ཁྲུང་ཁྲུང་ཁྱུ་ཚོགས།

སྐོར་སྲུང་བ་སྟོབས་རྒྱལ་གྱིས་ལྷུན་གྲུབ་རྫོང་ཁོངས་སུ་འཚོ་སྡོད་བྱེད་པའི་དུས་བྱར་ཟས་སྟེར་བཞིན་པ།

དགུན་ཁ་ཤར་རྗེས་གནམ་གཤིས་རིམ་བཞིན་གྲང་དུ་སོང་བ་དང་བསྟུན། དུས་བྱ་འབོར་ཆེན་གཅིག་རྗེས་གཉིས་མཐུད་ངང་ལྷུན་གྲུབ་རྫོང་དུ་དགུན་སྒྲོལ་ལ་སླེབས་པ་དང་། དུས་བྱ་མང་པོ་མཉམ་དུ་འཕུར་བའི་བརྗིད་ཉམས་དེ་ལྷུན་གྲུབ་རྫོང་གི་གྲོང་གསེབ་ཀྱི་ལྟ་ན་སྡུག་པའི་མཛེས་ལྗོངས་ཤིག་ཏུ་གྱུར་ཡོད་ལ། དེའི་དབང་གིས་ལྷུན་གྲུབ་རྫོང་ཡང་མིང་དོན་མཚུངས་པའི“དུས་བྱའི་འཇིག་རྟེན”ཞིག་ལ་གྱུར་ཡོད།

ཉེ་བའི་ལོ་ཤས་རིང་། ལྷུན་གྲུབ་རྫོང་གིས་རང་བྱུང་སྲུང་སྐྱོང་ཁུལ་གྱི་དོ་དམ་དང་རི་སྐྱེས་སྲོག་ཆགས་སྲུང་སྐྱོང་ལས་དོན་ནན་ཏན་ངང་སྤེལ་ཞིང་། ལོ་མང་རིང་འབད་བརྩོན་བྱས་པ་བརྒྱུད། ཁྲུང་ཁྲུང་སྐེ་ནག་དང་། ཁྲུང་ཁྲུང་མགོ་ཁྲ། ངང་སེར། ཤྭ་བ་མཆུ་དཀར་སོགས་རི་སྐྱེས་སྲོག་ཆགས་རྣམས་ད་ཆ་སྔོ་ལྗང་གི་ས་གཞི་གཤིན་པོ་དེར་རང་དགར་འཚོ་སྡོད་བྱས་ནས། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་མི་སེམས་འགུལ་བའི་སྙན་ངག་ཅིག་བརྩམས་ཡོད།

ཁྲུང་ཁྲུང་སྐེ་ནག་ནི་རྒྱལ་ཁབ་ཀྱི་རིམ་པ་དང་པོའི་རི་སྐྱེས་སྲུང་སྐྱོང་སྲོག་ཆགས་རེད་ལ། འཛམ་གླིང་གི་ཁྲུང་ཁྲུང་རིགས་ཁྱུ་15ཡི་ཁྲོད་ས་མཐོར་འཚོ་གནས་བྱེད་པའི་ཁྲུང་ཁྲུང་རིགས་ཁྱུ་འབའ་ཞིག་དེའང་རེད། ཁྲུང་ཁྲུང་སྐེ་ནག་སྲུང་སྐྱོང་གི་ལས་དོན་སྔར་བས་ཡག་པོ་སྒྲུབ་ཆེད། ལྷུན་གྲུབ་རྫོང་ནགས་ལས་ཅུས་ཀྱིས་ཡར་ཀླུང་གཙང་པོའི་དབུས་རྒྱུད་ལུང་གཞུང་གི་ཁྲུང་ཁྲུང་སྐེ་ནག་རྒྱལ་ཁབ་རིམ་པའི་སྲུང་སྐྱོང་ཁུལ(ལྷུན་གྲུབ་དུམ་བུ)དུ་ཆེད་མངགས་ལྟོ་ཆས་སྟེར་ས་བཙུགས་ཏེ་མིས་ཁྲུང་ཁྲུང་ལ་ལྟོ་ཆས་སྟེར་བའི་ཐབས་ལམ་སྤྱད་དེ་ཁྲུང་ཁྲུང་སྐེ་ནག་དགུན་སྒྲོལ་བྱེད་རིང་གི་ལྟོ་ཆས་འདང་ངེས་ཡོང་བའི་འགན་ལེན་བྱས་ཡོད། མིག་སྔར། ལྷུན་གྲུབ་རྫོང་གིས་ཁྱོན་བསྡོམས་ལྟོ་ཆས་སྟེར་ས་10བཙུགས་པ་དང་། ཟླ་བ་སྒྲོལ་དཀར་དང་། སྟོབས་རྒྱལ། སྐལ་བཟང་སྒྲོལ་མ། དོན་གྲུབ་ཚེ་རིང་། བློ་བཟང་ཚེ་བརྟན། བསྟན་འཛིན། དངོས་གྲུབ་ཉི་མ། ངག་དབང་། གནམ་གང་ཚེ་རིང་བཅས་ལྟོ་ཆས་སྟེར་སའི་སྐོར་སྲུང་བར་གདན་དྲངས་ཡོད།

སྐོར་སྲུང་བས་ངོ་སྤྲོད་བྱས་པར་གཞིགས་ན། སྲུང་སྐྱོང་ཁུལ་གྱི་ལས་དོན་ནི་ཁྲུང་ཁྲུང་སྐེ་ནག་གི་གྲངས་འབོར་དང་། ཟས་འཚོལ་བའི་གནས་ཚུལ། གནས་སྤོའི་དུས་ཚོད་བཅས་ལ་ལྟ་ཞིབ་ཚད་ལེན་དང་ཐོ་འགོད་བྱ་རྒྱུ་སོགས་ཡིན་པ་དང་། ཁྲུང་ཁྲུང་སྐེ་ནག་གི་འཚོ་བའི་གོམས་གཤིས་ཕྱོགས་ཡོངས་ནས་ཤེས་རྟོགས་བྱས་པ་བརྒྱུད། གོམ་སྟབས་རྗེས་མར་ལྟོ་ཆས་སྟེར་བ་དང་སྲུང་སྐྱོང་བྱེད་པའི་ལས་དོན་ཚན་རིག་དང་མཐུན་ཞིང་ལུགས་དང་མཐུན་པའི་སྒོ་ནས་སྤེལ་བར་རྨང་གཞི་བརྟན་པོ་བཏིང་ཡོད།

“ཁྱེད་རང་གཟིགས་དང་། ཁྲུང་ཁྲུང་སྐེ་ནག་དེ་ལོ་བཅུ་གྲངས་འགའ་ཤས་ཀྱི་སྔོན་ལ་ངས་ཞིང་ནང་ནས་བསྐྱབས་པ་ཡིན། སྐབས་དེར་ཁྲུང་ཁྲུང་དེའི་གཤོག་པ་དང་རྐང་པ་གཡས་པར་རྨས་སྐྱོན་ཕོག་ནས་དབུགས་ཆད་ལ་ཉེ་བས་ང་རང་སེམས་ཁྲལ་ཆེན་པོ་བྱུང་། ངས་གཉན་ཁ་འཇོམས་བྱེད་ཀྱི་སྨན་མར་དང་བསྲེས་ནས་རྨ་ཁར་བྱུགས་པ་བྱས་པ་མ་ཟད། གཉན་ཁ་འཇོམས་བྱེད་ཀྱི་སྨན་ཡང་སྟེར་བ་ཡིན། ད་དུང་ཉིན་མོ་སྒོ་རའི་ནང་གློད་ནས་རྨས་སྐྱོན་ཕོག་པའི་རྐང་པར་སྦྱོང་བརྡར་བྱེད་དུ་བཅུག་པ་ཡིན། ལྟ་སྐྱོང་ཞིབ་ཚགས་བྱས་པ་བརྒྱུད་ཁྲུང་ཁྲུང་དེ་དྲག་སྐྱེད་མགྱོགས་པོ་བྱུང་སོང་། དྲག་སྐྱེད་བྱུང་རྗེས་ངས་དེ་རང་བྱུང་ཁམས་སུ་གློད་པ་ཡིན”ཞེས་ལོ་48ལ་སླེབས་པའི་སྐོར་སྲུང་བ་སྟོབས་རྒྱལ་གྱིས་དགའ་ཚོར་ཆེན་པོས་བརྗོད།

ལྷུན་གྲུབ་རྫོང་གི་སྐོར་སྲུང་བ་དོན་གྲུབ་ཚེ་རིང་དང་སྐལ་བཟང་སྒྲོལ་མས་རྨས་སྐྱོན་ཕོག་པའི་ཁྲུང་ཁྲུང་སྐེ་ནག་ལ་སྐྱོབ་བཅོས་བྱེད་བཞིན་པ།

ལྷུན་གྲུབ་རྫོང་གི་མང་ཚོགས་ཀྱིས“བཀྲ་ཤིས་དུས་བྱ”ཞེས་འབོད་པའི་མགོ་དམར་པོ་དང་སྐེ་ནག་པོའི་ཁྲུང་ཁྲུང་ཡིན་པ།

དུས་བྱ་དང་མཉམ་དུ་དགུན་སྒྲོལ་དང་ལོ་གསར་གཏོང་བ་ནི་ལྷུན་གྲུབ་རྫོང་གི་སྐོར་སྲུང་བ་དགའ་ཚོར་ཆེ་ཤོས་དང་བདེ་སྐྱིད་ཆེ་ཤོས་ཀྱི་བྱ་བ་ཞིག་རེད། ཁྲུང་ཁྲུང་སྐེ་ནག་དང་ཁ་བྲལ་སྐབས་ཁོ་ཚོས་སེམས་ཁྲལ་ཆེན་པོ་བྱེད་ཀྱི་ཡོད། “ཁྲུང་ཁྲུང་སྐེ་ནག་སྲུང་སྐྱོང་བྱ་རྒྱུ་ནི་ཞིབ་ཚགས་པའི་ལས་ཀ་ཞིག་ཡིན་པས། མི་ཚང་མས་སྐོར་སྲུང་བའི་ལས་འགན་དེ་འཁུར་ཐུབ་ཀྱི་མེད། གང་ལགས་ཤེ་ན། དེའི་སྔོན་འགྲོ་ནི་སྲོག་ཆགས་ལ་དགའ་པོ་ཡོད་དགོས་པ་མ་ཟད། དུས་བྱའི་འཚོ་བའི་གོམས་གཤིས་ལ་རྒྱུས་མངའ་ངེས་ཅན་དགོས་པས་ཡིན། རྨས་སྐྱོན་ཕོག་པའི་ཁྲུང་ཁྲུང་སྐེ་ནག་ཅིག་ལ་ཆ་མཚོན་ན། དེ་བདེ་བླག་ངང་ཟས་ཟ་བ་དང་ཆུ་འཐུང་ཐུབ་པར་བྱེད་དགོས་པ་མ་ཟད། ངེས་པར་དུ་ཐབས་རྩལ་ངེས་ཅན་ཞིག་ཁོང་དུ་ཆུད་པའང་བྱེད་དགོས་ཏེ། ཆུ་ནང་དུ་རྡོ་དཀར་པོ་འགའ་ཞིག་བླུགས་པ་དང་། གྲོའི་ནང་དུ་ཞིང་ནང་གི་བྱེ་མ་ཅུང་ཟད་བླུགས་ནས་ཟས་ཟ་བའི་ཁོར་ཡུག་དེ་ཕྱི་རོལ་ཡུལ་དང་འདྲ་བ་ཞིག་ཏུ་བཀོད་སྒྲིག་བྱེད་དགོས། དེ་ལྟར་བྱས་ན་རྨས་སྐྱོན་ཕོག་པའི་ཁྲུང་ཁྲུང་སྐེ་ནག་གཞི་ནས་ཆུ་འཐུང་འདོད་པ་དང་ཟས་ཟ་འདོད་པ་ཞིག་ཡོང་ཐུབ”ཅེས་སྐོར་སྲུང་བ་བསྟན་འཛིན་དང་ལོ་43ལ་སླེབས་པའི་སྐོར་སྲུང་བ་སྐལ་བཟང་སྒྲོལ་མས་གསར་འགོད་པར་ཁྲུང་ཁྲུང་སྐེ་ནག་ལ་ལྟ་སྐྱོང་བྱེད་པའི་ཉམས་མྱོང་བརྗོད།

ཉེ་བའི་ལོ་ཤས་རིང་། ལྷུན་གྲུབ་རྫོང་དུ་དགུན་སྒྲོལ་ལ་སླེབས་པའི་ཁྲུང་ཁྲུང་སྐེ་ནག་ལོ་རེ་ལས་མ་འདས་པར་མང་དུ་ཕྱིན་ཏེ། དང་ཐོག་མའི་བརྒྱ་གྲངས་ཁ་ཤས་ནས་ད་ཆའི་2000ལྷག་ཙམ་བར་མང་དུ་ཕྱིན་ཡོད། ཁྲུང་ཁྲུང་དེ་དག་གཙོ་བོ་མཁར་རྩེ་ཆུ་མཛོད་དང་སྟག་མགོ་རི་ཆུ་མཛོད་ཁུལ་དུ་འཚོ་གནས་བྱེད་ཅིང་། དེ་ནི་ཡར་ཀླུང་གཙང་པོའི་དབུས་རྒྱུད་ལུང་གཞུང་གི་ཁྲུང་ཁྲུང་སྐེ་ནག་ཁྱབ་ཆེ་ཤོས་ཀྱི་སྲུང་སྐྱོང་ཁུལ་ཞིག་རེད། ཁྲུང་ཁྲུང་སྐེ་ནག་གི་ཟས་འཚོལ་ཡུལ་གཙོ་བོ་མཁར་རྩེ་ཆུས་དང་། བྱང་ཁ་ཤང་། མཚོ་སྟོད་ཤང་། དཔལ་གླིང་ཤང་བཅས་སུ་ཡིན་པ་དང་། ཁྲུང་ཁྲུང་སྐེ་ནག་ཁྱུ་ཚོགས་ཆེ་ཤོས་ལ་ཁྲུང་ཁྲུང་400ནས་500ཡས་མས་ཡོད། ཁྲུང་ཁྲུང་སྐེ་ནག་མང་དུ་སོང་བ་ལས་ལྷུན་གྲུབ་རྫོང་གི་སྣོད་བཅུད་ལ་བྱུང་བའི་འགྱུར་ལྡོག་ཕྲན་བུའང་གསལ་པོ་མཐོང་ཐུབ།

ཤེས་རྟོགས་བྱུང་བར་གཞིགས་ན། 2003ལོར་རྒྱལ་ཁབ་ནགས་ལས་ཅུས་ཀྱི་ཆོག་མཆན་ཐོབ་པ་བརྒྱུད། ཡར་ཀླུང་གཙང་པོའི་དབུས་རྒྱུད་ལུང་གཞུང་གི་ཁྲུང་ཁྲུང་སྐེ་ནག་རང་བྱུང་སྲུང་སྐྱོང་ཁུལ་དེ་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་རིམ་སྤོར་བྱས་ཤིང་། ཁྲུང་ཁྲུང་སྐེ་ནག་ལ་སྔར་བས་སྲུང་སྐྱོང་བྱ་ཆེད། ལྷུན་གྲུབ་རྫོང་གིས་ཁྲུང་ཁྲུང་གི་ཟས་རིན་ཁོ་ནར་ཉིན་རེར་མ་མཐར་ཡང་སྒོར་ཁྲི་3གཏོང་གི་ཡོད་ཅིང་། ནས་དང་གྲོ་རྒྱ་མ་ཁྲི་1.5ཙམ་གྲ་སྒྲིག་བྱས་ནས་དགུན་སྒྲོལ་དུས་བྱའི་བཟའ་བཅའ་འདང་ངེས་ཡོང་བའི་འགན་ལེན་བྱེད་ཀྱི་ཡོད།

དེ་དང་ཆབས་ཅིག་རི་སྐྱེས་སྲོག་ཆགས་སྲུང་སྐྱོང་གི་ལས་དོན་སྔར་བས་ཡག་པོ་སྒྲུབ་ཆེད། ལྷུན་གྲུབ་རྫོང་ནཌ་ལས་ཅུས་དང་རྩྭ་ཐང་ཅུས་ཀྱིས་གྲོང་ཚོ(གྲོང་ལྷན)ཁག་དང་གྲོང་སྲོལ་དམངས་ཆིངས་བཟོས་པ་མ་ཟད། ད་དུང་ཁྲུང་ཁྲུང་སྐེ་ནག་རང་བྱུང་སྲུང་སྐྱོང་ཁུལ་གྱི་སྐོར་སྲུང་བ་9ཆེད་མངགས་གདན་དྲངས་ཏེ་སྲུང་སྐྱོང་ཁུལ་དོ་དམ་ས་ཚིགས་དང་མཁར་རྩེ་ཤང་ཁྲུང་ཁྲུང་སྐེ་ནག་ལྟ་ཞིབ་ས་ཚིགས་སུ་ལྟ་ཞིབ་སྐོར་སྲུང་བྱེད་ཀྱི་ཡོད། ལྷུན་གྲུབ་རྫོང་གི་ནགས་སྲུང་བ་950ཡིས་ཀྱང་རི་སྐྱེས་སྲོག་ཆགས་སྐོར་སྲུང་ལས་དོན་ནང་ཧུར་ཐག་ཞུགས་ཏེ། རི་སྐྱེས་སྲོག་ཆགས་ལ་རྨས་སྐྱོན་ཕོག་པ་སོགས་གནས་ཚུལ་ཐེར་འདོན་བྱེད་མཁན་ཡོད་པའམ་ཡང་ན་ཤེས་རྟོགས་བྱུང་ཚེ་ནགས་ལས་དང་རྩྭ་ཐང་ཅུས་ཀྱིས་འཕྲལ་མར་ཆེད་ལས་ལག་རྩལ་མི་སྣ་རོགས་སྐྱོབ་ལ་མངགས་ཀྱི་ཡོད། 

ལྷུན་གྲུབ་རྫོང་ཁོངས་སུ་དགུན་སྒྲོལ་བྱེད་པའི་ཁྲུང་ཁྲུང་མགོ་ཁྲས་དུས་བྱའི་ཁྱུ་ཚོགས་སྒུག་བཞིན་པ།

ཅི་དགར་རོལ་བའི་ཁྲུང་ཁྲུང་སྐེ་ནག

ཁྲུང་ཁྲུང་སྐེ་ནག་གཉིས་ལྷུན་གྲུབ་རྫོང་དུ་དགུན་སྒྲོལ་བྱེད་བཞིན་པ།