●2020ལོའི་ལོ་མཇུག་བར་ལྗོངས་ཡོངས་ཀྱི་གཙང་པོ་དང་། ཆུ་བོ། མཚོ་བཅས་གཙོ་བོའི་ཆུའི་སྤུས་ཚད་ལོངས་པའམ་ཡང་ན་IIIརིགས་གསུམ་པའི་ཚད་གཞི་ལས་ལེགས་པ་ཡོད་པ། 

●ས་ཁུལ་རིམ་པ་དང་དེ་བཞིན་གྲོང་ཁྱེར་དང་གྲོང་རྡལ་གྱི་གཅིག་སྡུད་འཐུང་ཆུའི་ཆུ་འགོའི་ཆུའི་སྤུས་ཚད་ལོངས་ཚད་100%ཟིན་པ། 

●ལྗོངས་ཡོངས་ཀྱི་ས་རྒྱུའི་ཁོར་ཡུག་སྤུས་ཚད་སྤྱིར་ན་བརྟན་པོ་ཡོང་རྒྱུ་རྒྱུན་འཁྱོངས་ཐུབ་ཅིང་། ནགས་ཚལ་ཁེབས་ཚད་12.14%ནས་12.31%བར་མཐོ་རུ་ཕྱིན་པ།

● ས་བབ་མཐོ་ཚད་སྨི་4300མན་གྱི“སྐྱེ་ཤིང་མེད་པའི་གྲོང་ཚོ”1079དང“སྐྱེ་ཤིང་མེད་པའི་དུད་ཚང”ཁྲི་10.4ཚང་མར་སྐྱེ་ཤིང་ཡོད་པ། 

མིག་སྔར་རང་ལྗོངས་ཀྱི་སྐྱེ་ཁམས་ཁོར་ཡུག་གི་སྤུས་ཚད་རྒྱུན་འཁྱོངས་ཡག་པོ་ཐུབ་པ་དང་སྐྱེ་ཁམས་ཤེས་དཔལ་གྱི་སྒྱུར་བཅོས་བྱ་ཐབས་ལ་ཕན་འབྲས་ཐོན་ཏེ་མང་ཚོགས་མང་པོ་ཞིག་ལ་ལྗང་མདོག་ལས་བྱུང་བའི་བདེ་སྐྱིད་འཚོ་བ་ལོངས་སུ་སྤྱོད་རྒྱུ་བྱུང་བ་རེད།

ཁོར་ཡུག་མཛེས་བཟོ་ལས་འཚོ་བ་སྔར་བས་སྐྱིད།

མི་སྡོད་ཁོར་ཡུག་ལེགས་སུ་གཏོང་ཆེད། ཉེ་བའི་ལོ་ཤས་རིང་ལྷ་ས་གྲོང་ཁྱེར་གྱིས“སྔོ་འགྱུར་གྲོང་ཁྱེར”གྱི་འཛུགས་སྐྲུན་ལས་གྲྭ་དང་། འགོག་སྲུང་ནགས་ཚལ་གྱི་ལས་གྲྭ། བྱེ་འགོག་བྱེ་བཅོས་ཀྱི་ལས་གྲྭ་སོགས་ཀྱི་གཙོ་གནད་སྐྱེ་ཁམས་ལས་གྲྭ་ལག་བསྟར་བྱ་རྒྱུར་རིམ་བཞིན་སྐུལ་འདེད་བཏང་བས་ལྷ་ས་གྲོང་ཁྱེར་གྱི་ནགས་ལས་རྒྱ་ཁྱོན་དང་ནགས་ཚལ་ཁེབས་ཚད་རྒྱུན་མཐུད་ངང་ཆེ་རུ་ཕྱིན་ནས་གྲོང་མི་དང་ཡུལ་སྐོར་བ་ལྷ་སའི་རི་སྔོན་ཆུ་དྭངས་ཀྱི་མཛེས་སྡུག་ལ་སྔར་བས་རོལ་ཐུབ་པ་བྱུང་ཡོད།

སྤོ་བོ་རྫོང་རྡོ་རྗེ་ཤང་ཤིས་པ་གྲོང་ཚོར་ཤིང་སྡོང་གང་བྱུང་དུ་གཅོད་རིགས་བཀག་འགོག་དང་། ནགས་སྲུང་བ་ཉིན་ལྟར་དུས་ངེས་མེད་ངང་སྐོར་གཡེང་བྱ་རྒྱུ་བཀོད་སྒྲིག་བྱེད་པ། གད་སྙིགས་གཤོ་ས་འཆར་འགོད་བྱེད་པ། ཡུལ་མིས་གྲོང་ཚོའི་ཁོར་ཡུག་ལ་རེས་མོས་བཞིན་གཙང་སྦྲ་བྱ་རྒྱུ་སྒྲིག་འཛུགས་བྱེད་པ། དྲིལ་བསྒྲགས་སློབ་གསོར་ཤུགས་སྣོན་རྒྱག་པ་སོགས་ཀྱི་བྱེད་ཐབས་བརྒྱུད་ས་གནས་དེ་གའི་ཡུལ་མི་རྣམས་སྐྱེ་ཁམས་ཁོར་ཡུག་སྲུང་སྐྱོང་ལ་བལྟས་ནས་སྡོད་མཁན་ནས་དེའི་ནང་ཞུགས་མཁན་ཞིག་ཏུ་གྱུར་ཏེ་གད་སྙིགས་གང་བྱུང་དུ་མི་གཤོ་བ་དང་རི་སྟེང་གི་ཤིང་སྡོང་གང་བྱུང་དུ་མི་གཅོད་པ་བྱེད་ཐུབ་ནས་གྲོང་ཚོའི་བཀོད་པ་གསར་རྐྱང་དུ་གྱུར་ཡོད།

རི་སྔོ་ཆུ་དྭངས་ལས་ཐོན་ལས་སྔར་བས་དར།

“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱིས་ནགས་བཟོའི་ལས་གྲྭ་ལག་བསྟར་བྱེད་པ་དང་། གནམ་གྲུ་ནས་སོན་སྟོར་ཏེ་ནགས་བཟོའི་ཚོད་ལྟ་བྱེད་པ། “རི་སྟེང་ལ་ཆུ་འདྲེན་པའི”ཆུ་འདྲེན་ལག་རྩལ་ཚོད་ལྟའི་ངང་ཁྱབ་གདལ་གཏོང་བ་བཅས་བྱས་པ་མ་ཟད། བྱེ་འགོག་བྱེ་བཅོས་དང་། རྨོ་བསྐྱུར་ནགས་གསོ་དང་འབྲོག་བསྐྱུར་རྩྭ་གསོ། འདམ་ར་གཙོ་བོ་སྲུང་སྐྱོང་དང་སླར་གསོ། རང་བྱུང་སྲུང་སྐྱོང་ཁུལ་འཛུགས་སྐྲུན་སོགས་ཀྱི་གཙོ་གནད་སྐྱེ་ཁམས་སྲུང་སྐྱོང་ཉམས་བཟོའི་ལས་གྲྭ་ལག་བསྟར་ཤུགས་ཆེན་བྱས་པ་བརྒྱུད་ནགས་ཚལ་དང་རྩྭ་རའི་བྱ་གཞག་མགྱོགས་མྱུར་ངང་འཕེལ་རྒྱས་ཕྱིན་ཡོད།

“ཁོར་ཡུག་ཡག་ཏུ་སོང་ཚེ། གཞི་ནས་མཛེས་སྡུག་ལྡན་པའི་འཚོ་བ་གཏོད་ཐུབ”ཅེས་འདི་ལོ་ལོ་46ལ་སླེབས་པའི་སླད་མོན་པ་མི་རིགས་ཤང་སླད་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་སྟོབས་རྒྱལ་གྱིས་བཤད་པ་དང་། ཁོང་གིས“2015ལོར་སླད་གྲོང་ཚོ་རང་སྐྱོང་ལྗོངས་ཀྱིས་ཁག་དང་པོའི་ཁྱད་ལྡན་གྲོང་རྡལ་ཆུང་ངུ་གསར་པ་20ཡི་ཁོངས་སུ་བཅུག་པ་དང་། ང་ཚོས་སྒོར་ཁྲི་30རང་གྲབས་བྱས་ཏེ་ད་ལྟའི་ཐོག་སོ་བཞི་ལྡན་གྱི་སྡོད་ཁང་བསྐྲུན་པ་དེའི་རྒྱ་ཁྱོན་ལ་སྨི་ངོས་གྲུ་217ཡོད་པ་མ་ཟད། ཐོག་སོ་གསུམ་པ་དང་བཞི་པར་འགྲུལ་ཁང་བཟོས་ཡོད”ཅེས་བཤད། སྐྱེ་ཁམས་ཡུལ་སྐོར་ལ་བརྟེན་པས་སྟོབས་རྒྱལ་ལ་ལོ་ལྟར་ཡོང་འབབ་སྒོར་ཁྲི་10ཡན་ཟིན་གྱི་ཡོད།

ཐུན་མོང་མ་ཡིན་པའི་རང་བྱུང་གི་ལེགས་ཆར་བརྟེན་པས་མེ་ཏོག་རྫོང་མེ་ཏོག་གྲོང་རྡལ་ཡ་གདུང་གྲོང་ཚོའི་སྐྱེ་ཁམས་ཡུལ་སྐོར་ཡང་རིམ་བཞིན་དར་འགོ་ཚུགས་ཤིང་། ཡུལ་མི་ཆོས་སྒྲོན་གྱིས་གོ་སྐབས་དེར་བརྟེན་ནས་ཁྱིམ་ཚང་མགྲོན་ཁང་བཙུགས་པས་ད་ཆ་ཁྱིམ་གྱི་ལོའི་ཡོང་འབབ་སྔོན་མའི་སྒོར་ཁྲི་ཡང་མ་ཟིན་པ་ནས་སྒོར་ཁྲི་20ལྷག་ཙམ་བར་མང་དུ་ཕྱིན་ཡོད།

སྐྱེ་ཁམས་སྲུང་སྐྱོང་ལས་མང་ཚོགས་ཕྱུག་པོར་གྱུར།

བོད་ཀྱི་རི་སྔོན་ཆུ་དྭངས་སྲུང་སྐྱོང་ཡག་པོ་བྱ་ཆེད། རང་ལྗོངས་ཀྱི་གཙོ་གནད་སྐྱེ་ཁམས་ནུས་པའི་ཁུལ་གྱི་སྤོ་སྒྱུར་གཏོང་སྤྲོད་དང་རིགས་ཁག་གི་སྐྱེ་ཁམས་ཁ་གསབ་ལམ་སྲོལ་སྣ་ཚོགས་རྒྱུན་མཐུད་ངང་འཐུས་སྒོ་ཚང་དུ་བཏང་ནས་ནགས་ལས་སྐྱེ་ཁམས་སྲུང་སྐྱོང་དང་། རྩྭ་རའི་སྐྱེ་ཁམས་སྲུང་སྐྱོང་། ཆུའི་སྐྱེ་ཁམས་སྲུང་སྐྱོང་། གྲོང་གསེབ་ཀྱི་གཞུང་ལམ་བདག་སྐྱོང་། ཡུལ་སྐོར་གསང་སྤྱོད་ལ་གཙང་སྦྲ། གྲོང་ཚོ་རིམ་པའི་ཁོར་ཡུག་ལྟ་སྐུལ། ས་གཤིས་ཀྱི་གནོད་འཚེ་མཉམ་འགོག་མཉམ་དཔྱོད་སོགས་ཀྱི་སྐྱེ་ཁམས་ཁ་གསབ་ཀྱི་དབུལ་སྒྲོལ་ལས་གནས་བཙུགས་པས། མང་ཚོགས་སྔར་ལས་མང་བར་སྐྱེ་ཁམས་སྲུང་སྐྱོང་ལས་འབབ་འཕར་བྱུང་སྟེ་ཕྱུག་འགྱུར་གྱི་ལམ་བུར་སྐྱོད་ཐུབ་པ་བྱུང་ཡོད།

“ལོ་ལྔ་ཚན་བཅུ་གསུམ་པའི”རིང་། རང་ལྗོངས་ཀྱིས་རིམ་རྩིས་བྱས་ན་ནགས་ཚལ་དང་རྩྭ་རའི་སྣོད་བཅུད་ཁ་གསབ་ལས་གནས་ལ་མི་ཐེངས་ཁྲི་122.34བཀོད་སྒྲིག་བྱས་པར་ཞིང་འབྲོག་པའི་ཡོང་འབབ་སྒོར་དུང་ཕྱུར་40ཙམ་མང་དུ་ཕྱིན་ཡོད། དེ་དང་ཆབས་ཅིག་ཞིང་འབྲོག་པ་དབུལ་པོས་བཙུགས་པའི་ནགས་བཟོའི་ཆེད་ལས་མཉམ་ལས་ཁང་སོགས་ནགས་ཚལ་དང་རྩྭ་རའི་ལས་གྲྭའི་རྣམ་གྲངས་འཛུགས་སྐྲུན་ནང་ཞུགས་རྒྱུར་ལྕག་སྐུལ་བཏང་ཞིང་། རིམ་རྩིས་བྱས་ན་ཞིང་འབྲོག་པར་ཡོང་འབབ་སྒོར་དུང་ཕྱུར་20མང་དུ་ཕྱིན་པ་དང་། ཞིང་འབྲོག་མང་ཚོགས་ལ་ཕྱོགས་ནས་མི་ཐེངས་2500ལྷག་ལ་ནགས་བཟོ་ལྗང་གསོ་སོགས་ཀྱི་ཉེར་སྤྱོད་ལག་རྩལ་གསོ་སྦྱོང་བྱས་པ་རེད།

ཉེ་བའི་ལོ་ཤས་རིང་ཆབ་མདོ་གྲོང་ཁྱེར་སྨར་ཁམས་རྫོང་དུ་གནས་པའི་སློང་ལའི་སྤྲེའུ་ཁམ་སེར་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་རྨང་གཞིའི་སྒྲིག་བཀོད་ཟམ་མི་ཆད་པར་འཐུས་སྒོ་ཚང་དུ་དང་། སྐྱེ་ཁམས་ཁོར་ཡུག་ཟམ་མི་ཆད་པར་ལེགས་སུ་ཕྱིན་ཞིང་། ལག་རྩལ་དང་མ་རྩའི་རོགས་སྐྱོར་བྱས་པ་བརྒྱུད་ཉེ་འཁོར་གྱི་ཡུལ་མི་ནགས་སྲུང་བ་དང་རི་དྭགས་སྲུང་སྐྱོང་མཁན་བྱེད་དུ་བཅུག་སྟེ་སྐྱེ་ཁམས་ཁོར་ཡུག་སྲུང་སྐྱོང་བྱས་པ་དང་སྦྲགས་ཉེ་འཁོར་ཤང་དང་གྲོང་ཚོའི་དཔལ་འབྱོར་ལ་སྐུལ་ཁྲིད་བྱས་པས་ཞིང་འབྲོག་པའི་འཚོ་བའི་ཁ་ཐབས་ལེགས་སུ་ཕྱིན་ཡོད།