འདི་ནི་མངའ་རིས་ས་ཁུལ་སེང་གེ་ཁ་འབབ་ངོགས་ཀྱི་དགུང་སྔོན་དབྱིངས་སུ་དུས་བྱ་འཕུར་ལྡིང་བྱེད་བཞིན་པ།
ཉེ་བའི་ལོ་ཤས་རིང་། མངའ་རིས་ས་ཁུལ་གྱིས་སྐྱེ་ཁམས་ཁོར་ཡུག་སྲུང་སྐྱོང་བྱེད་ཤུགས་ཕྱོགས་ཡོངས་ནས་ཆེ་རུ་བཏང་སྟེ། སྲིད་གཞུང་གི་གཙོ་ཁྲིད་ནུས་པར་ཤུགས་སྣོན་རྒྱག་པ་དང་སྤྱི་ཚོགས་རྩ་འཛུགས་དང་མང་ཚོགས་སྐུལ་སློང་གིས་ཁོར་ཡུག་བཅོས་སྐྱོང་ནང་མཉམ་དུ་ཞུགས་ནས་སྐྱེ་ཁམས་ཁོར་ཡུག་སྲུང་སྐྱོང་གི་ཕུགས་ཕན་ལམ་སྲོལ་བཙུགས་པ་དང་འཐུས་སྒོ་ཚང་དུ་བཏང་བ་དང་། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་ཡོལ་གལ་ཆེན་བརྟན་དུ་བཏང་ཡོད། མིག་སྔར་མངའ་རིས་ས་ཁུལ་གྱི་སྐྱེ་ཁམས་ཁོར་ཡུག་གི་སྤུས་ཚད་ལེགས་པོ་རྒྱུན་འཁྱོངས་བྱུང་བ་དང་། སྦགས་བཙོག་དངོས་པོ་གཙོ་བོའི་གཅུན་སྡོམ་རང་བཞིན་གྱི་སྟོན་གྲངས་དང་ཐོན་ཁུངས་ཟད་གྲོན་གྱི་ཆུ་ཚད་དེ་རྒྱལ་ཁབ་དང་རང་སྐྱོང་ལྗོངས་ཀྱིས་གཏན་ལ་ཕབ་པའི་ཁྱབ་ཁོངས་སུ་ཚོད་འཛིན་ཐུབ་པ། མཁའ་རླུང་གི་སྤུས་ཚད་ལེགས་ཚད་97%ཡན་ཟིན་པ། གཙང་པོ་དང་མཚོ་མོ་གཙོ་བོའི་ཆུ་སྤུས་རིམ་པ་གསུམ་པའི་ཚད་གཞིར་སླེབས་པའམ་དེ་ལས་ལེགས་པ། གྲོང་ཁྱེར་དང་གྲོང་རྡལ་གྱི་གཅིག་སྡུད་རྣམ་པའི་འཐུང་ཆུའི་ཆུ་ཁུངས་ཀྱི་ཆུ་སྤུས་ཚང་མ་ཚད་གཞི་ལོན་པ། ས་རྒྱུའི་ཁོར་ཡུག་སྤུས་ཚད་སྤྱིར་ན་ལེགས་པོ་རྒྱུན་འཁྱོངས་ཐུབ་ཡོད།