“ངས་མཐའ་མཚམས་ལོ་30སྲུང་བ་ཡིན་ལ་མུ་མཐུད་ལོ་30སྲུང་གི་ཡིན། ཡུལ་དམག་གི་བཅུ་དཔོན་ཡིན་པའི་ངས་མེས་རྒྱལ་གྱི་རྩྭ་དང་རྩི་ཤིང་སྲུང་སྐྱོང་བྱེད་ཐུབ་པ་ནི་མི་ཚེ་འདིའི་སྤོབས་པ་ཆེ་ཤོས་ཀྱི་བྱ་བ་ཞིག་རེད”ཅེས་པ་ནི་དགའ་ནོར་བུས་རྟག་ཏུ་བརྗོད་པའི་སྐད་ཆ་ཞིག་རེད།

དགའ་ནོར་བུ་ཐོག་མར་འཕྲད་སྐབས། ཁོང་གིས་བོད་ཆས་གྱོན་ཞིང་སྦག་སྦག་ཞིག་བཞོན་ཡོད་པ་དང་། ངོ་གདོང་གི་ཤ་རྩི་ཅུང་ནག་ཅིང་ངོ་ཚ་སྨིན་པ་ཞིག་འདུག

དགའ་ནོར་བུ་1970ལོར“མཐའ་མཚམས་ཀྱི་གྲོང་ཚོ་དང་པོ”ཞེས་བརྗོད་པའི་གམ་པ་རྫོང་གམ་པ་གྲོང་རྡལ་དགྱེས་རུ་གྲོང་ཚོར་སྐྱེས་པ་དང་1987ལོར་ཡུལ་དམག་བྱས། ད་ཆ་དགྱེས་རུ་གྲོང་ཚོའི་ཡུལ་དམག་གི་བཅུ་དཔོན་ཡིན་པ་རེད། དུས་རབས་གོང་མའི་ལོ་རབས་80པར་ན་གཞོན་དགའ་ནོར་བུས“ས་ཆ་སྦར་མཐིལ་ཙམ་ཡང་མི་གློད་པ་དང་ས་ཆ་སྦར་མཐིལ་ཙམ་ཡང་བརྩོན་ལེན་བྱ་རྒྱུའི”དམ་བཅའ་བཞག་ཡོད། ཛ་དྲག་པའི་མཐའ་མཚམས་ཀྱི་དུས་བབ་ལ་ཕྱོགས་སྐབས་ཁོང་གིས་ཁྱིམ་ཆུང་དོར་ནས་ཁྱིམ་ཚང་ཆེ་མོར་ལྟ་རྟོག་བྱེད་པ་དང་ཉིན་ལྟར་ས་བབ་མཐོ་ཚད་སྨི་ལྔ་སྟོང་ཡན་གྱི་མཐའ་མཚམས་སུ་སྐོར་གཡེང་བྱེད་ཀྱི་ཡོད།

དགའ་ནོར་བུས་དྲན་གསོ་བྱེད་བཞིན“ང་སྐོར་གཡེང་བྱེད་པར་བསྐྱོད་དེ་ལྷམ་མང་པོ་རལ་བ་རྫོང་གིས་ཤེས་སྐབས་ངར་དམག་མིའི་ལྷམ་ཞིག་སྤྲད་བྱུང་། ལྷམ་དེ་གྱོན་ནས་མཐའ་མཚམས་སུ་སྐོར་གཡེང་བྱེད་སྐབས་སེམས་དྲོ་སོབ་སོབ་དང་གོམ་པ་སྤོ་འདོད་པའི་སྣང་བ་ཞིག་ཡོང་གི་འདུག”ཅེས་བཤད། ཁོང་གིས་ཉིན་ཐོག་ཉིན་བརྩེགས་དང་ལོ་ཐོག་ལོ་བརྩེགས་བྱས་ཏེ་ཆར་རླུང་ལ་མི་སྐྲག་པ་དང་དཀའ་ཚེགས་དང་ཉེན་ཁར་མི་སྐྲག་པར་གཡང་གཟར་གྱི་རི་མཐོར་བསྐྱོད་པ་དང་རི་མགོ་འདི་ནས་རི་མགོ་གཞན་ཞིག་ཏུ་བསྐྱོད་དེ་མཐའ་མཚམས་ལམ་ཐིག་སྤྱི་ལེ་50ཙམ་སྲུང་སྐྱོང་བྱེད་པ་དང་ཡུལ་དམག་བྱས་ནས་ལོ་30ལྷག་ཙམ་ཕྱིན་ཡོད་ལ་སྐོར་གཡེང་བྱས་ནས་ལོ་30ལྷག་ཙམ་ཡང་ཕྱིན་ཡོད།

2019ལོའི་ཟླ་3པར་དགྱེས་རུ་གྲོང་ཚོས་གམ་པ་རྫོང་ཨུད་ཀྱི་འབོད་སྐུལ་དང་ལེན་ཧུར་ཐག་བྱས་ཏེ་སེམས་མཐུན་མཐའ་བརྟན་གྱི་ཞིང་འབྲོག་པའི་ལུག་གསོ་ཚགས་ཆེད་ལས་མཉམ་ལས་ཁང་བཙུགས་ཡོད། མཉམ་ལས་ཁང་དེ་འཛུགས་པའི་ཐོག་མར་གྲོང་མི་མང་པོས་བསམ་ཤེས་དང་རྒྱབ་སྐྱོར་བྱེད་ཀྱི་མེད། དེས་ན་དགའ་ནོར་བུས་རང་འགུལ་ངང་མཉམ་ལས་ཁང་གི་ལྟ་ཞིབ་པ་བྱ་རྒྱུའི་ཡིག་ཐོག་སྙན་ཞུ་ཕུལ་བ་དང་རང་ཁྱིམ་གྱི་ལུག་35དེ་དག་འཕྲལ་མར་མཉམ་ལས་ཁང་ནང་བཅུག གྲོང་ཚོའི་ཏང་ཀྲི་པུའུ་ལ་གཞོགས་འདེགས་ཀྱིས་གྲོང་ཚོའི་མཉམ་སྡེབ་དཔལ་འབྱོར་རྒྱ་སྟོབས་ཆེ་རུ་གཏོང་རོགས་དང་དགའ་ཉེ་སྤུན་མཆེད་ཚོ་མཉམ་ལས་ཁང་ནང་ཞུགས་རྒྱུའི་ལྕག་སྐུལ་དང་སྐུལ་སློང་བྱས་ཡོད།

དགའ་ནོར་བུའི་བུ་ཕུར་བུ་དབང་ལ་ཆུང་དུས་ནས་པཱ་ལགས་ཀྱི་ཤུགས་རྐྱེན་ཕོག་ཏེ་ད་ཆ་པཱ་ལགས་དང་འདྲ་བར་ཡུལ་དམག་ཞིག་ཏུ་གྱུར་ཡོད། དགྱེས་རུ་གྲོང་ཚོའི་ཏང་ཀྲི་པུའི་ཧྲུའུ་ཅི་ཕུར་བུ་བསོད་ནམས་ཀྱིས“ང་ཚོའི་གྲོང་ཚོར་དགའ་ནོར་བུ་གཅིག་རང་ལས་མེད། ཁོང་ནི་ང་ཚོས་སློབ་སྦྱོང་བྱེད་སའི་མིག་དཔེ་ཞིག་རེད། སླད་ཕྱིན་མི་དེ་བས་མང་བ་མཐའ་མཚམས་སྲུང་སྐྱོང་གི་ལས་དོན་ཁྲོད་ཞུགས་ངེས་རེད”ཅེས་བཤད།

དགའ་ནོར་བུའི་སྣེ་ཁྲིད་འོག་དགྱེས་རུ་གྲོང་ཚོའི་ཡུལ་དམག་གི་དཔུང་ཁག་མི་36བར་རྒྱ་སྟོབས་ཆེ་རུ་ཕྱིན་ནས་མཐའ་མཚམས་ལམ་ཐིག་ཐོག་གི་དམག་དམངས་མཉམ་སྐྲུན་དང་དམག་བཀུར་དམངས་གཅེས་ཀྱི་འབྲེལ་ཟམ་གལ་ཆེན་ཞིག་ཏུ་གྱུར་ཡོད།