འདི་ནི་བ་ཚང་སྒྱུར་བཀོད་བྱས་པའི་ཁྱིམ་ཚང་མགྲོན་ཁང་དུ་ཐང་ཧའེ་ཡུས(གཡོན)དང་དབྱངས་ཅན་ཅི་འཕྲོས་མོལ་འཕྲོས་ཤོད་བཞིན་པ།

འདི་ནི་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུའི་མཛེས་ལྗོངས་ཡིན་པ། 

ཆ་སྙོམས་ས་བབ་མཐོ་ཚད་སྨི་3385ཟིན་པའི་ཀླུ་ནང་དུ་ས་ཞིང་དང་ལྡུམ་ར་མཛེས་ལ། རི་ཀླུང་བརྗིད་ཆགས་པ་དང་ནགས་ཚལ་སྟུག་པ་བཅས་ཀྱི་ལྟ་ན་སྡུག་པའི་ཡུལ་ལྗོངས་ཡོད་པས་ཡུལ་སྐོར་བས་ཧ་ཅང་དགའ་པོ་བྱེད་ཅིང་། དེ་ནི་ཁྲོན་བོད་ལམ་བུའི་ཐོག་གི་བཀྲག་མདངས་འཚེར་བའི“མུ་ཏིག”ཅིག་རེད།

“དེ་སྔ་འདི་གར་རྩྭ་ར་དང་ནགས་ས་ལས་མེད་པ་དང་དུད་ཚང་10ལྷག་ཙམ་ལས་སྡོད་མཁན་མེད”ཅེས་ཀླུ་ནང་གྲོང་རྡལ་བཀྲ་ཤིས་སྒང་གྲོང་ཚོའི་གྲོང་མི་ཕུན་ཚོགས་ཀྱིས་ངོ་སྤྲོད་བྱས་པ་དང་། ཁོང་གིས་མེ་ཏོག་གི་རྡོ་ཁོག་ནང་བཙོས་པའི་ཡུལ་དེའི་དཀར་པོ་ཆིག་ཐུབ་དང་ཡུལ་བྱ་ནི་ཡུལ་སྐོར་བས་གདམ་ག་བྱེད་མང་ཤོས་ཀྱི་ལྟོ་ཆས་ཡིན་ཞེས་བརྗོད་པ་རེད།

ཡུལ་སྐོར་ཚོང་དོན་གྱི་གོ་སྐབས་མཐོང་སྐབས་ཨ་ཁུ་ཕུན་ཚོགས་ཀྱིས་སྔོན་ལ་གྲོང་ཚོའི་ནང་ཁྱིམ་ཚང་མགྲོན་ཁང་གཉེར་བས་ཚོང་ཧ་ཅང་ཡག་པོ་བྱུང་ཡོད། ཁོང་གི་སྐུལ་ཁྲིད་འོག་བཀྲ་ཤིས་སྒང་གྲོང་ཚོ་དང་དེ་བཞིན་ཉེ་འགྲམ་གྲོང་ཚོའི་ཆ་རྐྱེན་ཡོད་པའི་ཁྱིམ་ཚང་གིས་སྔ་རྗེས་སུ་རྒྱལ་ལམ་གཡས་གཡོན་དང་རང་ཁྱིམ་གྱི་སྒོ་རའི་ནང་ཁྱིམ་ཚང་མགྲོན་ཁང་གཉེར་ནས་ཡུལ་སྐོར་ལས་དོན་ནང་ཞུགས་མཁན་ཇེ་མང་དུ་ཕྱིན་ཡོད།

2011ལོར་ཀོང་ཏུང་ཞིང་ཆེན་དང་བོད་རང་སྐྱོང་ལྗོངས་ཀྱིས་འཆར་འགོད་ཞིབ་ཚགས་བྱས་ཏེ་ཁྱོན་མ་དངུལ་སྒོར་དུང་ཕྱུར་36བཏང་བའི“ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུའི”རྣམ་གྲངས་སྐྲུན་འགོ་ཚུགས་ཡོད། ལོ་6འཛུགས་སྐྲུན་བྱས་པ་བརྒྱུད་བཀོད་སྒྲིག་ལུགས་མཐུན་དང་། རང་བྱུང་སྐྱེ་ཁམས། དེང་རབས་དར་སྲོལ་བཅས་ཀྱི་རྒྱལ་ཁབ་རིམ་པའི་ཡུལ་སྐོར་སྤྲོ་གསེང་གྲོང་རྡལ་ཆུང་ངུ་ཞིག་གངས་རིའི་འདབས་ཀྱི་ནགས་ཚལ་ཁྲོད་དར་རྒྱས་བྱུང་བ་རེད།

ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུའི་ནང་སྣུམ་ནག་ལམ་པ་ཏྲའི་རིས་ལྟར་འཕྲེད་གཞུང་གང་སར་བསྲིངས་པ་དང་། གསོལ་མགྲོན་ཁང་དང་ཁྱིམ་ཚང་མགྲོན་ཁང་རྣམས་རང་བྱུང་ཁམས་དང་གཞི་གཅིག་ཏུ་འདྲེས་ཡོད། སྤྱི་ལེ་གཅིག་ཙམ་གྱི་ཚོང་ལས་ཁྲོམ་གཞུང་དུ་མི་རིགས་གྱོན་ཆས་ཚོང་ཁང་དང་། ལག་ཤེས་བཟོ་རྩལ་ཐོན་རྫས་ཚོང་ཁང་། སྒོ་རྩིས་ཚོང་ཁང་ཆུང་གྲས། “གཉིས་གཏོད”རྟེན་གཞི། རྡོ་ཁོག་བྱ་ཤ་སོགས་ཁྱད་ལྡན་ཟ་ཁང་བཙུགས་ཡོད་པ་དང་། བཀྲ་ཐང་ཀླུ་མཚོའི་ཁུལ་དུ་གསོལ་མགྲོན་ཁང་དང་ཁྱིམ་ཚང་མགྲོན་ཁང་མང་པོ་ཡོད་པ་དང་རྒྱལ་ལམ་གྱི་བྱང་ངོས་ནི་རྒྱལ་ཡོངས་ཀྱི་བོད་སྐྱོར་འགྲེམས་སྟོན་ཁང་དང་། ཡུལ་སྐོར་བའི་ཞབས་ཞུའི་ལྟེ་གནས། ཀླུ་ནང་གི་མངོན་འགྱུར་པ། སློབ་གྲྭ་སོགས་ཡིན་པ་རེད།

“མིག་སྔར་ཀླུ་ནང་གྲོང་རྡལ་དུ་ཚོང་དུད་56དང་། སྐར་མ་ལྔ་རིམ་པའི་གསོལ་མགྲོན་ཁང་3 ཁྱིམ་ཚང་མགྲོན་ཁང་100ལྷག་ཙམ་བཅས་ཡོད”ཅེས་ཀླུ་ནང་དོ་དམ་ཨུ་ལྷན་གྱི་རྒྱུན་ལས་ཀྲུའུ་རེན་གཞོན་པ་ཧུའུ་ཞུང་དབྱིང་གིས་བརྗོད། ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་གིས་ཡུལ་སྐོར་དབུལ་སྐྱོར་དེ་ཀླུ་ནང་ལ་ཁ་གཏད་རོགས་སྐྱོར་བྱེད་པའི་གཙོ་གནད་ཐབས་ལམ་ཞིག་ཏུ་བརྩིས་ནས་ལས་ཞུགས་ལས་གནས་2000ལྷག་ཙམ་བཏོད་པ་དང་། ལོ་ལྟར་རིམ་སྤེལ་གསོ་སྦྱོང་ཐེངས་10བྱས་ནས་ཞིང་འབྲོག་པ་མང་ཚོགས་མི་ཐེངས་300ལ་གསོ་སྦྱོང་བྱས་ཏེ་ཞིང་འབྲོག་པ་མང་ཚོགས་ཀྱི་ཁྱིམ་ཚང་མགྲོན་ཁང་རིམ་སྤོར་ཕྱོགས་སྒྱུར་ལ་སྐུལ་འདེད་བཏང་ཡོད། གྲོང་མི་64ཡོད་པའི་བཀྲ་ཤིས་སྒང་གྲོང་ཚོར་དུད་ཚང་52ཀྱིས་ཁྱིམ་ཚང་མགྲོན་ཁང་གཉེར་བ་དང་ཆབས་ཅིག་རྟ་བཞོན་པ་དང་། མདའ་འཕེན་པ། རིག་རྩལ་འཁྲབ་སྟོན་བྱེད་པ་སོགས་ཡུལ་སྐོར་ཐོན་ལས་ནང་ཞུགས་ཡོད་པ་རེད།

ཡུལ་སྐོར་ལས་ལ་གཞོལ་བའི་ཀླུ་ནང་བར་འཕེལ་རྒྱས་ཀྱི་གོ་སྐབས་དེ་བས་མང་བ་རག་ཡོད། ལོ་27ལ་སླེབས་པའི་བསྟན་འཛིན་ནི་བཀྲ་ཤིས་སྒང་གྲོང་ཚོའི་གྲོང་མི་ཡིན་པ་དང་ད་ཆ་ཀླུ་ནང་ཧེང་ཏ་གསོལ་མགྲོན་ཁང་ཆེ་མོའི་VIPཚོང་ཤག་གི“སྐུ་བཅར་ཕྱག་མཛོད”ཡིན་པ་རེད། ཟླ་རེར་གླ་ཆ་སྒོར་6000ལྷག་ཙམ་ཡོད་པ་དང་རླངས་འཁོར་ལ་བསྡད་ཚེ་ཁྱིམ་ལ་སྐར་མ་5ཡི་ནང་སླེབས་ཀྱི་ཡོད་པས་རང་ཁྱིམ་གྱི་ཁྱིམ་ཚང་མགྲོན་ཁང་གི་ཚོང་ལ་ལྟ་རྟོག་ཐུབ་པ་མ་ཟད། དོ་དམ་རྩལ་ནུས་ཀྱང་སྦྱོང་ཐུབ་པས་བསྟན་འཛིན་གྱིས་བློ་ཡིད་ཚིམ་པོ་བྱེད་ཀྱི་ཡོད།

“ངའི་ཁྱིམ་གྱི་ཁང་མིག་4ཡོད་པའི་མགྲོན་ཁང་ད་ཆ་སྤུས་དག་གི་ཁྱིམ་ཚང་མགྲོན་ཁང་ལ་རིམ་སྤོར་བྱས་ཟིན་ལ། ཡུལ་སྐོར་བར་ཞོགས་ཟས་མཁོ་འདོན་བྱེད་ཀྱི་ཡོད་པ་མ་ཟད། ད་དུང་རྡོ་ཁོག་བྱ་ཤ་ཡང་བཟོ་ཐུབ་པས་ནང་མི་ཚང་མའི་ལོའི་ཡོང་འབབ་ལྡབ་ཁ་ཤས་འཕར་སོང”ཞེས་བསྟན་འཛིན་གྱིས་བརྗོད།

ས་གནས་དེ་གའི་མང་ཚོགས་ཀྱིས“ཡུལ་སྐོར་ཡོང་འབབ”བསགས་ཏེ་ཕྱུག་པོ་ཆགས་ནས་འབྱོར་འབྲིང་ཕྱོགས་སུ་བསྐྱོད་པ་དང་དུས་མཚུངས་ཀླུ་ནང་འདི་ཉིད་ཀྱང་ཡུལ་གཞན་གྱི་མི་མང་པོ་ཡོང་འདོད་བྱེད་པའི་ས་ཆ་ཞིག་ཏུ་གྱུར་ཡོད།

2017ལོའི་ཟླ་9པར་ལོ་32ལ་སླེབས་པའི་ཐང་ཧའེ་ཡུས་དང་བཟའ་ཟླ་ཀླུ་ནང་དུ་ཡུལ་སྐོར་ལ་ཡོང་བ་དང་ནོར་བུ་གྲོང་ཚོར་འཆམ་འཆམ་བྱེད་སྐབས་དབྱངས་ཅན་ཁྱིམ་གྱི་བ་ཚང་རྙིང་པར་སེམས་པ་ཤོར། “ངའི་བཟའ་ཟླས་ཁང་པ་དེའི་གདོད་མའི་རྣམ་པར་ཧ་ཅང་དགའ་པོ་བྱེད་པ་དང་། དེའི་མཐའ་འཁོར་དུ་ཆུ་བོ་དང་ན་ཁ་ཡོད་པས་ཁོར་ཡུག་ཧ་ཅང་ཡག་པོ་འདུག”ཅེས་བརྗོད། ཐང་ཧའེ་ཡུས་ཀྱིས་བོགས་མར་ལེན་འདོད་ཡོད་ཚུལ་སྐོར་བརྗོད་ཀྱང་དབྱངས་ཅན་ཁྱིམ་གྱིས་བོགས་མར་བཏང་མེད།

གང་ལགས་ཤེ་ན། ཁང་པ་གོག་ཧྲུལ་ཡིན་པ་དང་། མི་བསྡད་ན་འཚམ་པོ་མེད་པས་སེམས་པ་བཟང་བའི་ཁང་བདག་གིས་གཞན་ལ་གྱོང་རག་ཏུ་འཇུག་འདོད་མེད་པས་རེད། “ང་ཚོས་མཛེས་བཟོ་དང་བརྟན་དུ་གཏོང་བའི་ཇུས་གཞི་ཞིབ་ཚགས་ངང་བཟོས་ནས་ཨ་ཅག་དབྱངས་ཅན་དང་ནང་མིར་བསམ་བློའི་སློབ་གསོ་ཟླ་ཕྱེད་ལྷག་ཙམ་བརྒྱབ་རྗེས་གཞི་ནས་བོགས་མར་ལེན་ཐུབ་ཙམ་བྱུང”ཞེས་ཐང་ཧའེ་ཡུས་ཀྱིས་བརྗོད་པ་དང་། ཁོང་གིས“ང་ཚོས་བ་ཚང་ལ་སྒྱུར་བཀོད་བྱས་པ་དང་སྟབས་བདེ་ལ་ཁྱད་ཆོས་ལྡན་པའི་ཁྱིམ་ཚང་མགྲོན་ཁང་ཞིག་ཏུ་མཛེས་བཟོ་ཡོད། 2018ལོར་སྒོ་ཕྱེ་ནས་སྐུ་མགྲོན་བསུས་པས་ད་བར་ཚོང་ཧ་ཅང་ཡག་པོ་འདུག”ཅེས་བརྗོད།

གསོན་ཤུགས་དང་ཡིད་དབང་འཕྲོག་ཤུགས་ཀྱིས་ཁེངས་པའི་ཀླུ་ནང་གིས་ཉིང་ཁྲིའི་ཕུགས་འདུན་མངོན་འགྱུར་གྱི་ཀུན་གཏོད་ཐོན་ལས་གླིང་དེ་གར་གཞིས་ཆགས་པའི་ཡིད་དབང་བཀུག་ཡོད། གླིང་ཁུལ་གྱི་འགན་འཁུར་བ་ལུའུ་ཅིན་ཧྭ་ཡིས“2014ལོར་བཅའ་སྡོད་བྱས་པ་ནས་བཟུང་དེ་ཉིད་སློབ་གྲྭ་ཆེ་མོ་བ་དང་ཞིང་འབྲོག་པའི་ལས་གཏོད་ཐོན་ཁུངས་ཀྱི་ལས་སྟེགས་ཤིག་ཏུ་གྱུར་ནས་རང་གཉེར་ཁེ་ལས་11སྐྱེད་སྲིང་བྱས་པ་དང་། ད་ཆ་ཁེ་ལས་82དེའི་ནང་ཞུགས་ཡོད”ཅེས་བརྗོད་པ་རེད།

ཧུའུ་ཞུང་དབྱིང་གིས་ཀླུ་ནང་གྲོང་རྡལ་ཆུང་ངུ་དེ་གོམ་སྟབས་རྗེས་མར“གྲོང་རྡལ་གཅིག་དང་གཞོགས་གཉིས”ལ་གཞིགས་ནས་མུ་མཐུད་བསྐྲུན་རྒྱུ་ཡིན་ཞིང་། བཀྲ་ཤིས་སྒང་གྲོང་ཚོ་སོགས་གྲོང་ཚོ་4ཡིས་ཡུལ་སྐོར་ཞབས་ཞུ་གཙོ་བོར་བྱེད་པ་དང་། ལ་ཡོད་གྲོང་ཚོ་སོགས་གྲོང་ཚོ་5ཡིས་བོད་བྱ་དང་བཞོན་མ་གསོ་ཚགས་དང་། དྲོད་ཁང་ཆེ་མོའི་འདེབས་འཛུགས་བཅས་གཙོ་བོར་བྱེད་པ་དང་ཆུ་ཚན་ལུས་གསོ་ཞོར་ལ་འཕེལ་རྒྱས་གཏོང་བ། ཇ་ལོ་དང་ཡུལ་སྐོར་མཉམ་འདྲེས་བཅས་བྱས་ནས“སྐྱེ་ཁམས་ཡུལ་སྐོར”གྲོང་རྡལ་ཆུང་ངུའི་ཞབས་ཞུའི་ནུས་པ་དང་སྤུས་ཚད་སྔར་བས་མཐོ་རུ་གཏོང་རྒྱུ་ཡིན་ཞེས་ངོ་སྤྲོད་བྱས་པ་རེད།