ཉེ་ཆར། ལྷ་ས་གྲོང་ཁྱེར་གྱི་ཀྲུང་ཧྭའི་རིག་གནས་སྤྱི་གླིང་དངོས་སུ་ཕྱི་ཕྱོགས་སུ་སྒོ་མོ་ཕྱེ་ཞིང་། སྤྱི་གླིང་དེ་བསྐྲུན་ནས་སྒོ་མོ་ཕྱེ་བ་ལས་ལྷ་སའི་གྲོང་ཁྱེར་གྱི་གཟུགས་བརྙན་ལེགས་སུ་ཕྱིན་པ་མ་ཟད། རྒྱ་ཆེའི་གྲོང་མི་དང་ཡུལ་སྐོར་བའི་ཆུ་ཁོངས་བར་མཐོངས་ཀྱི་མཛེས་ལྗོངས་དང་སྤྲོ་གསེང་རོལ་རྩེད་ནུས་པའི་དགོས་མཁོ་སྔར་བས་བསྐངས་བ་རེད།

ལྷ་ས་གྲོང་ཁྱེར་གྱི་ཀྲུང་ཧྭའི་རིག་གནས་སྤྱི་གླིང་དེ་སྐྱིད་ཆུའི་ངོགས་གཉིས་སུ་གནས་པ་དང་། ཤར་སྣེའུ་ཟམ་ཆེན་ནས་ནུབ་ལྷ་ས་གོང་ལྷ་ཟམ་ཆེན་བར་ཡིན་པ་དང་། དབུས་སུ་སྐྱིད་ཆུའི་ངོགས་གཉིས་འཕྲེད་དུ་བརྒལ་བའི་སྤྱིའི་རིང་ཚད་ལ་སྨི་1293ཡོད་པའི་མཐུན་མཛེས་སེམས་སྦྲེལ་ཟམ་པ་ཡོད། ཀྲུང་ཧྭ་རིག་གནས་སྤྱི་གླིང་དེ་ཁྱོན་ཁག་བཞི་ལ་དབྱེ་ཡོད་པ་སྟེ། སྐྱིད་ཆུའི་བྱང་ངོགས་ཀྱི་ཐུན་མོང་རིག་གནས་དང་ཐུན་མོང་གི་སྙིང་སྟོབས་དང་། སྐྱིད་ཆུའི་ལྷོ་ངོགས་ཀྱི་ཐུན་མོང་གི་ལོ་རྒྱུས་དང་ཐུན་མོང་གི་མངའ་ཁོངས་བཅས་རེད། དེ་ལས་བྱང་ངོགས་སུ་མུའུ་651དང་ལྷོ་ངོགས་སུ་མུའུ་406ཡོད་པ་དེས་སྐྱིད་ཆུའི་ཆུ་ཁོངས་མུའུ་3000ལྷག་ཙམ་བསྐོར་ཡོད།

ལྷ་ས་གྲོང་ཁྱེར་གྱི་ཀྲུང་ཧྭའི་རིག་གནས་སྤྱི་གླིང་དེ་རང་སྐྱོང་ལྗོངས་ཀྱི་དམངས་ཕན་འདུ་འགོད་ཅིག་ཡིན་པའི་ངོས་ནས། སྐྱིད་ཆུའི་སྐྱེ་ཁམས་མཛེས་ལྗོངས་ཁུལ་ཆེད་མངགས་བསྐྲུན་ཡོད། སྐྱིད་ཆུ་དང་ཉེ་བཅར་ཐུབ་པ་དང་ལུས་སྦྱོང་སྦྱོང་བརྡར་སོགས་ཀྱི་གྲོང་མིའི་དགོས་མཁོ་བསྐངས་བས་གྲོང་མི་དང་ཡུལ་སྐོར་བའི་དགའ་བསུ་ཐོབ་ཡོད། འཆམ་འཆམ་དུ་འགྲོ་བཞིན་པའི་གྲོང་མི་ཚུལ་ཁྲིམས་ཀྱིས་གསར་འགོད་པར“ད་ཆ་ལྷ་སའི་སྤྱི་གླིང་འཛུགས་སྐྲུན་ཇེ་ལེགས་སུ་འགྲོ་བཞིན་འདུག་ལ། སྐྱེ་ཁམས་ཁོར་ཡུག་ཀྱང་ཇེ་ལེགས་སུ་འགྲོ་བཞིན་འདུག སྤྱི་གླིང་ནང་འཆམ་འཆམ་དུ་འགྲོ་སྐབས་སེམས་པ་ལྷོད་ལྷོད་ཅིག་འདུག”ཅེས་བརྗོད།