ད་ཕན་ལོ་ཤས་རིང་ཆབ་མདོ་གྲོང་ཁྱེར་གྱིས་འཕེལ་རྒྱས་དང་ཁོར་ཡུག་དབར་གྱི་འབྲེལ་བ་ཐག་གཅོད་ཡང་དག་བྱ་རྒྱུ་མཐའ་འཁྱོངས་བྱས་ཏེ་སྐྱེ་ཁམས་ཤེས་དཔལ་འཛུགས་སྐྱོང་ལ་མགྱོགས་མྱུར་སྐུལ་འདེད་གཏོང་རྒྱུར་རྒྱུན་མཐུད་ནས་ཤུགས་བརྒྱབ་པ་དང་། སྐྱེ་ཁམས་ལམ་ལུགས་འཐུས་སྒོ་ཚང་དུ་བཏང་བ། སྐྱེ་ཁམས་བཅོས་སྐྱོང་བྱེད་ཤུགས་ཆེ་རུ་བཏང་བ། སྐྱེ་ཁམས་བདེ་འཇགས་སྲུང་སྐྱོང་བྱས་པ། སྐྱེ་ཁམས་ཁོར་ཡུག་ལེགས་སུ་བཏང་བ་བཅས་རེད། ད་ཆའི་ཆབ་མདོའི་སྔོ་ཞིང་དྭངས་བའི་རི་ཆུ་ཀླུང་གསུམ་དུ་སྐྱེ་སྟོབས་ཀྱི་དཔལ་རབ་ཏུ་འབར་ཏེ་མི་དང་སྲོག་ཆགས་དང་རྩི་ཤིང་འཆམ་མཐུན་མཉམ་གནས་ཀྱི་མཛེས་སྡུག་ལྡན་པའི་ཁྱིམ་གཞིས་སུ་གྱུར་ཡོད།

དྭངས་གཙང་ཆུ་མོར་གཅེས་སྐྱོང་བྱེད་པ།

ཆབ་མདོའི་དབྱར་དུས་ཀྱི་གང་སར་སྔོ་ཐིང་ངེར་གནས་པ་དང་དུས་ཚིགས་དེར་མཚེའུ་ངོས་སུ་ལོ་གཅིག་རིང་གི་ཚོན་མདོག་ཕུན་སུམ་ཚོགས་ཤོས་མངོན། དཔལ་འབར་རྫོང་དུ་གནས་པའི་མདོག་གསུམ་མཚེའུ་ནི་འོད་རབ་ཏུ་འཚེར་བའི་མུ་ཏིག་དཀར་སེར་ནག་གསུམ་ལྟར་དཔལ་འབར་རྫོང་ཕུ་ཡུལ་གྲོང་ཚོའི་ས་ཁོངས་ལ་མཛེས་རྒྱན་སྤྲས་པ་དང་ཆུ་གཏིང་རིང་ཐུང་ཡོད་ལ་ཆུ་ནང་སྐྱེ་དངོས་དང་དེ་བཞིན་གཏེར་རིགས་མི་འདྲ་བའི་དབང་གིས་མཚེའུ་གཅིག་ལ་ཚོན་མདོག་གསུམ་གྱི་ངོ་མཚར་གྱི་རྣམ་པ་མངོན་ཡོད།

ད་ཕན་ལོ་ཤས་རིང་ཡུལ་སྐོར་བ་མང་དུ་འགྲོ་བ་དང་སྦྲགས་མདོག་གསུམ་མཚེའུ་མཐའ་འཁོར་གྱི་སྐྱེ་ཁམས་ཁོར་ཡུག་ལའང་ཤུགས་རྐྱེན་ཐེབས་ནས་ཕུ་ཡུལ་གྲོང་ཚོའི་གྲོང་མིས་གཟའ་འཁོར་མི་རེ་ངོ་རེར་གཙང་སྦྲ་ཆེ་མོའི་བྱེད་སྒོ་ཐེངས་རེ་བྱས་ཏེ་མཚེའུའི་འགྲམ་དུ་གད་སྙིགས་སྒྲུག་པར་འགྲོ་གི་ཡོད། སྦག་སྦག་ཡོད་པའི་འབྲོག་པ་ཚོས་ད་དུང་རི་ཁུག་ཏུ་ཆུ་ཚོད་འགའ་ཤས་བསྐྱོད་དེ་གད་སྙིགས་གཙང་སེལ་བྱེད་ཀྱི་ཡོད་ཅེས་དཔལ་འབར་རྫོང་ཕུ་ཡུལ་གྲོང་ཚོ་དང་པོའི་གྲོང་སྡོད་ལས་དོན་རུ་ཁག་གི་རུ་དཔོན་ལིའུ་ཧའེ་ཕིང་གིས་ངོ་སྤྲོད་བྱས།

ཕུ་ཡུལ་གྲོང་ཚོའི་མི་ཚོས་མདོག་གསུམ་མཚེའུ་སྲུང་སྐྱོབ་བྱས་ཡོད་ལ་མདོག་གསུམ་མཚེའུ་ཡིས་ཀྱང་ཕུ་ཡུལ་གྲོང་ཚོའི་གྲོང་མི་ཚོར་ཕན་བདེ་བསྐྲུན་ཡོད། ཆུ་དྭངས་སྲུང་སྐྱོང་དམག་འཐབ་རྒྱག་འགོ་ཚུགས་ཚུན་ཆབ་མདོ་གྲོང་ཁྱེར་གྱིས་ཆུའི་སྦགས་བཙོག་འགོག་བཅོས་ཀྱི་ལས་དོན་ཤུགས་ཆེན་སྤེལ་བ་དང་འདི་ལོ་ནས་བཟུང་ཆབ་མདོ་གྲོང་ཁྱེར་གྱིས་སྔ་རྗེས་སུ་གྲོང་ཁུལ་དང་མཐའ་འཁོར་གྱི་བཙོག་ཆུ་ཐད་འབུད་གནད་དོན་ཕྱོགས་ཡོངས་ནས་གྲལ་བཤེར་ཐེངས་གསུམ་བྱས་པ་དང་2020ལོ་འཁོར་གྱི་རྫོང(ཆུས)11གི་རྫོང་རིམ་པའི་གཅིག་སྡུད་རྣམ་པའི་འཐུང་ཆུའི་ཆུ་འགོ་12ལ་དུས་ཚིགས་རེར་ཆུ་སྤུས་ལྟ་ཞིབ་ཚད་ལེན་སྙན་ཞུ་དང་ས་ཁུལ་རིམ་པའི་གཅིག་སྡུད་རྣམ་པའི་འཐུང་ཆུའི་ཆུ་འགོ་2ལ་ཟླ་རེར་ལྟ་ཞིབ་ཚད་ལེན་གྱི་སྙན་ཞུ་བསྡུ་རུབ་བྱས་ནས་ལྟ་ཞིབ་ཚད་ལེན་གྱི་གྲངས་གཞི་ནུས་ལྡན་3168གྲུབ་པ་རེད།

བོད་ཤར་རྒྱུད་ཀྱི“ལྗང་མདོག་གློ་བ”སྲུང་སྐྱོང་བྱེད་པ།

འདི་ལོའི་ཟླ་2ཚེས་2ཉིན་ནི“འཛམ་གླིང་འདམ་རའི་ཉིན་མོ”ཐེངས་25པ་ཡིན་པ་དང་ཉིན་དེར་ཆབ་མདོ་གྲོང་ཁྱེར་ནགས་ལས་དང་རྩྭ་ཐང་ཅུས་ཀྱི་ལས་དོན་མི་སྣས་ཆབ་མདོ་གྲོང་ཁྱེར་གྱི་ཇ་རྟ་ཐང་ཆེན་དུ་འགྲོ་འོང་བྱེད་མཁན་ལ་གང་འདྲ་ཞིག་ལ་འདམ་ར་ཟེར་བ་དང་དེ་བཞིན་འདམ་ར་དང་ཆུ་དང་ཚེ་སྲོག་དབར་ཁ་འབྲལ་ཐབས་མེད་པའི་འབྲེལ་བ་ཡོད་ལུགས་ངོ་སྤྲོད་བྱས་ཁར་འདམ་ར་སྲུང་སྐྱོང་སྲིད་ཇུས་དྲིལ་བསྒྲགས་བྱས་པ་རེད།

བསྡོམས་རྩིས་བརྒྱབ་པར་གཞིགས་ན། ན་ནིང་ལོ་མཇུག་བར་ཆབ་མདོར་ཁྱོན་འདམ་ར་སྤྱི་ཆིངས་ཁྲི་10.5དང་། རྒྱལ་ཁབ་རིམ་པའི་འདམ་རའི་སྤྱི་གླིང་དང་དེ་བཞིན་ས་ཁུལ་དང་རྫོང་གི་རིམ་ཁག་འདམ་རའི་རང་བྱུང་སྲུང་སྐྱོང་ཁུལ་8ཡོད་པར་འདམ་ར་སྲུང་སྐྱོང་རྒྱ་ཁྱོན་སྤྱི་ཆིངས་ཁྲི་1.6116ཟིན་པ་དེས་ཆབ་མདོའི་རྒྱལ་ཁབ་ས་ཆའི་རྒྱ་ཁྱོན་གྱི་0.15%བཟུང་ཡོད།

གོ་འཇོ་རྫོང་ཁོངས་ཀྱི་ལྷ་ཐོ་འདམ་ར་ནི་རྫ་ཆུའི་ཆུ་ཕྲན་དང་རྨ་ཆུའི་སྟོད་རྒྱུད་ཀྱི་ཆུ་འགོ་སྲུང་སྐྱོང་ཁུལ་གལ་ཆེན་ཡིན་པས་ས་ཁོངས་ཀྱི་ཆུ་རྒྱུན་འབེལ་པོ་ཡོད་སྟབས་མཚོ་བོད་ས་མཐོའི་ཆུ་འགོའི་ཁུལ་གྱི་འདམ་རའི་ཁྱད་ཆོས་མངོན་གསལ་དོད་པོ་ལྡན་ཡོད།

“ལྷ་ཐོ་འདམ་རས་འབྲི་ཆུའི་ཆུའི་ཐོན་ཁུངས་ཡོངས་སྙོམས་སྒྲིག་ལ་འགག་རྩའི་ནུས་པ་ཐོན་པ་མ་ཟད། ད་དུང་ཡུལ་དེའི་གནམ་གཤིས་ལའང་སྙོམས་སྒྲིག་གི་ནུས་པ་གལ་ཆེན་ཐོན་ནས་སྐྱེ་ཁམས་གཙང་སེལ་ནུས་པ་ཆེན་པོ་ཡོད། ཉེ་བའི་ལོ་ལྔའི་རིང་ང་ཚོས་མི་རྒྱུ་འབོར་ཆེན་བཏང་ནས་འདམ་རའི་སྐྱེ་ཁམས་སླར་གསོ་དང་ཚན་ཞིབ་ལྟ་ཞིབ་ཚད་ལེན་དང་འདམ་ར་བདག་སྐྱོང་སོགས་ཀྱི་ལས་དོན་སྤེལ་ཏེ་རྒྱ་ཁྱོན་སྤྱི་ཆིངས་3593.84ཡོད་པའི་ལྷ་ཐོ་རྒྱལ་ཁབ་འདམ་རའི་སྤྱི་གླིང་དེ་དེ་བས་མཛེས་སྡུག་ལྡན་པར་གྱུར་ཡོད”ཅེས་གོ་འཇོ་རྫོང་ནགས་ལས་རྩྭ་ཐང་ཅུས་ཀྱི་ལས་དོན་པ་ལི་ཀོན་ཅུན་གྱིས་ངོ་སྤྲོད་བྱས།

ཡུལ་དེའི་མང་ཚོགས་འདམ་ར་སྲུང་སྐྱོང་ནང་ཞུགས་རྒྱུར་སྐུལ་མ་ཧུར་ཐག་གཏོང་ཆེད་ལི་ཀོན་ཅུན་གྱིས“ཉེ་བའི་ལོ་ཤས་རིང་ང་ཚོས་སྐྱེ་ཁམས་སྲུང་སྐྱོང་དང་ཡུལ་དེའི་མང་ཚོགས་ཀྱི་ལས་ཞུགས་ཐག་གཅོད་ཟུང་འབྲེལ་ཡག་པོ་བྱས་ནས་ལོ་ལྟར་མང་ཚོགས་མི་ཉུང་བ་ཞིག་འདམ་ར་སྲུང་སྐྱོང་ལས་དོན་ཁྲོད་གདན་ཞུ་བྱེད་ཀྱི་ཡོད”ཅེས་བཤད་པ་དང་2018ལོ་ནས་བཟུང་ལོ་ལྟར་སྐྱེ་ཁམས་ཁ་གསབ་དངུལ་སྤྲད་དེ་ལྷ་ཐོ་ཤང་གི་མི་1000རང་སྐྱོང་ལྗོངས་རིམ་པ་དང་དེ་ཡན་གྱི་འདམ་རའི་སྐྱེ་ཁམས་སྲུང་སྐྱོང་ཁུལ་གྱི་བདག་སྐྱོང་པ་དང་ལྟ་སྐུལ་པར་གདན་ཞུ་བྱས་པ་དང་དེ་བྱིངས་མི་35ཡང་ཆེད་བསྐོས་བདག་སྐྱོང་པར་གདན་ཞུས་བྱས་ཏེ་ཕི་གཱ་རླངས་འཁོར་དང་སྦག་སྦག་སོགས་སྐོར་སྲུང་སྒྲིག་ཆས་སྒྲིག་སྦྱོར་བྱས་ནས་ཁོང་ཚོས་ལྷ་ཐོ་འདམ་ར་ལྟ་སྐྱོང་ཞིབ་ཚགས་བྱེད་བཞིན་ཡོད།

ང་ཚོའི་ཐུན་མོང་གི་ཁྱིམ་གཞིས་སྲུང་སྐྱོང་བྱེད་པ།

རྡོ་མགོན་ནི་2021ལོར་ཀྲུང་གུང་ཀྲུང་དབྱང་དྲིལ་བསྒྲགས་པུའུ་དང་། རྒྱལ་ཁབ་ནགས་ལས་དང་རྩྭ་ཐང་ཅུས། ནོར་སྲིད་པུའུ། རྒྱལ་ཁབ་གྲོང་གསེབ་དར་རྒྱས་ཅུས་བཅས་ཀྱི་གཟེངས་བསྟོད་ཐོབ་པའི་ཀྲུང་གོའི“ནགས་སྲུང་པ་ཡག་ཤོས”20ཡི་གྲས་ཤིག་ཡིན་པ་དང་ཁོང་གིས་ནགས་ཚལ་ཁྱིམ་ཚང་ལ་བརྩིས་ཏེ་ཚེ་གང་ནགས་ཚལ་དང་སྲོག་ཆགས་དང་མཉམ་དུ་འགྲོགས།

རྡོ་མགོན་གྱི་ཁྱིམ་ནི་སྨར་ཁམས་རྫོང་ཆུ་ཚན་ཁ་ཤང་མཚམས་མདོ་གྲོང་ཚོར་གནས་པ་དང་དེ་གར་གྲགས་ཅན་གྱི་ཧུང་ལ་རི་བོས་བསྐོར་ཡོད། ཁོང་ཁྱིམ་གྱི་མི་རབས་ནས་མི་རབས་བར་ནགས་ཚལ་ཐོན་ཁུངས་སྲུང་སྐྱོང་བྱ་རྒྱུ་དེ་འཚོ་བའི་ཁྲོད་ཀྱི་ཆ་ཤས་ཤིག་ཡིན་པ་དང་རྡོ་མགོན་གྱིས་མཛེས་སྡུག་ལྡན་པའི་ཕ་ཡུལ་དང་ནགས་ཚལ་སྲུང་སྐྱོང་བྱ་རྒྱུ་དེ་ཚེ་གང་གི་འགན་འཁྲིར་བརྩིས་ཡོད།

ཧུང་ལ་རི་བོའི་བོད་དང་ཡུན་ནན་གྱི་སྤྲེའུ་སྤུ་སེར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་རྡོ་མགོན་དང་འདྲ་བའི་ས་གཞི་འདིར་དགའ་ཞེན་ཆེ་བའི་ནགས་སྲུང་པ་མཐོང་རྒྱུ་ཡོད་པ་དང་ཚང་མས་སྲུང་སྐྱོང་བརྒྱུད་རི་སྟེང་གི་ལྗོན་ཤིང་དེ་བས་ཚང་ཚིང་དུ་གྱུར་བ་དང་ཧུང་ལ་རི་བོའི་སྤྱང་གྲུང་ཅན—བོད་དང་ཡུན་ནན་གྱི་སྤྲེའུ་སྤུ་སེར་གྲངས་འབོར་ཡང་དུས་རབས་གོང་མའི་ལོ་རབས་བརྒྱད་ཅུ་པའི་500ལྷག་ཙམ་ནས་ད་ཆའི་800ལྷག་ཙམ་བར་མང་དུ་ཕྱིན་པ་རེད།

ཆབ་མདོར་ནགས་སྲུང་པ་སྟོང་ཕྲག་མང་པོས་སྐད་གྲགས་མེད་པར་སྤྱིར་བཏང་གི་ལས་གནས་ཐོག་སྤྱིར་བཏང་མིན་པའི་ལས་ཀ་བྱས་ཏེ་རང་བྱུང་ཁམས་ཀྱི་ཚེ་སྲོག་སྲུང་སྐྱོང་དང་ས་གཞི་ཆེ་མོའི་ལྗང་མདོག་སྲུང་སྐྱོང་བྱེད་བཞིན་མཆིས། 2019ལོའི་ཟླ་11ཚེས་14ཉིན་ཆབ་མདོ་གྲོང་ཁྱེར་འདི་ཉིད་རྒྱལ་ཁབ་སྐྱེ་ཁམས་ཁོར་ཡུག་སྲུང་སྐྱོང་པུའི་རྒྱལ་ཡོངས་ཀྱི་སྐྱེ་ཁམས་ཤེས་དཔལ་དཔེ་སྟོན་གྲོང་ཁྱེར་དང་རྫོང་ཁག་གསུམ་པའི་མིང་ཐོའི་ནང་ཚུད་དེ་ཆབ་མདོ་གྲོང་ཁྱེར་གྱི་སྐྱེ་ཁམས་ཁོར་ཡུག་སྲུང་སྐྱོང་ལས་དོན་ལ་སླར་ཡང་ཁས་ལེན་ཐོབ་པ་རེད།