ཟབ་ཏུ་ཕྱིན་པ་དང་། ཁོར་ཡུག་སྲུང་སྐྱོང་གི་འགན་འཁྲི་སྔར་བས་ཤུགས་ཆེར་སོང་བ། ཁོར་ཡུག་སྲུང་སྐྱོང་ལ་ཞུགས་ཚད་ཟམ་མི་ཆད་པར་མང་དུ་སོང་བ། ཐོན་སྐྱེད་དང་འཚོ་བའི་བྱ་སྤྱོད་ཁག་ཚང་མར་ཁོར་ཡུག་སྲུང་སྐྱོང་གི་འདུ་ཤེས་ཁྱབ་པ། ཁོར་ཡུག་ལ་གཏོར་བཤིག་གཏོང་བའི་བྱེད་སྤྱོད་བཀག་འགོག་ཧུར་ཐག་བྱེད་པ་བཅས་བྱུང་ཡོད།

ད་ཆའི་རྣམ་གླིང་གི་ཡུལ་ལྗོངས་ལྟ་ན་སྡུག་པ་དང་། དགུང་སྔོན་ཆུ་དྭངས། མཁའ་རླུང་གཙང་བ་བཅས་ཡོད་པའི་ཁར། མི་རིགས་ཁག་གི་མང་ཚོགས་ཚོས་སེམས་ནུས་ཡོད་རྒུས་སྔོ་ཞིང་དྭངས་བའི་རི་ཆུར་སྲུང་སྐྱོང་བྱེད་ཀྱི་ཡོད་པས་སྐྱེ་ཁམས་ཁོར་ཡུག་སྔར་བས་ལེགས་སུ་འགྲོ་བཞིན་ཡོད།